Dinamani - ஆயுள் காக்கும் ஆயுர்வேதம் - http://www.dinamani.com/health/health-serials/ayurvadham/ http://www.dinamani.com/ RSS Feed from Dinamani en-us Copyright 2016 Dinamani. All rights reserved. 2756892 தொடர்கள் ஆயுள் காக்கும் ஆயுர்வேதம் புத்தகச் சுமையால் ஏற்படும் வலி நீங்க...! டாக்டர் எஸ். சுவாமிநாதன் DIN Thursday, August 17, 2017 10:32 AM +0530 வார் வைத்த பையினுள் நிறைய புத்தகங்களை வைத்து தோள் பட்டையில் மாட்டி முதுகில் சுமந்து +1 படிக்கும் என் மகன் எடுத்துச் செல்வதால், தோள் பட்டைவலி, முதுகுத்தண்டுவட வலி ஆகியவற்றால் அவதியுறுகிறான். இந்த வலி குணமாகவும் எலும்புகள் வலுவாக இருக்கவும் வழி என்ன?

-முத்துலட்சுமி, கரூர்.

 உடலில் எந்த ஒரு பகுதியையும், அதிக அளவில் துன்புறுத்தக் கூடாது என்று ஆயுர்வேதம் வலியுறுத்துகிறது. நிர்பந்தம் காரணமாக இது போன்று செய்ய நேரிடும் போது அந்த உடல்பகுதியானது பலமிழந்து தன் செயல்திறனை இழக்க நேரிடுகிறது. இதற்கு மாற்றாக காலை, மதியம் என பாடப்பிரிவுகள் பள்ளியில் ஒரு அட்டவணையாக தயாரித்துத் தருவதால், காலையிலுள்ள பாடப்புத்தகங்களை ஒரு பையிலும், மதிய பாடப்புத்தகங்களை வேறு ஒரு பையிலுமாகப் பிரித்து, ஒன்றைத் தோள்பட்டையிலும் மற்றதைக் கையிலும் பிடித்து எடுத்துச் சென்றால், புத்தக சுமையானது முதுகுப் பகுதியில் குறைய வாய்ப்பிருக்கிறது. மதிய உணவிற்கான டிபன் பாக்ûஸயும் பையினுள் வைக்க இடமிருக்கும். வரும் காலங்களில், இதன் வடிவமாக புத்தக விஷயங்களை பதிவிறக்கம் செய்து, ஒரு கணிணி மாத்திரம் பிள்ளைகள் எடுத்துச் சென்று பள்ளியில் படிக்க நேர்ந்தால், சுமை என்ற பேச்சிற்கே இடம் இருக்காது. வெளிநாடுகளில் இது போன்ற படிப்பினை சிறு வயதிலேயே பள்ளிகளில் சொல்லித் தருவதாக கேள்விப்படுகிறோம். 
 பள்ளிக்குச் செல்லும் மாணவர்கள் உடல் ஆரோக்யம் மற்றும் மன ஆரோக்யத்துடன் வாழ, ஆயுர்வேதத்தின்  காலை முதல் இரவு வரை குறிப்பிடப்பட்டுள்ள வாழ்க்கை முறைகளைப் பின்பற்ற வேண்டிய அவசியமிருக்கிறது. அதற்கு தினசர்யா என்று பெயர். தினசர்யா என்றால் அன்றாடம் செய்ய வேண்டிய ஆரோக்ய குறிப்புகளும் மகனுடைய பிரச்னைக்குத் தேவையில்லை என்பதால், தேவையான சில பகுதிகளை மட்டும் நாம் இங்கு கவனிக்கலாம்.

 தலை மற்றும் உடல் எலும்புகளை வலுவூட்டவும், உட்புற அழுக்குகளை நெகிழவைத்து வெளியேற்றவும் , எண்ணெய் குளியல் பெரும் பங்கு வகிக்கிறது. நல்லெண்ணெய்யில் சிறிது ஓமம், சித்தரத்தை, மிளகு, சீரகம் சேர்த்து இரும்புக் கடாயில் பொரித்து, எண்ணெய்யை மட்டும் தலை, உடல் ஆகிய பகுதிகளில் வெது வெதுப்பாகத் தேய்த்து, அரை மணி ஊறி, வெந்நீரில் குளித்து, காலை உணவாக, சூடான புழுங்கலரிசி சாதத்துடன் மிளகு, சீரகம், பூண்டு போட்டுத் தயாரித்த, ரசத்தைப் பிசைந்து கறிவேப்பிலைத் துவையல், சுட்ட அப்பளம், புடலங்காய் கூட்டு, மோர் சாதம் என்று வகையில் சாப்பிட, மிகவும் நல்லது. இது எப்படி சாத்தியம்? அவன் காலையில் 7 மணிக்கே கிளம்ப வேண்டுமே என்று நீங்கள் கேட்பதுபுரிகிறது. எண்ணெய்க்குளியலை வாரமிருமுறையாவது செய்ய வேண்டும் என்று அதன் நன்மைகளையும் அவன் புரிந்து கொள்ளும்படி எடுத்துக் கூறவும். ஆனால் ஞாயிற்றுக் கிழமை எண்ணெய் குளியலுக்கு உகந்ததல்ல.

 உணவினுடைய சத்து முழுவதுமாக உடலில் சேர்ந்தால் தான் எலும்பும் தசை வலுவும் மாணவர்,  மாணவிகளுக்குக் கூடும் என்பதால், பசித்தீயுனுடைய செயல்திறனை குன்றச் செய்யும் சாலையோர பணியாரம், பேல்பூரி, பானிபூரி, சமோஸô போன்ற பொருட்களைச் சாப்பிடக் கூடாது. பசியுடன் மாலை நேரத்தில் வீட்டிற்கு வரும் பிள்ளைகள் சாப்பிடக் கேட்டால், கேட்டால் என்ன?  நிச்சயம் கேட்பார்கள், அவர்களுடைய வாய் ருசிக்கும்படி இனிப்பு பலகாரம், தட்டை, முறுக்கு, தேன்குழல், ரிப்பன் பக்கோடா என்ற வகையில் ஏதேனும் சிலவற்றை வீட்டிலேயே தயாரித்து வைத்திருந்தால், அவற்றை ஆசையுடன் சாப்பிடுவார்கள். ஆனால் இவற்றைச் சாப்பிட்டவுடன் பால் சாப்பிடக் கூடாது. உப்புடன் பிசையப்பட்ட பொருட்களைச் சாப்பிட்டு, மேலே பால் சாப்பிடுவது, சாலையோர பணியாரத்தை விடமோசமானது. சுமார் 1 மணி நேரம் கழித்துப் பால் சாப்பிடலாம். குடித்த பால் செரித்து பசிவந்த பிறகே இரவு உணவைச் சாப்பிட வேண்டும். 

மாதம் ஒரு முறையோ இருமாதங்களுக்கு ஒரு முறையோ உடல் வலுவிற்கு எற்றாற் போல், குடலைச் சுத்தம் செய்து கொள்ள வேண்டும். உடற்சூடு அதிகமிருந்தால், த்ரிவிருத் லேஹ்யம் எனும் ஆயுர்வேத மருந்தை ஆண்பிள்ளைகள் சுமார் 20 கிராம் 4 ஸ்பூன் காலையில் குடித்த கஞ்சி செரித்து, பசி எடுத்தவுடன் நக்கிச் சாப்பிட, நீர்ப் பேதியாகும். உட்புற அழுக்குகள் நீங்குவதால், குடலில் செரிமானம் செய்யும் நீர்த்திரவங்கள் நன்கு சுரந்து, உணவை செரிக்கச் செய்து உடல் வலுவைக் கூட்டும். பெண்பிள்ளைகள் 15 கிராம் 3 ஸ்பூன் லேகியம் சாப்பிட்டால் போதுமானது. சூடு அல்லாத குளிர்ச்சியான தேகவாகு உள்ள பிள்ளைகள், பிஞ்சுக் கடுக்காய், சுக்கு, சூரத்தாவரை விதை, ரோஜாமொக்கு ஆகியவற்றை வகைக்கு 5 கிராம் எடுத்து, 300 மிலி சூடான தண்ணீரில் ஊற வைத்து, மறுநாள் காலையில் கசக்கிப் பிழிந்து, லேசாக சூடாக்கி, வெறும் வயிற்றில் குடிக்கலாம்.

 சியவனப்பிராசம் லேகியம், தசமூலாரிஷ்டம், அஷ்ட சூரணம், அஸ்வகந்தாதி லேகியம் போன்றவை பள்ளி மாணவ, மாணவிகள் சாப்பிட வேண்டிய நல்ல ஆயுர்வேத மருந்துகளாகும். 

(தொடரும்) 

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2012/11/1/10/w600X390/bag_STUDENTS.jpg http://www.dinamani.com/health/health-serials/ayurvadham/2017/aug/17/புத்தகச்-சுமையால்-ஏற்படும்-வலி-நீங்க-2756892.html
2752956 தொடர்கள் ஆயுள் காக்கும் ஆயுர்வேதம் களைப்பு நீங்க நல்ல உணவு.. மன நிம்மதி! டாக்டர் எஸ். சுவாமிநாதன் DIN Thursday, August 10, 2017 05:45 PM +0530 என் வயது 52. நான் நன்றாகத்தான் சாப்பிடுகிறேன். ஆனாலும் எனக்கு எப்பவும் களைப்பாகவே இருக்கிறது.  வேலை ஒவ்வொன்றும் செய்வதற்கே மலைப்பாக இருக்கிறது. இந்த களைப்பு எதனால் ஏற்படுகிறது? எப்படி குணப்படுத்தலாம்?  
-விசாலாட்சி, தஞ்சாவூர். 

களைப்பு என்பது ஒரு காரியத்தில் மனது ஈடுபடாமலிருப்பதும், அப்படி மனது அக்காரியத்தைச் செய்ய நினைத்தாலும், உடல் அதற்கு சம்மதிக்காமலிருப்பதாகும். ஆக, மனது நினைப்பதை உடல் பல காரணங்களால்  செய்ய மறுப்பதும், வேலைகள் செய்ய வேண்டியிருந்தாலும் மனம் ஈடுபட மறுப்பதும் களைப்பு என்று சொல்லாம்.

களைப்பு மூன்று வித காரணங்களால் உண்டாகலாம். அதாவது 1) நோயினால் 2) உணவினுடைய அளவு குறைவதாலும், அதன் சத்து உடலில் சேராதிருப்பதால் 3) மனப்போராட்டத்தால்.

உடலில் ரத்தக் குறைவு ஏற்படுத்தக் கூடிய சோகை உபாதை, சிறுநீரில் சர்க்கரை வெளியேறுவது, காசநோய் இவற்றில் உடல் சக்தி குறைந்து களைப்பு ஏற்படுவது உண்டு. அந்தந்த நோய்களைக் குணப்படுத்துவதால் களைப்பு நீங்கும். நாம் உண்ணும் சாதம், காய்கறி, மாமிசம், கோதுமை என்று எதுவாக இருந்தாலும் அவை  ஜீரண உறுப்புகள் என்ற ரசாயன சாலையில் உடலுக்கு வேண்டிய சத்துப் பொருட்களாகப் பிரிக்கப்பட்டு, கல்லீரலில் ரசாயன மாற்றங்களையடைந்து அந்தந்த அவயவங்களுக்குத் தகுந்த மாதிரி மாற்றப்பட்டு ரத்தத்தின் மூலமாகச் செலுத்தப்படுகிறது.

உணவினுடைய பரிமாண மாற்றத்திற்கு தேகமே ஒரு ரசாயன சாலையாக வேலை செய்கிறது. உணவு ஜாடராக்கினியால் பக்குவம் செய்யப்பட்ட பிறகு, ஜாடராக்கினி (பசித்தீ)யிலிருந்து பலம்பெற்ற தாத்வாக்கினிகளும், உணவுப் பொருட்களில் அடங்கியுள்ள பஞ்ச பூதாக்கினிகளும் சேர்ந்து தான் உடலை நிலைநிறுத்தவும் வளர்க்கவும் செய்கின்றன. ஆக பதின்மூன்று அக்னிகள் நெருப்பு நமது உடலில் வேலை செய்கின்றன. 1 ஜாடராக்னி, 7 தாத்வக்னி, 5 பூதாக்னி. இவற்றில் ஏதாவதொன்று வேலை செய்ய முடியாவிட்டால் தேகத்திற்கு வேண்டிய தாதுப்பொருள்களோ ஜீவசத்துப் பொருள்களோ குறைவடைகின்றன அதனால் களைப்பு ஏற்படுகின்றது.

நமது மூளை உடலின் எடையில் 2 சதவிகிதம் தானிருக்கின்றது. ஆனால் அதற்கு 14 சதவிகிதம் ரத்தம் தேவைப்படுகிறது. 23 சதவிகிதம் பிராண வாயுவை உபயோகப்படுத்துகிறது. மற்ற அவயவங்களை விட சர்க்கரைச் சத்தையும் அதிகமாக உபயோகிக்கிறது. ஆக மூளைக்குப் போதுமான ரத்தமோ, பிராண வாயுவோ, சர்க்கரைச் சத்தோ இல்லாவிட்டால், மூளையிலுள்ள நரம்புகளினால் இயக்கப்படுகிற  பல சுரப்பி கிரந்திகளும் வேலை செய்யாமற் போவதால், அப்போதும் களைப்பு ஏற்படுகிறது.

பயம், சோகம் போன்ற மனப் போராட்டத்தினால், உடலிலுள்ள கிரந்திகள் அதிகமாக இயங்கி சாரமற்றதாகவோ அல்லது இயங்காமலேயே போவதால், சத்துகள் ரத்தத்தில் குறைந்து களைப்பு ஏற்படுத்தும். உடல் உழைப்பினால் ஏற்படும் களைப்பும் மனப் போராட்டத்தினால் ஏற்படும் களைப்பும் ஒன்றல்ல. நல்ல உணவின் மூலமாக முதல் களைப்பை நீக்க முடியும். மற்றதை பயம், சோகம் போன்றவை நீங்கும் அளவிற்கு மனநலம்தரும் அன்பும், இனிமையான பேச்சும், மருந்து ஆகியவை மட்டுமே உதவும். 

ஏழு தாதுக்களாகிய ரஸம் - ரத்தம் - மாமிசம் - மேதஸ் - எலும்பு - மஜ்ஜை - விந்து ஆகியவற்றின் சாரம் பொருளான "ஓஜஸ்' இதயத்தை இருப்பிடமாகக் கொண்டு உடலெங்கும் பரவி நாம் ஜீவனுடன் வாழ உதவுகிறது. பசி, கோபம், அதிக சிந்தனை, துயரம், சாகசமான காரியங்கள் இவைகளால் இந்த ஓஜஸ் எனும் சத்து குறைகிறது. அதனால் வேலைகளில் உற்சாகம் உண்டாகாது, எப்போதும் களைப்பு ஏற்படும். அதனால் களைப்பு ஏற்படாமலிருக்க நல்ல உணவும் மன நிம்மதியும் இருக்க வேண்டும்.

களைப்பைப் போக்கும் சியவனப்பிராசம் எனும் லேஹ்யம், உணவின் சத்து உடலில் முழுமையாகச் சேர்க்கும் ஹிங்குவசாதி சூரணம், தசமூலாரிஷ்டம், மனப்போராட்டத்தைக் குறைக்க உதவும் கல்யாணகிருதம் எனும் நெய் மருந்து, அந்தந்த நோய்களுக்குத் தகுந்தவாறு கொடுக்கப்படும் எண்ணற்ற ஆயுர்வேத மருந்துகள் என பல மருந்துகள் இருந்தாலும், நீங்கள் ஆயுர்வேத மருந்துவரின் நேரடி ஆலோசனை மூலம் மருந்துகளைச் சாப்பிட்டு, களைப்பைப் போக்கிக் கொள்ளலாம். 
(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/8/29/w600X390/Ayurvedic_massage_pune_ayurvedic_massage_in_pune_koregaon_park.jpg http://www.dinamani.com/health/health-serials/ayurvadham/2017/aug/10/களைப்பு-நீங்க-நல்ல-உணவு-மன-நிம்மதி-2752956.html
2749736 தொடர்கள் ஆயுள் காக்கும் ஆயுர்வேதம் ஆயுர்வேதத்தில் கண் நோய்க்கு மருந்து! டாக்டர் எஸ். சுவாமிநாதன் DIN Thursday, August 3, 2017 12:00 AM +0530 எனது பேத்தியின் வயது 10. பிறந்த சில வருடங்களில் NYSTAGMUS-SQUINT EYES கண்டறியப்பட்டு அறுவை சிகிச்சை தான் வழி என கண்மருத்துவமனையில் கருத்து கூறியுள்ளனர். ஆயுர்வேத மருத்துவத்தால் குணப்படுத்த இயலுமா?
-த. நாகராஜன், சிவகாசி.

கழுத்திற்கு மேற்பட்ட, தொண்டை மற்றும் தலையைச் சார்ந்த உபாதைகளில் "நஸ்யம்' எனும் மூக்கினுள் மருந்து விடும் முறையே மிகவும் நல்லது என்று ஆயுர்வேதம் குறிப்பிடுகிறது. தலைக்கு மருந்தை நேரடியாக எடுத்துச் செல்லும் ஒரே வழியானது மூக்கினுள் அமைந்துள்ள வெற்றிடப்பாதை என்பதாலேயே அதற்கு இத்தனை சிறப்பு. மூன்று வகையான நஸ்யப் பிரயோகங்களாகிய "விரேசனம்',  "ப்ரம்ஹனம்',  "சமனம்' ஆகியவற்றில் தங்களுடைய பேத்திக்கு எதைத் தேர்ந்தெடுத்துச் செயல்படுத்துவது என்பதை மருத்துவரால் மட்டுமே கூற இயலும். இம்மூன்றிலும் ப்ரம்ஹணம் எனும் நஸ்யப்பிரயோகம் பற்றிய வர்ணணையில் - வாதத்தினுடைய ஆதிக்கத்தால் ஏற்படும் தலைவலிக்கும், சூர்யாவர்த்தம் எனும் வெயில் ஏற ஏற உண்டாகும் தலை வலிக்கும்,  குரல்வளை குன்றிய நிலையில் பேசமுடியாமல் அவதியுறும் நபர்களுக்கும், மூக்கு உட்புறம் வறண்டு போவதிலும், வாய் வறண்டு போகும் நிலையிலும், திக்கு வாயிலும், கண் இமைகள் பிரித்து விரிக்க முடியாத உபாதையிலும், தோள் பட்டை சதை காய்ந்து போவதால் கைகளை உயர்த்த முடியாத கஷ்டத்திற்கும் நல்ல பலனை உண்டாக்கக்கூடியது என்று கூறப்படுகிறது. இந்த ப்ரம்ஹண நஸ்யம் தங்களுடைய பேத்திக்கு குணமளிக்க ஏதேனும் வாய்ப்பிருக்கிறதா? என்று முயற்சி செய்து பார்க்கலாம்.

கண் உபாதைக்குத் தக்கவாறு மருந்துகளைத் தேர்வு செய்து தயாரிக்கப்பட்ட கொழுப்பு அல்லது நெய் மருந்துகள், மருந்துகளை அரைத்து உருண்டையாக்கி அந்த கொழுப்பு அல்லது நெய் மருந்துகளுடன் கலந்து உசிதமான கஷாயமும் சேர்த்து, ஆடு, முயல், வெள்ளை நிறப்பன்றி, அவற்றின் இரத்தம் ஆகியவை கலந்து கூட்டாக சேர்த்து செய்யப்படும் ப்ரம்ஹண நஸ்யம் பயன்படுத்த உகந்ததாகும்.

மேற்குறிப்பிட்ட மூக்கில் மருந்துவிடும் முறையால், கண்களைச் சார்ந்த அழுக்குகள் ஏதேனும் இருந்தால், நெகிழ வாய்ப்பிருக்கிறது. அதைச்  சரி செய்து கொள்ள திரிபலை எனும் கடுக்காய், நெல்லிக்காய், தான்றிக்காய் ஆகியவற்றைக் கொண்டு தயாரிக்கப்படும் திரவமான மருந்தை கண்ணில் சிறிது தாரையாக ஊற்றுவது, ஆச்யோதனம் எனும் சிகிச்சை முறையாகும். இதனால் கண்ணில் உண்டாகும் வலி, குத்தல், அரிப்பு, உறுத்தல், நீர்க்கசிவு, அழற்சி, சிவப்பு ஆகியவை நீங்கும்.

அஞ்சனம் எனும் கண்களில் மை எழுதுதல் எனும் சிகிச்சை முறையும் ஆயுர்வேதம் கண் நோய்களுக்கான பிரச்னைகளுக்குத் தீர்வு தரக்கூடியது என்றும் கூறுகிறது. கண்ணில் ஏற்படும் வீக்கம், அதிக அரிப்பு, பிசுபிசுப்பு, உறுத்தல், கசிவு, சிவப்பு இவை குறைந்து பீளை அதிகரித்தல், பித்தம், கபம், இரத்தம் மற்றும் விசேஷமாக வாயுவால் ஏற்பட்ட உபாதைகள் ஆகியவற்றில் நல்ல பலனைத் தரக்கூடியது.

மேற்குறிப்பிட்ட ஆச்யோதன அஞ்சன பிரயோகங்களால் கண்களுக்கு பலக்குறைவு ஏற்படலாம். அது நீங்க தர்ப்பண புடபாகம் எனும் சிகிச்சை முறைகளாலும் கண்களுக்கு வலுவூட்டலாம். கண்கள் வாட்டமடைதல், தம்பித்தல், காய்ந்திருத்தல், வடுபோதல், அடிபட்டிருத்தல், வாத பித்த தோஷங்களால் வருத்தமடைதல், கண்கள் வளைந்திருத்தல், இமைமயிர் உதிர்தல், கலங்கிய பார்வை, சிரமப்பட்டு கண்விழித்தல், வெண்பகுதியில் சிவந்த கோடுகளுடன் வீக்கம், வேதனை, எரிச்சல் காணப்படுதல், எந்நேரமும் கண்ணீர் ஒழுகுதல், கண்பார்வை மங்குதல், வெண்பகுதியில் சிவப்புப்புள்ளி காணப்படுதல், கண்கூசுதல், மென்னி, கண்பொட்டு அல்லது மற்ற இடங்களிலிருந்து கண்ணில் வேதனையைத்தோற்றுவித்தல், புருவத்திலும் கண்ணிலும் வாயு மாற்றி மாற்றிச் சென்று விசேஷமாகக் கடுமையான வேதனை, குத்தல், கிளர்ச்சி  இவை அடங்கிய நிலையில் யவை எனப்படும் வாற்கோதுமையுடன் உளுந்து சேர்த்து அரைத்து, கண்களில் வெளிப்புறத்தில் இரண்டு அங்குல உயரத்திற்கு சமமாக வரம்பு ஒன்று உறுதியாக அமைத்து, நோய்களுக்கு ஏற்றவாறு தயாரிக்கப்பட்ட நெய்யை நீராவியில் உருக்கி, கண்களை மூடச் செய்து ஊற்றுவதால் பேத்திக்கு நிவாரணம் கிடைக்குமா என்பதை செய்து பார்த்தால்தான் தெரிய  வாய்ப்பிருக்கிறது. 

கண்களை வலுப்படுத்துவதற்கான சில விசேஷ பயிற்சி முறைகளும் உள்ளன. அவற்றையும் சற்று நிதானமாகச் சொல்லிக் கொடுத்து தொடர்ந்து முயற்சி செய்துவந்தாலும் முன்னேற்றம் ஏற்பட வாய்ப்புள்ளது. ஒருசில மருந்துகளை உள்ளுக்குச் சாப்பிட்டு, முன் குறிப்பிட்ட சிகிச்சை முறைகளையும் செய்வதால், கண்சார்ந்த உபாதைகளுக்கு நல்ல நிவாரணம் கிடைக்கலாம். இவை அனைத்தும் செய்து குணமடையாவிட்டால், அறுவை சிகிச்சையைத் தவிர வேறு வழி இருப்பதாகத் தெரியவில்லை. 
(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

 

]]>
http://images.dinamani.com/uploads/user/imagelibrary/2016/9/3/w600X390/child-eye.jpg http://www.dinamani.com/health/health-serials/ayurvadham/2017/aug/03/ஆயுர்வேதத்தில்-கண்-நோய்க்கு-மருந்து-2749736.html
2745116 தொடர்கள் ஆயுள் காக்கும் ஆயுர்வேதம் இந்துப்பின் மருத்துவ குணங்கள் பற்றி அறியலாம்! டாக்டர் எஸ். சுவாமிநாதன் DIN Thursday, July 27, 2017 04:32 PM +0530 'சேந்தாநமக்' என்ற பெயரில் தற்சமயம் ஓர் உப்பு விற்கப்படுகிறது. விசாரித்ததில் அது  இந்துப்பு என்று கடையில் கூறினார்கள். இந்துப்பைப் பற்றிய விவரம் ஆயுர்வேதத்தில் கூறப்பட்டுள்ளதா? இதன் மருத்துவகுணங்கள் எவை? மற்ற உப்புகளிலிருந்து இது எவ்வாறு மாறுபடுகிறது? 

- கோ.ஸ்ரீதர், காஞ்சிபுரம்.

"அஷ்டாங்கஹ்ருதயம்' எனும் ஆயுர்வேதநூலில் உப்பினுடைய பொது குணம் பற்றிய வர்ணனையில் எல்லா உப்புக்களும் கபத்தை இளக்கும், உட்புறக் குழாய்களில் துளைத்துக் கொண்டு ஊடுருவிச் செல்லும் தன்மை உடையவை. மலச்சிக்கல் உபாதையைப் போக்கக் கூடியவை. மிருதுவான தன்மையுடையவை. குடல் வாயுவைக் கட்டுப்படுத்தும். எளிதில் செரிக்கும். சூடான வீரியம் கொண்டவை. நாக்கிலுள்ள ருசிக்கோளங்களைத் திறந்து ருசியை உண்டு பண்ணுபவை என்றும், கபம் மற்றும் பித்த தோஷங்களைத் தூண்டிவிடும் தன்மை உடையவை என்றும் கூறப்பட்டுள்ளது. 

நீங்கள் குறிப்பிடும் சேந்தாநமக் எனும் இந்துப்பானது,  சிறிது இனிப்பான சுவையுடையது. ஆண்மையைப் பெருக்கும். இதயத்திற்கு நன்மை செய்யும். மூன்று தோஷங்களாகிய வாத, பித்த, கபங்களைப் போக்கும். எளிதில் செரிக்கும். சிறிதே உஷ்ணவீரியம் உள்ளது. நெஞ்சு எரிச்சலை ஏற்படுத்தாது. பசியைத் தூண்டிவிடும் என்றும் கூறப்பட்டுள்ளது. மற்ற உப்புக்களை விட இந்துப்பு கண்களுக்கு நல்லது. ஆயுர்வேதத்தில் பல மூலிகை மருந்து தயாரிப்புகளில் இந்த இந்துப்பு சேர்க்கப்படுகிறது. இதனால் அந்த மருந்தினுடைய வீரியமானது வேகமாக உட்புற உடலில் எடுத்துச் செல்லப்பட்டு வேலை செய்வதற்கு உதவுகிறது.

உதாரணத்திற்கு ஹிங்குவசாதி எனும் சூரணமருந்தில் இந்துப்பு சேர்க்கப்படுகிறது. இதனால் இதய உபாதைகள், விலாவலி, கழுத்தினுடைய குருத்தெலும்பு மற்றும் இடுப்பிலுள்ள வில்லைகளில் ஏற்படும் வலி ஆகியவற்றை இந்த சூரணமருந்து நீக்குகிறது. மாதவிடாயின் பொழுது ஏற்படும் கருப்பை வலி மேலும் ஆசனவாய் வலி, வாயு மற்றும் கபங்களால் ஏற்படும் குடல் உபாதைகள் ஆகியவற்றை நீக்கும். மலம் மற்றும் சிறுநீரை விடுவிக்கும் தன்மையுடையது. நெஞ்சுபிடிப்பு, சோகை, உணவில் விருப்பமின்மை, மூலம், விக்கல், விதைவாதம், மூச்சிரைப்பு, இருமல், பசியின்மை ஆகியவற்றை குணப்படுத்தும் தன்மை இந்துப்பினால் மேம்படுத்தப்படுகிறது. 

நாக்கில் ருசி, பசி ஆகியவை இல்லாமல் குடல் வாயுவினாலும், மலச்சிக்கலினாலும் அவதியுறும் நபர்களுக்கு கந்தர்வஹஸ்தாதி எனும் கஷாயம் கொடுக்கப்படும் தறுவாயில் அதில் இந்துப்பும், வெல்லமும் ஒரு சிட்டிகைச் சேர்த்துக் கொடுக்கப்படுவதால் மருந்தினுடைய செயல்பாடானது குடலில் துரிதப்படுத்தப்படுகிறது. சிரிவில்வாதி எனும் கஷாயம் வெளிமூலம் மற்றும் உள்மூல பிரச்னைகளுக்குக் கொடுக்கப்படும்போது இந்துப்பு சேர்த்தே கொடுப்பது வழக்கம். இதனால் மூலத்தில் ஏற்படும் வலி, மலச்சிக்கல் ஆகியவை விரைவில் நீங்குவதோடு பசியும் நன்றாக எடுக்கத் தொடங்கும். 

வைஷ்வானரம் எனும் சூரண மருந்திலும் இந்துப்பு ஒரு முக்கிய மருந்தாகச் சேர்க்கப்படுகிறது. அரை, ஒரு ஸ்பூன் இந்த சூரண மருந்தை சிறிது வெந்நீருடன் கலந்து காலை, இரவு உணவிற்கு அரைமணி முன் சாப்பிடுவதால் குடல் சார்ந்த வாயு உபாதைகள் பசியின்மை, மலச்சிக்கல் போன்றவை நீக்கப்பட்டு உடலின் ஆரோக்கியத்தை மேம்படுத்துகிறது. அதுபோலவே, அஷ்டசூரணம் எனும் ஆயுர்வேத மருந்திலும் இந்துப்புச் சேர்க்கப்படுவதால் குடலில் வாயு  பந்து போன்று உருண்டு ஒருபகுதியில் உந்தப்பட்டு பெரிதாகக் காணப்படும் உபாதையையும்,  பசியின்மையையும் குணப்படுத்துவதில் பெரும் பங்கு வகிக்கிறது. 

இந்துப்பு தற்சமயம் சுத்திகரிக்கப்பட்டு விற்பனைக்கு கடைகளில் கிடைக்கிறது. இதை பழங்களை நறுக்கி அதில் தூவியும் சாப்பிடலாம். பழங்களால் ஏற்படும் குளிர்ச்சியும், கனமான தன்மையும் இந்துப்பினால் நீக்கப்பட்டு விரைவில் செரிமானத்திற்கு உதவுகிறது. கண்களுக்கு நல்லது என்பதால் பல ஆயுர்வேதக் கண்சொட்டு மருந்துகளிலும் இந்துப்பு சேர்க்கப்பட்டே தயாரிக்கப்படுகின்றன. ஒரு சிட்டிகை இந்துப்பைச் சூடாக்கப்பட்ட மூலிகைத் தைலங்களில் சேர்த்து நன்றாகக் கரைத்து அதன் பின்னர் வலியுள்ள மூட்டு போன்ற பகுதிகளில் தடவினால்,  சிறந்த வலிநிவாரணியாக அந்தத் தைலம் செயல்படும். 

(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை -  600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2013/3/13/13/w600X390/ayurveda.png http://www.dinamani.com/health/health-serials/ayurvadham/2017/jul/27/இந்துப்பின்-மருத்துவ-குணங்கள்-பற்றி-அறியலாம்-2745116.html
2740332 தொடர்கள் ஆயுள் காக்கும் ஆயுர்வேதம் செரிமானக் கோளாறுகளை நீக்கும் பார்லி! டாக்டர் எஸ். சுவாமிநாதன் DIN Thursday, July 20, 2017 12:00 AM +0530 பார்லி அரிசியை சமைத்துச் சாப்பிட்டால் உடல் எடை குறையும் என்ற கருத்து சரியா? அதைப் பற்றிய விவரம் ஆயுர்வேதத்தில் குறிப்பிடப்பட்டுள்ளதா? அதற்கு வேறு ஏதேனும் மருத்துவப் பயன்கள் உள்ளதா?

-கணேசன், மதுரை.

பாவபிரகாசர் எனும் முனிவர், பார்லி அரிசியைப் பற்றிய வர்ணனையில் - துவர்ப்பும், இனிப்புச் சுவையும் நிறைந்த பார்லி அரிசி, வீர்யத்தில் குளிர்ச்சியானது என்கிறார். மேலும், உடல் உட்புற குழாய்களில் படிந்துள்ள படிவங்களை நன்கு உரசி, வெளியேற்றும் தன்மையுடையது, ஆனால் உண்பதற்கு மிகவும் மிருதுவானது என்கிறார். புண் ஆறுவதற்கு எள்ளைப் போல, பார்லி அரிசியும் பத்தியமானது. வறட்சி ஏற்படுத்தும், புத்திசக்தியை நன்கு தூண்டிவிட்டு, நினைவாற்றலை மேம்படுத்தும் திறன் கொண்டது, பசியினுடைய மந்த நிலையை மாற்றி பசியை நன்கு தூண்டிவிடும் சக்தி உடையது. சீரண இறுதியில் காரமான சுவையாக மாறும் தன்மையுடையது. உட்புறக் குழாய்களில் பிசுபிசுப்பை ஏற்படுத்தாது. நல்ல குரல்வளம் ஏற்படுத்தும், உடலுக்கு வலுவூட்டும், கனமான செரிமானப் பொருளாகும்.

அதிக அளவில் காற்றையும்  மலத்தையும் ஏற்படுத்தும்,  உடல்நிறம், ஸ்திரத்தன்மை ஆகியவற்றை மேம்படுத்தும், சாப்பிடும் போது சற்று வழவழப்பாக இருக்கும். தொண்டையைச் சார்ந்த உபாதைகளையும், தோல் சார்ந்த உபாதைகளையும் குணப்படுத்தும், தலை, மார்புப் பகுதியில் ஏற்படும் சளித்தொல்லை, பித்தத்தினால் ஏற்படும் உடற்சூடு, கொழுப்பு ஆகியவற்றை நீக்கி ஆரோக்யத்தை நிலைநாட்டும். மூக்கிலிருந்து நீராக ஒழுகி கஷ்டப்படுபவர்கள், மூச்சிரைப்பு உபாதை உடையவர்கள், சளியினால் இருமல் ஏற்பட்டு துன்பப்படுபவர்கள், தொடை விரைப்பு, தண்ணீர் தாகம் அதிகம் உள்ளவர்களுக்கு ஏற்ற காலை உணவு பார்லி அரிசி தான்.

"தன்வந்தரி நிகண்டு' எனும் புத்தகத்தில் கூடுதலாக- பார்லி அரிசி நன்கு மலமிளக்கி குடலை சுத்தப்படுத்துமென்றும், ஆண்களுக்கு விந்தணு சக்தியை கூட்டுவதாகவும், சிறுநீரை தாராளமாக வெளியேற்றும் என்றும் காணப்படுகிறது.

"கையதேவ நிகண்டு' எனும் புத்தகத்தில்- முன் குறிப்பிட்ட அத்தனை குணங்களையும் கூறிய பிறகு, கூடுதலாக - உடல் பருமனை ஏற்படுத்தும் சதைக் கொழுப்பை சுரண்டி மேலும், கப - வாத - ரத்தத்தில் ஏற்படும் பூட்டுகளின் மந்தமான வீக்கத்துடன் வலி நிறைந்த உபாதையையும், சர்க்கரை உபாதையையும் குணமாக்கும் என்றும் கூறப்பட்டுள்ளது. இதை சுஸ்ருதர் எனும் முனிவரும் அங்கீகரிக்கிறார்.

பார்லியினுடைய முழு அரிசியைக் கஞ்சியாக்கி அதன் தெளிவை காய்ச்சல், தொண்டைப்புண், சிறுநீர் எரிவு, நா வறட்சி போன்ற உபாதைகளுக்குப் பருகலாம். பால், பழரசம், மோர், உப்பு, சர்க்கரை இவற்றை  தேவைக்கேற்ப சேர்த்துக் கஞ்சி தயாரித்துக் கொடுக்க மலத்தை இளக்கி வெளியேற்றும்.  இதனை அரைத்து மாவாக்கியும் கஞ்சி செய்யலாம். உடல் வலுவூட்டும். தொடர்ந்து உணவாக்கிக் கொள்ள உடல் இளைக்கும். இதனை சாதமாக வடித்துச் சாப்பிடுவதில்லை.

குடல் அழற்சி அதாவது எரிச்சலால் துன்பப்படும் நபர்கள் , காலை உணவாக பார்லி கஞ்சியைச் சாப்பிடலாம். சிறுநீர்தடை ஏற்பட்டு அவதியுறும் உபாதையுள்ளவர்கள், பார்லி  கஞ்சியில் சிறிது ஏலக்காயை நுணுக்கிச் சேர்த்து காலையில் சாப்பிட நல்லது.  எவ்வளவு தண்ணீர் குடித்தாலும் தாகம் அடங்கவில்லையே என்று கஷ்டப்படுபவர்கள், பார்லி கஞ்சியை காலையில் சிறிது நாட்கள் தொடர்ந்து சாப்பிட, நல்லபலன் கிடைக்கும். செரிமானக் கோளாறு ஏற்பட்டு, சரி வர ஜீரணசக்தி இல்லாதவர்கள், பார்லியைக் கஞ்சியாக்கி, சிறிது சீரகம், ஓமம். கண்டந்திப்பிலி, இந்துப்பு ஆகியவற்றைச் சிறிய அளவில் பொடித்து சேர்த்து, காலையில் பருகிவருவதால் செரிமானக் கோளாறுகள் அனைத்தும் விரைவில் நீங்கிவிடும். யவை எனும் பெயரில் பார்லி விற்பனை செய்யப்படுகிறது.

முட்டை வடிவிலுள்ள யவை, சீமை யவை என்பர். குணத்தில் யவையை ஒத்து இருப்பதால்தான் பார்லி என்று பெயர். யவையையும் கஞ்சியாக்கிச் சாப்பிடலாம். குடலில் வறட்சி ஏற்படுத்தும், ஆனால் மலத்தைக் கட்டாது. நீரிழிவு, கொழுப்பு அடைப்பு உள்ளவர்களுக்கு ஏற்றது. மார்புச்சளி, தலைச்சளி, சளியுடன் இழப்பு, தொடைச்சதை விரைப்பு, தொண்டை நோய் இவற்றிற்குப் பத்திய உணவுப் பொருள். யவையை சாதமாகவும், கஞ்சியாகவும், சத்து மாவாகவும் உபயோகிக்கத்தக்கது.   
(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

 

]]>
http://images.dinamani.com/uploads/user/imagelibrary/2017/7/6/w600X390/stomach-ache.jpg http://www.dinamani.com/health/health-serials/ayurvadham/2017/jul/20/செரிமானக்-கோளாறுகளை-நீக்கும்-பார்லி-2740332.html
2736173 தொடர்கள் ஆயுள் காக்கும் ஆயுர்வேதம் எந்தவொரு நோய்க்கும் மருந்து மட்டும் போதாது! டாக்டர் எஸ். சுவாமிநாதன் DIN Thursday, July 13, 2017 12:00 AM +0530 என் வயது 63. கடந்த 12 வருடங்களாக நீரிழிவு நோயினால் இன்சுலின் போடுகிறேன். கண் பாதிக்கப்பட்டுள்ளது. இன்சுலின், மற்ற மருந்துகளுடன் மதுமேக சூரணம் சாப்பிடலாமா? அதன் அளவு, நேரம், கண் பாதுகாப்பு, உணவு முறை பற்றி கூறவும்.

-விஜயகுமார், நெற்குன்றம்,
சென்னை.

பொதுவாகவே தொடர்ந்து ஆங்கில மருந்து சாப்பிடுபவர்களுக்கு, உபாதைகளின் தாக்கம் குறையாதிருக்கும் போது, மாற்று மருத்துவ முறைகளின் மூலம் விடிவுகாலம் பிறக்காதா என்று நினைப்பு ஏற்படுவது தற்சமயம் அதிகரித்துள்ளது. மற்ற மருத்துவ சம்பந்தமான மருந்துகளைச் சாப்பிடும் போது, ஆங்கில மருந்தை விட்டு விடலாமா என்று பலரும் கேட்கின்றனர். இது சரியான வழியல்ல. ஆங்கில மருத்துவர் குறிப்பிடும் நேரத்திற்குத் தகுந்தாற்போல மருந்தைத் தொடர்ந்து, மற்ற மருத்துவ மருந்துகளை குறைந்தது ஒரு மணி நேரத்திற்கு முன்பாகவோ அல்லது பின்னரோ சாப்பிடுவதே சிறந்தது. அந்த வகையில் நீங்கள் குறிப்பிடும் மதுமேக சூரணம் எனும் மருந்தை சுமார் 5 கிராம் அளவில் காலையில் வெறும் வயிற்றில், சிறிது சூடான தண்ணீருடன் சாப்பிட்ட பிறகு, நடை பயிற்சி செய்யலாம். இதில் பக்கவிளைவுகள் ஏதும் ஏற்பட வாய்ப்பில்லை. ஏனென்றால், நாட்டு மருந்துகளில் பலவற்றையும் தாய்ச்சரக்கு என்பார்கள். அதாவது தாய்வழியாக பால் அருந்தும் குழந்தைக்கு எத்தனை ஆரோக்கியம் கிட்டுமோ, அத்தனை ஆரோக்கியத்தையும் இம்மருந்துகளின் தொடர் உபயோகத்தின் மூலம் பெறலாம்.

கண் பாதுகாப்பிற்கு உணவில் பொன்னாங்கண்ணி கீரையை வாரம் இரு முறையாவது சமைத்து உண்ணலாம். திரிபலை எனும் கடுக்காய், நெல்லிக்காய், தான்றிக்காய் சூரணத்தை இரவு படுக்கும் முன் 5 கிராம் எடுத்து சிறிது சூடான பாலுடன் சாப்பிடலாம். வெயிலில் செல்லும் போது குளிர்ச்சி தரும் கண்ணாடி அணியலாம். குடை பிடித்துச் செல்வதால், வெயிலின்தாக்கம் தலையில் இறங்குவதைத் தவிர்க்கலாம். பாத அணிகளை சூடான தரையில் நடக்கும் போது அவசியம் அணிந்திருக்க வேண்டும். தலைக்கு வெந்நீர்விட்டுக் குளிப்பதைத் தவிர்க்க வேண்டும். திரிபலாதி தைலத்தைத் தலைக்குத் தேய்த்து அரை, முக்கால் மணி நேரம் ஊறிய பிறகு காலையில் குளிக்கலாம். கண்ணொளி தரும் ஆலோசகம் எனும் பித்தம் கண்ணில் இருப்பதால் சூட்டை கண்களில் உணருபவர்கள், மேற்குறிப்பிட்ட வகையில் உணவையும் மருந்தையும் செயலையும் அமைத்துக் கொள்வதால், கண்சூட்டை வெகுவாகக் குறைக்கலாம்.

உணவில், சில கொடிக்காய்களான அவரைக்காய், புடலங்காய், பீர்க்கங்காய், சுரைக்காய், பூசணிக்காய், வெள்ளரிக்காய், கொத்தவரை, பீன்ஸ் போன்றவற்றை அடிக்கடி சமைத்துச் சாப்பிடுவதால், சர்க்கரையின் அளவை கட்டுப்படுத்தலாம். அதுபோலவே, கத்தரிக்காய், சுண்டைக்காய், வாழைப்பூ, வாழைத்தண்டு, முட்டைக்கோஸ், வெங்காயம், நூல்கோல், சௌசௌ, முருங்கைக்காய், தக்காளி, குடமிளகாய், வெண்டைக்காய், கொத்துமல்லி, கறிவேப்பிலை, பச்சை மிளகாய், இஞ்சி, பூண்டு, வெங்காயத்தாள், பச்சைப்பட்டாணி, காலிபிளவர், புதினா, கீரைவகைகள் ஆகியவற்றையும் சமச்சீராக மெனுபோல் தயாரித்து நீங்கள் பயன்படுத்தலாம். இவை அனைத்தும் ரத்தத்தில் சர்க்கரைச்சத்து கூடாதபடி கவனித்துக் கொள்ளும் சிறப்பான உணவு வகைகளாகும். நெல்லிக்காயும் மஞ்சள்தூளும் சர்க்கரையைக் கட்டுப்படுத்தும் சிறந்த உணவுப் பண்டங்களாகும். நெல்லிக்காய் சாறு 15 மி.லி. அளவில் எடுத்து, 3-5 கிராம் மஞ்சள்தூளை நன்கு அதில் கலந்து, 2 சொட்டு தேன் சேர்த்து - காலையில் வெறும் வயிற்றில் சாப்பிட, மிகச் சிறந்த டானிக் மருந்து போல, சர்க்கரை உபாதை வந்தவர்களுக்கு தெம்பையும், மனதிற்குத் தெளிவையும் அளிக்கக் கூடியது. சர்க்கரையின் அளவைக் கட்டுப்படுத்தும் பழங்களில் எலுமிச்சம் பழச்சாறு, தக்காளி சாறு, சாத்துக்குடி ஜூஸ் அருந்தலாம்.

மாதுளம்பழம், கொய்யாக்காய், அரைஆப்பிள், ஆரஞ்சுபழம் மிதமாய்ப் பயன்படுத்தலாம். அன்னாசி, பப்பாளி, தர்பூசணி, திராட்சை குறைந்த அளவில் சாப்பிடலாம்.

நரம்பு பாதிப்புகளிலிருந்து பாதுகாத்துக் கொள்ள, நல்லெண்ணெய் குளியலை வாரம் இரு முறை செய்யலாம். அமுக்கராக் கிழங்கு எனும் அஸ்வகந்தா சூரணத்தை, சிறிது சூடான பாலுடன் இரவு உணவிற்கு 1/2மணி அல்லது 1 மணி நேரம் முன்பாகவோ சாப்பிட மிகவும் நல்லது. எண்சாண் உடம்பிற்குச் சிரசே பிரதானம் என்ற சொல்லிற்கு ஏற்ப, தலையினுள் அமைந்துள்ள நரம்புகளை வலுவூட்ட, தலைக்கு க்ஷீரபலா தைலத்தை வெது வெதுப்பாகத் தேய்த்து அரை- முக்கால் மணி நேரம் ஊறிய பிறகு குளிக்கலாம். உடல் இளைத்துப் போகும் தறுவாயில், மஹாமாஷ தைலம், பலாஅஸ்வகந்தாதி தைலம் போன்றவற்றைக் கலந்து சூடாக்கி, உடலெங்கும் தேய்த்துக் குளிக்கலாம். பூனைக்காலிவிதை, தண்ணீர்விட்டான் கிழங்கு, நிலப்பனைக்கிழங்கு போன்றவை சேர்த்துத் தயாரிக்கப்படும் மருந்துகளை உட்கொள்வதால், ஆண்களுக்கு ஏற்படும் விந்தணுக்குறைபாடு, தளர்ச்சி ஆகியவை நீங்கும், நரம்புகளுக்கு வலுவூட்டும்.

வாழ்க்கை முறை, உணவு முறை, செயல்களில் காட்டும் நிதானம், மகிழ்ச்சியான மனநிலை, சீரான உடற்பயிற்சி போன்றவை ஒன்றோடு ஒன்று கைகோர்க்கும் போது, மருந்து சிறப்பாக வேலை செய்யும். அதைவிடுத்து மதுமேகசூர்ணம் மட்டும், ஆங்கில மருந்துகளுடன் சேர்த்துச் சாப்பிட்டால் குணமாகுமா என்றால் குணமாகாது. மருந்தினுடைய வீரியம், உட்புறப் பகுதிகளில், உடலில் விரைவாகச் சேர்க்கப்பட்டு, அவற்றினுடைய திறமை வெளிப்பட, மேற்குறிப்பிட்ட முறை அனைத்தும் தங்களுக்கு உதவிடக் கூடும்.
(தொடரும்)


பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2013/12/15/23/w600X390/tabletman.jpg http://www.dinamani.com/health/health-serials/ayurvadham/2017/jul/13/எந்தவொரு-நோய்க்கும்-மருந்து-மட்டும்-போதாது-2736173.html
2732310 தொடர்கள் ஆயுள் காக்கும் ஆயுர்வேதம் இடது பக்கம்  சரிந்து படுப்பதுதான் ஆரோக்கியமானது! டாக்டர் எஸ். சுவாமிநாதன் DIN Thursday, July 6, 2017 12:00 AM +0530 இடது பக்கம் சரிந்து படுப்பதுதான் ஆரோக்கியமானது என்று ஆயுர்வேதம் குறிப்பிடுவதாக அறிகிறேன். அது உண்மையா? அப்படி படுப்பதால் என்ன நன்மை? 

  - சா. முகம்மது , சிதம்பரம்.

இரவு உணவிற்குப் பிறகு, குறைந்தது நூறு அடியாவது நடக்க வேண்டும் என்றும் இடது பக்கமாக சரிந்து படுத்துக்கொள்ள வேண்டும் என்றும் "அஷ்டாங்க சங்கிரஹம்' எனும் ஆயுர்வேத நூல் கூறுகிறது.

1) சிறு குடலில் உற்பத்தியாகும் மலப்பகுதிகள், இலியோசீக்கல் வால்வு எனும் பகுதி வழியாக, வலதுபகுதியில் அமைந்துள்ள ஆரம்ப நிலையான பெருங்குடலில் சேர்த்து, வலது குடல்வழியாக, வயிற்றின் குறுக்கே நகரும் பெருங்குடல் மூலம், இடது பக்கம் அமைந்துள்ள இறங்கும் பெருங்குடலில் நகருவதால், புவி ஈர்ப்பு சக்தியின் மூலமாக, மலமானது எளிதில் நகர்வதற்கு உதவுகிறது. இதனால் மறுநாள் காலை, மலக்கழிவானது எளிதில் ஏற்படும்.

2) கரியமில வாயுவானது இன்பீரியர் வீனேகேவா எனும் மெல்லிய சுவருடன் கூடிய குழாய்மூலம் கீழ் உடலில் சேர்ந்து ரத்தத்தில் சேகரிக்கப்பட்டு, உடலின் வலதுபக்கத்தில் நகர்ந்து இதயத்தை வந்தடைவதால், இடது பக்கம் சரிந்து படுப்பதன்மூலமாக, உடல் உறுப்புகள், இடது பக்கம் சரிவதன் விளைவாக, இந்த ரத்தக்குழாயில் அழுத்தம் தவிர்க்கப்பட்டு, அதன் தொழிலை சிறப்பாகச் செய்யமுடிகிறது. இதயமும் கரியமிலவாயுவை நன்றாக உள்வாங்கி, வலது கீழ் பக்கத்திலுள்ள அறைக்குக் கொண்டு சென்று, நுரையீரலுக்கு எளிதாக எடுத்துச் செல்ல முடிகிறது. இதனால் இதயத்தின் செயல்பாட்டில் தொய்வு ஏற்படாமல், அதன் வேலைப்பளுவும் எளிதாகிறது. 

3) நிணநீர் சுரப்பிகளிலுள்ள நீரில், புரதம், க்ளுகோஸ், இதர கழிவுகள், அதன்குழாய்களின் நடுநடுவே அமைந்துள்ள முடிச்சு போன்ற க்ரந்திகளின் மூலம் சுத்தமாக்கப்பட்டு, இதயத்தின் இடது பக்கம் வந்து சேர்வதை, இடது பக்கம் சரிந்து படுப்பது எளிதாக்குகிறது. மேலும் இதயத்தின் வேலைப் பளுவும் குறைகிறது.

4) இதயத்தின் இடதுகீழ் பக்கம் அமைந்துள்ள வெண்டிரிக்கல் எனுமிடத்திலிருந்து பெரும் தமனி வழியாக, ரத்தத்திலுள்ள பிராண வாயுவானது, இடதுபக்கம் படுக்கும்போது புவியீர்ப்பு சக்தியினால் எளிதாக எடுத்துச் செல்லப்படுகிறது. இதயத்தினுடைய சுருங்கும் தொழிலானது சுலபமாக்கப்படுகிறது.

5)  மண்ணீரல் இடதுபக்கம்அமைந்துள்ளது. பெரிய நிணநீர் க்ரந்தியானது இது, நிணநீரை சுத்தப்படுத்துவதுடன் ரத்தத்திலுள்ள சில கசடுகளையும் சுத்தப்படுத்துகிறது. இடது பக்கம் படுப்பதால், நிணநீர் மற்றும் ரத்தம் ஆகியவை அதனுள் எளிதாக நுழைகின்றன. இதனால் மண்ணீரல் தன்தொழிலை சிறப்பாகச் செய்ய முடியும். இதய சுருக்கத்தை விட, தசை சுருக்கத்தின் மூலமாகத்தான் நிணநீரிலுள்ள அணுக்கள் விரைவாக நகருகின்றன என்பதால் இடது பக்கம் படுப்பதன் மூலம், தசை சுருக்கத்தின் செயல்பாடும் மேம்படுகிறது.
6) இடது  பக்கம்  சரிந்து படுப்பதால், உண்ட உணவானது வயிற்றினுடைய இடது பக்கத்தில் தங்கும்.  இயற்கையாகவே இடது பக்கம் சுலபமாகத் தொங்கும் வகையில் அமைக்கப்பட்டுள்ள வயிறு மற்றும் பாங்கிரியாஸ் ஆகியவை சுரக்கும் அமிலங்கள் சீராக உணவின் மீது விழுந்து செரிமானத்திற்கு உதவுகின்றன. இதனால் அவற்றிலிருந்து ஊறும் அமிலமானது, உணவின் முழுப்பகுதியும் செரிப்பதற்கு உதவுகின்றன.

7) கல்லீரலும், பித்தப்பையும் வலது பக்கம் வயிற்றில் அமைந்துள்ளன. இடது பக்கம் படுப்பதால் அவை மேலே வந்து விடுவதால், பித்தநீரானது, உணவுப்பையின் நடுப்பகுதியில் எளிதாக வந்து சேர்ந்து, நெய்ப்புப்பொருட்களைச் செரிப்பதற்கும், அமிலங்களைச்  சமன்படுத்துவதற்கும் பெரிதும் உதவுகிறது. உணவின் சீரான செரிமானத்தால், அதன் சத்து முழுவதும் உடல் எளிதாக பெறும் என்பதால், சோர்வு எனும் நிலை தவிர்க்கப்படுகிறது. சுறுசுறுப்பாக உடல் இயங்கவும் உதவுகிறது.

படுக்கையிலிருந்து எழும் போது இடதுபக்கம் சரிந்து வலதுகையால் படுக்கையை அழுத்தி எழுந்துகொள்வதால், இடுப்பு எலும்பு மற்றும் கழுத்து எலும்புகளில் வலி ஏற்படாமல் தவிர்க்கலாம். காலையில் எழும்போது சுறுசுறுப்பாக இல்லாமல் சோர்வாக உள்ளதாகச் சிலர் உணர்வார்கள்.

இது  உண்ணும் உணவின் செரிமானத் தாமதத்தால் வயிற்றில் வாயு நிறைந்து ஏற்படக்கூடும். முன் குறிப்பிட்ட வகையில், வாழ்க்கை முறையை மாற்றி அமைப்பதால், காலையில் சோர்வை தவிர்த்திடலாம். இரவு முழுவதும் இடது பக்கம் படுக்க வேண்டும் என்ற கட்டாயமில்லை. மலர்ந்தும் கிடக்கலாம். வலது பக்கம் படுப்பதையும், குப்புறப்படுப்பதையும் பெருமளவு தவிர்க்கலாம். வயிற்றிலுள்ள க்லேதகம் எனும் கபம், உணவை திரவ நிலைக்கு மாற்றுகிறது. பாசகம் எனும் பித்தம் உணவினுடைய செரிமானத்தை செய்து சத்தான பகுதியையும் உணவினுடைய கழிவுகளையும் பிரித்து பெருங்குடல் பகுதிக்கு அனுப்புகிறது. சமானன் எனும் வாயு உணவை பாசக பித்தத்திற்கு அருகில் எடுத்துத் சென்று செரிமானத்திற்கு உதவுகிறது. பெருங்குடல் பகுதியிலுள்ள அபானன் எனும் வாயு உணவுச் சக்கையிலிருந்து நீரைப் பிரித்து குடல் வழியாக உறிஞ்ச உதவுகிறது. இவை அனைத்தும் இடதுப் பக்கமாக படுப்பதன் மூலமாக விரைவாகச் செயல்பட உதவுகிறது. 

(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/9/25/w600X390/o-CATCH-UP-ON-SLEEP-facebook.jpg http://www.dinamani.com/health/health-serials/ayurvadham/2017/jul/06/இடது-பக்கம்--சரிந்து-படுப்பதுதான்-ஆரோக்கியமானது-2732310.html
2729013 தொடர்கள் ஆயுள் காக்கும் ஆயுர்வேதம் ரத்தசோகையை நீக்கும் மோர்! டாக்டர் எஸ். சுவாமிநாதன் DIN Thursday, June 29, 2017 05:56 PM +0530 குழாய் அடைப்புகளை நீக்கக் கூடியதும், ரத்தத்தைச்  சுத்தப்படுத்துவதும், ரத்த அணுக்களை வளரச் செய்வதுமான உணவும் மருத்துகளையும் பரிந்துரை செய்யவும்.  எனக்கு ரத்தத்தில் ஹீமோகுளோபின் அளவு எப்போதும் குறைவாகவே காணப்படுகிறது.

 -பொன் மனோகரன்,   
நரிமேடு, மதுரை.

உணவுப் பொருட்களில் நீங்கள் குறிப்பிடும் மூன்று செயல்களையும், செய்யக் கூடிய மோரும், தயிர் மேல் நிற்கும் தண்ணீரும் சிறந்தவை.  அஷ்டாங்கஹருதயம் எனும் ஆயுர்வேத நூலில், மோர் பற்றிய வர்ணனையில் - மோர் லேசானது, துவர்ப்பும், புளிப்புச்சுவையும் கொண்டது.  நல்ல ஜீரணகாரி, கபம் மற்றும் வாயு சார்ந்த உபாதைகளைக் குணப்படுத்தக் கூடியது. உடலில் ஏற்படும் வீக்கம், வயிற்றில் ஏற்படும் நீர் தேக்க உபாதையான உதரம், மூலம், க்ரஹணி எனப்படும் உணவு சரிவர செரியாமல் வெளியேறும் உபாதை, சிறுநீர் சரியான அளவில் பிரியாமல் ஏற்படும் தேக்கம், நாக்கில் ருசியின்மை, மண்ணீரல் வீக்கம், குல்மம் எனப்படும் வாயு உருண்டு திரண்டு பந்துபோல ஆகுதல், நெய்யை அதிக அளவில் பருகுவதால் ஏற்படும் வீக்கம், மூலம், சலிப்பு, விரைப்பு, உணர்வற்றநிலை, இடுவிஷம் எனப்படும் விஷப்பொருட்களின் சேர்க்கை, சோகை உபாதை ஆகியவற்றை மோர் குணப்படுத்தும் என்று கூறுகிறது. தயிரின் அளவிலிருந்து கால்பங்கு தண்ணீர் மட்டும் சேர்த்து, நன்கு கடைந்து வெண்ணெய் நீக்கியது தான் மோர் என்று அழைக்கப்படுகிறது. அதற்குத்தான் மேற்கூறிய சிறப்புகள் அனைத்தும் உரித்தானவை. 

தயிரை வடிகட்டி எடுக்கப்பட்ட அதன் தண்ணீருக்கு "மஸ்து' என்று ஆயுர்வேதம் பெயரிட்டுள்ளது. மோரினுடைய அத்தனை குணங்களும் இதிலும் அடங்கியுள்ளன. மேலும் குழாய் உட்புற அடைப்புகளைச்  சுரண்டி நீக்கக் கூடிய தன்மையும், வயிற்றில் வாயு உருண்டோடும் சத்தத்துடன் கூடிய மலச்சிக்கலையும் குணப்படுத்தும் சிறப்பான செயல்களை மஸ்து கொண்டுள்ளதாக அந்நூல் கூறுகிறது.

கசப்பு, துவர்ப்பும் கூடிய உணவு மற்றும் மருந்துபொருட்கள், குழாய்களின் உட்புறக் கழிவுகளை நன்கு அகற்றக் கூடியதும், ரத்தத்திலுள்ள கெடுதிகளை நீக்கக் கூடியவையுமாகும். அந்த வகையில் பாகற்காய், கோவக்காய், மணத்தக்காளி கீரை, அகத்திக்கீரை, வெந்தயக்கீரை, நிலவேம்புகுடிநீர், வேப்பம்பூ, மஞ்சள் போன்ற கசப்பான நாம் அன்றாடும் பயன்படுத்தும் உணவு வகைகளை நீங்கள் உணவாக ஏற்கலாம். அதுபோலவே துவர்ப்புச் சுவை வகைகளான கடுக்காய், கருங்காலிக்கட்டைத் தண்ணீர், அத்திக்காய், வாழைப்பூ, வாழைத்தண்டு, சுண்டைக்காய் ஆகியவற்றையும் உபயோகித்து உட்புற குழாய் அடைப்புகளை நீக்கி, ரத்தத்தைச் சுத்தப்படுத்தலாம். 

சிலாசத்து எனும் பாறையின் இடுக்குகளிலிருந்து எடுக்கப்படும் தாதுப்பொருள், தற்சமயம் காப்ஸ்யூல் வடிவத்தில் கொண்டு வரப்படுகிறது. குழாயின் உட்புற அழுக்குகளைச் சுரண்டி எடுப்பதும் ரத்தத்தைச் சுத்தப்படுத்துவதும், ரத்த அணுக்களை நன்கு வளரச் செய்வதிலும் இது பெரும் பங்கு ஆற்றுகிறது. இரவில் படுக்கும் முன் ஒன்றிரண்டு காப்ஸ்யூல்களை சிறிது சூடான பாலுடன்  சாப்பிட மிகவும் நல்லது. 

உடலெங்கும் மூலிகைத் தைலமாகிய மஹாமாஷத்துடன், பலா அஷ்வகந்தாதி தைலத்தைக் கலந்து தேய்த்து அரை மணிநேரம் ஊறிய பிறகு வெந்நீரில் குளித்து அன்றைய தினம் மிளகு மற்றும் சீரகம் சேர்த்த ரசம், புழுங்கலரிசி சாதத்துடன் சாப்பிட்டு சிறிது வெந்நீர் அருந்துவது உட்புற குழாய்களைச் சுத்தப்படுத்துவதற்கான ஓர் எளிய வழியாகும்.

உண்ணும் உணவின் செரிமானம் நன்கு ஏற்பட்டு, அவற்றின் சத்து முழுவதும் உடலில் நன்கு சேரும் வகையில் பசித்தீயை மேம்படுத்தினால் தங்களுக்கு ஏற்பட்டுள்ள ரத்த அணு குறைபாடானது விரைவில் நீங்கும். அப்படி அல்லாமல் நேரடியாக ரத்த அணுக்களை வளர்த்துத்  தரும் மருந்துகளை மட்டுமே நம்பி, மாத்திரையாகவோ, டானிக்காகவோ சாப்பிடுவதால், தற்காலிக நிவாரணம் மட்டுமே கிடைக்கும்.

ஒரு சில ஆயுர்வேத மருந்துகள், பசியை நன்கு ஏற்படுத்தி, தானும் விரைவாக குடலில் செரித்து, ரத்த அணுக்களை வளர்க்கும். தாடிமாதிகிருதம் எனும் நெய் மருந்து, அந்த வகையில் மிகவும் சிறந்தது. சுமார் பத்து மில்லி லிட்டர் மருந்தை, நீராவியில் உருக்கி, காலை மாலை வெறும் வயிற்றில் தொண்ணூறு நாட்கள் வரை சாப்பிட, சோகை உபாதையின் தாக்கத்தை வெகுவாகக் குறைக்கும். 

அதன் பிறகு உலர்ந்த திராட்சையை, இரவு முழுவதும் வெந்நீரில் ஊற வைத்து, மறுநாள் காலை கசக்கிப் பிழிந்து, வெறும் வயிற்றில் சாப்பிடும் நீர்பேதி ஏற்படுத்தும் முறை, லோஹாஸவம் மற்றும் குமார்யாஸவம் கலந்து சாப்பிடும் முறை, தேனுடன் வாஸாகுடூச்யாதி கஷாயம் சாப்பிடும் வகை, மண்டூரவடகம் மோருடன் சாப்பிடுவது, திராக்ஷாதி லேஹ்யம் போன்ற வரிசைக் கிரமமான பிரயோக விசேஷங்களை ஆயுர்வேத மருத்துவர்களிடமிருந்து நன்கு அறிந்து நீங்கள் சாப்பிட்டுவந்தால், உடல் உபாதைகள் அனைத்தும் நீங்கி, ஆரோக்யத்தின் அடிப்படை  ரகசியமான "பலத்தை' உடலிலும், மனதிலும் நீங்கள் முழு அளவில் பெறலாம். 
(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/8/29/w600X390/Ayurvedic_massage_pune_ayurvedic_massage_in_pune_koregaon_park.jpg http://www.dinamani.com/health/health-serials/ayurvadham/2017/jun/29/ரத்தசோகையை-நீக்கும்-மோர்-2729013.html
2723596 தொடர்கள் ஆயுள் காக்கும் ஆயுர்வேதம் சிறுநீரைக் கட்டுப்படுத்த...! டாக்டர் எஸ். சுவாமிநாதன் DIN Thursday, June 22, 2017 12:00 AM +0530 என் வயது 82. எனக்கு சில மாதங்களாக சிறுநீர் கட்டுப்பாட்டில் இல்லை. தானாக வெளியேறுகிறது. இதனால் உடைகள் நனைந்து விடுகின்றன. அதுவும் இரவில் அடிக்கடி அதிக அளவில் போகிறது. மேலும் உடல் முழுவதும் பொடிப்பொடியாக உதிர்கிறது. நமைச்சல் உள்ளது. சொறிந்தால் ரத்தம் வருகிறது. இதற்கு ஆயுர்வேத மருத்துவம் ஏதேனும் உள்ளதா?

கே.வி. நாகராஜ சர்மா, சென்னை.

சிறுநீர்ப்பையின் அடியில், சிறுநீரை வெளியேற்றும் குழாயைச் சுற்றியுள்ள புரஸ்தோளக் கிரந்தியின் வீக்கத்தினால், வயோதிகத்தில் இரவில் அடிக்கடி சிறுநீர் வெளியேறலாம். இந்தக் கிரந்தியானது பலவித தசை நார்களால் உருவாக்கப்பட்டுள்ளது. இவற்றினுடைய இயக்கம், அபானவாயு எனும் வாயுவை அடிப்படையாகக் கொண்டு செயல்படுகின்றன. நரம்புகளைச் சார்ந்த செயல்திறன் - வயோதிகத்தில் வாயுவினுடைய இயற்கை குணங்களாகிய வறட்சியும், குளிர்ச்சியும் கூடுவதால், அங்குள்ள நரம்பு மண்டலமும், தசைநார்களும் தம்முடைய நெய்ப்பை இழந்து இறுகுவதாலும், குளிர்ச்சியான குணத்தால் சிறுநீர் கட்டுப்பாட்டை அடிவயிற்றுப் பகுதி இழப்பதாலும் திறனற்றுப் போவதால் தங்களுக்கு சிறுநீர் அதிக அளவில் இரவில் போவதாய்த் தோன்றுகிறது.

சிறுநீர் வழியாக வெளியேற வேண்டிய பல கழிவுகளும், சரிவர வெளியேறாமல் மறுபடியும் சிறுநீரகங்களின் வழியாக உறிஞ்சப்பட்டு, உடல் உட்பகுதிகளில் சுழலும் தறுவாயில், தோலில் பொடிப் பொடியாக, நமைச்சலுடன் இரத்தமும் வரத் தொடங்கும். புதிய அணுக்களின் உற்பத்தியைத் தோலும் வயோதிகத்தில் இழப்பதால் , தோல் வெண்மையுறுவதும், சுருங்குவதும், நீர்ச்சத்து குறைவினால் வடு வெடிப்பதும் அதிகம் காணப்படுகிறது.

இது போன்ற உடல் உபாதைகளைத் தவிர்ப்பதற்கான வழிகளை ஆயுர்வேதம் விரிவாக எடுத்துக் கூறுகிறது. அதில் உணவும் - செயலும் - மருந்தும், ஒருங்கே சீராகச் சேர்வதால் உபாதைகளைப் பெருமளவில் தவிர்க்கலாம் என்றும், பல ஆயுர்வேத நூல்களில் காணப்படுகின்றன. உணவில் வாயுவின் சீற்றதை அதிகப்படுத்தும் காரம், கசப்பு மற்றும் துவர்ப்புச் சுவையைத் தவிர்க்க வேண்டும். அதற்கு மாற்றாக, இனிப்பு, புளிப்பு மற்றும் உப்புச் சுவைகளை, மிதமான அளவில் உட்கொள்வதால், நரம்புகளின் கிரியா ஊக்கிகள் நன்கு செயல்படவும், உடல் உறுப்புகளின் உட்புற நெய்ப்பும் குறையாதவாறு கவனித்துக் கொள்ளலாம். தலை முதல் உள்ளங்கால் வரை வெது வெதுப்பாக நல்லெண்ணெய் தேய்த்துக் குளிப்பதாலும், தோலினுடைய வறட்சியானது ஏற்படாதவாறு பாதுகாப்பை அளிக்கும். நிறைய ஓய்வும், மனநிம்மதியும், மகிழ்ச்சியும்} செயல்வடிவமாக அமைந்தால் - வாயுவினுடைய இயற்கைச் சீற்றதை உடலில் தவிர்க்கலாம். அவ்வப்போது, ஏற்படும் உடல் உபாதைகளுக்கான மருந்துகளைச் சரிவர சாப்பிட்டு, பிரச்னைகளைத் தவிர்ப்பதன் மூலமாக, வயோதிகத்தில் உடல் சிரமங்களைப் பெருமளவில் தவிர்க்கலாம்.

தங்களுக்கு ஏற்பட்டுள்ள சிறுநீர்ப் போக்கை இரவில் கட்டுபடுத்த ஆயுர்வேத நெய் மருந்தாகிய சுகுமாரம் க்ருதம் எனும் மருந்தை சுமார் பத்து மில்லி லிட்டர் நீராவியில் உருக்கி, காலை மதியம் இரவு, உணவிற்கு ஒரு மணி நேரம் முன்பாக, சுமார் மூன்று முதல் ஆறுமாதங்கள் வரை தொடர்ந்து சாப்பிடலாம். மருந்தைச் சாப்பிட்ட பிறகு , சிறிது சூடான தண்ணீரை அருந்தினால், உட்சென்ற நெய் மருந்து, நன்றாக குடல் வழியாக உறிஞ்சப்பட்டு, விரைவாகச் செயல்படும்.
உடல் அரிப்பையும், பொடிப்பொடியாக உதிர்வதைத் தடுக்கவும், ரத்தக் கசிவைக் குணப்படுத்தவும், நால்பாமராதி தைலத்தையோ, தூர்வாதி கேர தைலத்தையோ உடலெங்கும் தேய்த்து, சுமார் நாற்பதைந்து நிமிடங்கள் ஊறிய பிறகு, வேப்பம்பட்டை, சரக்கொன்றை பட்டை, புங்கம்பட்டை, அரசம்பட்டை, ஏழிலைப்பாலைப்பட்டை, கருங்காலிக்கட்டை போன்றவை கிடைத்தமட்டில், தண்ணீரில் நன்கு கொதிக்கவிட்டு, குளிப்பதற்காகப் பயன்படுத்தலாம். உடலிலுள்ள எண்ணெய்ப் பிசுக்கை அகற்ற சீயக்காய் தூளுடன், வெந்தயம், செம்பருத்திப்பூ, பூலாங்கிழங்கு, காய்ந்த எலுமிச்சம்பழத் தோல், பச்சைப்பயறு ஆகியவற்றைக் பொடித்துக் கலந்து, அரிசி வடித்த கஞ்சியினோடோ, தயிர்த் தண்ணீரோடோ சேர்த்துக் குழைத்துப் பயன்படுத்தலாம்.

பச்சரிசி, தோலுடன் கூடிய முழு ஊளுந்து, கறுப்பு எள்ளு ஆகியவற்றை 4:2:1 என்ற கணக்கில் எடுத்து ரவை அளவாகப் பொடித்து கஞ்சி காய்ச்சி, அதில் சிறிது பசும்பாலும், சர்க்கரையும் கலந்து காலை உணவாகச் சாப்பிட, உட்புற நெய்ப்பானது நன்கு பாதுகாக்கப்பட்டு, உறுப்புகளின் சுருங்கி விரியும் தன்மையானது குன்றாது நிலைக்கும். இதற்கு “க்ரூசரா” என்று ஆயுர்வேதம் பெயரிட்டுள்ளது. வயோதிகத்தில் காலையில் சாப்பிட ஏற்ற கஞ்சியாகும். அமுக்கராசூரணம் எனும் அஸ்வகந்தா சூரணத்தை சுமார் ஐந்து கிராம் அளவில் எடுத்து, இரவில் சிறிது சூடான பாலுடன் சாப்பிட, நரம்பு மண்டலம் நன்கு வலுப்படும். சர்க்கரை உபாதையில் குறிப்பிடப்படும் பத்து மில்லி லிட்டர் நெல்லிக்காய் சாறுடன், மூன்று கிராம் மஞ்சள் தூள் கலந்து, டீ ஸ்பூன் தேனும் குழைத்து, காலை உணவிற்கு அரை மணி முன் சாப்பிட அதிக அளவில் வெளியேறும் சிறுநீரை நன்கு கட்டுப்படுத்தலாம்.
(தொடரும்)

பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/8/15/w600X390/ayurveda.jpg http://www.dinamani.com/health/health-serials/ayurvadham/2017/jun/22/சிறுநீரைக்-கட்டுப்படுத்த-2723596.html
2720509 தொடர்கள் ஆயுள் காக்கும் ஆயுர்வேதம் நீரிழிவு நோய் கட்டுப்பட... தொட்டாற் சிணுங்கி! டாக்டர் எஸ். சுவாமிநாதன் DIN Thursday, June 15, 2017 12:00 AM +0530
சமீபத்தில் கோவை சென்றிருந்த போது தொட்டாற்சிணுங்கி எனும் தரையோடு படரும் செடியைப் பார்த்தேன். தொட்டதும் இலைகள் சுருங்கிக் கொள்வதைப் பார்ப்பதற்கே அழகாக இருந்தது. இந்தச் செடி பற்றிய முழு விவரங்களையும்  மருத்துவ குணங்களையும் அறிய விரும்புகிறேன்.
-முரளிதரன், சேலம்.

வளரியல்பு - சிறுசெடி

தாவர விளக்கம் - பரந்து விரிந்த வளரியல்பு கொண்ட தாவரம். தாவரம் முழுவதும் சிறு முட்கள் காணப்படும். இவை, நேராகவோ, வளைந்தோ இருக்கும். இலைகள், சிறகு வடிவமான கூட்டிலையானவை. தொட்டால் வாடிவிடும். இதன் இலைகளின் சிறப்பான அமைப்பாலேயே இது தொட்டாற்சிணுங்கி என்கிற பெயர் பெற்றது. மலர்கள் விளிம்புகளில் முள் போன்ற சொரசொரப்பான உரோமங்கள் காணப்படும். கனியில் 5 விதைகள் வரை தட்டையாகக் காணப்படும். இந்தியா முழுவதும் சமவெளிகள், கடற்கரையோரங்களில், சிறிய தொகுப்பாக காணப்படுகின்றன. தமிழகத்தில், ஈரப்பாங்கான இடங்கள், ஆற்றங்கரைகள், சாகுபடி நிலங்களின் கரைகள் மற்றும் தரிசு நிலங்களில் வளர்கின்றன. தொட்டாற்சிணுங்கிக்கு தொட்டால்வாடி, இலச்சி, இலட்சுமி மூலிகை போன்ற மாற்றுப் பெயர்களும் உண்டு. முழுத்தாவரமும் மருத்துவத்திற்குப் பயன்படும்.

மருத்துவப் பயன்கள் மற்றும் மருந்து முறைகள் 
இனிப்பு, துவர்ப்பு, கசப்பு ஆகிய சுவைகளைக் கொண்டது. வெப்பத் தன்மையானது. இலை,  மூலநோய், பவுத்திர புண்களைக் குணமாக்கும்  உடலைத் தேற்றும். இலைச்சாறு, புண்களைக் குணமாக்கும், அதிக மூத்திரத்தைக் கட்டுப்படுத்தும்,  காமம் பெருக்கும், மூலநோய் மற்றும் வாதத்தடிப்பைக் குணமாக்கும்.

நீரிழிவு நோய் கட்டுப்பட-
முழுத்தாவரத்தை உலர்த்தி, தூள் செய்து பத்திரப்படுத்தி வைத்துக் கொண்டு, ஒரு தேக்கரண்டி அளவு, காலையில், வெந்நீருடன் 48 நாட்கள் வரை சாப்பிட்டு வர வேண்டும்.

மாதவிடாயின் போது ஏற்படும் அதிகமான இரத்தப்போக்கை கட்டுப்படுத்த முழுச்செடியையும் இடித்து சாறு எடுக்க வேண்டும். 4 தேக்கரண்டி அளவு சாற்றுடன், இரண்டு தேக்கரண்டி அளவு தேன் கலந்து குடிக்க வேண்டும். தினமும் மூன்று வேளைகள், அவ்வப்போது தயார் செய்த சாறைப் பருக வேண்டும் அல்லது ஒரு கைப்பிடி அளவு இலைகளுடன், சிறிதளவு சீரகம், வெங்காயத்தைச் சேர்த்து, அரைத்து எலுமிச்சம் பழ அளவு சாப்பிட வேண்டும்.

வெட்டுக்காயங்கள் குணமாக- 
முழுச்செடியை அரைத்து சாறு எடுக்க வேண்டும். காயத்தின் மீது சாற்றைத் தடவ வேண்டும். குணமாகும் வரை, தினமும் இரண்டு வேளைகள், தொடர்ந்து தடவி வர வேண்டும். 

கை, கால், மூட்டு வீக்கம் குணமாக-  இலையை அரைத்து பசையாக்கி, பாதிக்கப்பட்ட இடத்தில் தடவ வேண்டும். 

ஒவ்வாமை, தோல் தடிப்புகள் குணமாக-  இலைச்சாறைப் பாதிக்கப்பட்ட இடத்தில் தடவ வேண்டும்.

மதனாதி நிகண்டு 

தொட்டாற்சிணுங்கி செடியை நிழலில் காய வைத்துப் பொடித்தும்  தேன் குழைத்துச் சாப்பிட்டால் பித்தத்தினால் ஏற்படும் பேதி நின்றுவிடும். ரத்தத்தில் கலந்துள்ள விஷசத்துக்களை முறிக்கும். கபம் மற்றம் பித்தங்களால் ஏற்படும் சளி இருமல் ஆகியவற்றுடன் கலந்த மஞ்சள் மற்றும் பச்சை நிறம் ஆகியவை குறையும்.

வீர்யத்தில் தொட்டாற்சிணுங்கி குளிர்ச்சியானது. கசப்பான சுவையுடையது.

தன்வந்தரி நிகண்டு 
தொட்டாற்சிணுங்கி இலையைக் காய வைத்து புண் மீது தூவ, புண் ஆறும். தோல் உபாதைகளுக்குத் தேய்த்துக் குளிக்கலாம். வீக்கத்தின் மீது அரைத்துக் கட்ட, வீக்கம் வடியும். இருமலின் போது கபத்துடன்  ரத்தம் கலந்து வருவது நின்றுவிடும். உள்ளுக்குச் சிறிது தொட்டாற்சிணுங்கி சூரணத்தைப் பாலுடன் சாப்பிட, எரிச்சல் அடங்கும். மூச்சுவிட சிரமமான நிலைகளில் தொட்டாற்சிணுங்கி சூரணத்தை தேன் குழைத்துச் சாப்பிட, மூச்சுக் குழாய்விரியும்.

ஷொடல நிகண்டு 
அரிசி கழுவிய நீருடன் தொட்டாற்சிணுங்கி செடியை அரைத்துக் குடித்தால் பாம்பு விஷம் இறங்கும்.

(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2017/6/14/w600X390/thottar_sinungi.jpg http://www.dinamani.com/health/health-serials/ayurvadham/2017/jun/15/நீரிழிவு-நோய்-கட்டுப்பட-தொட்டாற்-சிணுங்கி-2720509.html
2715506 தொடர்கள் ஆயுள் காக்கும் ஆயுர்வேதம் உண்ணாதீர்கள்... பகைப் பொருட்களை! டாக்டர் எஸ். சுவாமிநாதன் DIN Thursday, June 8, 2017 12:00 AM +0530 பாலுடன் மீன், உளுந்துடன் தயிர், இரவில் தயிர், உப்புடன் பால்பொருட்கள் போன்றவை பகைப்பொருட்கள் என்று எழுதியிருந்தீர்கள். அப்படி சாப்பிட்டால் உடலில் என்ன நேரும்? என்னென்ன வியாதிகள் வரும்? ஏனெனில் என் மனைவி (5 அடி 90 கிலோ), மகன் (5. 6 அடி எடை 105கிலோ) இருவரும் இரவிலும் பகலிலும் இட்லி, தோசை, சப்பாத்தியுடன் கெட்டித்தயிர் இல்லாமல் சாப்பிடுவது இல்லை. இதனால் என்ன கெடுதிகள் ஏற்படும்?  

சந்தான கோபாலன், சென்னை-8.

ஒன்றோடு ஒன்று சேராத உணவுப்பொருட்களைச் சாப்பிடும் போது அவை பகைப் பொருட்கள் என்ற பெயரில் அழைக்கப்படுகின்றன. அவற்றை உண்ணும்போது - உடலில் உள்ள தோஷங்களாகிய வாத- பித்த- கபங்களை அவை இருக்கும் இடத்திலிருந்து நெகிழ வைத்துக் கிளறி விட்டு அதை முற்றிலும் வெளிப்படுத்தாமல் உடலிலேயே தேக்கி வைக்கும் பொருள்களே பகைப்பொருட்கள் எனப்படும். அந்த பொருட்கள், மனிதர்களுக்கு ஆதாரமாகி உடலின் நிலையை நிறுத்தக் கூடிய ஏழு தாதுக்களான- ரஸம், ரக்தம், மாமிசம், மேதஸ், எலும்பு, மஜ்ஜை, மற்றும் விந்து ஆகியவற்றிற்கு எதிரிடையானவை. இரு உணவுப்பொருட்களின் சக்தி வாய்ந்த பரஸ்பர குணங்கள் ஒன்றுக்கொன்று விஷமமாயிருந்தால் (எதிரிடையானது), சமமாயிருத்தல் (மாறுபடாத ஒரே தன்மையுடையது),

சிலகுணங்கள் சமமாகவும், சில விஷமமாகவும் கலந்திருத்தல், மேலும், செய்முறை, அளவு, தேசம், காலம், சேர்க்கை அதுபோல் இயற்கையாகவே ஒவ்வாதிருத்தல் ஆகிய காரணங்களால் பகைமை ஏற்படுகிறது. 

 இவற்றிற்கு உதாரணமாக - பால், கொள்ளுடன் விஷம குணம் கொண்டிருப்பதால் பகையாகிறது. பால், பலாப்பழத்துடன் சம குணங்களால் பகையாகிறது. பால், மீனுடன் சில விஷமமாகவும் சில சமமாகவுமுள்ள குணங்களால் பகையாகிறது.

தயிரைச் சூடாக்குவது செய்முறையால் பகை குணமாகும். சம அளவில் தேனும் நெய்யும் சேர்ப்பது அளவால் எதிரிடையானது. உவர்ப்பு நிலமும் நீரும் தேசத்தால் ஒன்றுக்கொன்று ஒவ்வாதவை. இரவில் சத்துமாவைப் புசிப்பது காலத்தால் தீமையானது. இதே சத்துமாவை இடை இடையே நீர் அருந்திச் சாப்பிட்டால் சேர்க்கையால் பகைகுணமாகிறது. இயற்கையாகவே வாற்கோதுமை அல்லது பார்லியைத் தனியாக சமைத்துப் புசித்தாலும் கேடுவிளைவிக்கும்.

 பகைமையிலுள்ள பொருட்களாலான உணவு, வைசூரி, உடல்வீக்கம், வெறி, பெரியகட்டி, குன்மம், எலும்புருக்கி நோய் போன்றவை ஏற்படுத்தும். உடல் ஒளி, வலிமை, நினைவாற்றல், அறிவுப்புலன், மனோபலம் ஆகியவற்றை அழித்து, காய்ச்சல். இரத்தக்கசிவு, எண்வகைப் பெருநோய்களான- வாதநோய், மூலம், குஷ்டம், நீரிழிவு, பவுத்திரம், நீர்ப்பீலிகை, கிராணி, நீரடைப்பு ஆகியவற்றைத் தோற்றுவிக்கும். நஞ்சைப் போல உயிரையும் மாய்க்கும்.

 மேற்குறிப்பிட்ட உபாதைகளை நீக்குவதற்குத்தக்க மருந்துகளைப் பயன் படுத்தி, வாந்தி செய்வித்தல், பேதிக்குக் கொடுத்தல் போன்றவற்றை விரைவில் செய்து, உடலைச் சுத்தம் செய்ய வேண்டும், அல்லது அத்தகைய பகைமைப் பொருட்களுக்கு எதிரிடையான பொருட்களால் நோயைத் தணிக்கச் செய்வது அல்லது அந்தப்பொருட்களைக் கொண்டே முன்னதாக உடலைப் பண்படுத்த வேண்டும் என்று ஆயுர்வேதம் அறிவுறுத்துகிறது. 

பகைப்பொருட்களும் சிலருக்கு தீமையை உண்டு பண்ணுவதில்லை. உடற்பயிற்சி செய்பவர்கள், எண்ணெய்ப் பசையுண்டாக்கும் சிகிச்சை செய்து கொண்டவர்கள், பசித்தீ நன்கு வேலை செய்கின்ற நிலையிலுள்ளவர்கள், நடுவயதை உடையவர்கள், நல்ல உடல் வலிமை பெற்றவர்கள் இவர்கள் விஷயத்தில் பகைப்பொருட்கள் தீங்கை விளைவிப்பதில்லை. அதுபோலவே உடலுக்கு ஏற்ற உணவும், அளவில் குறைந்த உணவும் கூட விரோதகுணம் உள்ளதாயினும் கெடுதலைத் தருவதில்லை.

தீங்கிழைக்கும்  இயல்புள்ள பொருட்களை உண்ணும் பழக்கத்தை நீக்க, முன்பு உண்ட பொருளில் நாலில் ஒரு பங்கை அல்லது சிறிது சிறிதாகக் குறைத்து அதற்குப் பதிலாக நன்மை பயக்கும் பொருட்களைப் பயன்படுத்த வேண்டும். அப்படியே இடையில் ஒரு நாள், இரண்டு நாள், மூன்று நாள் என முறையே விட்டுவிட்டு பழக்கப்படுத்திக் கொள்ள வேண்டும். இதனால் தோஷங்கள் விலகிக் குணங்கள் வளர்கின்றன. தீங்கும் ஏற்படுவதில்லை.
(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/9/5/w600X390/vegetables_and_fruits.jpg http://www.dinamani.com/health/health-serials/ayurvadham/2017/jun/08/உண்ணாதீர்கள்-பகைப்-பொருட்களை-2715506.html
2711899 தொடர்கள் ஆயுள் காக்கும் ஆயுர்வேதம் காச நோய்க்கு மருந்து! டாக்டர் எஸ். சுவாமிநாதன் DIN Thursday, June 1, 2017 12:00 AM +0530 மக்கள் நெருக்கடியுடன் வாழும் மும்பை, டில்லி, சென்னை ஆகிய நகரங்களில் TB நோய் அதிக அளவு ஏற்படக்கூடிய சாத்தியக் கூறுகள் உள்ளன. இதற்கு ஆயுர்வேதத்தில் சிகிச்சை உள்ளதா?

-சுப்ர. அனந்தராமன், 
புட்டபர்த்தி.

"க்ஷதஜம்' என்றும் "க்ஷயஜம்' என்றும் இருவகை இருமலைப் (காசநோய்) பற்றிய விவரம் சரகஸம்ஹிதை எனும் நூலில் காணப்படுகிறது.  இவை இரண்டும் நவீன ஆராய்ச்சியாளர்கள் கூறும் TUBERCULOSIS எனும் உபாதைக்குறிய லட்சணங்களுடன் அதிகம் ஒத்து வருகின்றன. Mycobacterium tuberculosis எனும் பாக்டீரியாவால் பாதிக்கப்படும் நுரையீரலால் ஏற்படும் இந்த உபாதையில் கடும் இருமலும் காய்ச்சலும் சளியுடன் ரத்தமும், உடல்மெலிந்து போவதும் காணப்படும் எனும் நவீன ஆராய்ச்சியாளர்களின் கூற்று அனைத்தும் இந்த இருவகை காச நோயிலும் ஏற்படுவதை ஆயுர்வேதமும் கூறுகிறது. ஆனால் ஆயுர்வேதத்தில் பாக்டீரியா பற்றிய விவரம் எடுத்துரைக்கப்படவில்லை என்றாலும், இந்நோய் உருவாவதற்கான காரணங்களால், நுண்கிருமிகள் எளிதாக மனித உடலில் பற்றிவிடக் கூடிய ஆபத்தை துல்லியமாக எடுத்துக் கூறுகிறது. 

1) சாகசம் எனும் தன் சக்திக்கு மீறிய உழைப்பும் செயல்களும் 

2) வேகசந்தாரணம் எனும் இயற்கை உந்துதல்களாகிய மலம், சிறுநீர், குடல்காற்று, தும்மல், தண்ணீர் தாகம், பசி, தூக்கம், இருமல், பெருமூச்சு, கொட்டாவி, கண்ணீர், வாந்தி, விந்து ஆகியவற்றை வலுக்கட்டாயமாக அடக்குவதாலும்,

3)க்ஷயம் எனும் ரஸ - ரக்த மாம்ஸ - மேத - எலும்பு- மஜ்ஜை- விந்து ஆகியவற்றின் க்ஷீணத்தாலும்,

4)விஷமாஸனம் எனும் தப்பும் தவறுமாக உணவுகளை உண்பதாலும்-
காச நோய்க்கான விதையை மனிதர்கள் தம்முடைய உடலில் விதைத்துக் கொள்வதால், Mycobacterium tuberculosis எனும் நுண்கிருமியானது எளிதாக உள்நுழைவதற்கான வாய்ப்பை ஏற்படுத்திவிடுகிறது. 

க்ஷதஜகாஸத்தின் ஆரம்ப நிலையில் சளி இல்லாத இருமலாக ஆரம்பித்து, பின்னர் சளியுடன் ரத்தம் கலந்த இருமலாக மாறிவிடுகிறது. தொண்டையில் கடும்வலியும், மார்பு  பிளக்கப்படுவதைப் போன்ற வேதனையும் காணும். ஊசியால் உடல் துளைக்கப்படுவது போலவும், தொட்டால் உடல் வலிதாங்க முடியாமலும், கை மற்றும் கால்விரல் பூட்டுகளில் கடும் வலியும், காய்ச்சலும், மூச்சிரைப்பும், தண்ணீர் தாகமும், குரல் கம்மலும், இருமலானது புறாவுக்குச் சமமான சத்தமுடையதாகவும்  ஏற்படும். சாகசம் எனும் முன் கூறிய காரணத்தால் இந்த உபாதை ஏற்படுவதாக ஆயுர்வேதம் கூறுகிறது. 

 பின் கூறிய மூன்று காரணங்களால் ஏற்படும் க்ஷயஜகாஸத்தில், துர்நாற்றத்துடன் சளி, பச்சை அல்லது சிவப்பு நிறத்துடன், சீழ் போன்ற நிலையில் வெளியேறும். அதிக அளவில் உணவு சாப்பிட்டாலும், உடல்மெலிந்து, பலவீனமடையும். காய்ச்சல், ருசியின்மை, ஜலதோஷம் போன்றவையும் காணும்.

"அகஸ்தியஹரீதகீ' எனும் லேகியம் இதற்கு சிறந்த மருந்தாகும். தோல் சுருக்கம், நரைமுடி, நிறம் குறைதல் ஆகியவை குணமாகும். மேலும் ஆயுளை நீட்டி, உடல் வலுவைக் கூட்டும். காசநோய், ஆஸ்துமா, விக்கல், விட்டுவிட்டு வரும் முறைக் காய்ச்சல், மூலம், கிராணி, இதய உபாதைகள், ருசியின்மை மற்றும் மூக்கிலிருந்து ஒழுகும் ஜலதோஷம் போன்றவையும் குணமாகும். காசநோயால் பாதிக்கப்பட்டவர்கள் சுமார் பத்து கிராம் வரை காலை, மாலை வெறும் வயிற்றில் சாப்பிடலாம். 

வியாக்ரயாதி லேகியம், சிதோபலாதி சூரணம், தாளீசபத்ராதி சூரணம், ஹரித்ரா கண்டம், வியோஷாதி வடகம், தசமூலகடுத்ரயாதி கஷாயம், பலாஜீரகாதி கஷாயம், நயோபாயம் கஷாயம், இந்துகாந்தம் எனும் நெய்மருந்து, தேகராஜாதி தைலம், தசமூலரஸாயனம், வஸிஷ்ட ரஸôயனம் எனும் லேகியம் போன்ற பல மருந்துகள் விற்பனையில் உள்ளதால், நோயாளிக்குத் தக்கவாறு இம்மருந்துகளில் 2-3 தேர்ந்தெடுத்துச் சாப்பிடலாம்.

பசியைத் தூண்டி, உடல் வனப்பை அதிகரித்து, உட்புறக் குழாய்களைச் சுத்தப்படுத்தி உடலை வலுவூட்டும் மேற்கூறிய மருந்துகள், காச நோயாளிகளுக்குத் தரமானவை.
(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2017/2/24/w600X390/TB_day.jpg http://www.dinamani.com/health/health-serials/ayurvadham/2017/jun/01/காச-நோய்க்கு-மருந்து-2711899.html
2707961 தொடர்கள் ஆயுள் காக்கும் ஆயுர்வேதம் காதில் இரைச்சல்... என்ன செய்ய வேண்டும்? டாக்டர் எஸ். சுவாமிநாதன் DIN Thursday, May 25, 2017 12:00 AM +0530 வயது 70. எனக்கு சர்க்கரை வியாதி கடந்த 8 ஆண்டுகளாக உள்ளது. கடந்த சில வருடங்களாக வலது காதில் இரைச்சல் இருக்கிறது. ஆனால் சில நாட்களாக இரண்டு காதுகளிலும் இரைச்சல் அதிகமாக இருக்கிறது. இரவில் தூங்க முடிவதில்லை. இந்த இரைச்சல் எதனால் ஏற்படுகிறது? இதை குணப்படுத்துவது எப்படி?

-ர.சந்திரன், சென்னை -49.

வாயுவினுடைய ஒரு முக்கியப் பகுதியாக காது இருப்பதாக ஆயுர்வேதம் கூறுகிறது. காதினுடைய உட்பகுதிகளில் அமைந்துள்ள நுண்ணிய எலும்புகளும் நரம்புகளும் இடைவெளிகளும் வாயுவிற்கு இடமளித்து அதன் செயல்திறனை மேம்படுத்தித் தருகின்றன. வாயுவினுடைய வறட்சி, லேசான தன்மை, குளிர்ச்சி போன்ற குணங்களின் சீற்றத்தால் நீங்கள் குறிப்பிடும் இரைச்சல் ஏற்பட வாய்ப்பிருக்கிறது. நெய்ப்பும், கனமும், சூடும் இக்குணங்களுக்கு எதிரான குணம் கொண்ட தன்மையுடையதால், அவற்றை மருந்தாகவும், செயலாகவும், உணவாகவும் நாம் மாற்றி அமைக்கும் போது, காதிலுள்ள இரைச்சல் குறையலாம்.

மருந்துகளில் இந்துகாந்தம் க்ருதம் எனும் நெய் மருந்தை சுமார் 15 மி.லி. அளவில் உருக்கி, காலையில் வெறும் வயிற்றில் சாப்பிட, நரம்பு மண்டலத்தை வலுப்படுத்தும். மாலையில் விதார்யாதி க்ருதம் எனும் நெய் மருந்தை உருக்கி, சுமார் 15 மி.லி. அளவில் வெறும் வயிற்றில் சாப்பிட, நரம்பு மண்டலத்தையும், காதினுள் அமைந்துள்ள எலும்புகளையும் புஷ்டிப்படுத்தி வறட்சி, லேசான தன்மை ஆகியவற்றை அங்கிருந்து அப்புறப்படுத்தி நெய்ப்பையும் வலுவான கனத்தையும் அதிகப்படுத்தும். இவற்றைச் சாதிக்க, இம் மருந்துகளின் தொடர்ச்சியான உள்வரவானது சுமார் 5-6 மாதங்களுக்காவது தேவைப்படும்.

வாசனைக்கோஷ்டம் என்ற மருந்துச்சரக்கை ஒரு மெல்லிய வெள்ளைத் துணியால் சுற்றி, நல்லெண்ணெய்யில் நனைத்துத் திரி போலாக்கி, அதைக் கொளுத்தி எரியும் போது சொட்டு சொட்டாக ஜ்வாலையின் மேல் நல்லெண்ணெய்யை விட்டு கொண்டே வர, கீழே சுடர் எண்ணெய் விழும். அந்த எண்ணெய்யைச் சேகரித்து வைத்துக் கொண்டு அதைக் காதில் நேரிடையாகவிட்டோ, பஞ்சில் நனைத்துக் காதில் சொருகிக் கொண்டோ வர, குளிர்ச்சியால் ஏற்படும் காதுவலி, சத்தம், மென்னி விரைப்பு, தோள்பட்டை வலி இவை நீங்கும்.

தலைக்கு வெது வெதுப்பாக க்ஷீரபலா தைலம் தேய்த்துக் குளிக்க, காதினுள் ஏற்படும் இரைச்சலைக் குறைக்கலாம்.

செயல்களில் - பேருந்து, இருசக்கரவாகனம், ரயில், விமானம் ஆகியவற்றில் பயணம் செய்ய நேர்ந்தால், காதின் நுட்பமான உணர்ச்சி மிக்க தோல் அதிக சூட்டையும் அதிகக் குளிர்ச்சியையும் தாங்காது என்பதால், காதினுடைய வெளிப்புற ஓட்டை மட்டும் அடையும் அளவில், உருண்டையான பஞ்சை வைத்து  அடைத்துக் கொள்வது அவசியமாகும். பயணம் முடிந்ததும் எளிதில் வெளியே எடுத்துவிடும் வகையில் காதை அடைத்துக் கொண்டால் போதுமானது. குளிர்ந்த நீரை தலைக்குவிட்டுக் கொண்டு குளிக்க நேர்ந்தால், குளித்த பிறகு பஞ்சினால் காதை, இதமாகத் துடைத்து நீரை அகற்றிவிட வேண்டும்.

உணவில் - குடலில் வாயுவின் சீற்றத்தை அதிகப்படுத்தும் காரம், கசப்பு, துவர்ப்புச் சுவைகளைக் குறைப்பது நலம். வாயுவின் ஓட்டத்தை குடலிலிருந்து மற்றப் பகுதிகளுக்குத் தள்ளிவிடும். துவரம் பருப்பு, கொண்டைக்கடலை, காராமணி, வேர்க்கடலை ஆகியவற்றின் உபயோகத்தையும் குறைத்துக் கொள்வதும் நல்லதே. உணவை வெது வெதுப்பாகச் சாப்பிடுவதும், நேரம் தவறாமல், பசி எடுத்துள்ள நிலையில் சாப்பிடுவதும், உணவின் இறுதியில் வெந்நீர் அருந்துவதும், வாயுவை கோபமுறச் செய்யாமல் தடுக்கும் வழிகளாகும்.

இன்றைய வாழ்க்கை முறையில், வெளிப்புற நரம்பு மண்டலத்தை பலவீனப்படுத்தும் செயல்களும் சர்வசாதாரணமாகிவிட்டன. வருங்காலத்தில் அவர்கள் ஆயுர்வேதம் காட்டும் வாழ்க்கை முறைக்கு, மாற வேண்டிய அவசியம் ஏற்படலாம். 

(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2017/4/17/w600X390/ears-closed.jpg http://www.dinamani.com/health/health-serials/ayurvadham/2017/may/25/காதில்-இரைச்சல்-என்ன-செய்ய-வேண்டும்-2707961.html
2703913 தொடர்கள் ஆயுள் காக்கும் ஆயுர்வேதம் அரிப்பும் தடிப்பும் குறைய கருந்துளசி! டாக்டர் எஸ். சுவாமிநாதன் DIN Thursday, May 18, 2017 12:00 AM +0530 எனது மகன் வயது 30. டிரைவர். 5 ஆண்டுகளாக அவனுக்கு அரிப்பு, தடிப்பு இருந்து வருகின்றது. ஆங்கில மருந்து, நாட்டு மருந்துகள் சாப்பிட்டு வருகிறான். எது சாப்பிட்டாலும் இரண்டு, மூன்று மாதங்கள் நன்றாக இருக்கின்றது. பின்பு மீண்டும் அரிப்பு, தடிப்பு ஏற்படுகின்றது. அதனால் ரொம்பவும் சிரமப்படுகிறான். இதனை குணப்படுத்த ஆயுர்வேதத்தில் ஏதேனும் வழி உள்ளதா?

-சா. முகம்மது, சிதம்பரம்.

கபம் எனும் தோஷத்தினுடைய நீர்த்த நிலை, இரத்தத்தில் ஊடுருவும் தறுவாயில், தோலில் தடிப்பும் அரிப்பும் காணத் தொடங்கும். இரத்தத்தினுடைய இயற்கை குணமாகிய சூடும், கபத்தினுடைய இயற்கை குணமாகிய குளிர்ச்சியும், ஒன்றோடு ஒன்று கலக்கும் போது, எதிர்மறையான இரு குணங்களின் சேர்க்கையினால், உடல் உட்புற தாதுக்களில் ஏற்படும் மாற்றமானது, தோலில் இது போன்ற அரிப்பும் தடிப்பும் ஏற்படக் காரணமாகலாம். எண்ணற்ற உணவுப் பொருட்களின் துகள்களைச் செரிமானம் செய்யும் வயிற்றுப் பகுதியின், சுகாதாரமற்ற உட்புற சூழலாலும், அதிலிருந்து ஏற்படும் பிரதிபலிப்பின் சாரமாக தடிப்பும், அரிப்பும் ஏற்படக் கூடும். அதனால், வயிற்றினுடைய செரிமான கேந்திரத்தில் உணவின் வழியாக அழுக்குப் படியாமலும் இரத்தத்தில் ஏற்பட்டுள்ள குண  எதிரிகளைப் பிரிப்பதும், வெளியேற்றுவதும் சிகிச்சையின் முக்கிய நோக்கமாக அமைத்து செயல்பட்டால், தங்கள் மகனுக்கு ஏற்பட்டுள்ள பிரச்னைக்குத் தீர்வு கிடைக்கலாம். 

திக்தகம் எனும் நெய் மருந்தையோ, மஹாதிக்தகம் எனும் நெய் மருந்தையோ சுமார் 15 மி.லி. முதல் 25 மி.லி. வரை உருக்கி, காலையில் வெறும் வயிற்றில் சுமார் 48 நாட்கள் சாப்பிட, உகந்த மருந்தாகும். குடலில் வாயுவினுடைய நடையானது, கீழ் நோக்கிச் செல்லுதலும், பசி நன்றாக எடுப்பதும், மலத்தில் நெய்யினுடைய வரவானது பிசுபிசுப்பை ஏற்படுத்துவதும், மலம் கட்டை பிடிக்காமல் வெளியேறுவதும், நெய் உடலில் நன்றாக செரிமானமாகி கலந்துள்ள நிலையைக் குறிக்கிறது. 

மேற்குறிப்பிட்ட நிலையை உடல் அடைந்ததும், இரத்தத்திலுள்ள குண எதிரிகளைப் பிரிப்பதற்காக, படோலமூலாதி எனும் கஷாய மருந்தால், வயிற்றிலுள்ள அழுக்குகள் சுரண்டப்பட்டு, 2-3 முறை பேதியாகி, குடல் சுத்தமடைவதுடன், இரத்தமும் சுத்தமாகிறது.

அரிப்பும், தடிப்பும் நீங்க, எண்ணற்ற ஆயுர்வேத மருந்துகள் இருந்தாலும், உடலின் தன்மையை துல்லியமாக எடுத்துக் காட்டும் நாடித்துடிப்பிற்கு ஏற்ப, ஆராக்வதாதி கஷாயம், மஞ்சிஷ்டாதி கஷாயம், சோணிதாமிர்தம் கஷாயம், நிம்பாதி கஷாயம், திக்தகம் கஷாயம், மஹாதிக்தகம் கஷாயம், படோல கடு ரோஹிண்யாதி கஷாயம் போன்றவற்றில் ஒன்றிரண்டைத் தேர்வு செய்து மருத்துவர்கள் அளிப்பதை கால நிர்ணயத்துடன், பத்தியத்துடனும் சரியாகச் சாப்பிடுவது அவசியமாகும்.

குடல் சுத்தி முறைகளை அடிக்கடி கடைப்பிடிக்க வேண்டிய நிர்பந்தம் சிலருக்கு ஏற்படும். அதனால் வயிற்றில் ஏற்படும் வெற்றிடமானது, வாயுவைத்  தூண்டிவிடும் என்பதால் நெய் மருந்துகளை விட்டுவிடாமல் சாப்பிட வேண்டிய நிலைகளும் ஏற்படும். மாணிபத்ரம் எனும் லேகிய மருந்தை, தோல் உபாதையுள்ளவர்கள், மருத்துவர் ஆலோசனைப்படி சாப்பிட்டு, வயிற்றைச் சுத்தப்படுத்திக் கொள்ளுதல் அவசியமாகும்.

 புலால் உணவு, தயிர், நல்லெண்ணெய், கடுகு வெந்தும் வேகாததுமான உணவு, முதல் நாள் உணவைச் சுட வைத்து அடுத்த நாள் சாப்பிடுவது, காய்ந்து உலர்ந்து போன கறிகாய்கள், அதிகம் வெந்து போன உணவு போன்றவை தவிர்க்கப்பட வேண்டியவை. மனதில் ஏற்படும் கொந்தளிப்பு, அது கோபமாக மாறி மற்றவர்களுடன் சண்டை செய்வது, வருமானம் குறைந்தால் துக்கப்படுவது போன்ற மனதைச் சார்ந்த விஷயங்களையும் அடக்கி அமைதியுடனிருத்தல், லாஹிரி வஸ்துக்களைத் தவிர்த்தல், தீய நண்பர்களின் சேர்க்கையைத் தவிர்த்தலும் அவசியமாகும்.

இரத்தத்திலுள்ள விஷத்தை முறிக்கும் சக்தி கருந்துளசிக்கும் மிளகுக்கும் உள்ளதாக நம்பப்படுகிறது. அதனால் உங்கள் மகன் கருந்துளசியை ஒரு கைப்பிடி அளவு எடுத்து, 4 மிளகுடன் காலை, மாலை சாப்பிட்டு வர, அரிப்பும் தடிப்பும் குறைய வாய்ப்புள்ளது. தோலின் சீதோஷ்ண சகிப்புத் தன்மை வளர, ஆயுர்வேத மூலிகைத் தைலமாகிய நால்பாமராதி தைலம் அல்லது தினசவல்யாதி தைலத்தையோ உடலில் தடவி, அரைமணி நேரம் ஊற வைத்துக் குளிப்பதை வழக்கமாக்கிக் கொள்ளலாம். வேப்பம் பட்டை, அரசம்பட்டைகளை தண்ணீரில் நன்கு கொதிக்கவிட்டு, குளிப்பதற்குப் பயன்படுத்துவதும் நல்லதே.
(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2017/5/17/w600X390/karunthulasi.jpg http://www.dinamani.com/health/health-serials/ayurvadham/2017/may/18/ayurvedha--karunthulasi-treatment-2703913.html
2700368 தொடர்கள் ஆயுள் காக்கும் ஆயுர்வேதம் கருத்தரிக்க எளிய கை வைத்தியமுறைகள்!  டாக்டர் எஸ். சுவாமிநாதன் DIN Thursday, May 11, 2017 03:45 PM +0530 குழந்தை இல்லாமல் கஷ்டப்படும் எண்ணற்ற பெண்கள், பலவித நவீன மருத்துவ முறைகளைச் செய்து, கருப்பை பாதிக்கப்பட்டு, குழந்தையும் இல்லாமல், உடல் பருமன், மாதவிடாய் சரி வர ஏற்படாமல் துன்புறும் நிலை இன்று மிக அதிக அளவில் காணப்படுகிறது. ஒரு பெண் கருவுற்றவளாவதற்கு நம் பாரம்பரிய இந்திய மருத்துவத்தில் ஆலோசனைகள் கூறப்பட்டுள்ளனவா?

-மீனாட்சிகுலசேகரன், சேலம்.

தஞ்சையை ஆண்ட சரபோஜி மன்னர் (1798-1832) மேல்நாட்டு வைத்திய நூல்களையும், மருத்துவர்களையும் கூட வைத்துக் கொண்டு, அதற்கென ஆஸ்பத்திரிகளையும் நிறுவி, பல ஆராய்ச்சிகளைச் செய்து, சுமார் 4000 முறைகளைத் தேர்ந்தெடுத்து 18 சுவடிகளில் எழுதி வைத்திருக்கிறார். அவற்றைத் தஞ்சாவூர் சரஸ்வதி மஹால் நிர்வாகத்தார் புத்தக வடிவில் கொண்டுவர பெரும் முயற்சிகளைச் செய்திருக்கிறார்கள். அதில் இரண்டாவது வெளியீட்டில் - மலட்டு நோய்க்கான மருந்து வகைகளும் காணப்படுகின்றன. அவற்றிலிருந்து திரட்டிய சில சுவாரஸ்யமான தகவல்கள்-

1. வெல்லம் 1 கட்டி
2. குப்பைமேனிச் சாறு 150 மி.லி.
3. சுத்தமான பொரித்த பெருங்காயம்  3 கிராம்  

இவற்றை ஒன்று கலந்து ஒரு புதுச்சட்டியிலிட்டு, ஒரு வெள்ளைத் துணியினால் மூடி, இளம் வெயிலில் வைத்து, மாதவிடாய் காலத்தில் மூன்று நாளும் சாப்பிட்டு வர, கருப்பை மலட்டுத்தன்மை நீங்கும். மூன்று முறை செய்தால் பெண் கர்ப்பமடைவாள்.  

பருத்திக் கொட்டையை ஒரு கொட்டைப்பாக்கு அளவெடுத்து அரைத்து, அதை ஒரு கோழி முட்டை வெள்ளைக் கருவில் குழப்பிச் சாப்பிட, கர்ப்பம் உண்டாகாமல் தடுக்கும் நீர்க்கட்டிகள் உடையும். அடுத்த மாதம் செப்பு நெருஞ்சியின் வேரை பால் விட்டரைத்துச் சாப்பிடக் குழந்தை உண்டாகும். தாயாருக்கும் செüக்கியமுண்டாகும். 

ஆடாதோடை இலை, சிறுகுறிஞ்சி இலை, மலர்ந்த முருங்கைப்பூ இம் மூன்றையும் சிவந்த நிறமுள்ள பசுவின் பாலிலரைத்துக் குழப்பி, மூன்று நாள் சாப்பிட, பெண்ணுக்குக் கர்ப்பம் உண்டாகும். 

வெள்ளைப்பூண்டு, ஓமம், சிற்றரத்தை, சுக்கு, பெருங்காயம், மிளகு இவற்றை  சமமாக எடுத்து பேய்க்கொம்மட்டி (கும்மட்டி) சாறு விட்டுக் கலந்து நன்றாக அரைத்துச் சிறிது தாளித்து அப்படியே விழுங்கிவிட்டு கொம்மட்டி இலையை அரைத்து வயிற்றில் கட்ட மலட்டுத்தன்மை நீங்கும்.

எருக்கம் பழுப்பு, கழற்சிக்கொடி, ஆடாதோடை இலை,  பிரண்டை, சிறுபாகல், குறிஞ்சியிலை இவற்றை சமமான எடையளவில் எடுத்து நன்றாக இடித்துச் சாறு பிழிந்து அதனுடன் நல்ல புஷ்டியுள்ள சிவப்பு நிறப்பசுவின் பால் 150 மி.லி. சேர்த்துச் சாப்பிட, மலட்டுத் தன்மை நீங்கி, பெண்ணுக்கு கர்ப்பம் தரிக்கும். 

மேற்கண்ட இலைச் சாறு எல்லாம் சேர்த்து 50 மி.லி. எடுத்துக் கொள்ளவும்.

 தேங்காயெண்ணெய் 100 மி.லி.
  நல்லெண்ணெய்- 100 மி.லி.
  ஆடாதோடைச் சாறு- 100 மி.லி.
 வேப்பிலைச் சாறு- 150 மி.லி.

இவற்றையெல்லாம் ஒரு பாத்திரத்திலிட்டு அடுப்பின் மீதேற்றிப் பக்குவமாக எரித்து வடித்து இந்த எண்ணெய்யை 12 நாள் சாப்பிட்டு வர,  சாப்பிடும் பெண்ணுக்குப் பிள்ளையுண்டாகும்.

பத்தியம்: புளிப்பு, கசப்பு தவிர்க்கவும். 

பிரமியிலைச் சாறு 150 மிலி  எடுத்து சூரியக் கதிரிலும் சந்திரக் கதிரிலும் வைத்து, அதைப் பருகி வர பெண்ணுக்குக் கர்ப்பமுண்டாகும். அதனுடன் செüக்கியமும் உண்டாகும். 

துத்தி இலையை வாய் பேசாமல் கடவுளைத் தொழுது பறித்து, நெல்லைக் குத்தி அரிசி செய்து, அதனுடன் நன்றாக இடித்து வைத்துக் கொள்ளவும். இதை நல்லெண்ணெய்யில் குழைத்துச் சாப்பிட, ஆண் குழந்தையுண்டாகும், நெய்யில் குழைத்துச் சாப்பிட பெண் குழந்தையுன்டாகும்.

தீட்டான மூன்று நாட்களிலும் இரவு பட்டினியாயிருந்து மறுநாள் விடியற்காலையில் தாமரைப் பூவைப் பசும் பாலில் அரைத்து அம் மூன்று நாளும் பருகி வரக் குழந்தை உண்டாகும்.

இந்துப்பு, காசுக்கட்டி, பூவரசம்பட்டை இம் மூன்றையும் எடுத்து தண்ணீர்விட்டு நன்றாக அரைத்து தீட்டு முடிந்து தலை முழுகிய நாலாந்தினம் முதல், காலையும் மாலையும் நான்கு நாள் இம் மருந்தைச் சாப்பிட்டு வர கர்ப்பமுண்டாகும். இவை அனைத்தும் நவீன மருத்துவமுறைகளின் மூலம் கர்ப்பம் அடைவதற்காகச் செய்யும் முயற்சிகளுடன், செய்து கொள்ளக் கூடிய எளிய கை வைத்திய முறைகளாகும். தயாரித்து விற்பனையிலுள்ள பலசர்பிஸ் எனும் நெய் மருந்து, தான்வந்திரம் கஷாயம், சதாவரீகுலம், தாடிமாதிகிருதம் போன்ற மருந்துகளும் கர்ப்பம் தரிப்பதற்கு உதவிடக் கூடியவை.

(தொடரும்)

]]>
http://images.dinamani.com/uploads/user/imagelibrary/2016/9/2/w600X390/pregnancy.jpg http://www.dinamani.com/health/health-serials/ayurvadham/2017/may/11/ayurvedha-treatment--question-and-answers-2700368.html
2695495 தொடர்கள் ஆயுள் காக்கும் ஆயுர்வேதம் தீராத மலச்சிக்கல் தீர... டாக்டர் எஸ். சுவாமிநாதன் DIN Thursday, May 4, 2017 12:00 AM +0530 என் வயது 78. இளம் வயதில் கண்ட கண்ட ஹோட்டல்களில், கண்டபடி வாய்க்கு ருசியான விதம்விதமாக மசால் சேர்த்த உணவுப் பண்டங்களை நேரம் கெட்ட நேரத்தில் உட்கொண்டதால் எனது கல்லீரல் பழுதடைந்து பித்தப்பை நீக்கப்பட்டுள்ளது. இப்போதும் கூட தீராத மலச்சிக்கல். எந்தவிதமான மலமிளக்கி மருந்துகள் உட்கொண்டாலும் திருப்திகரமாக மலம் வெளியேறுவது இல்லை. மாதம் மூன்று முறையாவது கடும் உபவாசம் இருக்கிறேன். இதுவும் மலச்சிக்கலுக்கான காரணமாக இருக்குமா? மேலும் நிரந்தர சளித்தொல்லையால் அவதிப்பட்டு வருகிறேன். இவற்றுக்கு ஆயுர்வேதத்தில் தீர்வு உள்ளதா?

-சங்கர வெங்கட்ராமன், சென்னை-8.

வயோதிகத்தில் வாயுவின் குணங்களாகிய வறட்சி, லேசானதன்மை, குளிர்ச்சி, சொரசொரப்பு, ஊடுருவும் தன்மை, நகரும்தன்மை போன்றவை இயற்கையாகவே குடலில் ஆதிக்கம் செலுத்துவதால், கடும் மலச்சிக்கலால் அவதியுற வேண்டிய நிலை ஏற்படுகிறது. பித்தப்பை நீக்கப்பட்டுள்ளதால், நெய்ப்புத்தன்மையுடைய தேங்காய்ப்பால், எள்ளு, உளுந்து போன்ற பண்டங்களின் வரவானது, குடலில் எந்த அளவிற்கு உள்வாங்கப்பட்டு, குடலில் நெய்ப்பூட்டி, அவற்றின் அசையும் தன்மையைக் குறைவில்லாது நடத்திச் செல்லும் என்பதை நம்மால் அறிய முடியாது. செரிமானத்தை விரைவுபடுத்தும் பித்தத்தினுடைய சிறிது நெய்ப்பு எனும் தன்மையையும், மலத்தை இளக்கக் கூடிய குணமும் சீராக்கினால், உங்களுக்கு ஏற்பட்டுள்ள பிரச்னையை ஒருவாறு சமாளிக்கலாம். சாதாரண ஆனால் சுத்தமான பசு நெய்க்கு, பித்தத்தினுடைய சிறிய நெய்ப்புத் தன்மையை சீராக்கித் தரும் சக்தியிருப்பதால், நீங்கள் பசு நெய்யை லேசாக நீராவியில் உருக்கி, காலை, இரவு  சூடான சாதத்துடன் கலந்து முதல் கவளத்தைச் சாப்பிடலாம். குடலுக்கு வழுவழுப்பை ஏற்படுத்தித் தரும். அளவு குறைவாக இருப்பதால், பித்தப்பை நீக்கப்பட்டிருப்பதால் பிரச்னை ஏதும் ஏற்பட வாய்ப்பில்லை. குடலில் வாயுவினுடைய சீற்றத்தையும் மட்டுப்படுத்தும். அதிக அளவில் நீரான உணவுப் பண்டங்களாகிய ரசம், சாம்பார் தெளிவு, பால் பாயசம் போன்றவை சாப்பிட, குடலில் ஏற்றம் பெரும் நீர்ப்பாங்கான தன்மையால், பித்தத்தினுடைய திரவம் எனும் குணமானது ஏற்றமடைந்து, வயிற்றிலுள்ள கழிவுப் பொருட்களை அலசி, நீர்க்கச் செய்து வெளியேற்றிவிடும். அதனால், உங்களுடைய விஷயத்தில், பித்தம் ஏற்றமுற வேண்டும், வாயு மட்டுப்பட வேண்டும் என்பதை என்றென்றும் கவனத்தில் கொள்ள வேண்டிய அவசியமிருக்கிறது.

மிச்ரகஸ்நேஹம் எனும் நெய் மருந்தை, 10 மி.லி. அளவில் உருக்கி, காலையில் வெறும் வயிற்றில் சாப்பிட்டு மேலே சிறிது வெந்நீர் அருந்தலாம். தீவிரமான மலமிளக்கி என்பதால் கடும் மலச்சிக்கல் உள்ள நாட்களில் மட்டும் சாப்பிட்டால் போதுமானது. விரத நாட்களில், குடலில் ஏற்படும் வெற்றிடத்தை வாயு நிரப்புவதால், அந்நாட்களில் வெது வெதுப்பான சர்க்கரை கலந்த பால், நடுநடுவே சாப்பிட வேண்டிய நிர்பந்தமிருக்கிறது.

சளித் தொல்லை குணமாக ஏலக்காய் விதை, லவங்கப்பட்டை, வெற்றிலையின் காம்பு இவற்றை அரைத்து சிறிது சூடாக்கிச் சூட்டோடு நெற்றியிலும் தலை உச்சியிலும் பற்றுப்போடவும்.

மஞ்சள், சாம்பிராணி இரண்டையும் தண்ணீர்விட்டு கல்லில் உரைத்தும் நெற்றியில் பற்றுப் போடலாம். கொம்பரக்கு, தும்பைப்பூ, மஞ்சள், மிளகு, காய்ந்த மிளகாய், ஓமம், வில்வ இலை, வெற்றிலை இவற்றில் ஒன்றைப் போட்டுக் காய்ச்சிய நல்லெண்ணெய்யையே தேய்த்துக் கொள்ளவும். ஒரே சூடாகக் காய்ச்சிய வெந்நீரில் குளித்து, உடனே தலையை நன்கு துவட்டி, சாம்பிராணியைத் தணலில் தூவி புகை பிடிப்பது, சூடான லேசான உணவு, வெயிலில் செல்லாமல், பகலில் தூங்காமல், இரவில் விழித்திராமல், உடல் சூட்டை ஒரே சீராகப் பாதுகாத்துக் கொள்வது. இவை சளி, ஆஸ்துமா இவற்றில் இருந்து காப்பாற்றும். குளிக்கும் வெந்நீரில் கருங்காலிக் கட்டையையோ, கடுக்காயையோ இடித்துப் போட்டுக் காய்ச்சி குளிக்கலாம்.

(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2015/8/8/15/w600X390/liver.jpg http://www.dinamani.com/health/health-serials/ayurvadham/2017/may/04/தீராத-மலச்சிக்கல்-தீர-2695495.html
2691411 தொடர்கள் ஆயுள் காக்கும் ஆயுர்வேதம் குமட்டல், வாய்க் கசப்புக்கு எளிய வைத்தியம்! டாக்டர் எஸ். சுவாமிநாதன் DIN Friday, April 28, 2017 10:57 AM +0530 எனக்கு காலையில் எழுந்ததும் வாயில் அதிக உமிழ் நீர் ஊறுகிறது. குமட்டிக் கொண்டு வாந்தியாகிறது. வாய் கசக்கிறது. ஆனால் செரிமான குறைவோ தூக்க குறைவோ கிடையாது. இது எதனால்? இதை எப்படிக் குணப்படுத்துவது?

 -ராஜேந்திரன், சென்னை.

இரவில் தேங்காய், கொத்தவரங்காய், காராமணி, மொச்சைக் கொட்டை, கடலை எண்ணெய், தேங்காய் எண்ணெய்யில் தயாரித்த நேந்திரங்காய் வறுவல் போன்ற உணவுப் பொருட்களைச் சாப்பிடுவதைத் தவிர்க்கவும். இவை அனைத்தும் வயிற்றில் பித்த ஊறலை அதிகப்படுத்துபவை. உணவைச் செரிமானம் செய்யும் வயிற்றுப்பகுதியில் ஊறும் பித்தம், தன்குணங்களாகிய சிறு நெய்ப்பு, ஊடுருவும் தன்மை, சூடு, லேசு, துர்நாற்றம், கழிச்சல், நீர்த்தன்மை ஆகியவை அதிகமாகும் நிலையில், பித்தத்தை வெளியே வாய் வழியாகத் தள்ளுகிறது. புளிப்புத் தன்மை வாயில் அதிகம் தென்பட்டால் அது கட்டாயமாக ஜீரணக் குறைவுதான் என்று சொல்லிவிடலாம். கசப்புத்தன்மை தோன்றினால் பித்தம் - ரத்தத்துடன் கலந்து சுற்றிவருவதால் ஏற்படும் நிலை என்று அறியலாம்.

 சுமார் 150 கிராம் இஞ்சியை தோல் சீவி, அரைத்து, 600 மில்லி லிட்டர் தண்ணீரில் கலந்து சுமார் பத்து நிமிடங்களுக்குப் பிறகு வடிகட்டிக் கொள்ளவும். வடிக்கட்டியதை ஒரு பாத்திரத்தில் ஊற்றி சிறிது நேரம் வைத்திருக்கவும். பாத்திரத்தின் அடியில் சுண்ணாம்பு போன்று தங்கும் பகுதியை நீக்குவதற்கு மேலேயுள்ள தெளிவான நீரை வடிகட்டி (சுமார் 400 மி.லி. இருந்தால் போதும்) அதனுடன் எலுமிச்சம் பழச்சாறு 800 மி.லி. கலந்து, 600 கிராம் சர்க்கரை சேர்த்துக் கரைத்து வடிகட்டவும். அதை அடுப்பிலேற்றி சிறுதீயில் காய்ச்சினால் அது சுண்டி ஒரு சிரப் போல ஆகிவிடும். காலையில் எழுந்தவுடன் ஏற்படும் பித்தக் குமட்டல், வாய்க் கசப்பு உள்ள போது, ஒன்றிரண்டு டீ ஸ்பூன் (சுமார் 10 மி.லி. அளவு) நாக்கில் விட்டுக் கொண்டு மெதுவாகச் சுவைத்து விழுங்கினால், பித்தத்தைக் குறைத்து வாந்தியை நிறுத்தும். வாய் கொப்பளித்து அழுக்கை அகற்றிய பிறகு, இதைச் சாப்பிடுவது நல்லது. ஐந்து மில்லி லிட்டர் சிரப்பை (1ஸ்பூன்), 30 மி.லி. தண்ணீரில் கரைத்துச் சாப்பிட்டால் , உணவின் குணக் கெடுதியால் ஏற்படும் பித்த சீற்றம் நன்றாகக் குறைந்துவிடும். அஜீரணமோ வாந்தியோ வரவே வராது.

கிராமங்களில் அந்தக் காலங்களில் செய்யும் எளிய  வேறு ஒருவகை கை வைத்திய முறை: 

 60 கிராம் சீரகத்தை ஒரு பீங்கான் கிண்ணத்தில் எடுத்துக் கொள்ளவும். சீரகம் நன்றாக மூழ்குமளவு எலுமிச்சம் பழச்சாற்றை விட்டு வெய்யிலில் காய வைக்கவும். ஒன்றிரண்டு நாட்களில் சாறு நன்றாகச் சுண்டிவிடும். வேண்டுமானால் மறுபடியும் சாறு பிழிந்து வெய்யிலில் காய வைத்து நன்றாக காய்ந்து போன சீரகத்தை, கண்ணாடி பாட்டிலில் பத்திரப்படுத்தவும். பலமான கல்யாணச் சாப்பாட்டிற்குப் பிறகும் சாப்பிட்டது செரிக்காமல்  நெடுநேரம் வரையில் நெஞ்சைக்குத்தியும்- எதுக்களித்துக் கொண்டும் இருக்கும் நிலையிலும், நீங்கள் குறிப்பிடும் குமட்டல், வாந்தியிலும் இந்த சீரகத்தை ஒன்றிரண்டு சிட்டிகை வாயிலிட்டுக் கொண்டு சிறிது சிறிதாக நெடுநேரம் சுவைத்தபடி கடித்து விழுங்கினால் நல்ல பலனை அளிக்கும். 

ஆயுர்வேத மருந்துகளாகிய தாளீசபத்ராதி சூரணம் அல்லது கற்பூராதி சூரணத்தையோ பத்து கிராம் எடுத்து 20 மில்லி லிட்டர் தேன் குழைத்து சிறிது சிறிதாக விரலால் தொட்டு நாக்கில் தடவிக் கொண்டு இருந்தால், மருந்தின் சுவையும் மணமும் தொடர்ந்து நாக்கிலும், தொண்டையிலும் இருக்கும். வாந்தி நின்றுவிடும். செரிமானக் கோளாறு உள்ளவர்களுக்கு, செரிமானமும் விரைவில் நன்றாக ஏற்படும்.

நெல்பொரியைத் துணியில் கட்டி, தண்ணீருடன் கொதிக்கவிட்டு, துணியை நடு நடுவே தண்ணீரில் ஆட்டிக் கொண்டே வர, பொரியின் பெரும் பகுதி கரைந்து கஞ்சி போல ஆகிவிடும். துணி மூட்டையை எடுத்துவிட்டு, கஞ்சியுடன் ருசிக்க நெல்லிமுள்ளி அல்லது புளிப்பு மாதுளைச் சாறு சிறிது கலந்து, தேவையான அளவு உப்பும் சேர்த்து சிறிதாக காலையில் சாப்பிட்டால், வாந்தியுள்ளவருக்கு மருந்துமாகவும், சிறந்த உணவுமாகவும் பயன்படும்.  
 
(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/8/29/w600X390/Ayurvedic_massage_pune_ayurvedic_massage_in_pune_koregaon_park.jpg http://www.dinamani.com/health/health-serials/ayurvadham/2017/apr/27/ayul-kaakum-ayurvedham-2691411.html
2687880 தொடர்கள் ஆயுள் காக்கும் ஆயுர்வேதம் குடற்புழுக்களை வெளியேற்ற...! டாக்டர் எஸ். சுவாமிநாதன் DIN Thursday, April 20, 2017 05:43 PM +0530 என் வயது 73. எனது குடலில் கொக்கிப் புழுக்கள் இருக்குமோ? என்ற சந்தேகம் உள்ளது. குடற்புழுக்களை வெளியேற்ற ஆயுர்வேத மருந்துகள் உள்ளனவா? ஆங்கில மாத்திரைகள் மூலம் வயிற்றில் உள்ள பூச்சிகளையும், புழுக்களையும் வெளியேற்றச் செய்யும் சிகிச்சை காரணமாக, மனித உடலுக்கு நன்மை செய்யும் நுண்ணுயிர்களும் அழிக்கப்படுகின்றன என்று பிரபல இருதய சிகிச்சை நிபுணர் ஈழ்.ஆ.ங. ஹெக்டே  எழுதிய கட்டுரைகளில் படித்துள்ளேன்.      

    
  - எம். ஜே.ஸ்வாமிநாதன், 
விருகம்பாக்கம், சென்னை-92.

வயிற்றில் கிருமிகள் உள்ளவருக்கு முதலில் குடலில் எண்ணெய்ப் பசையை உருவாக்கும் வகையில் 4-5 நாட்கள் நல்லெண்ணெய்யை சுமார் 15-20 மி.லி. காலை, மாலை பருகச் செய்த பின், உடலில் நன்கு வியர்வை வரும்படியான சிகிச்சையை பிரயோகம் செய்வார்கள். பிறகு வெல்லம், பால், மீன் முதலியவற்றை உணவாக அதிக அளவில் ஏற்க, குடலில் கிருமிகளையும் கபத்தையும் கிளர்ச்சியுறச் செய்து அன்று இரவு சுகமாகச் சென்ற பின், மறுநாள் பகலில் துளசி, வெண்துளசி, கருந்துளசி, காட்டுதுளசி, வாய்விடங்கம், நாயுருவி, எலிச்செவி, சிறுகுமிழ், தூதுவளை, பெரியநாயுருவி, தகரை, சிறுதேக்கு, முல்லைவல்லி, மணத்தக்காளி, கொட்டைக்கரந்தை, எட்டிக்கொட்டை, புல், ஜடாமாஞ்சி ஆகியவற்றை பாதி அளவு நீர் கொண்ட பசு மூத்திரத்தில் போட்டு கஷாயம் செய்து அதனுடன் திப்பிலி, மலங்காரக்காய், வாய்விடங்கம் இவற்றின் கல்கமும், எண்ணெய், ஸர்ஜசஷாரம் ஆகியவற்றையும் கலந்து எனிமா எனப்படும் வஸ்தி செய்வார்கள். அன்றைய தினமே சிவதைக் கல்கத்தை, மலங்காரக்காய், திப்பிலி இவற்றின் கஷாயத்தில் கலந்து உள்ளுக்குக் கொடுத்து வாந்தியும், பேதியும் ஏற்படுமாறு குடலை சுத்தம் செய்துவிடுவர். அதன் பிறகு பஞ்சகோலம் எனப்படும்- திப்பிலி, கண்டந்திப்பிலி, செவ்வியம், கொடிவேலி, சுக்கு ஆகியவை சேர்த்த கஞ்சி முதலிய வரிசையில் உணவு உட்கொள்ள வேண்டும். காரம், கசப்பு, துவர்ப்பு ஆகிய சுவை உள்ள கஷாயங்களால் உடலை நனைக்க வேண்டும். பசித் தீ நன்றாக உள்ள நிலையில் வாய்விடங்கத் தைலத்தால் வஸ்தி (எனிமா) செய்வது நம் பண்டைய ஆயுர்வேத வைத்ய முறையாகும்.

மோர் சேர்த்து பக்குவம் செய்யப்பட்ட கஞ்சியில் வாய் விடங்கம், திப்பிலி, மிளகு, கண்டந்திப்பிலி, முருங்கை இவற்றின் சூர்ணமும், ஸர்ஜசஷாரமும் கலந்து பருக வேண்டும் அல்லது வாகை, நாயுருவி, மலைவேம்பு, கேமுகப்புல், புரசைவிதை, பொன்னாங்கண்ணி, ஆவில்புங்கு இவற்றுள் ஒன்றின் சாற்றை தேனுடன் கலந்து லேகியமாக உபயோகிக்கலாம். கிருமி நோயாளி, குதிரையின் சாணித்தூளை வாய்விடங்க கஷாயத்திலாவது திரிபலைக் கஷாயத்திலாவது 100 தடவை ஊறவைத்து, தேன் கலந்து லேகியமாக உட்கொள்ள வேண்டும்.

எலிச்செவியனும் செடியின் இலைத் துளிரை நன்கு அரைத்து சிவப்பு அரிசி மாவுடன் கலந்து வடைப் பக்குவம் செய்து உண்டு, முன்குறிப்பிட்ட பஞ்ச கோலம், பஞ்ச லவணம் எனப்படும்- இந்துப்பு, ùஸவர்ச்சல உப்பு, வளையுப்பு, கறியுப்பு, வெடியுப்பு ஆகியவை கலந்த நீர்மோரை உணவிற்குப் பிறகு பருக வேண்டும். கடம்பு, கரிசாலை, நொச்சி இவற்றின் துளிரையும் இவ்வாறே உபயோகிக்கலாம் அல்லது வாய்விடங்கச் சூரணம் கலந்த மாவினால் பணியாரங்கள் தயாரித்து உண்ணலாம்.

குடல்கிருமி நோயாளிகள் பால் வகை, மாமிசவகை, நெய், வெல்லம், தயிர், இலைக்கீரை வகை, புளிப்பு, இனிப்பு ஆகிய சுவையுள்ள பொருட்களை விலக்க வேண்டும்.

தயாரித்து விற்கக்கூடிய மருந்துகளாகிய விழால்வேராதி கஷாயம், திக்தகம் கஷாயம், ஆரக்வதாதி கஷாயம், வில்வாதி குளிகை, மாணிபத்ரம் லேஹ்யம், கிருமிக்னவடி, கிருமிசோதினி மாத்திரை போன்றவை மருந்துவரின் ஆலோசனைப்படி சாப்பிட உகந்தவை.

இன்றும் கிராமங்களில் குப்பைமேனி இலைச்சாறு 100 மி.லி. வேப்பெண்ணெய் 5 மி.லி. கலந்து காலையில் வெறும் வயிற்றில் சாப்பிட்டு குடல் கிருமிகளை  அழித்து வெளியேற்றும் சிகிச்சை முறை மிகவும் பிரபலமானது. வேப்பம் இலைக் கொழுந்துடன் ஓமம் அரைத்து காலையில் உணவிற்கு முன் சாப்பிடுவதும் தேவையற்ற கிருமிகளை வெளியேற்றும். 

(தொடரும்)

பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,
நசரத்பேட்டை - 600 123 (பூந்தமல்லி அருகே)
செல் : 94444 41771

 

]]>
http://images.dinamani.com/uploads/user/imagelibrary/2012/9/20/17/w600X390/stomach.jpg http://www.dinamani.com/health/health-serials/ayurvadham/2017/apr/20/ayurvedha-dr-swaminathan-2687880.html
2683327 தொடர்கள் ஆயுள் காக்கும் ஆயுர்வேதம் வாதரக்தம் எனும் உபாதை! டாக்டர் எஸ். சுவாமிநாதன் DIN Thursday, April 13, 2017 12:00 AM +0530 என்னுடைய முழங்கால் மூட்டில் வீக்கமும் எரிச்சலும் உள்ளது. தொட்டால் சூடாகவும் வலியும் ஏற்படுகிறது. தாங்கி தாங்கித்தான் நடக்க முடிகிறது. இது எதனால்? இதற்கு மருந்து உள்ளதா?

-தங்கமணி, ஓசூர்.

உணவில் உப்பு, புளிப்பு, காரம் சேர்ந்தவற்றை அதிகம் உண்பதாலும், வினிகர், எண்ணெய் மற்றும் மிகவும் சூடான வீர்யம் கொண்ட ஊறுகாயை அதிக அளவில் சாப்பிடுவதாலும், முன் உண்ட உணவு முழுவதும் செரித்திருக்காத நிலையில், அடுத்த உணவை உண்பதாலும், உட்புற நொதநொதப்பை ஏற்படுத்துவதும், மிகவும் வறண்டதுமாகிய நீர்வாழ் பிராணிகள், எள், புண்ணாக்கு, முள்ளங்கி, கொள்ளு,  உளுந்து, பட்டாணி, இலைக்கறிகாய்கள், மாமிசச்சூப்பு, கரும்புச்சாறு கொண்டு தயாரிக்கப்படும் இனிப்புகள், தயிர், மிகவும் புளித்துப்போன கள், சாராயம், மோர், ஒவ்வாமை உணவுகள், தன் அளவிற்கு மீறிய உணவு, அடிக்கடி கோபம், பகல் தூக்கம், இரவில் கண்விழித்தல், மிக மென்மையான உடல் அமைப்பு, நேரம் தவறி உண்ணுதல், இயற்கையை மீறிய வாழ்க்கை முறை, உடல் பருமன், சுகமான வாழ்க்கை  போன்ற காரணங்களால் நீங்கள் குறிப்பிடும் வாதரக்தம் எனும் உபாதை, மனிதர்களைத் தாக்கக் கூடும் என்று சரகர் என்ற முனிவரும்,  ஸுஸ்ருதர் எனும் முனிவரும் கூறுகின்றனர்.

மேற்குறிப்பிட்ட உணவு வகைகளால், வயிற்றில் உணவானது புளிப்புடன் கூடிய பதனழிந்த நிலையை அடைந்து, இரத்தத்துடன் அதன் சத்து கலக்கும் போது, இரத்தமும் புளிப்புடன் கூடிய காந்தல் போன்ற நிலையை அடைந்துவிடுகிறது. வாகனங்களில் ஏறி, நின்று கொண்டோ, முட்டியை மடக்கிக் கொண்டோ, வெகுதூரம் பயணம் செய்கையில் இரத்தம் கால் பகுதியில் அதிலும் முக்கியமாக மூட்டுப் பகுதியில் சஞ்சரிக்கும் போது வாயுவுடன் சேர்ந்து, வீக்கம், எரிச்சல், வலி போன்ற உபாதைகள் ஏற்படுகின்றன. 

வியர்வை அல்லது வியர்வையின்மை, கருமையடைந்த தோல்நிறம், தொடு உணர்ச்சியின்மை, சிறிய அடிபட்டாலும் கடுமையான வலி, பூட்டுகள் கலகலத்துவிடுதல், அலுப்பு, சலிப்பு, நீர்க்கொப்புளம், முட்டி, முட்டியின் கீழ் கெண்டை சதை, தொடை, இடுப்பு, கை-முதுகுப்பகுதி இணைப்பு, பாதம், மூட்டுகள் ஆகிய பகுதிகளில் ஊசியால் குத்துவது போன்ற வலி, துடிப்பு, பிளப்பது போன்ற வலி, கனம், மரத்துப்போகுதல், அரிப்பு, பூட்டுகளில் வலி திடீரென்று தோன்றுவதும், மறைவதும், கருப்பு நிறத்தில் உடலில் வட்ட வட்டமான தடிப்புகள் தோன்றுவதும் இந்த உபாதைக்கான முன் அறிகுறிகளாகும்.

இரத்தம் கெட்டுப்போய் ஏற்பட்ட உபாதை என்பதால், உடலில் நெய்ப்பு தரும் சிகிச்சை முறைகளை முதலில் செய்து, பிறகு சிறிது சிறிதாக, கெட்ட ரத்தத்தை அட்டைப் பூச்சி வைத்து கடிக்க வைத்து வெளியேற்றும் சிகிச்சை முறையை ஆயுர்வேதம் பரிந்துரைக்கிறது.   வாயுவின் சீற்றம் அதிகரிக்காத வகையில், இந்த சிகிச்சையைக் கையாள வேண்டும்.

தசமூலம் கஷாயம், பிருகத்யாதி கஷாயம், பலாகுடூச்யாதி கஷாயம், கோகிலாக்ஷம் கஷாயம் போன்றவை, இந்த உபாதைக்கு நல்ல பலன்களைத் தரக்கூடிய மருந்துகளாகும்.

ஜடாமயாதி எனும் பற்றுபோடும் மருந்தை, வடித்த கஞ்சியுடன் குழைத்து முட்டியில் பற்றுப் போடுவதால் எரிச்சலும், வீக்கமும் வலியும் பெருமளவு குறையும்.

சதகுப்பையை பாலில் அரைத்து இளஞ்சூடாகப் பற்று இடுவதும் நல்லதே. பிண்ட தைலம், இந்த உபாதைக்கு பயன்படுத்தும் சிறந்த தைலமாகும். வெதுவெதுப்பாக முட்டியில் வைத்து கட்டிக் கொள்வதால், வீக்கம், எரிச்சல், வலி ஆகியவை குறையும்.

நீர்முள்ளியின் இலையைச் சமைத்து தொடர்ந்து சாப்பிட்டு வந்தால், வாதரக்தம் எனும் உபாதையை நாம் வென்று விட முடியும் என்று ஆயுர்வேதம் கூறுகிறது.

(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

 

]]>
http://images.dinamani.com/uploads/user/imagelibrary/2015/7/22/11/w600X390/healthy-skin-fashiondivasonline.jpg http://www.dinamani.com/health/health-serials/ayurvadham/2017/apr/13/வாதரக்தம்-எனும்-உபாதை-2683327.html
2678640 தொடர்கள் ஆயுள் காக்கும் ஆயுர்வேதம் புண் விரைவில் குணமாக...! டாக்டர் எஸ். சுவாமிநாதன் DIN Thursday, April 6, 2017 05:57 PM +0530 என் வயது 46. காலில் புண் ஏற்பட்டு புரையோடிப் போனதால் மருத்துவர்கள் அதை அறுவை சிகிச்சையின் மூலம் சீழ் மற்றும் கெட்டுப்போன ரத்தம், சதை எல்லாம் அகற்றி, கட்டுப் போட்டுள்ளனர். ஆனாலும் எனக்கு அவ்விடத்தில் வலியும் எரிச்சலும் அடங்கவில்லை. அறுவை சிகிச்சை செய்த பின் புண் புரையோடாதிருக்க ஆயுர்வேத மருத்துவத்தில் வழிகள் உள்ளனவா?

-கனகசபாபதி, கோவை.

அறுவை சிகிச்சைக்குப் பின், மறுபடியும் புண் மற்றும் சீழ்கட்டாதிருக்க, ஓரிலைத்தாமரை, ஓரிலை மூவிலை, ஜடாமாஞ்சி, பிராம்மி, வசம்பு, சதகுப்பை, காட்டு சதகுப்பை, அருகம்புல், வெண்கடுகு ஆகியவற்றை தலையில் கட்டிக் கொள்ள வேண்டும் என்ற ஒரு விநோதமான அறிவுரையை ஆயுர்வேதம் கூறுகிறது. இதன் மூலம் அணுக்கிருமிகளின் தாக்கம் உடலில் ஏற்படாது. தற்காலத்திய நவீன ஆன்டிபயாடிக் மருந்துகளுக்கு மாற்றாக இதுபோன்ற சிகிச்சை முறைகள் அந்தக் காலத்தில் பிரசித்தமாக இருந்தது என்பது தெளிவாவதுடன் இவை அனைத்தும் நம் பாரம்பரிய மருத்துவத்தின் மிகச் சிறந்த ஆன்டிபயாடிக் மருந்துகளாக பயன்படுத்தப்பட்டுள்ளன என்பதையும் புரிந்து கொள்ளலாம்.

மேலும் அறுவை சிகிச்சைக்குப் பின் நீர்த்ததும், சூடானதும், கபத்தை இளக்காததும், அதிக எண்ணெய் சேர்க்காததும், ஒவ்வாமை உணவு சேராததுமான உணவு வகைகளைக் குறைந்த அளவே உண்ண வேண்டும். வெந்நீரையே எல்லாவற்றிற்கும் பயன்படுத்த வேண்டும். பெண் சேர்க்கை கூடாது. இரவில் உரிய நேரத்தில் உறங்க வேண்டும். இயற்கை உந்துதல்களாகிய மலம், சிறுநீர், பசி, தாகம், உறக்கம், கொட்டாவி, வாந்தி, ஏப்பம், கீழ்க்காற்று போன்றவற்றை அடக்கக் கூடாது. உடற்பயிற்சி, கோபம், வருத்தம், பனி, வெயில், பெருங்காற்றுக்கு எதிரில் செல்லுதல், வாகன சவாரி, அதிக நடை, பேச்சு, அதிகம் அமர்ந்திருத்தல், நிற்பது, மிகவும் உயர்ந்த அல்லது தாழ்ந்த தலையணையை உபயோகிப்பது, பகல் தூக்கம், புகை, புழுதி போன்றவை தவிர்க்கப்பட வேண்டும். பகல் தூக்கத்தினால், புண்ணில் அரிப்பு, சிவப்பு நிறம், வலி, வீக்கம், சீழ் ஆகியவை உண்டாகும் என்கிறார் வாக்படர் எனும் முனிவர்.

புண் விரைவில் ஆற பார்லி, கோதுமை, அறுபதாங்குறுவை, காராமணி, பயறு, துவரை, ஊசிப்பாலைக்கீரை, ஆரைக்கீரை, இளம் முள்ளங்கி, கத்திரிக் காய், சிறுகீரை, வாஸ்துக்கீரை, பாகல், புடல், சுரை, இந்துப்பு, மாதுளை, நெல்லிக்காய், நெய், காய்ச்சி குளிராக்கப்பட்ட நீர், பழைய அரிசி, நெய்ப்பசையுடன் கூடிய சிறிது சூடான உணவு வகைகளைக் குறைந்த அளவில் உபயோகிக்கவேண்டும். அதிக அளவில் குடிநீர் அருந்த வேண்டும். முயல், கோழி, கிளி, மாடப்புறா, கெüதாரி போன்றவற்றின் மாமிசத்தை உணவாக்க விரைவில் புண் ஆறிவிடும். ஏதேனும் காரணத்தினால் அறுவை சிகிச்சைக்குப் பின் அஜீரணம் உண்டானால் வாயு முதலிய தோஷங்களின் கலக்கம் அதிகமாகும். அதனால் வீக்கம், வலி, அழற்சி, எரிச்சல், ஆகியவை உண்டாகும். அதனால் உரியநேரத்தில் அளவுடன் பத்தியமான உணவை உட்கொண்டால், சுகமாக ஜீரணமாகும்.

புண் உள்ளவர் - புதிய தானியம், எள், உளுந்து, மதுபானம், மேற்குறிப்பிட்ட மாமிசத்தைத் தவிர மற்ற மாமிசங்கள், பால் மற்றும் கரும்புச்சாற்றினால் தயாரிக்கப்பட்டவை, புளிப்பு, உப்பு, காரம் ஆகியவற்றை விலக்க வேண்டும். வயிற்றுப் பொருமல் உண்டாக்குவதும், புளித்த ஏப்பத்துடன் காந்தல் செய்வதும் எளிதில் செரிக்காததும், குளிர்ந்ததுமான உணவு கூடாது. இவை அனைத்தும் உடலிலுள்ள எல்லா தோஷங்களையும் கோபமடையச் செய்யும்.

விலாமிச்சை வேர் விசிறியால் புண் உள்ள இடத்தை வீசி காற்றுபடும்படி செய்ய வேண்டும். புண்ணைத் தட்டுவது, குத்துவது, சொறிவதோ கூடாது. வேலை செய்யும் போது அதிர்ச்சியுண்டாகாவண்ணம் பாதுகாக்க வேண்டும். நண்பர், வயோதிகர், மறையோர் ஆகியோர் கூறும் மனதிற்கு பிரியமான கதையைக் கேட்பதுடன் புண் விரைவில் குணமாகும் என்ற நம்பிக்கையுடனும் இருந்தால் விரைவில் புண் குணமாகிவிடும்.

(தொடரும்)
பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2015/7/27/11/w600X390/Operation-008.jpg http://www.dinamani.com/health/health-serials/ayurvadham/2017/apr/06/புண்-விரைவில்-குணமாக-2678640.html
2674392 தொடர்கள் ஆயுள் காக்கும் ஆயுர்வேதம் மரத்துப் போவதைக் குறைக்க..! டாக்டர் எஸ். சுவாமிநாதன் DIN Thursday, March 30, 2017 10:19 AM +0530 என் வயது 74. எனக்கு சுமார் 5 ஆண்டுகளாக சர்க்கரை நோய் இருந்து வருகிறது. சுமார்  3 மாதங்களுக்கு முன் எனக்கு சுகர் 500க்கு மேல் போய்விட்டது. நமஎஅத SUGAR Specialist இடம் காண்பித்து எனக்கு SUGAR தற்போது NORMAL ஆக உள்ளது. எனக்கு கை, காலில் மரத்துப் போகும் தன்மை அதிகம் உள்ளது. அதற்கு என்ன காரணம்?  நான் ஆயுர்வேதம் காட்டும் முறையான வழிமுறைகளைப் பின்பற்ற நினைக்கிறேன். உணவு முறைகள் மற்றும் மருத்துவ முறைகளையும் கூறவும்.

-ப.ச. சுவாமிநாதன், கோவை-10.

 தோலினுடைய தொடு உணர்ச்சிக்காக வேலை செய்யும் நரம்புகளில் வறட்சியும், குளிர்ச்சியும் ஆதிக்கம் செலுத்தும் தறுவாயில், அவற்றிலுள்ள உணர்ச்சித் தன்மையானது குறைந்து, நீங்கள் குறிப்பிடும் மரத்துப் போகும் தன்மைக்குக் காரணமாகி விடுகின்றது. சமையல் தொழிலை முக்கியமாகக் கொண்டுள்ள உங்களுக்கு, சமையல் செய்யும் பாத்திரங்களுடைய குளிர்ச்சியாலும், நெடுநேரம் நின்று தரமான சமையலுக்கான முயற்சியால் ஏற்படும் உடல் வறட்சியாலும், நீங்கள் இதுபோன்ற பாதிப்புக்கு ஆளாகியிருக்கக் கூடும். உடலில் சிறிதும் எண்ணெய்ப் பசையின்றி, விடியற்காலையிலேயே எழுந்து, குளிர்ந்த நீரில் நீராடி, நெற்றியில் திருநீர் அணிந்து, இறைவனின் திருநாமத்தை உச்சரிக்கும்  சமையல் விற்பன்னர்களுக்கு, காலைக் குளிரும், தண்ணீரும் வறட்சியையும், குளிர்ச்சியையும் இயற்கையாகவே தோலில் ஏற்படுத்தக் கூடும்.  அதனால் நீங்கள் குளிப்பதற்கு முன், ஆயுர்வேத மூலிகைத் தைலமாகிய மஹாநாராயண தைலத்தையோ, பலாஅஸ்வகந்தாதி தைலத்தையோ சூடாக்கி, உடலெங்கும் தேய்த்து அரை மணி நேரம் ஊறிய பிறகு, வெதுவெதுப்பான தண்ணீரில் குளிப்பதை பழக்கிக் கொண்டால், மரத்துப் போகும் தன்மையைக் குறைக்க வாய்ப்பிருக்கிறது. நரம்பு மண்டலங்களில் ஆதிக்க இருப்பிடமாகிய மூளையையும் நாம் இவ்விஷயத்தில் உதாசீனப்படுத்த இயலாது. அதனால் மூளை நரம்புகளை வலுப்படுத்தும் க்ஷீரபலா தைலத்தையோ கார்ப்பாஸôஸ்த்யாதி தைலத்தையோ, வெதுவெதுப்பாக தலையில் தடவி, அரை மணி நேரம் ஊறிய பிறகு இளஞ்சூடான வெந்நீரில் குளிப்பதும் நல்லதே.

நரம்புக் கூட்டத்தை பலவீனப்படுத்தும் காரம், கசப்பு மற்றும் துவர்ப்புச் சுவையைத் தவிர்த்து இனிப்பு, புளிப்பு, உப்புச் சுவையை சற்று அதிகம் சேர்ப்பதும் நலமே.

நரம்புகளுக்கு உணர்வும், ஊட்டமும் தரும் ஆயுர்வேத மூலிகை நெய்மருந்துகளாகிய இந்துகாந்தம், விதார்யாதி, க்ஷீரபலா 101 போன்றவற்றில் ஒன்றை ஆயுர்வேத மருத்துவரின் ஆலோசனைப்படி சாப்பிட, மரத்துப் போகும் தன்மையைப் பெருமளவு குறைக்கலாம். சர்க்கரை உபாதையினுடைய அதிக அளவு தாக்கம் மூலமாக, பலரும் தொடு உணர்ச்சியை இழந்து போகிறார்கள். அவர்களும் இதுபோன்ற சிகிச்சை முறையால் பலனடையலாம்.

ஆயுர்வேத மருந்துவமனைகளில் நரம்பினுடைய உணர்வற்ற தன்மையை மேம்படுத்த உதவும் சிகிச்சை முறைகளாகிய உடலெங்கும் ஊற்றப்படும் எண்ணெய்க் குளியல், வியர்வையை உருவாக்கும் மூலிகை இலை ஒத்தடம், நவரக்கிழி, ஆஸனவாய் வழியாக செலுத்தப்படும் மூலிகைத் தைலம், தலையில் எண்ணெய் கட்டும் சிரோவஸ்தி மூக்கினுள்விடும் நஸ்ய சிகிச்சை போன்றவற்றை நீங்கள் செய்து கொள்ளலாம்.

குடலில் வாயுவினுடைய ஆதிக்கத்தால் ஏற்படும் வறட்சியும் குளிர்ச்சியும், தோல் நரம்புகளை வலுவிழக்கச் செய்யும் என்பதால், நீங்கள் உணவில் வாயுவை அதிகப்படுத்தும் சூடு ஆறிப்போன கொண்டைக் கடலை சுண்டல், பட்டாணி, வேர்க்கடலை, பருப்பு வகைகள் ஆகியவற்றைத் தவிர்க்க வேண்டும். வெதுவெதுப்பான வெந்நீரைக் குடிக்கப் பயன்படுத்துவதும், புளித்த மோரை உணவின் இறுதியில் குடிப்பதும், குடல் வாயுவைக் குறைக்க உதவும் எளிய வழிகளாகும். 

(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை-  600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2017/3/25/w600X390/A8.jpg http://www.dinamani.com/health/health-serials/ayurvadham/2017/mar/30/மரத்துப்-போவதைக்-குறைக்க-2674392.html
2670709 தொடர்கள் ஆயுள் காக்கும் ஆயுர்வேதம் ஒலியால் வரும் தலைவலி! டாக்டர் எஸ். சுவாமிநாதன் Thursday, March 23, 2017 01:23 PM +0530 என் திருமணமாகாத 30 வயது மகனுக்கு பிறர் தண்ணீர் குடிக்கும் போது தொண்டையிலிருந்து வரும் ஒலி மற்றும் பிறர் சாப்பிடும் உணவை மெல்லும் ஒலி இவற்றினால், அவருக்கு அடுத்த விநாடியே பின் மண்டையில் ஒரு வலி ஏற்படுகிறது. அவருடைய உடல் எடை 94 கிலோ. இந்த பிரச்சனைக்கு ஆயுர்வேத மருத்துவம் ஏதேனும் உள்ளதா?

-நா. நிஷ்களானந்தன்,
கும்பகோணம்.

தலையை தன் முக்கிய இருப்பிடமாகக் கொண்டு செயல்படுகிற பிராண வாயுவின் கதி முடக்கத்தால் நீங்கள் குறிப்பிடும் உபாதை தலைதூக்கலாம். மனிதர்களுடைய உடலில் உணவுச்சத்தின் கதி முடங்கினால் உணவுச்சத்து வறண்டுபோகும், சிறு செயல்களைச் செய்வதிலும் பெரும் சிரமம், உட்புற சத்துகள் வறண்டு போதல், சோம்பல், சிறு ஒலியினுடைய சத்தமும் சகிக்க  முடியாத தன்மை போன்றவை ஏற்படும் என்கிறார் வாக்படர் எனும் முனிவர், தான் இயற்றிய அஷ்டாங்கஹிருதயம் எனும் ஆயுர்வேத நூலில். மூளையினுடைய வலுவைக் கூட்ட வேண்டிய உணவுச் சத்து, அப்பகுதியில் குறைந்து போனால் பிராண வாயுவும் தன் செயல்களில் பலஹீனத்தை உணரத் தொடங்கும். உங்களுடைய மகனுக்கு, உண்ணும் உணவானது, பெருமளவில் அவை கொழுப்பினுடைய  உடல் பகுதியில் ஊட்டம் பெற்று, மற்ற பகுதிகளில் போதுமான அளவிற்கு ஊட்டம் கிடைக்காமலேயே போவதாகத் தோன்றுகிறது. கொழுப்பாக மாற்றும் நெருப்பானது கொழுந்துவிட்டு எரியும் நிலையில், மற்ற தாதுக்களின் நெருப்பானது மந்தமாகி, வரக்கூடிய  சத்தை உடலெங்கும் பரவவிடாமல் செய்துவிடுகிறது.

அதனால் உடல் பருமனைக் குறைக்க வேண்டும்.  அதற்கு அங்குள்ள நெருப்பை மட்டுப்படுத்த வேண்டும். மற்ற பகுதிகளிலுள்ள தாது பரிணாமம் எனும் தாது வளர்ச்சி தூண்டப்பட வேண்டும். மூளைக்குத் தேவையான ஊட்டத்தை ஏற்படுத்தி, அங்குள்ள நரம்பு மண்டலங்களைக் கோர்த்திருக்கும் அணுக்களின் வலுவைக் கூட்ட வேண்டும் என்ற பல பரிணாமங்களில் மருந்துகளைப் பிரயோகிக்க வேண்டிய நிர்பந்தம் ஏற்பட்டிருக்கிறது.

வரணாதி கஷாயம் 15 மி.லி. எடுத்து 60 மி.லி. சூடு ஆறிய தண்ணீர் கலந்து 5 மி.லி. தேனுடன் காலை, மாலை வெறும் வயிற்றில் சாப்பிட, உடல் பருமன் குறையலாம். தலைவலியைக் குறைக்கும், பசியைத் தூண்டும் இந்த மருந்தில், குளிர்ச்சியும் வறட்சியும் நிறைந்த தேன் சேர்ப்பதால், பசித்தீயை மட்டுப்படுத்தும். உட்புறக் குழாய்களைச் சுரண்டிச் சுத்தப்படுத்தும். அதனால் வாயுவிற்கு ஏற்பட்ட  தடை நீங்குவதால், அதன் சஞ்சாரமானது, தலையில் எளிதில் நடைபெறத் தொடங்கும். 

 ராஸ்னாதி சூரணத்தை இஞ்சி சாறு கலந்து சூடாக்கி நெற்றியில் பத்து போடுவதன் மூலமாகவும் தலை வலி நிவாரணம் பெறலாம். கார்ப்பாஸôஸ்தியாதி தைலத்தை மூக்கினுள் 2-4 சொட்டுகள் விட்டு உறிஞ்சித் துப்பிவிடவும். அது மூளை நரம்புகளை வலுவூட்டச் செய்யும். வாயினுள் அரிமேதஸ் தைலம் 5 மி.லி. அளவில் எடுத்து வாயினுள் விட்டு 5-10 நிமிடங்கள் கொப்பளித்துத் துப்பவும். மூளை நரம்புகளை வலுப்படுத்தும். தலைக்கு பலாஹடாதி தைலத்தை தேய்த்துக் குளிக்கலாம். 

 காது வாயு தோஷத்தினுடைய ஒரு முக்கிய இருப்பிடமாகக் கொண்டு சப்தத்தை உள்வாங்கி மூளைக்கு எடுத்துச் சென்று வந்துள்ள செய்தியை உணர்த்துவதால் காதினுள் விடப்படும் சில மூலிகைத் தைலங்களால், மூளை நரம்புகளை வலுவுறச் செய்து, தலைவலியை ஏற்படுத்தாமல் தடுக்க முடியும். அந்த வகையில், வசாலசுனாதி எனும்  தைலத்தை இளஞ்சூடாக காதில் நிரப்பும் சிகிச்சை முறையையும் ஆயுர்வேதம் வலியுறுத்துகிறது.

 கண்களில் மூலிகை நெய் மருந்தாகிய ஜீவந்த்யாதி க்ருதம் அல்லது த்ரைபல க்ருதம் உருக்கி, கண்களின் உள்ளே ஊற்றி நிரப்பிவைக்கும் தர்ப்பணம் எனும் சிகிச்சை முறை மூலமாகவும், மூளையிலுள்ள நரம்பு மண்டலங்களை வலுப்படுத்தி, தலைவலி உபாதையைத் தவிர்க்கலாம். இவை அனைத்தும் ஆயுர்வேத மருத்துவமனைகளில் சிறப்பாகச் செய்யப்படுகின்றன.

(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
தலைவலி, உடல் பருமனை, மூலிகை, மருத்து http://images.dinamani.com/uploads/user/imagelibrary/2013/2/23/14/w600X390/headache.jpg http://www.dinamani.com/health/health-serials/ayurvadham/2017/mar/23/ஒலியால்-வரும்-தலைவலி-2670709.html
2666515 தொடர்கள் ஆயுள் காக்கும் ஆயுர்வேதம் ஆயுள் காக்கும் ஆயுர்வேதம்: அடிக்கடி ஏப்பம் வந்தால்..! டாக்டர் எஸ். சுவாமிநாதன் DIN Thursday, March 16, 2017 12:00 AM +0530 எனது வயது 42. எனக்கு அடிக்கடி ஏப்பம் வருகிறது. மருத்துவரிடம் சென்றேன். செரிமானம் இல்லை அதனால் வரும் என்கிறார். தண்ணீர் குடித்தால் கூட ஏப்பம் வருகிறது. இரண்டு மாதமாக உள்ளது. இந்த உபாதை தீர வழி என்ன? எதை சாப்பிடலாம் 

- ஒ. ஜெயா, கிருஷ்ணகிரி.

இரைப்பையில் அதிகம் வாய்வழியாக விழுங்கப்பட்ட காற்று இரைப்பையை விரிவாக்குவதனால் அந்தக் காற்றை வாய்வழியாகவே வெளியேற்றுவதுதான் ஏப்பம். இதனால் இரைப்பையில் காற்றின் அழுத்தம் குறைகிறது. காற்று எப்படி அதிகம் இரைப்பையில் சேருகிறது என்றால் உணவையோ அல்லது குடிக்கும் பானத்தையோ விரைவாக உண்பது அல்லது குடிப்பது, காற்றடைத்த குளிர்பானம் அருந்துதல், மனக்கவலையில் சிலர் இரைப்பையில் காற்று நிறைந்திருக்காத நிலையிலும் ஏப்பம் விடுவர். இதை ஒரு பழக்கமாக அவர்கள் கொண்டிருப்பதாலோ அல்லது வயிற்றுப் பகுதியிலுள்ள சுகமற்ற தன்மையை போக்கவோ அவர்கள் அவ்வாறு செய்யக்கூடும். அறிந்தோ அறியாமலோ சிலர் காற்றை விழுங்குவதுண்டு பேசிக்கொண்டே சாப்பிடுவதாலும், சுவிங்கம் சுவைத்துக் கொண்டே இருப்பதாலும், கெட்டியான சாக்லெட்டை உறிஞ்சிச் சாப்பிடுவதாலும், ஸ்ட்ரா எனும் குழல் வழியாக நீர்ப் பொருட்களான பழரஸம், இளநீர் போன்றவற்றை உறிஞ்சுவதாலோ, புகைப்பழக்கத்தினாலோ வாய்வழியாக சுவாசிப்பதாலோ, காற்றின் அளவு அதிகமாக வயிற்றினுள்ளே செல்லக்கூடும்.

பீன்ஸ், பருப்புவகைகள், ப்ரக்கோலி, பட்டாணி, வெங்காயம், முட்டைக்கோஸ், காலிஃப்ளவர், வாழைப்பழங்கள், திராட்சை, கோதுமை ரொட்டிகள் போன்றவை, அதிக ஏப்பத்தை செரிமான நிலையில் ஏற்படுத்துபவை. Type 2 சர்க்கரை உபாதைக்கான சில மருந்துகள், மலமிளக்கிகள், சில வலி நிவாரணிகள் போன்றவையும் வயிற்றில் புண்ணை ஏற்படுத்தி வாயுவை உற்பத்தி செய்யக்கூடும்.

இரைப்பையிலிருந்து மேலே கிளம்பி உணவுக் குழாயினுள் பரவும் அமிலத்தன்மையினாலும் இரைப்பையினுடைய தசைகள் வலுவிழப்பதனாலும், இரைப்பை உட்புற சவ்வுப் பகுதியில் ஏற்படும் தொற்று உபாதைகளாலும், உணவுக்குழாய், இரைப்பை, சிறுகுடல் பகுதிகளில் ஏற்படும் புண்களாலும், பாலிலுள்ள சில புரதங்களைச் செரிமானம் செய்யும் சக்தி இல்லாதிருப்பதாலும், சர்க்கரைச்சத்து செரிமானக் குறைப்பாட்டாலும், H. pylori நுண் உயிரிகளாலும் ஏப்பம் ஏற்படக்கூடும்.

மேலும் gluten எனும் வேதிப்பொருள் நிறைந்துள்ள ப்ரட் வகையறாக்களை செரிக்க முடியாமலாவதும், முழுவதும் செரிமானமாகாத நிலையில், இரைப்பை, உணவை அடுத்தபகுதிக்குத் தள்ளிவிடுவதாலும், செரிமானத்திற்கான சில சுரப்பிகள் pancreas பகுதியிலிருந்து சுரக்காமலிருந்தாலும் தொடர் ஏப்பம் வரக்கூடும். குடல் நழுவி வெளிப்படுதல், IBS எனும் மலம் நொத நொதப்புடன் அடிக்கடி வெளியேறுதல், பித்தப்பை கற்கள், சிறு குடலில் ஏற்படும் Giardia நுண்உயிரிகள் தொற்று, பித்தப்பை அழற்சி, வேகமாக மூச்சுக்காற்றை வெளியேற்றி, உள் மூச்சுக்காற்றை குறைவாக இழுப்பதனால் ஏற்படும் கரிமில வாயுவின் அளவுகுறைதல், குடல் ஒன்றோடு ஒன்று சொருகிக் கொள்ளுதல், உணவுக்குழாய் மற்றும் இரைப்பை கான்சர் உபாதை ஆகியவற்றிலும் தொடர் ஏப்பம் ஏற்படவாய்ப்பிருப்பதாக நவீன ஆராய்ச்சியாளர்கள் குறிப்பிடுகிறார்கள்.

அதனால் நீங்கள் இரைப்பைப் பகுதியை குழாய் பரிசோதனை மூலம் ஏதேனும் பிரச்னை உள்ளதா? என்பதைக் கண்டறிந்து, அதற்கேற்றாற்போன்று மருந்து சாப்பிடுவது நலம். வெறும் காற்று மட்டுமே வெளியேறுகிறது என்று அறிந்தால், ஆயுர்வேத மருந்தாகிய வாயுகுளிகையோ, தான்வந்திரம் குளிகையோ ஒன்றிரண்டு, உணவிற்குப் பிறகு சீரகம் போட்டுக் காய்ச்சிய வெந்நீருடன் காலை, இரவு உணவிற்குப் பிறகு சாப்பிடுவது நலம். அஜீரணக்கோளாறும் ஏற்பட்டுள்ள நிலையில் அஷ்ட சூரணம் 1/2-1 ஸ்பூன் (5 கிராம்) சூடான சாதத்துடன் சிறிது நெய்யும் விட்டுக்கலந்து காலை-இரவு அந்த சாதத்தின் முதல் உருளையைச் சாப்பிடவும் மற்ற உபாதைகளுக்கு தனிப்பட்ட மருந்தை பயன்படுத்த வேண்டும்.

(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2017/3/15/w600X390/ashtachurnam.jpg http://www.dinamani.com/health/health-serials/ayurvadham/2017/mar/16/ஆயுள்-காக்கும்-ஆயுர்வேதம்-அடிக்கடி-ஏப்பம்-வந்தால்-2666515.html
2662457 தொடர்கள் ஆயுள் காக்கும் ஆயுர்வேதம் தசை, எலும்பு நோய்களுக்கு என்ன தீர்வு? டாக்டர் எஸ். சுவாமிநாதன் DIN Thursday, March 9, 2017 12:00 AM +0530 MSD எனப்படும் Musculo Skeletal Disorder சமீப காலங்களாக அதிகரித்து வருகிறது. இதற்கான காரணங்களை ஆயுர்வேதம் எடுத்துக் கூறியுள்ளதா? சிகிச்சை முறைகள் எவை?

-தேசிகன், சென்னை.

குணம் மற்றும் செயல்கள் வாயிலாகத்தான் நாம் நம் உடலை நன்கு பேணிக்காக்கவும் முடியும். அழித்துக் கொள்ளவும் முடியும். இந்த இரு விஷயங்களும் உணவு, செயல் மற்றும் மருந்துகள் மூலமாக, உடலில் ஏற்படும் குணங்களின் ஏற்ற இறக்கத்தைச் சமன் செய்து ஆரோக்கியத்தை நிலை நிறுத்த முயற்சிப்பதே, நோயாளிகளுக்கு மருந்துவர் செய்ய வேண்டிய கடமையாகும். ஒரு சில குணங்களின் ஆதிக்க வரவினால், நீங்கள் குறிப்பிடும் MSD எனப்படும் தசை மற்றும் எலும்புகளை குறி வைத்துத் தாக்கும் நோய்கள் மனிதர்களைப் பெரிதும் பாதிக்கும். அந்த குணங்களுக்கு எதிரிடையான உணவு - செயல் மருந்துகள் ஆகியவைகளைத் தரும் போது, அந்த உபாதைகள் அனைத்தும் குணமாகி விடுகின்றன. அவை பற்றிய ஒரு சிறிய விவரம்: 

காரணம்

1) வறட்சி - எலும்புகளிலுள்ளே அமைந்துள்ள மஜ்ஜை, நீர்ப் பசையான வில்லைகள், முதுகுத் தண்டுவடம் பகுதியில் வறண்டு விடுதல். 

பிரச்னை -  தண்டுவட வலி, எலும்புகள் வலுவிழத்தல், தசைநார்கள் சுருங்குதல்

தவிர்க்கவும்: சுவை -  கசப்பு, துவர்ப்பு, காரம்

செயல் - அடிதடி, உடற்பயிற்சி, உடலுறவு, நீச்சல்

மருந்துகள் -  நீர்ப்பசை, கொழுப்பு மருந்துகள்

2)   லேசானது-  எலும்பு, தசை, தசைநார்கள் அடர்த்தியை தளர்த்தி வலுவிழக்கச்
செய்தல்

பிரச்னை -  நடக்கும் போது தன்னிச்சையாக கால் மூட்டுகள் மடங்குதல்; சோம்பல் முறிக்கும் போது தசைகள் விரைத்துக் கொள்ளுதல்

தவிர்க்கவும்:  சுவை -  அதிகக் காரம், துவர்ப்பு, எளிதில் செரிக்கும் உணவு

செயல் - பட்டினி, சைக்கிள் சவாரி, பளுதூக்குதல், ஓடுதல்

மருந்து- சர்க்கரை உபாதைக்கான மருந்து, இருமல் மருந்து

3) குளிர்ச்சி-விரைப்பை ஏற்படுத்தும்

பிரச்னை- தசைகள், பூட்டுகள் இறுகி விரைத்து உறுப்புகளை அசைக்க முடியாமல் போதல்

தவிர்க்கவும்-சுவை - கசப்புச் சுவை, குளிர்ந்த நீர், கரும்புச் சாறு, பருப்புகள்

செயல்  குளிர்ந்தநீரில் குளித்தல், நீந்துதல், குடித்தல்

மருந்து-உடல்சூட்டைக் குறைக்கும் சந்தனம், வெட்டிவேர் போன்றவை

4)சுரண்டி காயச் செய்தல்- உட்புற நெய்ப்பைச் சுரண்டி தசை, எலும்புகள் காய்ந்து போகுதல்

பிரச்னை - நடக்கும்போது  பூட்டுகளிலிருந்து சத்தம் வருதல், வலி ஏற்படுதல்

தவிர்க்கவும்- சுவை- கசப்பு, துவர்ப்பு, சிறிதும் எண்ணெய்ப்பசை இல்லாத வறண்ட உணவு

செயல்- வறண்ட காற்றுக்கு எதிராகப் பயணித்தல், நெய்ப்பின்றி வாழ்தல்

மருந்து- இளைக்கச் செய்யும் மருந்துகள்

5)நகருதல்-தசை, எலும்பு மஜ்ஜை தம் இடத்தை விட்டு விலகுதல்

தவிர்க்கவும்- சுவை-கசப்பு, துவர்ப்பு,கொடிக்காய்கள்

மருந்து- நரம்பு ஊக்கிகள்

சிகிச்சை

1) நெய்ப்பு-  எண்ணெய்ப்பசை, நீர்ப்பசை உருவாக்குதல்

அறிவுரை:
சுவை  இனிப்பு, புளிப்பு, உப்பு சேர்க்கவும் 
செயல் - ஓய்வு, எண்ணெய் கட்டுதல்
மருந்து - க்ஷீரபலா கேப்ஸ்யூல், விதாரியாதி நெய்மருந்து, மகாமாஷ தைலம், எனிமா மற்றும் வெளிப்புறம் தடவுதல்

2) கனமானது -  அடர்த்தியை மறுபடியும் ஏற்படுத்துதல்

அறிவுரை
சுவை - இனிப்பு, புளிப்பு, உப்பு, நெய், மாமிச சூப்பு, மஜ்ஜை சேர்க்கவும்
செயல்  பகல் தூக்கம், படுக்கையில் ஓய்வு
மருந்து அஜஅஸ்வகந்தாதி லேகியம், பிருகச்சாகலாதி கிருதம் (நெய்)

3) சூடு-வியர்வையை வரவழைத்தல்

அறிவுரை:
சுவை - காரம், புளி, உப்பு சேர்க்கவும்
செயல்-  உடலை கனமான போர்வையால் போர்த்துதல், வெந்நீர் ஒத்தடம்
மருந்து-யோகராஜ குக்குலு, கைசோர குக்குலு மாத்திரை,அஷ்டவர்க்கம் கஷாயம்

4 )வழுவழுப்பு -  நெய்ப்பை ஏற்படுத்துதல்

அறிவுரை:
சுவை-இனிப்பு, புளிப்பு, நெய், பால் வெண்ணெய் மாமிசசூப்பு சேர்க்கவும்
செயல்-குஷன்படுக்கை, நெய்தடவி வெயிலில் சிறிது நேரம் அமருதல்
மருந்து-கந்த் தைலம், தான்வந்திரம் 101

5)நிலைத்தல்-ஸ்திரத்தன்மையை ஏற்படுத்துதல்

சுவை-இனிப்பு,பால்,நெய்,வெண்ணெய்,பழஜாம், பழங்கள் சேர்க்கவும்
மருந்து-அஷ்வகந்தாசூரணம், சியவனப்பிராசம் லேகியம்
 

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,  
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2014/2/6/12/w600X390/bones1.jpg http://www.dinamani.com/health/health-serials/ayurvadham/2017/mar/09/தசை-எலும்பு-நோய்களுக்கு-என்ன-தீர்வு-2662457.html
2658290 தொடர்கள் ஆயுள் காக்கும் ஆயுர்வேதம் கபத்தின் சீற்றமும் தோலில் ஊரலும்...! டாக்டர் எஸ். சுவாமிநாதன் DIN Thursday, March 2, 2017 12:00 AM +0530 எனக்கு வயது 51 ஆகிறது. மூன்று மாதங்களாக பின்பக்கம் ஊரல் இருந்து வருகிறது. இது எப்படி வரும் என்றால் இரவில் படுக்கும் போது ஊரல் இருக்கும், பகலில் இருக்காது. இந்த ஊரல் கொசு கடித்தால் அரிக்குமே அதுபோல் இருக்கிறது. இந்த நோய்க்கு ஆயுர்வேத மருத்துவம் ஏதேனும் உள்ளதா?

 -கா.திருமாவளவன்,
திருவெண்ணெய்நல்லூர்.


இரவின் குளிர்ச்சியால் கபதோஷத்தினுடைய சில குணங்களாகிய நெய்ப்பு, கனம், மந்தம், வழவழப்பு போன்றவை உடலில் ஏற்றமடைந்து, இரத்தத்தின் வழியே தோலைச் சென்றடைவதால், நீங்கள் குறிப்பிடுவது போல் ஊரல் ஏற்படக்கூடும். கபம் சீற்றமடைவதற்கான காரணங்களை ஸுஸ்ருதர் எனும் முனிவர், தான் இயற்றிய ஸுஸ்ருத ஸம்ஹிதை எனும் ஆயுர்வேத நூலில் குறிப்பிடுகிறார். 

பகல் தூக்கம், உடற்பயிற்சியே இல்லாத சோம்பலான வாழ்க்கை, சோம்பலுடன் படுத்திருப்பதில் ஆர்வம், இனிப்பு, புளிப்பு, உப்பு, குளிர்ச்சி, நெய்ப்பு, எளிதில் செரிக்காதவை, வழவழப்பு, கொசகொசப்பு நிறைந்த உணவு வகைகளில் நாட்டம், பார்லி, உளுந்து, கோதுமை, எள்ளு, மாவுப்பொருட்கள், தயிர், பால், பாயசம், கரும்புச்சாறிலிருந்து தயாரிக்கப்படும் உணவு வகைகள், நீரில் வாழும் பிராணிகளின் மாமிசம், தாமரைத்தண்டு, இனிப்பான பழங்கள், கொடியினத்தைச் சார்ந்த பழங்கள், ஒன்றோடு ஒன்று பொருந்தாத உணவு வகைகள், முன் உண்ட உணவு செரிக்காத நிலையில் அடுத்த உணவைச் சாப்பிடுதல் ஆகியவை கபம் சீற்றமடைவதற்கான காரணங்களாகக் குறிப்பிடுகிறார்.

சீற்றமுறும் குணங்களே செயல் வடிவமாக உருமாறி மனிதர்களை நிலைகுலையச் செய்கின்றன. அதனால் அவற்றை உடல் உட்புறங்களிலிருந்து பிரித்தெடுத்து வாந்தி சிகிச்சையின் மூலம் வெளியேற்றும் போது, தோல் உபாதைக்கான தீர்வு கிடைக்க வாய்ப்பிருக்கிறது.

உபாதையை அழுத்தி அமர வைக்கும் மாத்திரை மருந்துகளால் பக்கவிளைவுகளே அதிகம் ஏற்படும். மேலும் தகுந்த காரணங்கள் கிடைத்ததும் அவை மறுபடியும் தூண்டப்படுகின்றன. 

சரக்கொன்றைப் பட்டையை சுமார் 15 கிராம் எடுத்து சிராத்தூள் போல் சீவி, ஒரு லிட்டர் தண்ணீரில் போட்டு கொதிக்கவிட்டு 500 மி.லி. ஆகக் குறுகியதும் வடிகட்டி தயாராக்கி வைத்துக் கொள்ளவும். ஒரு நாளில் 2-3 வேளை சிறிது சிறிதாகக் குடித்து வரவும். ஆரக்வதாதி கஷாயம் சுமார் 15 மிலி எடுத்து 60 மி.லி.  வெதுவெதுப்பான தண்ணீரில் கலந்து ஒரு வில்வாதி குளிகையை அரைத்துச் சேர்த்து காலை, மாலை வெறும் வயிற்றில் 48 நாட்கள் தொடர்ந்து சாப்பிடுவதன் மூலமாக, உங்களுக்கு ஏற்பட்டுள்ள உபாதை குறைய வாய்ப்பிருக்கிறது. தினவு ஏற்படாத வண்ணம் இந்த கஷாயம் உதவிடக்கூடும்.

மத்திய வயதுடைய உங்களுக்கு, குடலை அப்பழுக்கற்றதாக வைத்திருக்க வேண்டிய நிர்பந்தம் இருப்பதால், திருவிருத்லேஹ்யம் மற்றும் மாணிபத்ரம் எனும் லேகிய மருந்தை, பதினைந்து தினங்களுக்கு ஒரு முறை காலையில் வடித்த கஞ்சி செரித்து, மதியம் பசி எடுத்துள்ள நிலையில், இரண்டு மருந்தையும் ஒன்றாகக் கலந்து சுமார் 20-25 கிராம் அளவில் நக்கிச் சாப்பிடவும். நன்றாக பேதி ஆன பிறகு, மதியம் மிளகு, சீரகம், பூண்டு போட்டு தயாரித்த ரசம், சூடான புழுங்கலரிசிச் சாதத்துடன் கலந்து, சுட்ட அப்பளத்துடன் சாப்பிடவும். அதிக அளவில் பேதியானால், கெட்டியான தயிர்சாதம் சாப்பிட்டால் பேதி நின்றுவிடும்.

தோல் உபாதைகளைத் தவிர்க்க நீங்கள் பயன்படுத்தும் படுக்கை, துணி விரிப்புகள், தலையணை உறை, உள்ளாடைகள் அனைத்தும் நன்றாக தோய்த்து வெயிலில் காயபோட்டு பயன்படுத்தவும். குளிக்கக்கூடிய தண்ணீரில் வேப்பிலை, அருகம்புல் போட்டுக் காய்ச்சி, உடலெங்கும் தூர்வாதி கேரதைலம் எனும் மூலிகைத் தேங்காய் எண்ணெய் தேய்த்து 12 மணி நேரம் ஊறிய பிறகு காலையில் குளிக்கவும். கொசுத் தொல்லையைத் தவிர்க்க கொசு வலையைப் பயன்படுத்தவும்.
(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை } 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2015/7/22/11/w600X390/healthy-skin-fashiondivasonline.jpg http://www.dinamani.com/health/health-serials/ayurvadham/2017/mar/02/கபத்தின்-சீற்றமும்-தோலில்-ஊரலும்-2658290.html
2653615 தொடர்கள் ஆயுள் காக்கும் ஆயுர்வேதம் ரத்தத்தைச் சுத்தம் செய்தால்...! டாக்டர் எஸ். சுவாமிநாதன் DIN Thursday, February 23, 2017 12:00 AM +0530 ஆயுள் காக்கும் ஆயுர்வேதம்

என் வயது 34. அடிக்கடி வாய்ப்புண், தண்ணீர் தாகம், கசப்புடன் கூடிய புளிப்பு ஏப்பம், பசியின்மை, வியர்வை துர்நாற்றம், முகப்பருக்கள் போன்ற உபாதைகளால் அவதியுறுகிறேன். உத்தியோகம் காரணமாக பல ஊர்களுக்குச் செல்ல வேண்டி இருப்பதால் ஓட்டல் சாப்பாடுதான். இவை எதனால் ஏற்படுகின்றன? இவற்றுக்கு ஆயுர்வேத மருந்துகள் எவை?

தனஞ்செழியன்,
சேலம்.

சரகஸம்ஹிதை எனும் ஆயுர்வேத நூலில் மனிதர்களுடைய இரத்தம் கெட்டுவிட்டால் கீழ்காணும் உபாதைகளைத் தோன்றச் செய்யும் என்று கூறப்பட்டுள்ளது:

வாய்ப்புண், கண் விழிப்படல பாதிப்பு, மூக்கிலிருந்து நீராக ஒழுகுதல், வாய் துர்நாற்றம், வயிற்றில் கட்டி, அக்கி, நுண்ணிய தோல் ஓட்டைகளிலிருந்து ரத்தம் கசிதல், தலைசுற்றல், மூட்டு வீக்கத்துடன் வலி, உடல் வெளுத்து சோகை அடைதல், பசியின்மை, தண்ணீர் தாகம், உடல் கனம், உடல் எரிச்சல், தாங்க முடியாத சோர்வு, ருசியின்மை, தலைவலி, கசப்பும் புளிப்புமாக கெட்டநீர் ஏப்பத்தில் வருதல், கடுங் கோபம், வாயில் உப்புச்சுவை, அதிக வியர்வையில் துர்நாற்றம், மதம்பிடித்தது போல தள்ளாட்டம், நடுக்கம், குரல் கம்மல், அதிக உறக்கம், சோம்பல், அடிக்கடி மூர்ச்சையாகி விழுதல், அரிப்பு, காணாக்கடி, பருக்கள், சரும உபாதைகள்.

மேற்குறிப்பிட்ட உபாதைகளில், நீங்கள் குறிப்பிடும் உபாதைகளும் அடங்கியிருப்பதால், உங்களுக்கு இரத்தம் தன் சுத்தமான தன்மையைவிட்டு, கெட்டிருப்பதாகத் தோன்றுகிறது. இரத்தம் கெடுவதற்கான காரணங்களையும் அந்நூல் எடுத்துக் கூறுகிறது:

ஒவ்வாமை உணவுகள், குடலில் துளைத்துக் கொண்டு செல்லும் சூடான வீரியம் கொண்ட மதுபானங்களை அருந்துதல், அதிக அளவில் உணவைச் சாப்பிடுதல், காரம், புளி, உப்பு சேர்த்த உணவுகள், கொள்ளு, உளுந்து, நல்லெண்ணெய் சார்ந்த உணவுகள், பச்சைமுள்ளங்கி, உப்பு நீரிலும், பொந்துகளிலும், நீர்ப்பாங்கான நிலங்களிலும் வாழும் மிருகங்களின் மாமிசத்தை உணவாக ஏற்றல், தயிர், புளித்த தயிர்த்தண்ணீர், வினிகர், பதனழிந்த கெட்டுப் போன உணவு ஆகியவை.
எண்ணெய், நெய் கலந்து எளிதில் செரிக்காத திரவ உணவு வகைகளைச் சாப்பிட்டு பகலில் படுத்து உறங்குதல், கடும் கோபம், வெயில் மற்றும் நெருப்பினருகில் வேலை, வாந்தியை வலுக்கட்டாயமாக அடக்குதல், அடிபடுதல், உடற்சூடு அதிகரித்தல், முன் உண்ட உணவு செரிமானம் ஆகாத நிலையிலேயே அடுத்த உணவைச் சாப்பிடுதல், இலை உதிர் காலத்தின் இயற்கையான தன்மையாலும் மனிதர்களுடைய இரத்தம் கெட்டுவிடக்கூடும்.

கெட்டுப்போன நிலையில் இரத்தத்தை உடலில் வைத்துக் கொண்டிருக்க முடியாது. அதனால் அதைச் சிறுகச் சிறுக வெளியேற்றும் அட்டைப்பூச்சிகள், கொத்தி எடுத்தல் போன்ற முறைகளால் வெளியேற்றி, சுத்த ரத்தத்தை உடல் பெறும் வண்ணம் முயற்சிக்க வேண்டும். திக்தகம் என்றும் மஹாதிக்தகம் என்ற பெயரிலும் பயன்படுத்தக் கூடிய மூலிகை நெய் மருந்துகளை காலை,மாலை என இருவேளை வெறும் வயிற்றில் சுமார் 21 நாட்கள் வரை உருக்கிச் சாப்பிட்டு வர, உங்களுடைய உபாதைகள் பல, இரத்தம் சுத்தமாவதால் குணமடைய வாய்ப்புள்ளது. மாணிபத்ரம் எனும் லேகிய மருந்தை அதன் பின்னர் சுமார் 20-25 கிராம் வரை சாப்பிட, நீர்பேதியாகி குடல் சுத்தமடையும். இரத்தத்தில் கலந்துள்ள பல விஷப்பொருட்களையும், மேற்குறிப்பிட்ட நெய் மருந்துகள், குடலுக்குக் கொண்டுவந்து, லேகிய மருந்தின் மூலம் வெளியேற்றுவதால், இரத்தம் சுத்தமடைகிறது.

இரத்தத்தினுடைய சுகாதார மேம்பாட்டினால், உடல்நிறத்திற்குத் தெளிவு, புலன்கள் அனைத்தும் தத்தம் செயல்களில் மேம்படுதல், புலப்பொருட்களின் மீது இயற்கையான மோகம் அதிகரித்தல், சீரான இடைவேளையில் பசி எடுத்தல், உட்புறக்கழிவுகள் எவ்வித கஷ்டமுமில்லாமல் எளிதாக வெளியேறுதல், மனதில் நிறைவான மகிழ்ச்சி, உடல்வனப்பு கூடுதல், உடல் மற்றும் மனதில் வலுகூடுதல் போன்றவை ஏற்படும். ஆயுர்வேத மருந்துகளாகிய சோணிதாமிருதம், நிம்பாதி கஷாயம், ஜீவந்தியாதி கஷாயம் போன்றவை இரத்தத்தை சுத்தப்படுத்தக் கூடியவை. மேற்குறிப்பிட்ட இரத்தம் கெட்டுப் போவதற்கான காரணங்களைத் தவிர்த்து தக்க சிகிச்சை முறைகளை மேற்கொள்வதால், உங்களுடைய உபாதைகள் அனைத்தும் நீங்கிவிடும்.

(தொடரும்)
பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,
நசரத்பேட்டை -  600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/9/30/w600X390/BLOOD-DONATION.jpg http://www.dinamani.com/health/health-serials/ayurvadham/2017/feb/23/ரத்தத்தைச்-சுத்தம்-செய்தால்-2653615.html
2650072 தொடர்கள் ஆயுள் காக்கும் ஆயுர்வேதம் அவசரமாகச் சிறுநீர் பிரிவதைக் குணப்படுத்தலாம்! டாக்டர் எஸ். சுவாமிநாதன் DIN Thursday, February 16, 2017 12:00 AM +0530 ஆயுள் காக்கும் ஆயுர்வேதம்
எனக்கு வயது 70. சர்க்கரை நோய் கட்டுப்பாட்டில் உள்ளது. அவசரமாக சிறுநீர் கழிக்கும் போது சில சொட்டுகள் ஆடையில் பட்டுவிடுகிறது. மேலும் அந்த நேரத்தில் பாதத்தில் எரிச்சல் ஏற்படுகிறது. உடன் சரியாகி விடுகிறது. இதற்கு ஆயுர்வேத மருத்துவம் ஏதேனும் உள்ளதா?

சுகுமாறன்,
மன்னார்குடி.

 சிறுநீரைத் தேக்கி வைக்கும் சிறுநீர்ப்பை, நரம்பு மண்டலத்தின் இயக்கத்தின் மூலமாக, சிறுநீரின் அளவு கூடாத வண்ணம் வெளியேற்றுகிறது. இந்த நரம்பு மண்டலத்தின் செயல்திறன் வயோதிகத்தில் மந்தமாவதற்கு ஏற்ப, சிறுநீரின் வெளியேற்றம் வேகமாகவோ, மந்தமாகவோ நிகழக்கூடும். இடுப்பினுடைய கீழ்பகுதியில் அமைந்துள்ள முதுகுத்தண்டு வடப்பகுதியிலிருந்து வெளிக்கிளம்பும் நரம்புகளே, சிறுநீர்ப்பையைத் தம் ஆளுமையின் கீழ்வைத்துள்ளது. அவற்றின் செயல்களைச் சீராக்கினால், உங்களுக்கு ஏற்படும் சிறுநீர்ச் சொட்டானது குணமடைய வாய்ப்பிருக்கிறது. 

அந்த வகையில், கடிவஸ்தி அதாவது இடுப்பைச் சுற்றி உளுந்து மாவினால் வரம்பு கட்டி அதனுள்ளே, மஹாமாஷம், பலா அஸ்வகந்தாதி எனும் பெயர்களிலுள்ள மூலிகைத் தைலங்களை, வெது வெதுப்பாக  ஊற்றி, அரைமணி நேரம் முதல் முக்கால் மணி நேரம் வரை ஊறவிடுதல், சூடு ஆற ஆற, மறுபடியும் பிழிந்தெடுத்துச் சூடாக்கி, மறுபடியும் ஊற்றி வைக்கும் சிகிச்சை முறை மிகவும் சிறப்பானது. இதைச் செய்து கொள்ளும் தறுவாயில், வயிறு காலியாக இருத்தலும், மலங்கழித்திருத்தலும் அவசியமாகும். சிறுநீரும் கழித்திருக்க வேண்டும்.

நொச்சி, ஆமணக்கு, புங்கை, வாதநாராயணன், கல்யாண முருங்கை, கற்பூரவல்லி செடி ஆகியவற்றின் வேர்களை சிறு சிறு துண்டுகளாக நறுக்கி, குக்கரில் தண்ணீருடன் கலந்து கொதிக்கவிட்டு, குக்கரின் மூடியிலுள்ள குழலில் ஒரு ரப்பர் டியூபைப் பொருத்தி, அதிலிருந்து வரும் மூலிகை நீராவியை இடுப்பு பகுதியில், முன் குறிப்பிட்ட வரம்பு மற்றும் எண்ணெய்களை வழித்தெடுத்த பிறகு காண்பிப்பதும், இடுப்பு நரம்புகளின் செயல் ஊக்கிகளை மேம்படுத்தும் சிகிச்சை முறையாகும்.

உணவை உண்ட உடனேயே, ஆசனவாய் வழியாக மூலிகைத் தைலங்களைக் கொண்டு ஒரு பையில் நிரப்பி உட்செலுத்துதல் மூலம், இடுப்பிற்குக் கீழ்ப் பகுதிகள் அனைத்தும் நெய்ப்பைப் பெறுகின்றன. இரு தினங்கள் இந்த சிகிச்சை முறை செய்த பிறகு, மூன்றாவது நாள், காலையில் வெறும் வயிற்றில் உள்ளபோதே, தசமூலம், ஆமணக்கு ஆகியவற்றின் வேரைக் கொண்டு காய்ச்சப்படும் கஷாயத்தில், தேன், இந்துப்பு, நல்லெண்ணெய், சதகுப்பை சூரணம் ஆகியவற்றைக் கலந்து, நன்றாகக் கடைந்து ஒரு பையில் ஊற்றி, ஆசனவாயினுள் செலுத்தி, சுமார் 25-30 நிமிடங்களுக்குள் கழிவறையில், அக்கஷாயத்தை கழித்து விடுவதால், பல வகையில் துன்புறுத்தும் வாத நோய்களைப் போக்கும் திறன் கொண்ட இந்த சிகிச்சை முறையும் உத்தமமானதே.

நீர்த்தொட்டி நீராட்டம் எனும் சிகிச்சை முறையும் தங்களுக்கு நல்ல பலனை அளிக்கலாம். மூலிகைகளைக் கொண்டு கஷாயமிட்டு,  ஓர் அண்டாவினுள் வெது வெதுப்பாக ஊற்றி, அதனுள்ளே இடுப்பு வரை மூழ்குமாறு அமர்ந்து கொள்ளும் இந்த சிகிச்சை முறை மூலம், உடலின் கீழ்ப்புறம் அமைந்துள்ள உறுப்புகளை வலுப்படுத்தலாம்.

இடுப்பு முதல் பாதம் வரை, மூலிகைத் தைலங்களைச் சூடாக்கி, பஞ்சினால் பிழிந்து ஊற்றும் தைல தாரா சிகிச்சையின் மூலமாகவும், சிறுநீர்ப்பையைச் சார்ந்த நரம்பு மண்டலத்தை வலுவாக்கலாம். 

நரம்புகளை வலுப்படுத்தும் யூகலிப்டஸ், முடக்கத்தான், எருக்கு, நொச்சி, ஏழிலம் பாலை, ஆமணக்கு ஆகியவற்றின் இலைகளை நறுக்கி, பந்துபோல் துணியில் கட்டி, சூடாக்கி, இடுப்பு மற்றும் கால் பகுதிகளில் ஒத்தடமிட, வாயுவை கீழடக்கி, நரம்புகளை வலுவடையச் செய்யும்.

விதார்யாதி, தசமூலம், சுகுமாரம், இந்துகாந்தம் போன்ற கஷாய மருந்துகளில் ஒன்றிரண்டை மருந்துவர் ஆலோசனைப்படி, தான்வந்திரம் அல்லது வாயு குளிகையுடன் பால் கஷாயமாக அருந்துவதன் மூலமாக, நரம்பு மண்டலங்களை வலுவூட்டலாம்.

உணவில் நரம்புகளை வலுவிழக்கச் செய்யும் காரம், கசப்பு மற்றும் துவர்ப்புச் சுவைகளைக் குறைத்து இனிப்பு, புளிப்பு மற்றும் உப்புச் சுவைகளை மிதமாகச் சேர்க்கலாம்.

(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/8/30/w600X390/ayurveda.jpg http://www.dinamani.com/health/health-serials/ayurvadham/2017/feb/16/அவசரமாகச்-சிறுநீர்-பிரிவதைக்-குணப்படுத்தலாம்-2650072.html
2646017 தொடர்கள் ஆயுள் காக்கும் ஆயுர்வேதம் தோல் உபாதைக்கான காரணம்..! டாக்டர் எஸ். சுவாமிநாதன் DIN Thursday, February 9, 2017 12:00 AM +0530 ஆயுள் காக்கும் ஆயுர்வேதம்

என் வயது 37. உடலில் ஆங்காங்கே அத்திப்பழம் போன்று சிவந்த நிறத்தில் சருமமும் அதைச் சுற்றியுள்ள முடிகளும் இருக்கின்றன. அந்தப் பகுதிகள் தடித்தும், நீர்க்கசிவும் ஏற்பட்டு, வெடித்தும், எரிச்சலும் ஏற்படுகின்றன. அதிகமான வலியும் உள்ளது. இதைக் குணப்படுத்த ஆயுர்வேத மருந்துகள் உள்ளனவா?

- முருகன்,
ஆலந்தூர், சென்னை.

பதினெட்டு வகையான தோல் உபாதைகள் மனிதர்களைத் தாக்கக் கூடும் என்று அஷ்டாங்க ஹிருதயம் எனும் ஆயுர்வேத நூல் கூறுகிறது. தாங்கள் குறிப்பிடும் உபாதையானது ஒதும்பரம் அதாவது அத்திக்காய் பெருநோய் எனும் வகையைச் சார்ந்ததாகத் தெரிகிறது. பித்ததோஷத்தின் சீற்றம் காரணமாக இந்த உபாதை ஏற்படுவதாகவும் அந்நூல் கூறுகிறது.

தோல் உபாதைக்கான காரணங்கள் - முறைகேடான உணவு, செயல் ஆகியவற்றாலும், முக்கியமாக ஒன்றோடு ஒன்று பொருந்தாத உணவு வகைகளாலும் தூண்டப்பட்ட வாத- பித்த- கப தோஷங்கள், உடலில் குறுக்காகச் செல்லும் ரத்தக் குழாய்களை அடைந்து, சருமம், நீர், ரத்தம், மாமிசம் ஆகியவற்றைக் கெடுக்கின்றன.

மேலும் கேடுற்ற தோஷங்கள் சருமம் முதலியவற்றைத் தளரச் செய்து பிறகு வெளிப்புறம் வந்து, சருமத்தில் நிற மாற்றத்தை உண்டாக்குகின்றன. தக்கவாறு சிகிச்சை செய்யாவிடில், இந்த உபாதை நாளடைவில் உடல் முழுவதையும் சிதைக்கும் தன்மை உள்ளது.

திக்தகம் என்றும் மஹாதிக்தகம் என்றும் தயாரிக்கப்படும் மூலிகை நெய் மருந்துகளில் ஒன்றை உடலின் தன்மைக்கு ஏற்ப, சில காலம் பருகச் செய்வார்கள். இம்மருந்து உடலில் நன்கு பரவி, வாயுவைக் கீழ் நோக்கிச் செலுத்துதல், பசி நன்றாக ஏற்படுதல், மலத்தில் இம் மருந்தின் நெய்ப்பினை உணருதல், மேலும் இம் மருந்தைச் சாப்பிடுவதில் ஏற்படும் வெறுப்பு, மருந்தினால் ஏற்படும் களைப்பு ஆகியவை, மருந்தினுடைய செயல்பாடு நன்றாக வந்தடைந்து விட்டது என்பதை அறிந்தவுடன், இந்த நெய் மருந்தை மேலும் அருந்துவதற்குத் தரமாட்டார்கள்.

பதினைந்து கிராம் கருங்காலிக் கட்டையை ஒருலிட்டர் தண்ணீரில் காய்ச்சி, அரை லிட்டராகக் காய்ச்சி வடிகட்டி, ஒரு நாளில் பலதடவை சிறுகச், சிறுகப் பருகுவதற்குப் பயன்படுத்துவதற்கான உகந்த நேரமும் இதுவேயாகும்.

நெற்றி, கை, பாதம் போன்ற பகுதிகளிலுள்ள காரி ரத்தக் குழாய்களில் ஏதேனும் ஒரு பகுதியிலிருந்து கெட்ட ரத்தத்தைக் கீறி வெளிப்படுத்துவார்கள். இதனால் உடலில் வாயு குவிந்துவிடாமல் தடுப்பதற்காக, மேலும் சில மூலிகை நெய் மருந்துகளைப் பருகச் செய்வார்கள்.

உணவில் புளி, உப்பு, காரம், தயிர், பால், வெல்லம், நீர் மற்றும் கடல் நீர்வாழ் பிராணிகள், எள்ளு, உளுந்து ஆகியவை தடை செய்யப்பட்டு, பழைய புழுங்கலரிசி, பார்லி, கோதுமை, பச்சைப்பயறு, கொண்டைக் கடலை, துவரம் பருப்பு, கசப்பான இலைக்கறிகள், வறண்ட நிலத்தில் வாழும் ஆடு, கோழி, முயல் போன்றவை, புடலை, கருங்காலிக்கட்டைக் குடிநீர், மோர் ஆகியவற்றைக் கொண்டே உணவைத் தயாரித்து வழங்குவார்கள்.

குடலைச் சுத்தம் செய்யும் பொருட்டு, படோலமூலாதி கஷாயம், மாணிபத்ரம் லேஹ்யம் போன்றவற்றைப் பயன்படுத்தி, கெட்டுப் போன ரத்தத்தை சுத்தப்படுத்தி, சருமத்தைப் பாதுகாத்தனர். உட்புற சுத்தத்தை நன்கு ஏற்படுத்திய பிறகே, வெளிப்புறப் பூச்சு மருந்துகளாகிய நால்பாமராதி தைலம், சததௌதக்ருதம் போன்றவற்றைப் பயன்படுத்தி தோல் உபாதைகளை பண்டைய ஆயுர்வேத மருந்துவர்கள் குணப்படுத்தினார்கள்.

(தொடரும்)
பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி,
நசரத்பேட்டை - 600 123 (பூந்தமல்லி அருகே)
செல் : 94444 41771

 

]]>
http://images.dinamani.com/uploads/user/imagelibrary/2015/7/22/11/w600X390/healthy-skin-fashiondivasonline.jpg http://www.dinamani.com/health/health-serials/ayurvadham/2017/feb/09/தோல்-உபாதைக்கான-காரணம்-2646017.html
2640950 தொடர்கள் ஆயுள் காக்கும் ஆயுர்வேதம் திரிபலா சூரணத்தின் பயன்கள்! டாக்டர் எஸ். சுவாமிநாதன் DIN Saturday, February 4, 2017 04:46 PM +0530 என் வயது 70. நான் கடந்த 25 வருடங்களாக நீரிழிவு நோயினால் அவதியுறுகிறேன். இன்சுலின் எடுத்துக் கொள்கிறேன். கடந்த 3 ஆண்டுகளுக்கு முன் எனக்கு அறுவைச் சிகிச்சை இரத்த அடைப்புக்காக இருதயத்தில் பைபாஸ் செய்யப்பட்டது. அதுமுதல் clopilet என்ற மாத்திரையை எடுத்து வருகிறேன். ரத்தம் உறைதலைத் தடுக்க நான் 5 வருடங்களாக திரிபலா சூரணம் தினமும் அரை தேக்கரண்டி சாப்பிடுகிறேன். இதில் உள்ள கடுக்காய் ரத்தம் உறைதலை ஏற்படுத்துமா? நான் இதனைத் தொடர்ந்து சாப்பிடலாமா? ஏதும் பக்கவிளைவுகள் உண்டா?

பி.நடராஜன், சென்னை-23.

துவர்ப்புச் சுவையுடைய கடுக்காய், லேசானது, அதனால் செரிப்பதற்கு எளிதானது, பசித்தீயை வளர்க்கும். சீரணத்தை அளிக்கும். உஷ்ணம் எனும் சூடான வீர்யமுடையது. இளகச் செய்யும் தன்மையுடையது. இதனாலேயே நீரிழிவு நோயினால் ஏற்படும் இதய நோய்களுக்கு அருமருந்தாகும். உடலிலுள்ள பல உறுப்புகளின் உட்பகுதிகளில் சென்று செயலாற்றக் கூடிய கடுக்காயின் பெருமைகளை அறிந்திருந்த நம் முன்னோர், கடுக்காய்த் தோலை நெய்யில் வதக்கி, காலையில் வெறும் வயிற்றில் சாப்பிட்டு இளமையைத் தக்க வைத்துக் கொண்டனர்.

கல்லீரலைப் பாதிக்கும் காமாலை, இரைப்பை மற்றும் சிறு குடல் இணையும் பகுதியில் அமைந்துள்ள க்ரஹணி எனும் வால்வுப் பகுதியில் ஏற்படும் தொய்வு, நீரிழிவு நோயினால் ஏற்படும் உடல் இளைப்பு, சிறுநீரின் உட்புறத் தேக்கத்தினால் ஏற்படும் உடல் வீக்கம், குடலில் ஏற்படும் நீரோட்டத்தினால் உண்டாகும் பேதி, மண்ணீரல் உபாதைகள் போன்றவை, கடுக்காயின் உட்புற உபயோகத்தினால் குணமடையக் கூடியவை. உஷ்ணம் மற்றும் இளக்கும் தன்மையுடையதால் ரத்த உறைதலை கடுக்காய் ஏற்படுத்துவதில்லை. கப, வாத நோய்களைக் குணப்படுத்தும்.

துவர்ப்புச் சுவையுடைய எந்த உணவும் மருந்தும் கபம், பித்தம், ரத்தம் இவற்றினால் ஏற்படும் தீமைகளை அழிக்கின்றன. கடுக்காய் தோலைத் தண்ணீரில் வேக வைத்து நன்கு உலர்ந்ததும் பொடித்து, தேன் குழைத்துச் சாப்பிட்டால் பேதி நிற்கும். அதே கடுக்காய்த் தோலை வெறுமனே பொடித்து வெந்நீருடன் சாப்பிட, மலச்சிக்கலை நீக்குகிறது. துவர்ப்புச் சுவை உடலில் நீர்ப்பசையின் ஏற்றத்தைத் தடுத்து வறட்சியைத் தருகிறது. ரத்தத்திலுள்ள ஈரத்தை உலர்த்தி அதன் ஓட்டத்தைச் சீராக்குகிறது. புண்களை ஆற்றக் கூடியது. அங்குமிங்கும் கட்டிக் கிடக்கக் கூடிய உட்புற குழாயிலுள்ள மலங்களைச் சுரண்டி வெளிப்படுத்தும் தன்மை கொண்டது.

கடுக்காயுடன் சேர்க்கப்படும் நெல்லிக்காய் மற்றும் தான்றிக்காயின் கூட்டிற்கே திரிபலை என்று பெயர். நெல்லிக்காயும் கடுக்காய் போன்றே குணமுள்ளது. ஆனால் குளிர்ச்சியான வீரிய முடையது. இனிப்புச் சுவையும் அதிலுள்ளதால் குறிப்பாக, பித்தத்தைப் போக்குவதில் சிறந்தது. சீரணமான பின் உவர்ப்பு குணம் கொண்டதால் கபத்தையும், புளிப்பினால் வாயுவையும் குணப்படுத்துகிறது. இதயத்திற்கு இதமானது. நல்ல பார்வையை அளிக்கும். குரலைச் சீர்படுத்தும். கடுமையான காய்ச்சலைத் தணிக்கும்.

தான்றிக்காய், நெல்லிக்கனியைக் காட்டிலும் குறைவான குணமுள்ளது. துவர்ப்பு, இனிப்புச் சுவையுமுடையது. குளிர்ச்சியான வீர்யமுடையது. இருமல், மூச்சுத்திணறல், தொண்டை நோய், கபம், பித்தம், கண்நோய் போக்கும். கூந்தலை வளர்க்கும். இந்தக் காயின் விதையினுள்ளே இருக்கும் பருப்பைக் கொண்டு கண்ணிற்கு மை தீட்டினால். கண்ணில் பூ (கேட்டராக்ட்) விழுதலைத் தவிர்க்கலாம்.

இவை மூன்றும் சம அளவு எடுத்துத் தூள் செய்துச் சாப்பிட- கண்நோய்களை அகற்றும். காயத்தை ஆற்றும். தோல் வியாதியைத் தூக்கி எறியும். பிசுபிசுப்பு, கொழுப்பு, நீரிழிவு, கபம் இவற்றைப் போக்கும் இரத்தம் தொடர்பான நோயை அகற்றும்.

இம்மூன்று மருந்துகளையும் தனித்தனியாகச் சாப்பிடுவதை விட, அவற்றின் சேர்க்கை மிகவும் விசேஷமானது என்பதை நம் முன்னோர் கண்டறிந்தனர். தனியாகச் செய்ய முடியாத சிறப்பான செயல்களை, மருந்துகளின் சேர்க்கையானது அவற்றின் தனித்தன்மையை விட்டு விட்டு, அவற்றின் சேர்க்கையினால் செய்கின்றன. அதனால் நீங்கள் தைரியமாகவும் நம்பிக்கையுடனும் திரிபலையைச் சாப்பிடலாம். இந்த சூரண மருந்தை ஐந்து கிராம் எடுத்து இருநூற்றைம்பது மி.லி. தண்ணீருடன் கொதிக்க வைத்து அறுபது மி.லி.யாக குறுக்கி வடிகட்டி காலை உணவிற்குப் பிறகு சாப்பிடுவது மிகவும் நல்லது.


(தொடரும்)

]]>
http://images.dinamani.com/uploads/user/imagelibrary/2017/1/30/w600X390/tripala.jpg http://www.dinamani.com/health/health-serials/ayurvadham/2017/feb/02/திரிபலா-சூரணத்தின்-பயன்கள்-2640950.html
2637514 தொடர்கள் ஆயுள் காக்கும் ஆயுர்வேதம் உடல் பருமன், சோம்பேறித்தனம் நீங்க...! டாக்டர் எஸ். சுவாமிநாதன் DIN Thursday, January 26, 2017 12:00 AM +0530 ஆயுள் காக்கும் ஆயுர்வேதம்

எனது மகனுக்கு வயது 39. எடை 110 கிலோ. நடைப்பயிற்சி முதலிய எந்தவித உடற்பயிற்சிகளும் இல்லாமல் எப்போதும் தொலைக்காட்சியில் கிரிக்கெட் போட்டிகளையும், டீவி சீரியல்களையும் பார்த்துப் பொழுது போக்கி வருகிறான். எப்போதும் சப்பாத்தி மட்டுமேதான் சாப்பிடுகிறான். அரிசி சாதம் சாப்பிட்டால் நீரிழிவு நோய் வந்துவிடும் என்கிறான். இது உண்மையா?    

                                                            எம். எஸ். நளினி, சென்னை-33.

ஒரு வகையில் அவருடைய நினைப்பு சரியாகத்தான் உள்ளது. அஷ்டாங்க சங்க்ரஹம் எனும் ஆயுர்வேத நூலில் பல வகையான சம்பா நெல்கள் மற்றும் அரிசி பற்றிய வர்ணனையில் இனிப்புச் சுவையுள்ளவை; உணவின் செரிமான இறுதியில் இனிப்பாகவே இருப்பவை; பசையுள்ளவை; வீரியத்தை வளர்ப்பவை; மலத்தைக் கட்டுபவை; மலத்தைக் குறைப்பவை; குளிர்ச்சியானவை என்றெல்லாம் கூறப்பட்டுள்ளது. கோதுமையைக் மட்டுமே மாவாக்கி, சப்பாத்தி சாப்பிடும் நிலையில், கோதுமையைப் பற்றிய விவரமும் நாம் அந்நூலிலிருந்து அறிந்து கொள்ள வேண்டியது - வீரியத்தை வளர்ப்பது; குளிர்ச்சியானது; எளிதில் செரிக்காத குணமுடையது; பசையுள்ளது; உயிரையளிப்பது; வாதம் மற்றும் பித்த தோஷங்களைப் போக்குவது; முறிந்த உறுப்புகளை சேர்க்க வல்லது; இனிப்பானது; உடலை நிலை நிறுத்துவது; மலமிளக்கி. மெல்லிய நீண்ட கோதுமை உடலுக்கு உகந்தது. குளிர்ச்சி, துவர்ப்பு, இனிப்புச் சுவையுடன் லேசான தன்மையுடையது.

உங்களுடைய மகனுடைய பிரச்னையே சோம்பேறித்தனமான வாழ்க்கை முறைதான். அதில்தான் ஆபத்து அதிகமுள்ளது. சிறு வயதிலிருந்தே அதிக செல்லம் கொடுத்து நீங்கள் வளர்த்திருந்தாலோ அல்லது தாய்-தந்தையரின் நேர்ப்பார்வையில் கண்டிப்பும், நல்உபதேசமும் இல்லாமல் வளரும் பிள்ளையாக இருந்திருந்தால், இது போன்ற வாழ்க்கையை அவர் இத்தனை வயது வந்திருந்தாலும் எதிர்கால சிந்தனை பற்றிய கவலை இல்லாமல் இருக்கலாம். 39 வயதில் உபதேசம் தலைக்கு ஏறாது. அதனால் கீழ் காணும் சில ஆயுர்வேத சிகிச்சைகள் மூலம் அவர் உடல் பருமனையும், சோம்பேறித்தனத்தையும் மாற்ற முயற்சிக்கலாம்.

உடலையும் தலையையும் விரேசனம் என்ற முறைப்படி சுத்தப்படுத்துதல். விரேசனம் என்றால் வாந்தி மற்றும் பேதி மருந்து கொடுத்து குடலை சுத்தப்படுத்துவதுடன், மூக்கினுள் விடும் மூலிகைத் தைலங்களால் தலைப்பகுதியைச் சுத்தப்படுத்துவதுமாகும். இதனால் தலையைச் சார்ந்த தமஸ் எனும் மனோ தோஷம் விலகுவதால், மனமும் மூளையும் சுறுசுறுப்படையும்.

இரத்தத்தை வெளியேற்றுதல்  ரத்தக் குழாயைக் கீறி இரத்தத்தை வெளியேற்றும் சிகிச்சை முறையால் இரத்தத்தில் தேங்கியுள்ள அழுக்குகளைக் களையலாம் என்று ஆயுர்வேதம் வலியுறுத்துகிறது. இதன் மூலம் அவருடைய சோம்பலினால் ஏற்பட்ட இரத்த அழுக்குகள் நீங்கும்.

மூலிகைப்புகை பிடித்தல் -  ஊமத்தம் இலையை காய வைத்து நெருப்பில் போட்டு வரும் புகையை முகர்வதால் மூளையிலுள்ள சோர்வையும் சோம்பலையும் மாற்றலாம்.

பசி, தாகம் ஏற்படும் வகையில் உபவாசமிருத்தல் -  இதனால் தேவையற்ற கொழுப்பு அம்சங்கள் தவிர்க்கச் செய்து வறண்டதாக்கலாம். சிந்தனையைத் தூண்டச் செய்யும் வகையில்  வேலைகளைத் தரலாம். இதனாலும் மூளையைச் சுறுசுறுப்பாக்கலாம். அவருக்கு பிடித்தமான விஷயங்களைச் சிந்தனை செய்து நன்மை பெறும் வகையில் இந்த சிகிச்சை முறையைக் கையாள வேண்டும். உதாரணமாக பாட்டிலும், வாத்தியம் இசைப்பதிலும் ஆர்வமுள்ளவராக இருந்தால் அவற்றையே பயிற்சி செய்து அவை மேலும் மெருகுற செய்யும் சிந்தனைகளைத் தூண்டி  மகிழ்ச்சியுறலாம். இன்பம் தராத படுக்கையைப் பயன் படுத்தல் ஒரு சிகிச்சை முறையாகும். இதனால் அதிக தூக்கமின்றி சோம்பலை நீக்கலாம்.

ஸத்துவம் எனும் நற்குணத்தின் ஏற்றம், பெருந்தன்மை, தமோகுண மின்மை, வறண்ட உணவு ஆகியவற்றின் மூலம் அவருடைய சோம்பலான வாழ்க்கை முறையை மாற்றி வாழ்க்கையை பயனுறும் வகையில் அமைக்கலாம். ஆயுர்வேத மருந்துகளாகிய வரணாதி கஷாயம் மற்றும் லோத்ராஸவம் போன்ற மருந்துகள் உடல் பருமனைக் குறைப்பவை. சிலாசத்து எனும் பற்பம் உடலைக் குறைப்பதுடன் ஆரோக்கியமும் சுறுசுறுப்பும் தரக் கூடியது. அணு தைலத்தை மூக்கினுள் விட்டு உறிஞ்சுவதால் தமோ குணம் எனும் மனோ தோஷமானது மூளையில் இருந்து நீங்கி விடும். குடல் சுத்தி முறைகளை ஆயுர்வேத மருத்துவ மனையில் தங்கி செய்து கொள்ள வேண்டியது அவசியமானது. 
(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2016/7/21/12/w600X390/rice.jpg http://www.dinamani.com/health/health-serials/ayurvadham/2017/jan/26/உடல்-பருமன்-சோம்பேறித்தனம்-நீங்க-2637514.html
2631628 தொடர்கள் ஆயுள் காக்கும் ஆயுர்வேதம் வறட்சியை ஏற்படுத்தி வலுவைச் சேர்த்தல்! டாக்டர் எஸ். சுவாமிநாதன் DIN Thursday, January 12, 2017 06:13 PM +0530 ஆயுள் காக்கும் ஆயுர்வேதம்
வயது 54. கடந்த ஏழுவருடங்களாக கழுத்து வலியால் அவதிப்படுகிறேன். கடந்த ஒரு வருடமாக கழுத்தை திருப்பக் கூட முடியவில்லை. MRI SCAN Report-இல் கழுத்து எலும்பு வில்லைகள் முழுவதுமாக தேய்ந்து விட்டது எனத் தெரிகிறது. அதிக நேரம் உட்காரவோ, படுக்கையில் மல்லாந்து படுக்கவோ இயலவில்லை. தலை படுக்கையில் படுவதில்லை. விரைப்பாக உள்ளது. பஸ்ஸில் கழுத்துப்பட்டை போட்டுக் கொண்டால் தான் போக முடிகிறது. உட்கார்ந்த நிலையில் இருகைகளும், இருகால்களும் மரத்துப் போகின்றன. கழுத்தை மெதுவாகத் திருப்பினாலும் எலும்புகள் உரசும் சத்தம் வருகிறது. இதற்கு ஆயுர்வேத சிகிச்சை உள்ளதா?

அ.சோமசுந்தரம், பவானி.

இளைத்துப்போன ஒரு நபரை, புஷ்டியாக்க  பயன்படுத்தும் மருந்துகளை முதலில் பயன்படுத்தாமல், அவர் மேலும் இளைப்பதற்கான சிகிச்சை முறைகளை சிறிது காலம் செய்வதால் நல்ல பலன்களைப் பெறலாம் எனும் ஓர் ஆயுர்வேத சித்தாந்தம் தங்களுக்குப் பயன்படலாம். அந்தவகையில் Ankylosing spondylitis, loss of joint space at C2,C3 and C4 facet joint. Small hyperintense cyst at right C7 neural foramina Guß MRI SCAN Report இல் வந்திருக்கும் தங்களுக்கு, சில நாட்கள் மூலிகைகளால் கட்டப்பட்ட பொடி ஒத்தடம் சூடாகக் கொடுப்பதும் அதன் பிறகு வறட்சி ஏற்படுத்தும் மூலிகைப் பற்று இடுவதும் அவசியம். 

காலையில் உணவிற்கு முன், கொட்டஞ்சுக்காதி, ஏலாதி, ராஸ்னாதி என்று பெயரில் விற்கப்படும் சூரண மருந்துகளைப் பொடி ஒத்தடமாக சூடாகக் கொடுப்பதும், இஞ்சி சாற்றுடன் கலந்து ராஸ்னாதி சூரணத்தைச் சூடாக்கி மாலையில் பற்று இடுவதன் மூலமாக வறட்சி ஏற்பட்டு, கழுத்து எலும்பு தேய்மானம் ஏற்பட்டுள்ள பகுதிகளை வறட்சியுறச் செய்ய வேண்டும்.

அதன் பிறகு, அதே கழுத்தினுடைய பகுதியில் கார்ப்பாஸூஸ்தியாதி தைலத்தை சூடாக்கி துணியில் நனைத்து இடுவதும், ஆமணக்கு, நொச்சி, கற்பூரம், புங்கம், கல்யாண முருங்கை, சித்தரத்தை இலை ஆகியவற்றை சிறு சிறு துண்டுகளாக நறுக்கி தண்ணீர் போட்டுக் காய்ச்சி, அதிலிருந்து வெளியேறும் நீராவியை, கழுத்தில் நன்கு படும்படியாகக் காட்டுவதும் நலமே. இதனால் விரைப்பான தன்மையைப் போக்கிக் கொள்ளலாம். இதற்கு ஸ்நேஹ-ஸ்வேதம் என்று பெயர்.

உட்புற வறட்சியை முதலில் ஏற்படுத்திய பிறகு எலும்பு வில்லைகளை வலுப்படுத்துவதே சிறப்பு. அந்த வகையில்-  பசியைத் தூண்டி செரிமானத்தைக் கூட்டும் வகையில் உள்ள அஷ்டசூரணம், வைஷ்வானரம் சூரணம் போன்ற மருந்துகளைச் சாப்பிடச் செய்து குடலில் வாயுவின் ஓட்டத்தை அடக்க வேண்டும். எனிமா முறையும் செய்ய வேண்டும். 

அதன் பிறகு உட்புற நெய்ப்பைத் தரும் ஷீரபலா101, விதார்யாதி கிருதம், அஸ்வகந்தாதி லேஹ்யம் போன்ற மருந்துகளைப் பிரயோகிப்பதன் மூலம், வில்லைகளை வலுப்படுத்தி, அவற்றிற்குத் தேவையான நெய்ப்பும், வலுவையும் சேர்க்கலாம். இவை யாவும் சிறப்பான  முயற்சிகளே. இதையும் மீறி வில்லைகளின் தேய்மானம் சரியாகாதிருந்தால் அறுவை சிகிச்சை செய்ய வேண்டி வரலாம். மேற்குறிப்பிட்ட சிகிச்சை முறைகள் அனைத்தும் ஆயுர்வேத மருத்துவமனைகளில் சிறப்பாகச் செய்யப்படுகின்றன.

(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://www.dinamani.com/health/health-serials/ayurvadham/2017/jan/12/வறட்சியை-ஏற்படுத்தி-வலுவைச்-சேர்த்தல்-2631628.html
2627719 தொடர்கள் ஆயுள் காக்கும் ஆயுர்வேதம் நரம்புகளை வலுப் பெறச் செய்ய... டாக்டர் எஸ். சுவாமிநாதன் DIN Thursday, January 5, 2017 05:40 PM +0530 ஆயுள் காக்கும் ஆயுர்வேதம்

என் வயது 81. கொட்டாவி விடும் போது காது அருகில் நரம்பு பிடித்துக் கொள்கிறது. சில சமயம் கை குரக்கலிபிடித்துக் கொள்கிறது. வலது கால் விரைத்து நீட்டினால் நரம்பு பிடித்துக் கொள்கிறது. நீவினால் சரியாகிவிடுகிறது. இவை எதனால் ஏற்படுகிறது.


- சு.உலகநாதன்,  திருநெல்வேலி - 7

வயோதிகத்தில் வாயுவின் ஆதிக்க குணங்களாகிய வறட்சி, லேசானதன்மை, குளிர்ச்சி, சொரசொரப்பு, ஊடுருவும்தன்மை மற்றும்  நகரும் தன்மை ஆகியவை மனித உடலில் இயற்கையாகவே அதிகரிக்கின்றன. இக்குணங்களுக்கு நேர் எதிராகிய நெய்ப்பு, கனம், சூடு, வழுவழுப்பு, மந்தத்தன்மை, நகராத நிலைத்தன்மை போன்ற குணங்களை உணவாகவும் மருந்தாகவும் செயலாகவும் பயன்படுத்தினால் உங்களுடைய நரம்பு பிரச்னைக்கு அதுவே தீர்வாகலாம். அந்த வகையில்    உடலுக்கு நெய்ப்பு தரும் உட்புற மருந்தாகிய விதார்யாதி க்ருதம் எனும் நெய்மருந்தை சுமார் பத்து மி.லி. காலை, மாலை உருக்கி, வெறும் வயிற்றில் 3-6 மாதங்கள் சாப்பிடவும். தோலுக்கு பதமளித்து நெய்ப்புத் தரும் மஹாமாஷ தைலத்தை காலையில் வெதுவெதுப்பாக உடலெங்கும் தடவி அரை மணிநேரம் ஊறிய பிறகு, வெந்நீரில் குளிக்கவும். உடலை வருத்தும் உழைப்பை நிறுத்தி, நிறைய ஓய்வெடுப்பதன் மூலமாக, செயல்வடிவமாக நீங்கள் நெய்ப்பைப் பெறலாம். உணவில் வறட்சியளிக்காத இனிப்பு, புளிப்பு மற்றும் உப்புச்சுவை ஆகியவற்றைச் சிறிது தூக்கலாகச் சாப்பிடுவதால் உணவின் மூலம் நெய்ப்பைக் குடலில் சம்பாதித்துக் கொள்ளலாம்.

 பூவன் வாழைப்பழம் அல்லது நேந்திரன் வாழைப் பழத்தை அரிந்து தயிர் மற்றும் தேன் கலந்து மதியம் சாப்பிடுவதன் மூலமாகவும், இரண்டு க்ஷீரபலா 101 எனும் கேப்ஸ்யூல் மருந்தை இரவு படுக்கும் முன் சிறிது சூடான பாலுடன் சாப்பிடுவதாலும், மதியம் படுத்து உறங்குவதன் மூலமாகவும் கனம் எனும் குணத்தை உடலில் நிரப்பி, வாயுவினுடைய லேசானதன்மை எனும் குணத்தை நீக்கலாம்.

சுக்கு, சித்தரத்தை போன்றவற்றை வகைக்கு 5 கிராம் வீதம் எடுத்து ஒரு லிட்டர் தண்ணீருடன் வேக வைத்து அரை லிட்டராகச் சுண்டியதும் வடிகட்டி, தாகம் எடுக்கும் போதெல்லாம் சிறிது சிறிதாகப் பருகுவதாலும் வைஷ்வாநரம் எனும் சூரணத்தை அரை ஸ்பூன் காலை, இரவு உணவிற்கு அரை மணி முன் 75 மி.லி. வெந்நீருடன் பருகுவதாலும் கதகதப்பான அறையில் படுத்து உறங்குவதாலும் வாயுவினுடைய குளிர்ச்சி எனும் குணம் நரம்புகளிலிருந்து விடுபட்டு, சூடேற்றப்
படுவதால் அதுவே உங்களுக்கு நரம்பு இழுப்பைக் குறைத்துவிடும்.

மற்ற மூன்றாகிய வழுவழுப்பு, மந்தகத்தன்மை, நிலைத்ததன்மை ஆகிய குணங்களை உணவில் சுமார் பத்து முதல் பதினைந்து மி.லி. வரை உருக்கிய பசு நெய்யை சூடான புழுங்கலரிசி சாதத்துடன் காலை, இரவு முதல் இரு கவளங்களைச் சாப்பிடுவதன் மூலமாகவும் அப்ரக பஸ்மம் மற்றும் சங்க பஸ்மம்  எனும் பஸ்ம மருந்துகளைச் சிறிது நெய் மற்றும் தேன் குழைத்து மதிய உணவிற்கு 1 மணிநேரம் முன்பாக நக்கிச் சாப்பிடுவதாலும், மனதில் கோபதாபங்களுக்கு இடம் தராமல், மகிழ்ச்சியுடன் கூடிய குடும்ப வாழ்க்கையை அமைத்துக் கொள்வதாலும் பெறலாம்.

ஆயுர்வேத மருத்துவமனைகளில் செய்யப்படும் தைலதாரா சிகிச்சை, நவரக்கிழி சிகிச்சை தலைப்பொதிச்சல் சிகிச்சை, சிரோவஸ்தி சிகிச்சை முறைகள் மூலமாகவும் நம் உடலிலுள்ள நாடி நரம்புகளை வலுப் பெறச் செய்யலாம்.

(தொடரும்)
பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே)
செல் : 94444 41771

]]>
http://images.dinamani.com/uploads/user/imagelibrary/2015/7/13/17/w600X390/stock-photo-of-banana-closeup-boutique-142922.jpg http://www.dinamani.com/health/health-serials/ayurvadham/2017/jan/05/நரம்புகளை-வலுப்-பெறச்-செய்ய-2627719.html
2559959 தொடர்கள் ஆயுள் காக்கும் ஆயுர்வேதம் அரிப்புக்குக் காரணம்... உட்புறக் கழிவுகள்! டாக்டர் எஸ். சுவாமிநாதன் DIN Monday, September 26, 2016 04:07 PM +0530 என் வயது 71. ஓய்வூதியர். இரண்டு கை மணிக்கட்டு, புறங்கைப் பகுதிகளில் அரிப்பு அதிகமாக இருக்கிறது. பிடறியிலும் அதே அறிகுறி உள்ளது. இதற்கான சிகிச்சைமுறையைத் தெரிவிக்க வேண்டுகிறேன்.
 த.நாகராஜன், சிவகாசி.

வயோதிகத்தில் உப்புசத்து உடலில் அதிகரிக்க வாய்ப்பிருக்கிறது. சிறுநீரகங்களின் வழியாக வெளியேற வேண்டிய தேவையற்ற உப்பு மற்றும் தாதுப்பொருட்கள் தேக்கமடைந்தால் அது உடலில் எந்த பகுதி தளர்ந்திருக்கிறதோ, அந்தப் பகுதியில் குடிகொண்டு அரிப்பை ஏற்படுத்தும். அதனால் வெளிப்புறப்பூச்சுகள் மட்டும் இதில் பயன்பெறுவதில்லை. திரிதோஷங்களாகிய வாத, பித்த, கபங்களின் சமச்சீரான நிலையில் நோய்கள் ஏதும் தோன்றுவதில்லை என்றும், அவற்றில் ஏற்படும் ஏற்றமும் இறக்கமுமே நோயாக மாறுவதாக ஆயுர்வேதம் குறிப்பிடுகிறது. அந்தவகையில் வாயு அதிகரிக்கக் கூடிய வயதில் தங்களுக்கு கபத்தினுடைய சேர்க்கையும் சேருமானால் அதுவே தோலில் அரிப்பை ஏற்படுத்தக் கூடும். இவ்விரு தோஷங்களையும் சமநிலைப்படுத்தக் கூடிய ஏலாதி என்ற பெயரிலுள்ள தைல மருந்தை காலை, மாலை இருவேளை வெளிப்புறப் பூச்சாகப் பயன்படுத்தி சுமார் அரை  மணிநேரம் ஊற வைத்து ஏலாதி சூரணம் என்ற மருந்துடன் கடலை மாவு கலந்து தயிர் மேலில் நிற்கக் கூடிய தண்ணீருடன் குழைத்து அந்த எண்ணெய்ப் பசையை அகற்றுவதற்காக நீங்கள் பயன்படுத்தலாம்.

உட்புற உறுப்புகளின் செயல்திறன்பாடானது குறையும் பட்சத்தில் இந்த உபாதை தோல்புறத்தில் பிரதிபலிக்கலாம். அதிலும் முக்கியமாக குடலின் உட்புற சவ்வுகளில் தேங்கும் அழுக்கினால் தோல் அரிப்பு ஏற்படும் என்றும் ஒரு வினோதமான குறிப்பை ஆயுர்வேதம் வெளிப்படுத்துகிறது. அதனால் குடல் சுத்தம் தாதுக்களில் படிந்துள்ள கண்ணுக்குத் தெரியாத அழுக்குகள், மலம், சிறுநீர், வியர்வை ஆகிய பகுதிகளைத் தாங்கக் கூடிய பை மற்றும் குழாய்களில் படியும் படிவங்களையும் நீக்கினால் வெளிப்புறத்தில் ஏற்பட்டுள்ள தோல் அரிப்பானது மறைந்துவிடும். குடல் சுத்தத்தை நேரடியாகச் செய்யக்கூடாது என்ற நியமம் இருப்பதால் ஆயுர்வேத மூலிகை நெய் மருந்தாகிய திக்தம் அல்லது மஹாதிக்தகம் ஆகியவற்றில் ஒன்றை சுமார் பதினைந்து மில்லி லிட்டர் காலை, மாலை வெறும் வயிற்றில் 48 நாட்கள் சாப்பிட உட்புறபடிவங்களை நெகிழ வைத்து அவற்றைக் குடலுக்குக் கொண்டு வரக்கூடிய அளவிற்கு இந்த நெய் மருந்துகள் மாற்றித் தரும். நெருப்பினுடைய சம்பந்தமில்லாமல் வியர்வையை வரவழைக்கக் கூடிய கம்பளியைப் போர்த்திக் கொள்ளுதல், வேகமான நடைப் பயிற்சி, சிலம்பாட்டம் போன்றவற்றின் மூலமாக நன்றாக வியர்வையை உடலில் ஏற்படுத்தி அதன்மூலம் உட்புறக் கழிவுகளை திரவமாக்கி குடல் உட்புறப் பகுதிகளில் விரைவாக எடுத்துச் செல்லும் வழியை இந்த வியர்வையின் மூலமாகப் பெறலாம். குடல் பகுதியில் குவிந்துள்ள அழுக்குகளை ஆசனவாய் வழியாக நீர்பேதியாக வெளியேற்றும் த்ரிவிருத் லேஹ்யம், அவிபத்தி சூரணம், மிஸ்ரகஸ்நேஹம், மாணிபத்ரம் குடம் போன்றவற்றில் ஒன்றை மருத்துவர் ஆலோசனைப்படி சாப்பிட்டு அதன் மூலம் பெறும் குடல் சுத்தமானது தோலில் ஏற்பட்டுள்ள அரிப்பை நீக்குவதற்கான சிறந்த சிகிச்சை முறையாகும். அரிப்பு குறைந்தாலும், வேப்பெண்ணெய்யைச் சிறிதுகாலம் இளஞ்சூடாக அரிப்பு ஏற்பட்டுள்ள பகுதியில் பூசி அரை முக்கால் மணிநேரம் ஊறிய பிறகு குளிக்கலாம்.

 உணவில் புளித்த தயிர், கத்தரிக்காய், நல்லெண்ணெய், கடுகு, உளுந்து சேர்க்கக் கூடிய இட்லி, தோசை, வடை, புலால் உணவு, பகல் தூக்கம், கனமான பொருட்களாகிய மைதா, பன்-பட்டர்-ஜாம், பிஸ்கட்டுகள், இனிப்பு வகைகள் ஆகியவை தவிர்க்கப்பட வேண்டியவை. குடிக்கக்கூடிய தண்ணீரையும் ஒரு மூலிகைத் தண்ணீராக மாற்றினால் சிறப்பாக அமையும். அந்தவகையில் கருங்காலிக் கட்டை, சரக்கொன்றைப்பட்டை, நன்னாரிவேர்ப்பட்டை ஆகியவற்றை வகைக்கு ஐந்து கிராம் வீதம் எடுத்து ஒரு லிட்டர் தண்ணீரில் கொதிக்க வைத்து அரை லிட்டராகக் குறுக்கி வடிகட்டி ஒருநாளில் பலதடவை சிறுகச் சிறுகப் பருகுவதால் குடல் உட்புற சுத்தம் பெறுவதுடன் இரத்தமும் சுத்தமாகும். அங்குமிங்கும் ஒட்டியிருக்கக் கூடிய கபதோஷத்தின் குணங்களாகிய நெய்ப்பு, குளிர்ச்சி, கனம், மந்தம் போன்ற குணங்களுக்கு நேரெதிராகச் செயல்பட்டு அவற்றை நீர்க்கச் செய்து சிறுநீர் மலம் மற்றும் வியர்வையின் மூலமாக இந்த தண்ணீரே வெளியேற்றிவிடும் சிறப்பு வாய்ந்தது. நால்பாமரப்பட்டை எனப்படும் ஆலம்பட்டை, அரசம்பட்டை, அத்திப்பட்டை, இத்திப்பட்டை மற்றும் வேப்பம்பட்டை, புங்கம்பட்டை, ஏழிலம்பாலைப்பட்டை, வில்வமரப்பட்டை ஆகியவற்றைக் கொண்டு தயாரிக்கப்பட்ட தண்ணீரை, குளிப்பதற்காக பயன்படுத்தினால் அரிப்பு குறைவது திண்ணம்.
 (தொடரும்)

 பேராசிரியர் எஸ். சுவாமிநாதன்,
 ஸ்ரீஜயேந்திர சரஸ்வதி ஆயுர்வேதக் கல்லூரி,
 நசரத்பேட்டை - 600 123 (பூந்தமல்லி அருகே)
 செல் : 94444 41771
 
 

]]>
http://images.dinamani.com/uploads/user/imagelibrary/2016/8/30/w600X390/ayurveda1.jpg http://www.dinamani.com/health/health-serials/ayurvadham/2016/sep/06/அரிப்புக்குக்-காரணம்-உட்புறக்-கழிவுகள்-2559959.html