Dinamani - பயணம் - http://www.dinamani.com/lifestyle/travellogue/ http://www.dinamani.com/ RSS Feed from Dinamani en-us Copyright 2016 Dinamani. All rights reserved. 2747873 லைஃப்ஸ்டைல் பயணம் வெயிலுக்கு இதமா கும்பக்கரை அருவிக் குளியல் போடலாமா?! கார்த்திகா வாசுதேவன் Tuesday, August 1, 2017 04:49 PM +0530  

கும்பக்கரை அருவியில் குளிப்பது பேரானந்தம் தரும் குதூகலங்களில் ஒன்றாக இருந்தாலும் கூட அருவிக் குளியலை விடவும் பரமானந்தம் கொள்ள வைப்பது, அந்த அருவிக்குச் செல்லும் பாதையின் இருமருங்கும் நாம் காணக்கூடிய காட்சிகள். பெரியகுளத்திலிருந்து கும்பக்கரை செல்லும் சாலையில் உள்ள இஸ்லாமிய மேல்நிலைப் பள்ளியைத் தாண்டி விட்டால் போதும், அங்கிருந்தே ஆரம்பித்து விடுகின்றது மாந்தோப்புகளின் நிரை. மாந்தளிர் வாசம் இதமாக நாசியை நிரப்ப... அதை  வாசம் பிடித்துக் கொள்ளத் தொடங்கும் போதே மெல்லிய பதமான குளிர் ஒரு சல்லாத்துணியைப் போல நம் மேனியில் கவியத் தொடங்கும்... சாலை உள்ளே செல்லச் செல்ல மாந்தோப்புகள், கொய்யாத்தோப்புகள், நெல்லித்தோப்புகள் என வகை வகையாக இதமான வாசனை நுரையீரலை நிரப்பத் தொடங்கும். எல்லா விதமான பழ மரங்களும் இருந்தாலும் மிகுந்திருப்பவை மாமரங்களே! நீங்கள் அருவியில் குளிப்பீர்களோ, இல்லையோ ஆனால் நிச்சயம் இந்தச் சாலைகள் தரும் அனுபவத்தை வாழ்க்கையில் ஒரு முறையாவது அனுபவிக்கவில்லை எனில் பூலோக சொர்க்கத்தை இழந்தவர்கள் என்பேன். சரி இனி கும்பக்கரை அருவியைப் பற்றி சுருக்கமாகத் தெரிந்து கொள்ளுங்கள்... 

அமைவிடம்...

தேனி மாவட்டம், பெரியகுளத்திலிருந்து சுமார் 8 கி.மீ தொலைவில் உள்ளது கும்பக்கரை நீர்வீழ்ச்சி. தேனி மாவட்டத்தில் உள்ள நீர்வீழ்ச்சிகளில் இதுவும் ஒன்று. மேற்குத் தொடர்ச்சி மலைப்பகுதியில் அமைந்துள்ள இந்த நீர்வீழ்ச்சி கொடைக்கானல் அருகில் உள்ள பாம்பாறு பகுதியில் தோன்றி பாறைகளிடையே பாய்ந்து கீழே நீர்வீழ்ச்சியாக விழுகிறது. மிதமான அருவிக் குளியலை விரும்பும் சுற்றுலாப் பயணிகளுக்கு மிகுந்த மகிழ்ச்சி அளிக்கும் சுற்றுலாத் தலமாக இது விளங்குகிறது. மழைக் காலத்தில் நீர்வீழ்ச்சியில் விழும் தண்ணீர் அதிகமாகவும், கோடை காலத்தில் குறைவாகவும் இருப்பதால் இங்கு நீரின் வேகம் அதிகமாகும் போது அருவியில் குளிப்பதற்குத் தடை விதிக்கப்படுகிறது. சமீபத்தில் அப்படி விதிக்கப்பட்டிருந்த தடை அருவியின் நீர்வரத்தைப் பொறுத்து இன்று விலக்கிக் கொள்ளப்பட்டுள்ளதாக தகவல். கும்பக்கரை செல்ல விரும்புவோர் தாராளமாக இந்த வார இறுதிக்குத் திட்டமிடலாம்.

நீர்வீழ்ச்சியின் பிற பகுதிகள்...

கும்பக்கரை நீர்வீழ்ச்சிப் பகுதியில் இந்த நீர்வீழ்ச்சி தவிர தண்ணீர் செல்லும் தடங்களிலுள்ள வழுக்குப் பாறை, யானைக் கெஜம், உரல் கெஜம், பாம்பு கெஜம் என்று அழைக்கப்படும் பகுதிகளில் சுற்றுலாப் பயணிகள் நீராடி மகிழ்கின்றனர். இந்த தண்ணீர் தடப்பகுதிகளில் சில இடங்களில் குளிப்பது ஆபத்தானது என்று தடை விதிக்கப்பட்டிருக்கிறது.

போக்குவரத்து வசதிகள்...

தேனி மாவட்டம் பெரியகுளம் நகரிலிருந்து 8 கிலோமீட்டர் தொலைவிலிருக்கும் இந்த நீர்வீழ்ச்சிக்கு குறிப்பிட்ட நேரங்களில் மட்டும் தமிழ்நாடு அரசுப் போக்குவரத்துக் கழகம் பேருந்துகளை இயக்குகிறது. தேனி மற்றும் பெரியகுளம் பேருந்து நிறுத்தங்களில் தனியார் வாகனங்களும் வாடகைக்குக் கிடைக்கின்றன. தேனியில் இருந்து கும்பக்கரை சென்று வர நாள் ஒன்றுக்கு 600 முதல் 800 ரூபாய் வரையில் கார்கள் வாடகைக்குக் கிடைக்கின்றன. சொந்தக்கார், வாடகைக்கார் என எந்தக் காரில் சென்றாலும் கும்பக்கரை மட்டுமல்ல அதையொட்டி அருகிலிருக்கும் சோத்துப்பாறை அணைப்பகுதிக்கும் சென்று திரும்பலாம்.

உணவு வசதி...

கும்பக்கரை நீர்வீழ்ச்சிக்கு செல்லத் திட்டமிடுபவர்கள் வீட்டிலிருந்து சாப்பாடு கட்டி எடுத்துக் கொண்டு செல்வது நல்லது. குடியிருப்புப் பகுதிகளாக இல்லாமல் தோட்டங்களும், தோப்புகளும் நிறைந்த பகுதி என்பதால் அங்கே சாப்பிடத் தோதாக எதுவும் கிடைக்காது. எனவே ஆசை தீர அருவியில் குளித்து விட்டு வந்த பின் கப, கபவென பசிக்கும் வயிற்றைப் பட்டினி போடாமல் ருசித்துச் சாப்பிட வீட்டிலிருந்தே மணக்க, மணக்க சித்ரான்னம், புளியோதரை, காரமான சாரமான தக்காளி இஞ்சித் தொக்குடன் தயிர் சாதம், உருளை வறுவல் என்று சிம்பிளாக ஏதாவது சமைத்து வீட்டிலிருந்தே கொண்டு சென்று அங்கே குளித்து விட்டுச் சாப்பிட்டால் ஏகாந்தமாக இருக்கும். வீட்டிலிருந்து சமைத்து எடுத்துவர இயலாத வெளிமாவட்ட சுற்றுலாப் பயணிகள் எனில் அவர்களுக்குச் சிறந்த உணவகங்கள் பெரிய குளத்திலும், தேனியிலும் கிடைக்கும்.

கழிப்பிட வசதிகள்...

கும்பக்கரை அருவிக்குச் செல்பவர்களுக்கு அருவியில் குளித்த பின் உடைமாற்ற வசதியாக அங்கே கழிப்பிட வசதியுடன் அறைகள் கட்டப்பட்டுள்ளன. ஆனால் நம் திருவாளர். பொதுஜனம் குறித்துத் தான் நமக்குத் தெரியுமே! கடந்தாண்டு நாங்கள் அங்கே சென்ற போது அந்த அறைகளுக்குள் கால் வைக்க முடியாத அளவுக்கு ஒரே துர்நாற்றம். சரியாகப் பராமரிக்கப் படாமல் நிறைய குப்பைக் கூளங்களுடன் பயன்படுத்த முடியாத நிலையில் இருந்தன கழிப்பறைகள். இதை சம்மந்த்தப் பட்ட அதிகாரிகள் கவனித்து நடவடிக்கை எடுத்திரா விட்டால் இதுவரையிலும் நிலைமை அப்படியே தானிருக்கும்.

 

]]>
kumabakarai falls, tamilnadu tour, குமக்கரை அருவி, தமிழ்நாடு டூர் http://images.dinamani.com/uploads/user/imagelibrary/2017/8/1/w600X390/kumbakarai2.JPG http://www.dinamani.com/lifestyle/travellogue/2017/aug/01/kumbakarai-falls-tour-2747873.html
2743940 லைஃப்ஸ்டைல் பயணம் திராவிடப் பாரம்பரியம் அறிந்து கொள்ள ஒருமுறை தக்‌ஷின சித்ராவுக்குப் போய் வாருங்கள்! கார்த்திகா வாசுதேவன் Wednesday, July 26, 2017 11:08 AM +0530  

  • இடம்: தக்‌ஷின சித்ரா
  • அமைவிடம்: எம்.ஜி.எம் டிஸ்ஸி வேர்ல்ட் அருகில், கிழக்கு கடற்கரைச் சாலை, சென்னை.
  • நுழைவுக் கட்டணம்: பெரியவர்களுக்கு 100 சிறுவர்களுக்கு 50 ரூபாய்
  • தொடர்புக்கு: 044 27472603
  • நேரம்: காலை 10 மணி முதல் மாலை 7 மணி வரை ( செவ்வாய் விடுமுறை, அனைத்து அரசு பண்டிகை விடுமுறை தினங்களிலும் திறந்திருக்கும், தீபாவளியன்று மட்டும் விடுமுறை)
  • உணவு: வீட்டிலிருந்து உணவு எடுத்துச் செல்ல அனுமதி இல்லை, சகாயமான விலையில் தரமான உணவு வகைகளுடன் மியூசியத்தின் உள்ளே உணவகம் உண்டு)
  • பேருந்து வசதி: எம்.ஜி.எம் டிஸ்ஸிவேர்ல்ட் வழியாகச் செல்லும் பேருந்துகளில் செல்லலாம், எந்த நேரமும் கால் டாக்ஸி வசதியும் உண்டு.

தக்‌ஷின சித்ரா சைட் மேப்:

 

உள்ளே நுழைந்ததும் இந்த மேப்பை ஒருமுறை நன்கு பார்த்துக் கொள்ளுங்கள். உள்ளே எந்த இடத்தையும் தவற விடாமல் பார்த்து ரசிக்க இந்த மேப் உதவும்.

திராவிடக் கட்டிடக்கலை, பழந்தமிழர் நாகரிகம், தென்னிந்திய கலாச்சாரம், தற்போது அரிதாகி அழிந்து வரும் தமிழக நாட்டுப்புறக் கலைகள், ஓவியம், பிலாக் பிரின்டிங், தென்னிந்தியாவை ஆண்ட மன்னர்கள் வரலாறு இவற்றையெல்லாம் சென்னையில் ஒரே இடத்தில் அறிந்து கொள்ள விரும்பினீர்கள் எனில் நீங்கள் தாரளமாக கிழக்கு கடற்கரைச் சாலையில் இருக்கும் ‘தக்‌ஷின சித்ரா ஹெரிடேஜ் மியூசியத்துக்கு’ ஒருமுறை சென்று திரும்புவது நல்லது. சென்னையில் இப்படி ஒரு இடம் இருக்கிறது என்று சேதி அறிந்த நாள் முதலாய் எனக்கு அங்கே ஒருமுறை சென்று வரும் ஆசை இருந்தது. ஆனால் பலநாட்களாக நிறைவேறாமல் நீண்டு கொண்டே இருந்த அந்த ஆசை கடந்த ஞாயிறு அன்று நிறைவேறியது. இப்படிப்பட்ட இடங்களுக்கு டூர் செல்லத் திட்டமிடுபவர்கள் பொதுவாக அளவு கடந்த கலை ஈடுபாட்டினால் அவ்விடங்களுக்குச் செல்வார்கள். ஆனால் நாங்கள் சென்றது அங்கிருந்த வெவ்வேறு மாநிலத்தைச் சார்ந்த வீடுகளின் கட்டுமானங்களைக் காணும் ஆவலுடன் தான். முன்பு எப்போதோ சினேகிதி ஒருவர் சொல்லக் கேள்விப் பட்டிருந்தேன் தக்‌ஷின சித்ராவில் தென்னக மாநிலங்கள் அனைத்திலிருந்தும் குறிப்பிட்ட இன மக்களின் வீடு கட்டும் முறைகள் பற்றி விளக்க கட்டிடங்களுடன் மாதிரிகள் உள்ளன என்று அதைக் காணும் ஆசையில் தான் நாங்கள் அங்கே சென்றோம். எங்களது ஆசையும், எதிர்பார்ப்பும் பொய்த்துப் போய்விடவில்லை. தக்‌ஷின சித்ராவின் வீடுகள் அனைத்துமே நம் அனைவருக்குமான ஆதர்ஷ வீடுகளில் ஒன்றாக இருக்கத் தகுதி வாய்ந்தவை. ஆனால் இந்த சென்னை மாநகரில் அப்படிப்பட்ட வீடுகளை கட்டிக்கொள்ள வேண்டுமெனில் இன்றைய கணக்குக்கு நாம் ஒன்று அரசியல்வாதியாக இருக்க வேண்டும் அல்லது நாம் 50 ஆண்டுகளுக்கு முன்பு சென்னையில் பிறந்திருக்க வேண்டும். அந்தளவுக்கு விஸ்தாரமான தனி வீடுகள் அவை. ஞாயிறன்று வெயில் காட்டு,காட்டென்று காட்டினாலும் கூட அங்கே கணிசமான அளவில் மக்கள் புழக்கம் இருந்தது. எல்லோருமே ஏதாவது ஒருவகையில் பழமையில் ஈடுபாடு கொண்டவர்கள் என்றெண்ண வேண்டியது தான். ஏனெனில் வெகு அருகில் எம்.ஜி.எம் டிஸ்ஸி வேர்ல்ட் இருக்கும் போது குழந்தைகள் அதைத் தவிர்த்து விட்டு இங்கே வரவேண்டும் என்றால் அதில் பெற்றோர்களின் அத்துமீறல் இருக்கிறது என்றும் அர்த்தம் கொள்ளலாம். எது எப்படியோ தக்‌ஷின சித்ரா சென்னையில் இருப்பவர்கள் மட்டுமல்ல சென்னைக்கு டூர் வருகிறவர்களும் கண்டிப்பாக காண வேண்டிய ஓர் இடம் தான் என்பதில் ஐயமில்லை!

கோகனெட் ஜெல்லி பானம்:

டிக்கெட் வாங்கிக் கொண்டு உள்ளே நுழைந்ததுமே பாதை ஓரத்தில் ஒருவர் கோகனெட் ஜெல்லி பானம் விற்றுக் கொண்டிருந்தார். இளநீரை ஃப்ரிஜ்ஜில் வைத்தால் இப்படி ஆகுமா? என்றவாறு அதை வாங்கி அருந்தினோம். வெகு அருமையான சுவை. இளநீரை கண்டன்சேஷன் முறையில் இப்படி ஜெல்லி ஆக்குகிறார்களாம். இளநீரைச் செதுக்கி அதையே குவளையாக்கி இளநீர் வழுக்கையுடன் கூடிய அந்தக் இயற்கை குவளையில் ஜெல்லி பானத்தை ஊற்றிப் பரிமாறுகிறார்கள். விலை தான் சற்று அதிகம். ஒரு இளநீர் ஜெல்லி பானம் 100 ரூபாய். சுவையோடு ஒப்பிடும் போது சரி தான் என்றிருந்தது.

இது குதிரா? முதுமக்கள் தாழியா?

மியூசியத்தின் உள்ளே நுழைந்ததும் அஜந்தா ஆர்ட் கேலரிக்குள் நுழையும் முன் முகப்பில் குதிர் போலவும், முதுமக்கள் தாழி போலவும் ஒருங்கே தோற்றமளிக்கும் பெரிய பானை ஒன்றிருந்தது. பார்க்க அழகாக இருந்ததால் முகப்பில் எந்த வித விளக்கங்களும் இன்றி அலங்காரத்திற்கு வைத்திருப்பார்கள் போலும்! இதே போல தோட்டம் போன்ற ஒரு பகுதியில் செராமிக் குதிரைச் சிற்பங்கள் சில இருந்தன. அவையும் அழகோ அழகு!

கிராஃப்ட் பஜார்:

ஆக்ஸிடைஸ்ட் நகைகள், பர்ஸுகள், தேங்காய் மூடியில் செய்த கைவினைப்பொருட்கள், மரத்தால் செய்யப்பட்ட கீசெயின் வளையங்கள், ஓவியங்கள், தாயக்கட்டைகள், மரச்சீப்புகள், பணியாரம் சுட்டெடுக்க உதவும் மரக்குச்சிகள் என விதவிதமான கைவினைப் பொருட்கள் இங்கே கிடைக்கின்றன. விலை மட்டும் அங்கு வருகை தரும் வெளிநாட்டுக்காரர்களுக்கானது மட்டுமே அப்பொருட்கள், நமக்கானதல்ல அவை என்று உணரச் செய்யும் வகையில் இருக்கிறது. ஆனாலும் குழந்தைகளுடன் செல்பவர்கள் எதையானும் வாங்காமல் மீள முடியாது எனும்படியாக அத்தனை பொருட்களிலுமே கலநயம் மிளிர்கிறது.

திராவிடப் பாரம்பரிய வீடுகள்:

கர்நாடகா சிக்மகளூர்  வீடு...

தக்‌ஷின சித்ராவில் திராவிடம் என்று சொல்லப்படக்கூடிய தமிழ்நாடு, ஆந்திரா, கேரளா, கர்நாடக மாநிலங்களின் பாரம்பரிய வீட்டு கட்டுமான மாதிரி வீடுகள் உள்ளன. இந்த வீடுகள் ஒவ்வொன்றும் அந்தந்த மாநிலங்களின் குறிப்பிட்ட இன மக்களின் பாரம்பரிய வீட்டு அமைப்புகளின் துல்லியமான மாதிரி வடிவங்கள். இந்த வீடுகள் ஒவ்வொன்றும் நம்மை 80 களுக்கு முந்தைய காலத்தைச் சேர்ந்த திராவிட நாட்டுப் பாரம்பரியத்துக்கு அழைத்துச் செல்கின்றன.

தமிழ்நாடு நாட்டுக்கோட்டைச் செட்டிமார் வீடு...

 

தமிழர் பாரம்பரிய முறைப்படி கட்டப்பட்ட அக்ரஹாரத்து வீடு, நாட்டுக்கோட்டை செட்டிமார் வீடு, குயவர் வீடுகள், நெசவாளர் வீடுகள் என அனைத்துமே அவரவர் தொழில் சார்ந்த அடையாளங்களுடன் காட்சிப் படுத்தப் பட்டிருந்த விதம் அருமையான காட்சி இன்பமாக இருந்தது. அக்ரஹாரத்து வீட்டில் சமையலறை மிகச் சிறியது. சமைக்குமிடம் மட்டுமே அங்கு... தானியங்களைத் திரிக்க, அரைக்க, காய வைக்க வீட்டின் கொல்லையில் இடமிருந்தது. அதுமட்டுமல்ல எல்லா மாநிலத்து வீடுகளிலுமே நடுவில் திறந்த வெளி முற்றம் இருந்தது. வீட்டின் முன்புறமும், பக்கவாட்டிலும் தோட்டம் இருந்தது.  தோட்டத்தின் நடுவிலோ அல்லது வீட்டின் முன்புறமோ ஏதோ ஓரிடத்தில் துளசி மாடம் இருந்தது. வீட்டின் முன்புறம் பெரிய அகன்ற திண்ணைகள் இருந்தன. மாடி, இரண்டு அடுக்கு மாடி என்பதற்கெல்லாம் அப்பாற்பட்டு எல்லா வீடுகளிலும் இருந்த ஒற்றுமைத் தன்மை இது.

கேரளா சிரியன் கிறிஸ்தவ வீடு...

ஆக திராவிடம் என்பது தமிழ்நாட்டைச் சேர்ந்தது மட்டுமல்ல அது தென்னிந்தியாவின் 4 மாநிலங்களையும் சேர்த்தது தான் என்பது இதிலிருந்து புலனாக வேண்டும். திராவிடம் என்பதை சிலர் திருவிடம் என்றும் அர்த்தப்படுத்துவதைக் கண்டிருக்கிறேன்.  இந்த வீடுகளைக் கண்டமாத்திரத்தில் அது எத்தனை நிஜம் என்று புரிந்தது. எல்லா வீடுகளுமே செல்வச் செழிப்புடனிருந்த வீடுகளின் மாதிரிகளாகவே காட்சி தந்தன. அங்கிருந்த வீடுகளின் மாதிரிகளில் கர்நாடக சிக்மகளூர் வீடும், கேரளப் பாரம்பரியத்தைப் பறை சாற்றும் சிரியன் கிறிஸ்தவ வீடும் அப்படியே உள்ளத்தைக் கொள்ளை கொள்ளும்படி இருந்தன. அப்படி ஒரு வீடு நமக்கிருந்தால் வாழ்நாள் முழுமைக்கும் போதுமென்றிருந்தது. சொந்த வீட்டுக் கனவுடன் அதிலும் அபார்ட்மெண்ட்டுகளில் ஆர்வமில்லாது தனி வீட்டுக் கனவுகளுடன் இருப்பவர்கள் வீடு கட்டும் முன்பு தக்‌ஷின சித்ராவுக்கு ஒரு முறை சென்று வாருங்கள்.... அதன் பின் உங்களது சொந்த வீட்டுக் கனவுகளில் பெரிதும் மாற்றம் வரலாம்.

பொம்மலாட்டம்:

3 மணிக்கு பொம்மலாட்ட நிகழ்ச்சிக்கு டிக்கெட் வாங்கி இருந்தோம். ஒரு டிக்கெட் விலை பத்து ரூபாய்...சுமார் 15 நிமிடங்களுக்கு செல்வராஜ் என்ற நிழல் பொம்மலாட்டக் கலைஞர் ஒருவர் வந்து ‘ஹரிச்சந்திர கதையின்’ ஒரு சிறு பகுதியை பொம்மலாட்டத்தில் நமக்கு வழங்குகிறார். தசாவதாரம் திரைப்படத்தின் ‘முகுந்தா, முகுந்தா’ பாடலில் வரும் பொம்மலாட்ட ஷோவில் இவருடைய பங்கும் உண்டாம். அரிதாகி அழிந்து வரக்கூடிய தமிழர் பாரம்பரிய நாட்டுப்புறக் கலையான பொம்மலாட்டத்திற்கான மவுசு குறைந்து கொண்டே வருவதாகவும், அதைக் காப்பாற்ற வேண்டியது நமது கடமையென்றும் கூறிய அவர், அங்கே வருகை புரிந்தவர்கள் எவருக்கேனும் தங்களது வீட்டுத் திருமணங்கள், பிறந்தநாள் விழாக்கள் உள்ளிட்ட வைபவங்களில் இந்த பொம்மலாட்டக் கலையை நிகழ்த்த ஆர்வமிருப்பின் தன்னைத் தொடர்பு கொள்ளுமாறு கேட்டுக் கொண்டார். 

கரகாட்டம்& சிலம்பாட்டம்:

தக்‌ஷின சித்ராவில் வார இறுதியில் மட்டும் சனி, ஞாயிறுகளில் கரகாட்டம், சிலம்பாட்டம், தப்பாட்டம், ஒயிலாட்டம், பொய்க்கால் குதிரையாட்டம், மயில் நடனம் உள்ளிட்ட பாரம்பரிய நாட்டுப்புறக் கலைகளை ஊக்குவிக்கும் வண்ணம் அதன் ஆர்வலர்களால் இலவச ஷோக்கள் நடத்தப்படுகின்றன. மென்பொருள் துறையில் பணிபுரியும் நாட்டுப்புறக் கலை ஆர்வலர்கள் கூட தாமாக முன்வந்து இப்படிப்பட்ட ஷோக்களில் தங்களது பங்களிப்பை அளித்து விட்டுச் செல்கிறார்கள். இங்கே பணம் பிரதானமில்லை. கலையும், கலையின் மீதான பற்றுமே முதலிடம் பெறுவதால் காக்னிசண்ட் நிறுவனத்தில் பணிபுரியும் நித்யா என்பவர் அன்று கரகாட்ட நிகழ்ச்சியை வழங்கினார். 

பழந்தமிழர் நாகரிகத்தில் அறிவியலின் துணை கலைகளிலும் பிரதிபலித்தது என்பத்ற்கிணங்க சிறுவன் ஒருவனும், ஷோ வைத் தொகுத்து வழங்கிய இளைஞர் ஒருவரும் ‘வட்டஇயக்க கோட்பாட்டின்’ படி கயிற்றில் கட்டப்பட்ட இருமுனை தட்டுகள் கொண்ட தராசு போன்ற அமைப்பில் 3 கப்களில் நீர் நிரப்பி அதை அதி வேகமாக வட்டமாகத் தலைக்கு மேல் சுழற்றி ஒரு துளி நீர் தரையில் சிந்தாமல் வித்தை செய்து காட்டினர். இது வித்தை இல்லை அறிவியல் தான். ஆனால் வட்ட இயக்க கோட்பாடு தெரியாதவர்களுக்கு இது வித்தையாகத் தான் தெரிந்திருக்கும். 

கிளி ஜோஷியம், கை ரேகை, மெகந்தி இன்னபிற...

தக்‌ஷின சித்ராவில் 40 ரூபாய் கொடுத்தால் உங்களுக்கு ஒருவர் கிளி ஜோஷியம் பார்த்து பலன் சொல்லுகிறார். ஓரளவுக்கு அங்கு எவருக்குமே கெடு பலன்களைச் சொல்வதில்லை என யூகிக்கிறேன். இங்கே விட்டால் நீங்கள் பின்னர் மகாபலிபுரத்தில் தான் கிளி ஜோஷியக்காரர்களைக் காணமுடியும் என்பதால் கிளி ஜோஷியத்தில் ஆர்வமும், நம்பிக்கையும் இருப்பவர்கள் இங்கே சென்று காணலாம். மகாபலிபுரத்துக் கிளி ஜோஷியக்காரர்கள் பணப்பித்துப் பிடித்தவர்கள்... ஆனால் தக்‌ஷின சித்ராவில் அப்படி இல்லை. இந்தப்பக்கம் ஆண் ஒருவர் கிளி ஜோஷியம் பார்த்துக் கொண்டிருந்தால், அந்தப்பக்கம் பெண் ஒருவர் கைரேகை பார்த்துச் சொல்கிறார். இவர்களுக்கு அப்பால் ஒரு ஓவியக் கலைஞர் படம் வரையக் கற்றுத்தருகிறார். முன்னமே சொன்னேனில்லையா? அங்கே சிரியன் கிறிஸ்தவர் மாதிரி வீடொன்று இருக்கிறதென... அந்த வீட்டின் பொறுப்பாளரான ஒரு பெண்மணி மெகந்தி டோக்கன் வாங்கியவர்களுக்கு மெகந்தி போட்டு விடுகிறார். அது கூட நன்றாகத்தான் இருக்கிறது. சிறுமிகள் மிக ரசிப்பார்கள்.

மட்பாண்டம் செய்யக் கற்றுக் கொள்ள வேண்டுமா?

நமக்கே நமக்கென்று சொந்தமாக ஒரு மண்பானையோ, குடமோ செய்து கொள்ள வேண்டும் என விரும்புபவர்கள் தக்‌ஷின சித்ராவிலிருக்கும் குயவரிடம் வரலாம். மனிதர் அழகாக பானை பிடிக்கக் கற்றுத் தருகிறார். சிறுவர்கள் தங்கள் கைப்பட செய்து காய வைத்த மட்பாண்டங்கள் அங்கே சில இருந்தன.

அய்யனார் கோவில்... 

அங்கிருந்த அருமையான இயற்கைச் சூழலில் இப்படி ஒரு கோயில் அமைப்பு இல்லையென்றால் தான் அது அதிசயம். பெரிய சுதைமண் சிற்பக் குதிரையில் சிலா ரூபமாய் தெய்வங்கள் வீற்றிருக்க நட்ட நடுவே அய்யனார் கொலுவிருக்கிறார். அருமையான ஷுட்டிங் ஸ்பாட் உணர்வைத் தருகிறது அந்த அய்யனார் கோயில் சுற்றுப்புறக் கட்டமைப்பு. கோயிலைச் சுற்றிலும் அழகழகான ஓலைப்புல் குடிசை மாதிரிகள் நிறைய இருந்தன. அவை ஆந்திர மாநில கடற்கரையோர மக்களின் வாழ்விட மாதிரிகளாம். 

பல்லாங்குழியும், பாண்டியாட்டமும்...

பழந்தமிழர் விளையாட்டுக்களான பாண்டியாட்டம், பல்லாங்குழி, ஆடுபுலியாட்டம், உள்ளிட்ட விளையாட்டுகளை ஆடிப்பார்த்து குதூகலிக்கவும் தக்‌ஷின சித்ராவில் வசதியுண்டு. வாரம் முழுக்க சென்னையின் புழுக்கத்தை சகித்துக் கொண்டு வார இறுதியில் இப்படிஒரு இடத்திற்குச் சென்று கொஞ்சம் விளையாடி விட்டு வந்தால் இவ்விஷயங்களில் விருப்பமுள்ளவர்களுக்கு அதுவும் ஒரு வித சுவாரஸ்யம் தான்.

விரஜா ஆர்ட் கேலரி...

சிறந்த ஓவியர்களின் தேர்ந்தெடுத்த ஓவியங்களைக் காட்சிப் படுத்துவதற்கென விரஜா ஆர்ட் கேலரி என ஒன்றும் இங்கே உண்டு. ஆனால் ஓவியங்கள் ஒவ்வொன்றுமே 8000 ரூபாய்க்கு மேல் தான் விலை. இதற்குப் பேசாமல் தோழா படத்து கார்த்தி போல நாமே ஒரு ட்ராயிங் போர்டு வாங்கி பிரயத்தனப்பட்டு வரைந்து அழகு பார்த்துக் கொள்ளலாம் என்று ஆயாசமாகி விட்டது. விலை அதிகமென்றாலும் ஓவியங்களைப் பார்க்கையில் ஒவ்வொன்றும் கண்ணில் ஒற்றிக் கொள்ளலாம் எனும்படியான துல்லியமான அழகில் இருந்தன. வெளிநாட்டினரில் சிலர் அந்த ஓவியங்களை வாங்கிச் செல்வதைக் காண முடிந்தது. இவ்விஷயத்தில் நம்மவர்களுக்கு சம்பாதனை போதுமானதாக இருக்கிறதோ இல்லையோ... நிச்சயம் 10,000 ரூபாய் செலவளித்து ஓவியங்களை வாங்கும் கலாரசனை விஷயத்தில் அயல்நாட்டினரைக் காட்டிலும் நமது ஆர்வங்கள் எப்போதும் ஒரு மாற்றுக் குறைவு தான்.

நூலகம், பார்ட்டி ஹால், திருமண மண்டபம்...

தக்‌ஷின சித்ராவில் நூலகம் இருக்கிறது... ஆனால் நாங்கள் அங்கே செல்வதற்குள் அதற்கான நேரம் முடிவடைந்திருந்தது... 5.30 மணி வரை மட்டுமே நூலகம் திறந்திருக்கும். எனவே உள்ளே என்னென்ன வகையான நூல்கள் எல்லாம் சேமிப்பில் உள்ளன எனக் காணும் வாய்ப்பை நாங்கள் இழந்தவர்களானோம். அதைத்தவிர, அங்கே பிறந்தநாள், ஃப்ரெண்ட்ஸ் கெட் டுகெதர், ஓவியக் கண்காட்சி, நாட்டிய வொர்க்‌ஷாப்புகள் உள்ளிட்டவற்றை நிகழ்த்த வாடகைக்கு கான்ஃபரன்ஸ் ஹாலும் உள்ளதாம். வீடு, திருமண மண்டபம் இரண்டும் அலுத்துப் போய் கடற்கரையோரமாக தக்‌ஷின சித்ராவின் அருமையான அட்மாஸ்பியரில் திருமணம் செய்து கொள்ள விரும்புவோரின் ரசனைக்காக இங்கே திராவிடப் பாரம்பரிய முறையில் அனைத்து ஜாதியினருக்கும் உரித்தான முறையில் திருமணம் செய்து கொள்ள வசதியான திருமண மண்டப அமைப்பும் உண்டாம். வாடகை விபரங்களை தக்‌ஷின சித்ரா தனது இணையப் பக்கத்தில் பகிர்ந்துள்ள தொலைபேசி எண்ணுக்கு அழைத்து அறிந்து கொள்ளலாம்.

உணவகம்...

தக்‌ஷின சித்ராவுக்குள் நாம் வீட்டிலிருந்து சமைத்து எடுத்துச் செல்லும் உணவுப் பொருட்களுக்கு அனுமதி இல்லை. சிறுவர்களுக்காக ஸ்னாக்ஸ்களும், தண்ணீர் பாட்டில்களும் வேண்டுமானால் உள்ளே கொண்டு செல்லலாம். மற்ற்படி உள்ளேயே இயங்கும் உணவகத்தில் சுவைக்கேடின்றி அருமையான மதிய உணவு கிடைக்கிறது. மீல்ஸ் ஒரு நபருக்கு 150 ரூபாய்கள். இரண்டு வகை காய்கறிப் பொரியல், சப்பாத்தி, கிரேவி, காரக்குழம்பு, சாம்பார், ரசம், தயிர், பாயஸம், அப்பளம், ஊறுகாய் என ஒரு கட்டு கட்டலாம். சின்ன ரெஸ்டாரெண்ட் தான் என்றாலும் நன்றாகவே பராமரிக்கிறார்கள். மதிய உணவாக மீல்ஸ் மட்டுமில்லை சப்பாத்தி, பரோட்டா கூட கிடைக்கிறது. மாலைச் சிற்றுண்டியாக பஜ்ஜி, வடை, போண்டாக்கள் கூட உண்டு. நல்ல காஃபீ, டீ, பழரசங்களும் உள்ளேயே கிடைக்கின்றன. விலை மற்றும் சுவையுடன் சேர்த்து நகரத்தின் பிற உணவகங்களோடு ஒப்பிடும் போது ஓரளவுக்கு கட்டுப்படியாகக் கூடிய ரகத்தில் தானிருக்கிறது. உள்ளேயே ஐஸ் கிரீம் பார்லர் மற்றும் பழரசங்களுக்கு எனத் தனி அங்காடியும் உண்டு. எல்லா இடங்களிலும் ரசித்து அமர்ந்து உண்ண விஸ்தாரமான இட வசதியும் இருக்கிறது. 

கழிப்பிட வசதிகள்...

தக்‌ஷின சித்ராவின் கழிப்பிட வசதியும் போதுமான அளவுக்கு நல்ல தண்ணீர் வசதியுடன் நிறைவாகவே செய்யப்பட்டுள்ளது. அங்கே குறை என்று சொல்வதற்கு சென்னையின் வெயில் நேரப் புழுக்கத்தைத் தாண்டி வேறு விஷயங்களென எதுவுமில்லை. ஆங்காங்கே மின்விசிறிகள் சுழன்றாலும் ஏ.சிக்கு பழக்கப் பட்டுப் போன சென்னை வாசிகளுக்கு அது ஒன்று மட்டுமே வெயில் காலங்களில் அங்குள்ள குறையெனத் தோன்றலாம். அது கூட இளவேனிற்காலங்களில் அங்கு இல்லாதொழிந்து விடும். மற்றபடி தக்‌ஷின சித்ரா திராவிடப் பாரம்பரியம் மற்றும் கலாச்சாரம் குறித்து நம் குழந்தைகள் அறிந்து கொள்ளக் கிடைத்த மிகச் சிறந்த  கலாச்சார மையம் என்றே சொல்லலாம்.

]]>
tour, travelogue, dhakshin chitra travelogue, தக்‌ஷின சித்ரா சுற்றுலா, பயணம், திராவிடப் பாரம்பரியம் http://images.dinamani.com/uploads/user/imagelibrary/2017/7/26/w600X390/seramic_workkkkkk.jpg http://www.dinamani.com/lifestyle/travellogue/2017/jul/25/dhakshina-chithra--travelogue-a-heritage-museum-in-chennai-2743940.html
2706791 லைஃப்ஸ்டைல் பயணம் தென்னிந்தியாவின் காஷ்மீர் மூணாறில் இது பீக் சீஸன்... வெயிலுக்கு இதமாக சில்லுன்னு ஒரு ட்ரிப் போகலாமே! கார்த்திகா வாசுதேவன் Tuesday, May 23, 2017 08:22 AM +0530  

கண்ணுக்கு எட்டிய தூரம் வரை பசுமைப் போர்வை போர்த்திய கடவுளின் தேசமான மூணாறில் மக்கள் தொகையைக் காட்டிலும் ரிஸார்ட்டுகள் எனப்படும் உல்லாச விடுதிகள் தான் அதிகமிருக்கும் என்று தோன்றுகிறது. ஊருக்கு வெளியே பத்துப் பதினைந்து கிலோமீட்டரில் இருந்தே ஆரம்பித்து விடுகின்றன ரிஸார்ட்டுகளுக்கு வழிகாட்டக் கூடிய குறியீட்டுக் கம்பங்கள். இந்த முறை கோடை விடுமுறையைக் கழிக்கச் சென்று அங்கே தங்கிய நாட்களை சொர்க்கம் என்றால் தவறில்லை. சென்னை திரும்பி மூன்று நாட்கள் கடந்த பின்னும், இன்னும் நுரையீரல் முதல்  கதகதப்பான உள்ளங்கால் வரையிலும் மிச்சமிருக்கிறது பசுந்தேயிலை வாசம் மணக்கும் மூணாறின் சில்லென்ற காற்றின் ஸ்பரிசம். 

இந்த மலைச் சிறு நகரில் திடீர் திடீரென கிளைமேட் மாறி விடுவது அதன் அதிசயத் தக்க அம்சம். நாங்கள் தங்கியிருந்த நாட்களில் இளவெயிலும் மென் மழைத் தூறலுமாக அந்த மலைநகர் மாயாஜாலம் காட்டாத குறை! சென்னையின் அக்னி நட்சத்திரக் கொடுமையில் சிக்கித் தவித்துக் கொண்டிருந்தவர்களின் மனக்கிலேசத்தை இதை விடப் பொருத்தமாக வேறு எப்படிக் கூறுவது?!

சென்னை -  மூணாறு செல்லும் வழித்தடங்கள்:

சென்னையிலிருந்து மூணாறு செல்ல இரண்டு மார்க்கங்கள் உள்ளன. ஒன்று உடுமலைப்பேட்டை மார்க்கம் மற்றொன்று தேனி வழியாக போடி மார்க்கம். நாங்கள் சென்னையிலிருந்து கிளம்பும் போது கோயம்பத்தூர் மார்க்கமாகவும் மூணாறில் இருந்து திரும்பும் போது தேனி மார்க்கமாகவும் பயணித்தோம். ஏனெனில் அப்போது தான் மூணாறில் காண வேண்டிய இடங்களில் பெரும்பாலானவற்றை நம் பயண நேரத்தின் இடையிலும் கூட கவர் செய்து கொள்ள முடியும். மித வேகத்தில் விரையும் வாகனங்களில் செளகரியமாக அமர்ந்து கொண்டு திடீர், திடீரெனக் குறுக்கிடும் பசும் மலைச்சரிவுகள் வரும் போதெல்லாம் ஜன்னலோர இருக்கையில் உள்ளம் அதிர ஜிலீரென உணரும் திரில் இருக்கிறதே அது மலைப்பயணங்களைத் தவிர வேறெதிலும் வாய்ப்பதில்லை. ஆகவே மலைகளில் பயணிக்க கார், வேன்களை விடவும் பேருந்தும், திறந்தவெளி ஜூப்பும் தான் உகந்தது என்பேன் நான்.

மூன்று நாட்களாவது தேவை மூணாறு முழுவதும் சுற்றிப் பார்க்க!

மலை ஏறும் பொழுதை விட இறங்கும் போது தான் மலைக்காட்சிகளின் எழில் வெகு ரம்மியமாக இருந்தது.

மூணாறு செல்ல நினைப்பவர்களுக்கு பொதுவாக முதலில் தோன்றும் ஒரு எண்ணம்; தேயிலை எஸ்டேட்டுகளைத் தாண்டி அங்கே அப்படி என்ன இருக்கிறது? என்பதாகவே இருக்கும்... எங்களுக்கும் அப்படித் தான் இருந்தது. ஆனால் அங்கே சென்ற பிறகு தான் தெரிந்தது. முழுதாக மூணாறைச் சுற்றிப் பார்த்து கண் கொள்ளாமல் அதன் அழகை நிரப்பிக் கொள்ள வேண்டுமெனில் குறைந்த பட்சம் 5 நாட்களாவது தேவை என்பது! நின்று நிதானித்து ரசித்து மகிழ அங்கே நிறைய இடங்கள் உண்டு. நாம் தேர்ந்தெடுக்கும் ரிஸார்ட்டுகளிலேயே மூணாறில் பார்க்க வேண்டிய இடங்கள் குறித்த டிராவல் கைடு தந்து விடுகிறார்கள். மொத்தத்தையும் கவர் செய்ய 5 நாட்களாகும். குறைந்த பட்சம் மூன்று நாட்களேனும் இருந்தால் தவற விடக் கூடாத முக்கியமான இடங்களையாவது கவர் செய்து விடலாம். அப்படி நாங்கள் கண்ட இடங்கள்;

மூணாறில் பார்க்க வேண்டிய முக்கியமான இடங்கள்:

1. இறவிக்குளம் நேஷனல் பார்க்: தமிழ்நாடு அரசின் தேசிய விலங்கான வரையாடுகளை இங்கு காணலாம், தென்னிந்தியாவின் மிக உயர்ந்த சிகரமான ஆனைமுடி மலைச்சிகரம் இங்கு உள்ளது)

2. மாட்டுப்பட்டி டேம்: ஹட்ஸன் தயிர் விளம்பரத்தில் மேயும் ஜெர்ஸி ரகப் பசுக்களைக் காண வேண்டுமெனில் நாம் மாட்டுப்பட்டி பண்ணைக்குச் செல்லலாம். பண்ணை தவிர இங்கே அணை ஒன்றும் உண்டு அதை மாட்டுப்பட்டி டேம் என்கிறார்கள். இந்த டேமில் படிகளைக் கொஞ்சம் செப்பனிடலாம். இப்போதிருக்கும் சிதிலமடைந்த படிகள் சற்று வயதானவர்கள் இறங்கிச் சென்று காண வசதியாக இல்லை. தடுமாறி விழுந்தால் நிச்சயம் பற்கள் மட்டுமல்ல எலும்புகளும் உடையும் வாய்ப்பு உண்டு. அந்த வசதிக் குறைவைத் தாண்டியும் ஏரியின் அழகு உளமயக்கம் தருகிறது. சித்திரத்தில் உறையும் ஏரி போல அத்தனை நிசப்தமான ஏரி இது. அங்கே நின்று புகைப்படங்கள் எடுத்துக் கொள்ளலாம். 

3. நியமக்கடா எஸ்டேட்: மூணாறு மலையைச் சுற்றிலும் பற்றிப் படர்ந்துள்ள பண்ணையார் எஸ்டேட், லொக்கார்ட் எஸ்டேட், பள்ளிவாசல் எஸ்டேட், பெருங்கனல் எஸ்டேட், கண்ணன் தேவன் எஸ்டேட் உள்ளிட்ட தேயிலை எஸ்டேட்களில் இதுவும் ஒன்று. நடைப்பயிற்சி மேற்கொள்ளவும், புகைப்படங்கள் எடுத்துக் கொள்ளவும் வாகான எழிலார்ந்த இடங்கள் பல இந்த எஸ்டேட் வளாகங்களில் உண்டு.

4. எக்கோ பாயிண்ட்: ஆளொன்றுக்கு 5 ரூபாய் டிக்கெட் கேட்கிறார்கள் இதனுள் இறங்கி நின்று கத்தி விட்டு வர. கொடைக்கானல் எதிரொலிப் பாறை போலத்தான் இதுவும். வண்டல் மண் படிந்த திட்டில் நின்றவாறு எதிரிலிருக்கும் அழகான ஏரியை அடுத்திருக்கும் சில்வர் ஓக் மரங்கள் நிறைந்த வனப்பகுதியை நோக்கி மனம் போன போக்கில் ஜெய்ஹோ, என்றோ பாகுபலி என்றோ உரக்கக் கத்தினால் நமது குரல் காற்றில் மீண்டும் எதிரொலித்து நம்மைப் பரவசப் படுத்துகிறது. இது தவிர இங்கே சற்று ஷாப்பிங்கும் செய்யலாம். மரத்தாலான கைவினைப் பொருட்கள், பொம்மைகள், ஹோம் மேட் சாக்லேட்டுகள், உள்ளிட்டவை இங்கே சற்று சகாயமான விலையில் கிடைக்கின்றன. பேரம் பேசி வாங்கத் தெரிந்தால் நிச்சயம் ஏமாற மாட்டீர்கள்.

5. யானைச் சவாரி: மூணாறு டிரிப்பில் எங்களை மட்டுமல்ல அனைவரையுமே அசத்திய ஒரு விசயம் என்றால் அது இந்த யானைச் சவாரியே! சமதளத்தில் இருந்து யானையில் ஏற்றிக் கொண்டு போய் மலை மேல் கால் கிலோமீட்டருக்கு குறைவின்றி ஒரு ரவுண்டு அழைத்துச் சென்று மலை இறக்கி அழைத்து வருகிறார்கள். மலை மேல் ஏறும் போது யானை கம்பீரமாக அசைந்தாடி நிதானமாக எட்டெடுத்து வைத்து நடக்க மத்தகக் கம்பியைப் பற்றிக் கொண்டு உல்லாசமாக அமர்ந்து செல்வது பிரமாதமாகத் தான் இருந்தது. எல்லாம் மலை ஏறும் போது மட்டும் தான். யானையில் அமர்ந்து கொண்டு மலை இறங்குவது என்பது உயிரைக் கையில் பிடித்துக் கொண்டு ஜபம் செய்வது போலத்தான். ஒரே திகிலாக இருந்தது. கைகள் மத்தகக் கம்பியை இறுக்கிப் பற்றிக் கொள்ள கை தவிர உடலின் அத்தனை உறுப்புகளும் திகிலில் நடுங்கத் தொடங்கி நாம் அந்த திரில்லான எக்ஸ்டஸியை முழுதாக அனுபவித்து முடிப்பதற்குள்  யானை சமர்த்தாகத் மலையிறங்கி சமதளத்துக்கு வந்து விடுகிறது. புதிதாக யானைச் சவாரி செய்பவர்களுக்கு ஒரு ஆலோசனை தயவு செய்து யானையில் அமரும் போது முன்புற இடத்தை யாருக்கும் விட்டுத் தராதீர்கள். யானை மலையிறங்கும் போது நம்மைக் குப்புறத் தள்ளி விடக் கூடுமோ என்று பதறும் உள்ளத்துடனும், தரை இறங்கினால் போதும் எனும் பயத்துடனும் கஜராஜனை உளமுருக தியானித்த படி கண்களை இறுக மூடிக் கொண்டு திரில்லாக யானை மேல் அமர்ந்து பயணிக்கும் அருமையான வாய்ப்பை இழந்தவர்கள் ஆகி விடுவீர்கள். இம்மாதிரியான சாகஷ வாய்ப்புகளை எல்லாம் கிட்டும் போது தவற விட்டு விடவே கூடாது. யானைச் சவாரி செய்ய ஒரு நபருக்கு டிக்கெட் விலை 400 ரூபாய்கள். 5 வயதுக்கு மேற்பட்ட குழந்தைகளுக்கு அரை டிக்கெட் என்கிறார்கள்.

6. வொண்டர் வேலி அட்வெஞ்சர் தீம் பார்க்: சென்னையின் தீம் பார்க்குகள் போலத்தான் ஆனால் அது சமதளத்தில் இருப்பவை. இங்கே  மலை வாசஸ்தலம் என்பதால் அதற்கே உரிய வகையில் சில அட்வெஞ்சர் விளையாட்டுக்கள் பிரத்யேகமாக கவனம் ஈர்க்கின்றன. பெரியவர்களை அத்தனை ஈர்க்காவிட்டாலும் மூணாறில் குழந்தைகளுக்கு மிகப் பிடித்தமான இடங்களில் இதுவும் ஒன்று.

7. ரோஸ் கார்டன்:   சமவெளியாக அன்றி மலைச்சரிவுகளில் அடுக்கு முறையில் மலர்ச்செடிகளை வளர்த்து காட்சிக்கு வைத்திருக்கிறார்கள். இங்கு இல்லாத வண்ண மலர்களே இல்லை எனலாம். அத்தனை ரக, ரகமான நிறங்கள் மனதைக் கொள்ளை கொள்கின்றன. வெண்மை நிற ரேடியோ பூக்கள் தொடங்கி மஞ்சள் நிற குறும்பூக்கள், வாடாமல்லி நிற திரள் பூக்கள், பல வண்ண ரோஜாக்கள், பன்னீர் மலர்கள், ஊதா நிற ஆர்க்கிட்டுகள் வரை எல்லாமும்... எல்லாமும் மனதையும் கண்களையும் ஒரு சேர குளிர்வித்து நிறைவிக்கின்றன. டூரிஸ்டுகள் தங்களது ஸ்மார்ட் ஃபோன்களிலும் கேமராக்களிலும் இவற்றின் அழகை வகை வகையாகப் புகைப்படங்களாகச் சுட்டுத் தள்ளிக் கொண்டே இருக்கிறார்கள். ஆனாலும் அங்கிருந்து கிளம்பும் போது யாருக்குமேஅந்த மலர்களைப் பிரிய மனமே இருப்பதில்லை.

8. பவர் ஹவுஸ்: நொடிக்கொரு தரம் மஞ்சுப் பொதிகள் பஞ்சு பஞ்சாய்க் கலைவதும், சேர்வதுமாக அபாரமான தேவலோக எஃபெக்ட் தரும் புகை மண்டலச் சிற்றூர் இது. பேருந்து நிறுத்தமெனக் கருதப்படும் இடத்தில் ஒரு டீஸ்டால் உண்டு. அங்கே வல்லிய கட்டன் சாயா கிடைக்கக் கூடுமென நினைக்கிறேன். நாங்கள் செல்கையில் அந்தக் கடை மூடப்பட்டிருந்தது. இந்த பவர் ஹவுஸ் ஏரியாவைச் சூழ்ந்து தான் மஹிந்திரா கிளப் ஹவுஸ் ரிஸார்ட் உள்ளிட்ட பிரபல ரிஸார்ட்டுகள் நிறைய அமைந்துள்ளன. ஓரிரு கிலோ மீட்டர்கள் தொலைவுக்குள் இன்னொரு ரிஸார்ட் அமைந்திருப்பது மேகப் பொதிகளுக்குள் மறைந்திருக்கும் சொர்க்க லோக அரண்மனைகள் போன்ற பிம்பத்தை உருவாக்கி விடுகின்றன. வாக்கிங், ஜாகிங்கில் ஆர்வமுள்ள டூரிஸ்டுகள் தங்க இந்தப் பகுதியில் இருக்கும் ரிஸார்ட்டுகளே உகந்தவை. நடக்கத் தோதான அழகான மலைச்சரிவு இங்கே உள்ளது. 

9. ஸ்பைஸ் கார்டன்: அருமையான ஆயூர்வேத ஷாப்பிங் செய்ய உகந்த இடம் இது. பொருட்களின் விலை சற்றுக் கூடுதலே! ஆனாலும் விளையும் இடத்திலேயே கிடைப்பதால் ஒரிஜினலாகவே இருக்க வாய்ப்பிருப்பதால் விலை தகும் என்றே தோன்றுகிறது. இங்கே 100 கிராம் நல்மிளகின் விலை 100 ரூபாய். மிளகு மட்டுமல்ல ஏலம், ஜாதிக்காய், ஜாதிப்பத்திரி, காப்பிக் கொட்டைகள், பிரியாணி இலை, பட்டைச் சுருள், அன்னாசிப் பூ, ஏக முகம் தொட்டு பல முகங்கள் கொண்ட 15 விதமான ருத்ராக்‌ஷ விதைகள்,  மரத்தக்காளி மரம், ஊறுகாய் போடப் பயன்படுத்தப் படும் குறு மிளகாய்கள், என அனைத்துமே இங்கே விளைவிக்கப் படுகிறது. சுத்தமானது மட்டுமல்ல தரமானதாகவும் கிடைக்கும் என்கிறார்கள். மூணாறில் வாசனைத் திரவியங்கள் வாங்க ஆசைப்படுபவர்கள் இங்கே வாங்கிக் கொள்ளலாம்.

10. டாட்டா டீ மியூஸியம்: இங்கு பிரிட்டிஷார் காலத்திலிருந்து மூணாறில் எவ்விதம் தேயிலை வர்த்தகம் நடந்து வருகிறது என்பதைக் காட்ட அருமையான புகைப்படக் கண்காட்சி ஒன்றை வைத்திருக்கிறார்கள். அதோடு அந்தக் காலத்தில் பயன்படுத்தப் பட்ட தேயிலை எடைக் கருவிகள், மலையில் ஏற வியாபாரிகள் பயன்படுத்திய காலணிகள் உள்ளிட்டவற்றைக் கூட அங்கே காட்சிக்கு வைத்திருக்கிறார்கள். டீ எஸ்டேட்டின் உள்ளே ஃப்ரெஷ் ஆக தேயிலை பறிக்கப் பட்டு அதிலிருந்து விதம் விதமான டீத் தூள்கள் எவ்விதமாகத் தயாராகின்றன என்பதை டாக்குமெண்டரி திரைப்படமாகவே முழுதுமாகக் காட்டும் வசதியும் உண்டு. ஒரு மணி நேரக் காட்சிக்கு 1000 ரூபாய் கட்டணம் வசூலிக்கிறார்கள்.

11. லொக்கார்ட் டீ எஸ்டேட்

12. ராக் கேவ்: இந்த இடத்தைப் பற்றி ஒரு சுவாரஸியமான கதை உலவுகிறது. 1850 களின் இறுதியில் இந்தப் பிரதேசத்தில் ஒரு திருடன் இருந்ததாகவும். அவன் இந்த மலையைக் கடந்து செல்லும் வியாபாரிகள் மற்றும் மக்களிடமிருந்து பொருட்களையும், பணத்தையும் கொல்ளையடித்துக் கொண்டு சென்று மலையைச் சுற்றி வசிக்கும் ஏழை எளிய மக்களுக்கு அளிப்பது வழக்கம். ஆக மொத்தத்தில் அவனொரு நல்ல திருடன் என்றொரு கதை அங்கிருந்த தட்டியில் எழுதப் பட்டிருக்கிறது. மலையாளத்தில் இந்த குகையின் பெயர் மலையில் கள்ளன் குகா! உள்ளே டார்ச் இருந்தால் ஒழிய நம்மால் எட்டிப் பார்க்க முடியாது. மூணாறு ட்ரிப் செல்பவர்கள் அனைவரும் கும்பலாக டார்ச் துணையுடன் உள்ளே ஒரு நடை எட்டிப் பார்த்து விட்டு வரலாம். குகைக்கு எதிரே ஒரு சிறு கடை இருக்கிறது. அங்கிருக்கும் கடைக்காரர் பிரமாதமான சுவையில் பிரெட் ஆம்லெட் போட்டுத் தருகிறார். மலையில் கள்ளன் குகைக்கு எதிரில் இருக்கும் புகைப்பட பாயிண்ட்டில் அமர்ந்து கொண்டு மேகப் பொதிகள் நம் மூக்கை உரசிச் செல்ல இதமாகக் கைகளை உரசிச் சூடேற்றியவாறு குட்டி குட்டியாக பச்சை மிளகாய நறுக்கிப் போட்டு பதமாக வார்க்கப் பட்ட சூடான ப்ரெட் ஆம்லெட்டை சுடச் சுட பிய்த்து உண்பது என்பது சுருங்கச் சொல்லிடின் அந்த நிலைக்குப் பெயர் டிவைன்!

13. காட்டுத் தேன் கூடு: மூணாறில் இருந்து மாட்டுப்பட்டி டேம் செல்லும் மார்க்கத்தில் ஒரே ஒரு இடத்தில் ஹிமாச்சலப் பிரதேசத்து தேவதாரு மரங்களுக்குச் சவால் விடக்கூடிய உயரத்தில் ஓங்கி உலகளக்கும் உத்தம மரம் ஒன்றுள்ளது. வேறு எந்த மரத்திலுமே கூட மருந்துக்கும் இல்லாத மலைத் தேன் கூடுகள் இந்த ஒரு மரத்தில் மட்டுமே அடை அடையாக இடவெளியின்றி நிறைந்திருக்கின்றன. சீசனைப் பொறுத்து அடைகளில் தேன் நிரம்பியதும் மலை உச்சியில் வசிக்கும் மூணாறு மலைவாசிகளில் திறமையுள்ளவர்கள் வந்து இந்த அபாயகரமான மரத்தில் ஏறி இந்த மலைத்தேனை இறக்கிச் செல்வார்களாம். பார்க்கும் போதே அந்த மலைத் தேனின் ஒரு துளி நாவின் நுனியில் பட்டதாக ஒரு சிலிர்ப்பு ஓடி மறைந்தது. 

இதற்குப் பின் கீழ் வரும் சில இடங்களை நேரப் பற்றாக்குறை மற்றும் குறிப்பிட்ட நேரத்தில் வாகனப் பற்றாக்குறை போன்ற காரணங்களால் எங்களால் கண்டு களிக்க இயலாமல் போனது. அவை முறையே;

14. சின்னாறு ட்ரெக்கிங் பாயிண்ட் 
15. சந்தன மரக்காடு
16. பொத்தமேடு வியூ பாயிண்ட்
17. செங்குளம் போட்டிங்
18. டாப் ஸ்டேஷன்
19. குந்தளா ஏரி
20. ஆனையிரங்கல் டேம் வியூ
21. புனர்ஜனி மார்சியல் ஆர்ட்ஸ் கிராமம்
(கதகளியும்/ களறிப் பயட்டும் கண்டு களிக்க நபர் ஒருவருக்கு 1000 ரூபாய்கள் கட்டணம்)

எனவே மூணாறுக்குச் செல்பவர்கள் முன்கூட்டிய திட்டமிடலுடன் செல்வது நலம்.

மூன்று வேளை போஜனம்!

ஒரு மலை நகரில் இத்தனை இடங்களையும் நிதானமாகக் கண்டு ரசிக்க வேண்டுமெனில் நமக்கு மூன்று வேளை போஜனத்தைப் பற்றிய கவலையில்லாமல் தங்கிக் கொள்ள ஒரு அருமையான ரிஸார்ட் நிச்சயம் தேவை. மூணாறைப் பொறுத்தவரை நாளொன்றுக்கு 3000 லிருந்து துவங்குகின்றன ரிஸார்ட் கட்டணங்கள். மிக உல்லாசமான அறைகளில் தங்க வேண்டுமெனில் நாளொன்றுக்கு ரூ.25,000 கொடுத்து மலை உச்சியில் வெந்நீர் நிரப்பிய நீச்சல் குளமும், மூன்று வேலைக்கும் ராஜ போஜனமுமாய் சேவைகளை விரிவாகத் தரும் 5 நட்சத்திர விடுதிகள் சில இங்கு உண்டு.

ரிஸார்ட்டுகள் அளிக்கும் காம்ப்லிமெண்ட்டரி காஃபீ, டீ சாம்பிள் பாக்கெட்ஸ் போதாது பாஸ்!

விடுதித் தேர்வுகள் நமது பர்ஸின் கனத்தைப் பொறுத்தவை என்பதால் அவரவர் மனக்கணக்கால் முன்பே அளந்து கொண்டு தங்கினால் சரியாக இருக்கும். 4 நட்சத்திர விடுதிகள் சிலவற்றில் காலை உணவு நமது கட்டணத்துக்குள் அடங்கி விடும். மதிய உணவையும், இரவு உணவையும் வெளியில் எங்காவது பார்த்துக் கொள்ள வேண்டியது தான். இங்கே நீங்கள் மறக்காமல் நினைவில் கொள்ள வேண்டிய விசயம் ஒன்றுண்டு. காலையில் காப்பியோ, டீயோ உள்ளே தள்ளினால் தான் இயற்கை கடன்களை முறையாகக் கழிக்க முடியும் என்று நோன்பெடுத்தவர்கள் எவரேனும் இருந்தால் தயவு செய்து காலாற நடந்து விடுதியை விட்டு வெளியேறி ஒரு கப் காப்பியோ, கட்டன் சாயாவோ விழுங்கி வரலாம். அதற்கும் சோம்பேறித்தனப் படுபவர்கள் எனில் வீட்டிலிருந்து புறப்படும் போதே ஒரு டப்பாவில் கொஞ்சம் பால் பவுடர் மற்றும் சர்க்கரையை மட்டுமேனும் கொண்டு சென்று விடுவது உத்தமம். விடுதிகளில் காம்ப்ளிமெண்ட்ரியாக அளிக்கப்படும் குட்டிக் குட்டி பால் பவுடர், சர்க்கரைப் பாக்கெட்டுகள் சத்தியமாகப் போதவே இல்லை.

ஏ.சி தேவைப்படாத மலைசிறு நகரம்!

ஊரே ஏர் கண்டீஷனிங் செய்யப்பட்ட நிலையில் இருப்பதால் பெரும்பாலான விடுதிகளில் ஏ.சி இருப்பதில்லை. ஆனால் எல்லா விடுதிகளிலும் ராயல் சூட்களில் மட்டும் நிச்சயம் ஏ.சி உண்டு. 

மூணாறு மலையாள உணவுகளின் சுவை!

உணவில் சுவை என்று பார்த்தால் தமிழர்களின் நாவின் சுவை மொட்டுகளைக் கட்டிப் போடும் திறன் மலையாள உணவு வகைகளுக்கு இல்லை என்றே கூற வேண்டும். பழப்பாயஸம், எரிசேரி, புளிச்சேரி, குண்டு அரிசிச் சோறு, சப்பாத்தி, பூரி, புல்கா, பரோட்டா, நூடுல்ஸ், சிக்கன், மட்டன் பிரியாணி வகைகள் அனைத்திலுமே கொஞ்சம், கொஞ்சம் புகாரி வாசனை. இனித்துக் கொண்டு கிடக்கின்றன எல்லாமும். பிரியாணி என்றால் வாசம் மட்டும் மூக்கைத் துளைத்தால் போதுமா? நாவில் சுவை அறியப்பட வேண்டாமோ! அந்தக் குளிர் மலையின் ஜில்லிப்புக்கு கச்சிதமாக காரசாரமான சுவையில் பிரியாணி கிடைக்கவில்லையே என்பது கொஞ்சம் வருத்தமான விசயமே. இட்லி, தோசை, பூரி, சப்பாத்தி கூட நம்மூரைப் போல இல்லை. ஓரிரு நாட்களுக்கு சமாளிக்கலாம் என்ற அளவில் தான் இருக்கிறது அவற்றின் சுவையும். கிரில்டு வகை உணவுகளின் சுவை கொஞ்சம் தேவலாம். பேசாமல் மூணாறுக்குச் செல்பவர்கள் அனைவரும் அந்த நாட்களில் மட்டுமேனும் பேலியோவுக்கு மாறலாம். அந்த அளவுக்கு சைவத்தைக் காட்டிலும் அசைவம் அங்கே கொஞ்சம் தேவலாம் என்றிருக்கிறது. இவை எல்லாவற்றையும் விட மகா உத்தமமான விசயம் ஒன்றுள்ளது. சிரமம் பார்க்காமல் கணிசமாக நல்லெண்ணெயில் ஊற வைத்த பொடி இட்லிகளையும், தாராளமாக வெண்ணெய் ஊற்றிப் பிசைந்து சுட்ட மிருதுவான சப்பாத்திகளையும் தயார் செய்து நபர்களுக்குத் தக்க தனித் தனி பொட்டலங்களாக கட்டி எடுத்துக் கொண்டு இப்படி உல்லாசச் சுற்றுலா செல்வதென்றால் அதிலும் ஒரு நிம்மதியும், பாதுகாப்புணர்வும் இருக்கவே செய்கிறது. அதோடு காசும் மிச்சம் பாருங்கள். அங்கே ஒரு காஃபிக்கு கூட 350 ரூபாய் தண்டம் அழ வேண்டியிருக்கிறது. ஆகவே சுற்றுலா செல்ல நினைப்பவர்கள் முதலில் என்னவெல்லாம் அவசியத் தேவைகள் என முன்னேற்பாடாக ஒரு லிஸ்ட் போட்டுத் தயார் செய்து  எடுத்துச் செல்வது பயணத்தை எளிமையாக்கி விடும்.

டூர் பர்ச்சேஸ்:

அப்புறம் இந்த பர்ச்சேஸ் விசயம்... மூணாறில் நீங்கள் உங்களுக்காகவும், அண்டை, அயலாருக்காகவும், நண்பர்களுக்காகவும் வாங்கிச் சென்று அன்பளிக்க கிரீன் டீ, வொயிட் டீ, பிரீமியம் டீ, பிளாக் டீ உள்ளிட்ட பல வகைத் தேயிலைகளைத்  தவிர வேறொன்று உண்டெனில் அது வாசனைப் பொருட்களே! மிளகும், ஏலமும், காப்பிக் கொட்டைகளுமாக விளையும் இடங்களிலேயே ஃப்ரெஷ் ஆக வாங்கலாம். சென்னையோடு ஒப்பிடும் போது விலை சற்றுக் குறைவு என்பதால் மட்டுமல்ல அவை அங்கேயே தயாராவதால் தரம் நம்பகமானதாகவே இருக்கிறது என்பதாலும் தான்.

அசெளகரியங்கள்:

மலைப்பாதையில் பிரயாணம் செய்வது எத்தனைகெத்தனை கண்களுக்கு விருந்தோ அத்தனைக்கத்தனை மேனிக்கு வருத்தமே! பேருந்தோ, காரோ எதுவானாலும் சரி மலை ஏறி இறங்கும் முன் உடலை மொத்தமாக சப்பாத்தி மாவைப் போல உருட்டிப் பிசைந்து ஒரு வழியாக்கி விடுகின்றன. பிரயாணம் முடிந்ததும் ஒரு முழுநாள் தூக்கம் இருந்தால் போதும், பிறகு அடுத்த வெகேஷன் ட்ரிப் செல்லும் வரை உற்சாகம் நீடிக்கும் எனும் அளவுக்கு மனதுக்கு இதமான தன்மையை நீடிக்கச் செய்து விடுகின்றன இம்மாதிரியான மலைப்பயணங்கள்! அதனால் அசெளகரியங்களைப் பெரிதாகப் பொருட்படுத்தாமல் குடும்பத்துடன் ஒரு முறை மூணாறு சென்று திரும்பலாம்.

மூணாறு ரிஸார்ட்டுகள் தர வரிசைப்படி:

மூணாறு டவுனில் இருந்து 5 ஸ்டார், 4 ஸ்டார் தரத்திலான அனைத்து ரிஸார்ட்டுகளுமே கிட்டத்தட்ட ஏழெட்டு கிலோ மீட்டர் தொலைவில் தான் அமைந்துள்ளன. அவற்றில் முதன்மையானது;

பனோரமிக் கெட் அவே:
இது 5 ஸ்டார் ரிஸார்ட், இங்கே குடும்பத்துடன் மூன்று நாட்கள் தங்கிச் செல்ல 50,000 க்கு குறைவில்லாமல் செலவாகும். மலைச்சரிவின் விளிம்பில் வெந்நீர் நிரப்பிய நீச்சல் குளத்துடன் கூடிய ரிஸார்ட் இது!

டீ கண்ட்ரி: இது 4 ஸ்டார் கேட்டகிரி தான், ஆனால் இங்கே கிடைக்கும் உணவுகளின் சுவையால் ஒரு முறை இங்கே தங்கிச் செல்பவர்கள் மறுமுறை வேறு ரிஸார்ட்டுகளைத் தேடுவதில்லை என்கிறார்கள். இங்கே தங்கியவர்கள் யாரேனும் இந்தக் கட்டுரையை வாசித்தால் தங்களது அனுபவங்களை கருத்துப் பெட்டியில் பதிவு செய்யலாம்.

பரக்காட் நேச்சர் ரிஸார்ட்: இது புனர்ஜனி டிரெடிஷனல் வில்லேஜின் அருகில் இருக்கிறது. மூணாறு டவுனில் இருந்து 8 கிலோ மீட்டர் உள்ளே செல்ல வேண்டும். நீச்சல் குளம் இல்லை என்பதால் இது 4 ஸ்டார் கேட்டகிரி. உணவில் சுவை அபாரம் என்று சொல்வதற்கில்லை. அதற்காக சுத்த மோசமென்றும் கூற முடியாது. ஒரு குடும்பம் 3 நாட்கள் இந்த ரிஸார்ட்டில் தங்கிச் செல்ல குறைந்த பட்சம் 30,000 ரூபாய்கள் செலவாகலாம். அதிகபட்சம் என்பது நீங்கள் அங்கே பயன்படுத்திக் கொள்ளும் வசதிகளைப் பொறுத்து மாறுபடும். இங்கே நீச்சல் குளம் இல்லையென்பதால் அதற்கு பதிலாக காலை உணவுடன் லஞ்ச் அல்லது டின்னர் காம்ப்ளிமெண்ட்டரியாகத் தருகிறார்கள். அதோடு ஒவ்வொரு நாளுக்கும் பழங்கள், ப்ரெட், குக்கீஸ், ஸ்பெஷல் மசாலா டீ என்று தருகிறார்கள். மலைச்சரிவை ஒட்டிய இதன் திறந்தவெளி ரெஸ்டாரெண்ட் மனடம் கவர்வதாக இருக்கிறது. இங்கே தங்கினால் இரு வேளை உணவு நமது பேக்கேஜுக்குள் அடங்கி விடும். மிச்சமிருக்கும் ஒரு வேளையையும் அவர்கள் அளிக்கும் ப்ரெட் அல்லது குக்கீஸ்கள் கொண்டு சமாளித்து விடலாம். 

டூர் பிளான்:

இவை தவிர மேலும் பல குட்டிக் குட்டி ரிஸார்ட்டுகள் இங்கே நிறைய உள்ளன. 5 ஸ்டாரோ, 4 ஸ்டாரோ, 3 ஸ்டாரோ அல்லது எந்த ஸ்டார் கேட்டகிரியும் இல்லாத சாதாரண விடுதி அறையோ எதுவானாலும் சரி பயணத்திற்கு திட்டமிடும் போதே அங்கே ஆகக் கூடிய செலவுக்கணக்குகளையும் கூட முன்கூட்டியே திட்டமிட்டு அவை குறித்த ஒரு சின்னக் கணக்கு வழக்கு குறிப்புடன் பயணங்களைத் தொடங்கினீர்கள் எனில் பயணம் முடிந்து திரும்புகையில் ஓரளவுக்கு பர்ஸ் இளைக்காமல் வீடு திரும்பலாம். 

சென்று வந்த பிறகே உணர முடிந்தது மூணாறை ஏன் தென்னிந்தியாவின் காஷ்மீர் என்கிறார்கள் என்பது. ஆம்  தென்னிந்தியர்களுக்கு இது காஷ்மீரே தான்!

]]>
munnar tour, MUNNAR trip, மூணாறு சுற்றுலா, மூணாறு சம்மர் ட்ரிப், munnar peak season, incredible india, தென்னிந்திய காஷ்மீர் மூணாறு, south indian kashmir munnar tour http://images.dinamani.com/uploads/user/imagelibrary/2017/5/22/w600X390/munnar-1.jpg http://www.dinamani.com/lifestyle/travellogue/2017/may/22/south-indian-kashmir-munnar-summer-tour-2706791.html
2695461 லைஃப்ஸ்டைல் பயணம் இதுவரை போகாத ஒரு ஊருக்கு போனாத்தான் அது டூர் இல்லனா அது சுத்த போர்! கார்த்திகா வாசுதேவன் Wednesday, May 3, 2017 01:14 PM +0530  

ஒவ்வொரு விடுமுறைக்கும் ஒரு புது இடத்துக்கு டூர் போனா சூப்பரா இருக்கும் தானே?! எப்போ பாருங்க ஊட்டி, கொடைக்கானல், ஏற்காடு, வால்பாறை, டாப் ஸ்லிப்னு சொந்த ஏரியாலயே சுத்திகிட்டிருந்தா எப்படி? அதுக்குப் பேர் குண்டுச் சட்டிக்குள்ள குதிரை ஓட்டறதும்பாங்களே அதான். சரி புதுசா வேறெந்த இடத்துக்குப் போலாம்னு ஏதாவது திட்டம் இருக்கா உங்க கிட்ட? இருந்தா ஓகே...
இல்லனா நாங்க எதுக்கு இருக்கும்? அதையெல்லாம் கண்டுபிடிச்சு சொல்லிட்டா போச்சு. நாளை முதல் அக்னி நட்சத்திரம் வேறு தொடக்கம். உச்சந்தலை முதல் உள்ளங்கால் வரை அனல் பட்டையைக் கிளப்ப வீட்டு ஏ.சி க்கு டெப்ரஸன்ல தீப்பிடிச்சுக்காம இருந்தா சரி. ஏனெனில் அத்தனை வேலைப்பளுவை அதற்கு இந்த இரண்டு மாதங்களில் நாம் தருகிறோம். 24 மணி நேரமும் வீடு, அலுவலகம், மால்கள், தியேட்டர்கள், டிபார்ட்மெண்டல் ஸ்டோர்கள் என எல்லா இடங்களிலும் நீக்கமற நிறைந்திருப்பது தேச பக்தி அல்ல ஏ.சி தான். இந்த ஏ.சி போதையில் இருந்து விடுபட்டு கொஞ்சம் இயற்கையே குளு, குளுவென ஆக்கி வைத்திருக்கும் புத்தம் புது இடங்களுக்குப் போனால் என்ன? 

விடுமுறைகளுக்கு திட்டம் வகுத்துக் கொடுக்கவென்றே பல இணையதளங்கள் உள்ளன. அவற்றுள் ஒன்று யாத்ரா. யாத்ரா மூலமாக இந்த முறை மூன்று மாதங்களுக்கு முன்பிருந்தே 45 சதவிகிதம் பேர் இதுவரையிலும் விடுமுறை டூர் பிளான் செய்திருக்கிறார்களாம். சரி இந்திய மற்றும் இண்டர்நேஷனல் டூர்களில் கியூட்டான இடங்களைப் பரிந்துரைப்பதில் கெட்டிக்காரர்களான யாத்ரா தளம் இந்த முறை பரிந்துரைக்கும் இடங்கள் எதுவென இப்போது தெரிந்து கொள்வோம்.

தவாங்: 

அருணாச்சலப் பிரதேசத்தின் மிகச்சிறிய மாவட்டம் இது. உலகின் மிகப்பிரசித்தி பெற்ற பெளத்த மடாலயங்களில் ஒன்று இங்குள்ளது. இந்தப் பிரதேசம் எப்போதுமே அதன் மதம் மற்றும் விவசாயத்துடன் இணைந்த கலாச்சார விழாக்கள் மற்றும் நிகழ்வுகளுக்காகச் சிறப்புற்று விளங்குவது. அதுமட்டுமல்ல சமீபத்தில் திபெத்திய மடாதிபதியான தலாய் லாமா வாயிலாக இந்தியாவின் அனைத்துப் பகுதி மக்களும் அறிந்து கொள்ளும் விதமாக செய்திகளிலும் அடிக்கடி இடம் பெற்ற பிரதேசம் தான் இது. இங்கிருக்கும் தவாங் பெளத்த மடாலயம் சரித்திரப் பிரசித்தி பெற்றது. அதைக் காண்பதற்கு மட்டுமல்ல இந்தியாவின் மத்தியப் பகுதிகளிலும், தென் பகுதிகளிலும் அனலடித்துக் கிடக்கும் கோடையைச் சமாளிக்க ஆண்டின் எல்லா மாதங்களிலும் தூறலுடன் கூடிய மழையோடு இப்படி ஈரம் குறையாமலிருக்கும் பிரதேசத்துக்குப் போய் சில நாட்களைக் கழிப்பது என்பதெல்லாம் தேவலோகத்துக்குப் போய் இந்திர சபையில் கண்ணயறுவதற்குச் சமானம் என்பது அதை அனுபவிப்பவர்களுக்கே புரியக் கூடும். ஆர்வமிருப்பவர்கள் உங்கள் டூர் பிளானை இதை நோக்கி திட்டமிடலாம்.

கலிம்பாங்: 

இந்து மேற்கு வங்கத்தில் இருக்கும் அருமையான டூரிஸ்ட் ஸ்பாட். இங்கு ஆண்டின் பெரும்பான்மை மாதங்களிலும் இதமான தட்ப வெப்ப நிலையே நீடிக்கும். இந்தியாவின் பல்வேறு விதமான வேறுபட்ட கலாச்சாரம் மற்றும் பாரம்பரியங்களால் பிணைக்கப்பட்டு நெகிழ்ந்த மனங்களுடன் வாழும் மக்களைக் கொண்ட இந்தியப் பகுதி இது. இங்கிருந்து பார்த்தால் இமயமலைச் சிகரங்கள் அனைத்தையுமே கண்களால் மட்டுமல்ல கேமராக்களிலும் விழி விரிய அப்படியே அள்ளிக் கொள்ளலாம். இமயத்தின் அடிவாரத்தில் இயற்கையின் கொடையாக பரந்து விரிந்து கிடக்கும் பச்சைக் கம்பள விரிப்பு போன்ற சமவெளிப் பகுதிகளையும், வெள்ளிப் பனியாய் உருகி வழிந்து கொண்டிருக்கும் எண்ணிலடங்கா மலை முகடுகளையும் இங்கிருந்து கண்டால் மட்டுமே ஜென்ம சாபல்யம் அடைய முடியும். அத்தனை அழகான சின்னஞ்சிறு உலகம் இது.

ஜிரோ:

அருணாச்சலப் பிரதேசத்தின் இன்னுமொரு சொர்க்கம் இது. டூரிஸ்டுகள் அதிகம் விரும்பிச் செல்ல தேர்ந்தெடுக்கும் இடங்களில் இதற்கு எப்போதும் முதலிடம் உண்டு. இங்கு மக்களின் முக்கியமான தொழில் நெல் விளைவிப்பது. இரண்டு விதமான நெல் வகைகள் இங்கே உற்பத்தியாகின்றன. அது மட்டுமல்ல இங்கிருக்கும் டரின் மீன் பண்ணை டூரிஸ்டுகள் தவற விடக்கூடாத இடங்களில் ஒன்று. அது மட்டுமல்ல ஜிரோவின் அழகான பைன் மரக்காடுகளால் ஆன சமவெளிப்பகுதிகள் டூரிஸ்டுகள் வந்து தங்கி இயற்கையை அனுபவித்து ரசிக்கத் தோதான இடங்களில் ஒன்று. என்பதால் இதையும் தவற விடாமல் ஒரு முறை சென்று பார்த்து வரலாம்.

பிர் பிலிங்& கஜ்ஜியர்: 

இந்தியாவில் பாராகிளைடிங் சாகஷ விளையாட்டுகளில் ஈடுபடும் ஆர்வமுள்ளவர்கள் நிச்சயம் தவற விடக்கூடாத இடங்களில் இது ஒன்று. இந்தியாவில் ஹிமாச்சல் பிரதேசத்தில் இருக்கும் இந்த டூரிஸ்ட் ஸ்பாட்டின் பாராகிளைடிங் பைலட்டுகள் மிகத் திறன் வாய்ந்தவர்கள் என்வதால் இந்தியா மட்டுமல்ல உலகெங்கிலும் இருந்து விடுமுறைகளில் இங்கு வந்து பாரகிளைடிங் விளையாட்டுகளில் ஈடுபடுபவர்களின் எண்ணிக்கை அதிகம். பாராகிளைடிங் மட்டுமல்ல இங்கு ஹேங் கிளைடிங், ட்ரெக்கிங் மற்றும் கேம்பிங் வசதிகளும் உள்ளதால் டூரிஸ்டுகளுக்கு மிகச் சிறந்த பொழுதுபோக்கு சாகஷ அம்சங்களைத் தரும் இடங்களில் ஒன்றாக கருதப்படுகிறது.

தீர்த்தன்வேலி:

இந்த இடமும் இந்தியாவின் ஹிமாச்சலப் பிரதேசத்தில் தான் இருக்கிறது. சுற்றிலும் நதிகள் பாய, பச்சைப் பட்டு விரித்தாற் போல சமவெளிகளில் இயற்கை அழகு கொஞ்ச ஆங்காங்கே மிகத் திறன் வாய்ந்த ஓவியரின் கை வண்ணத்தில் உறைந்த சொர்க்கம் போல காட்சியளிக்கும் குளிர் நீர் ஏரிகள் சூழ அமைந்துள்ள கிரேட் ஹிமாலயன் நேஷனல் பூங்கா அமைந்த்துள்ள இடம் இது தான். இங்கே டூர் வரும் மக்கள் இதன் அழகான ஏரிகளில் மீன் பிடித்து மகிழலாம், மலை ஏறிப் பழகலாம், இன்னும் சற்று அதிகப்படியாக இங்கிருக்கும் கிராமங்களில் அந்த மக்களோடு மக்களாக இணைந்து அவர்களது வீடுகளில் பேயிங் கெஸ்டுகளாகத் தங்கிக் கொண்டு சில நாட்களுக்கு மட்டுமேனும் அருமையான ஒரு வடகிழக்குப் பிராந்திய கிராமத்து வாழ்வை ஆசை தீர வாழ்ந்து பார்க்கலாம்.

நாங்கள் சொல்ல வேண்டியதை சொல்லி விட்டோம் இப்போது நீங்கள் ரெடியா? டூர் பிளான் செய்பவர்கள் இந்த இடங்களுக்குத் தான் செல்ல வேண்டும் என்பதில்லை. இது வெறுமே ஒரு பரிந்துரையே உலகில் நாம் காண வேண்டிய, காணாமல் விடுபட்டிருக்கக் கூடிய எழில் மிகு பிரதேசங்கள் இன்னும்... இன்னும்... இன்னும் நிறையவே உண்டு.

முதலில் நமது இந்தியாவை நாம் முற்றறிய வேண்டுமெனில் பயணம் ஒன்றே சிறந்த வழி. பயணத்துக்கு உகந்தவை விடுமுறைக் காலங்கள். நிச்சயம் விடுமுறைகள் தோறும் எங்காவது குடும்பத்துடன் பயணிக்க மட்டும் மறக்கவே மறக்காதீர்கள். 

]]>
india tour, unexplored places in india,indian tourism,இந்தியச் சுற்றுலா தலங்கள், டூர் ஸ்பாட்ஸ்,வட கிழக்கு இந்தியா டூரிஸம் http://images.dinamani.com/uploads/user/imagelibrary/2017/5/3/w600X390/bir_biling22.jpg http://www.dinamani.com/lifestyle/travellogue/2017/may/03/if-you-are-interested-to-plan-out-your-summer-vacations-to-unexplored-places-2695461.html
2663055 லைஃப்ஸ்டைல் பயணம் நீலகிரிக்கு ராமாயண ஜடாயு மாதிரி பெரிய கழுகுகள் வந்திருக்கிறதாமே?! சம்மர் விசிட் அங்க போகலாமா? Thursday, March 9, 2017 05:40 PM +0530  

இந்தியாவில் 9 வகையான கழுகு இனங்கள் வாழ்கின்றன. இவற்றில் தென்னிந்தியாவில் 7 வகைகள் உள்ளன. இதில் தமிழகத்தில் வெண்முதுகு பாறு கழுகு, கருங்கழுத்து பாறு கழுகு, செந்தலை பாறு கழுகு மற்றும் மஞ்சள் முக பாறு  கழுகு ஆகிய 4 வகையான கழுகுகள் உள்ளன.

இந்நிலையில் கடந்தாண்டில் நீலகிரிக்கு சிறப்பு விருந்தாளிகளாக இமாலயன் கிரிபான் கழுகும், எகிப்தியன் கழுகும் வந்திருந்தன. இவற்றைத் தொடர்ந்து அண்மையில் சினேரியஸ் வகையான கழுகு ஒன்றும் மாயார் வனப்பகுதிக்கு வந்திருந்தது பதிவு செய்யப்பட்டுள்ளது.

இதுதொடர்பாக நீலகிரியில் கழுகுகளைக் குறித்து ஆய்வு நடத்தி வரும் அருளகம் அமைப்பின் செயலர் எஸ்.பாரதிதாசன் நம்மிடம் பகிர்ந்து கொண்ட தகவல்களாவன:
"இமயமலைப் பகுதியில் சுமார் 10,000 அடிக்கும் மேலான உயரத்தில் ஊசி இலை மரங்களில் கூடமைத்து இனப்பெருக்கம் செய்து சுற்றித் திரியும் சினேரியஸ் வகை கழுகு நடப்பாண்டில் நீலகிரி மாவட்டத்தில் மாயார் வனப்பகுதிக்கு வந்தது மிகப் பெரிய ஆச்சரியத்தை ஏற்படுத்தியுள்ளது. இக்கழுகு கருப்பு நிறத்தில் இருந்தாலும் அதன் கழுத்து மற்றும் கால் ஆகியவை கருநீலத்தில் இருக்கும். அதனால் இவை கருங்கழுகு எனவும் அழைக்கப்படும். கழுகுகளிலேயே பெரிய உடல்வாகு கொண்டது இந்த கழுகு இனம்தான் என்றால் மிகையாகாது.

இந்த வகை கழுகுகள் உயரே பறக்கும்போது ஏற்படும் ஆக்ஸிஜன் தட்டுப்பாட்டைச் சமாளிக்கும் வகையில் அதன் ரத்தத்தில் சிறப்பு வகையான ஹீமோகுளோபினை உருவாக்கிக் கொள்ளும் இயல்புடையதாகும். அழிவின் விளிம்பிலுள்ள இப்பறவை வட இந்தியாவில் பரவலாகவும், தென்னிந்தியாவில் அவ்வப்போதும் தென்படுகிறது. 

மேலும் இப்பறவை பெரிய உடல்வாகைக் கொண்டிருப்பதால் தனியாகவே இரை தேடும் இயல்புடையதெனவும், இறந்த விலங்குகளையும், செத்த மீன்களையும் உண்ணும் இப்பறவை சில சமயங்களில் எலி உள்ளிட்ட சிறு கொறி விலங்குகளையும், ஆமை மற்றும் முயல் உள்ளிட்ட சிறு விலங்குகளையும் கூட வேட்டையாடி உண்ணும் திறன் படைத்ததாகவும் இருக்கிறது'' என்றார். 

கழுகுகள் குறித்து நீலகிரியில் ஆராய்ச்சி நடத்திவரும் உதகை அரசு கலைக்கல்லூரி மாணவரான சாம்சன், ""கடந்த ஆண்டில் இமாலயன் கிரிபான் ரக கழுகும், எகிப்தியன் கழுகும் மாயார் வனப்பகுதிக்கு வந்திருந்த சூழலில் நடப்பாண்டில் சினேரியஸ் வகை கழுகும் வந்திருந்தது பெரும் ஆச்சரியத்தை ஏற்படுத்தியுள்ளது.

பொதுவாக கழுகுகள் 37 வயது வரையிலும் உயிர்வாழக் கூடியவை என்பது அண்மைக்கால ஆராய்ச்சிகளில் தெரியவந்துள்ளது. இதில் 5 வயதிற்கு மேற்பட்ட கழுகுகளே வளர்ந்த கழுகுகள் என அழைக்கப்படும். ஓரிடத்திலிருந்து வேறு புதிய இடத்திற்கு வளர்ந்த கழுகுகள் வருவதில்லை. இளம் கழுகுகளே வந்து செல்கின்றன. முதலில் இவை அந்த பகுதிக்கு தனியாக வந்து தங்களது வாழ்க்கைச் சூழலுக்கு அந்த இடம் ஏற்றதா? என்பதை உறுதி செய்து விட்டு திரும்பிச் சென்ற பின்னர் அடுத்த முறை வரும்போது கூட்டத்தோடு வந்து செல்லும் இயல்புடையவையாகும்.

தற்போது நீலகிரியில் காணப்பட்ட சினேரியஸ் கழுகு இங்கு வருவது இதுவே முதன்முறை எனலாம். இதற்கு முன்னர் இந்த வகை கழுகுகள் கடந்த 2008 - ஆம் ஆண்டு கோடியக்கரையிலும், 1987 - ஆம் ஆண்டு புதுவையிலும் மட்டும்தான் பார்த்ததாகப் பதிவு செய்யப்பட்டுள்ளது.

உணவு, வாழ்விடச் சுருக்கம், பொதுமக்களால் இடையூறு மற்றும் இனப்பெருக்கம் ஆகியவையே கழுகுகள் இடம் மாறி செல்வதற்கான காரணங்களாகும். தற்போதைய சூழலில் இமயமலைப் பகுதியில் ஏற்பட்டுள்ள பருவநிலை மாற்றமும், உணவுத் தட்டுப்பாடும்கூட இவை வந்து செல்வதற்கான காரணமாக இருக்கலாம்'' என்றார்.

ஓரிடத்தில் கழுகுகள் அதிக அளவில் உள்ளது என்றால், அங்கு அவற்றிற்கான உணவுச் சங்கிலி சிறப்பாக இருப்பதாகவே பொருள் கொள்ளலாம். புலிகள் அதிக அளவில் இருக்க வேண்டுமெனில் அவற்றின் உணவுத் தேவையைத் தீர்க்கும் வகையில் மான்களும் அதிக அளவில் இருக்க வேண்டும். அதன் எச்சங்கள்தாம் இக்கழுகுகளுக்கு உணவாகும். அதனால் அத்தகைய கணக்கின்படி பிணந்தின்னிக் கழுகுகள் நீலகிரி வனப்பகுதிகளுக்கு அதிக அளவில் வந்து செல்வது இப்பகுதியில் புலிகளின் எண்ணிக்கையும் திடகாத்திரமாகவே இருப்பதாகக் கொள்ளலாம். 
- ஏ.பேட்ரிக்
 

]]>
நீலகிரி டூர், நீலகிரி வனப்பகுதி, கழுகுச் சுற்றுலா, ராமாயணம், ஜடாயு, nigris, foriegn eagle verieties, ramayan, jadayu, eagle tour http://images.dinamani.com/uploads/user/imagelibrary/2017/3/9/w600X390/himalayan_eagle.jpg http://www.dinamani.com/lifestyle/travellogue/2017/mar/09/நீலகிரிக்கு-ராமாயண-ஜடாயு-மாதிரி-பெரிய-கழுகுகள்-வந்திருக்கிறதாமே-சம்மர்-விசிட்-அங்க-போகலாமா-2663055.html
2557046 லைஃப்ஸ்டைல் பயணம் வாழ்க்கையில் ஒரு முறையேனும் இந்த இடங்களில் ஏதாவதொன்றை பார்த்து விட்டாலே ஜென்ம சாபல்யம்!  கார்த்திகா வாசுதேவன் Monday, January 2, 2017 09:32 AM +0530 விடுமுறை தினங்கள் வார இறுதி ஓய்வு நாட்கள் என்றெல்லாம் இல்லை இப்போதெல்லாம் நினைத்தால் மக்கள் சுற்றுலாவுக்குத் தயாராகி விடுகிறார்கள். காலை, மாலை, இரவு என  எல்லா நேரங்களிலும் ஃபார்மேட்  மோடில் ஆட்டோமேட்டிக் மெஷின்  போல  இயங்க வைத்து களைப்படையச் செய்யும் இந்த வாழ்வின் மீதான சுவாரஸ்யம் குன்றாமல் இருக்க இப்படி நினைத்த மாத்திரத்தில் சுற்றுலா கிளம்புவது என்பதும்ஒரு ஆரோக்கியமான விஷயமே!

நடுத்தரக் குடும்பங்களில் தாத்தா காலத்தில் திருப்பதிக்கு போக வருடம் முழுக்க காசு சேர்க்க ஆரம்பித்து வருட இறுதியில் மலை ஏறிப் போய் பெருமாளை சேவித்து வருவார்கள், அவர்களுக்கு அது சுற்றுலா. அப்பா காலத்தில் கொஞ்சம் முன்னேறி சேர்த்து வைத்த காசு போதவில்லை என்றால் அலுவலகத்தில் பி.எப் லோன் வாங்கி  ஊட்டி, கொடைக்கானல், ஏற்காடு என்று போய் வந்தார்கள். இப்போதைய டிரெண்ட் என்ன தெரியுமா? நீங்கள் உள்நாட்டு அயல்நாட்டு சுற்றுலா போய் வர சில வரையறைகளின் கீழ்  வங்கிகள் கடன் தரத் தயாராக இருக்கின்றன. இதன் காரணமாகவோ என்னவோ முந்தைய வருடங்களை விட இப்போது அயல்நாட்டு சுற்றுலா செல்வோரின் எண்ணிக்கை தொடர்ந்து அதிகரித்த வண்ணம் உள்ளது. 

எப்படி ஆயினும் சுற்றுலா போய் வருவது மனதுக்கு மிக மிக ஆரோக்கியமான விஷயமே. 'வோல்கா முதல் கங்கை வரை' வரை நூலாசிரியரும் இந்தியப் பயண இலக்கிய நூல்களின் தந்தையுமான ராகுல் சாங்கிருத்யாயன் கூற்றுப் படி 'ஓடிக் கொண்டே இருந்தால் தான் அது நதி ஒரே இடத்தில்  தங்கி விட்டால் அது அழுக்கு தேங்கும் குட்டை' என்பதற்கிணங்க மக்களின் பயண ஆர்வங்கள் மேம்பாட்டு வருவது நன்று!

உலகம் ஒரு குளோபல் கிராமம் என்றான பின் இப்போது  உலகின் எந்த மூலையில் இருந்தும் மற்றொரு மூலைக்கு திட்டமிட்டு குறுகிய காலத்தில் சென்று  திரும்பலாம் என்று நம்புவதால் மக்களின் உலகச் சுற்றுலாக்கள் பெருத்து விட்டன. பள்ளிக் குழந்தைகளிடம் கூட விடுமுறை கழிந்து பள்ளி திறந்த பின்னான உரையாடல்கள் இவ்விதமே நிகழ்கின்றன.


'நாங்க இந்த வருஷம் துபாய் போனோமே. புர்ஜ் கலீபா மேல இருந்து ஃபோட்டோ எடுத்து ஃபேஸ் புக்ல ஷேர் பண்ணிருக்கோம்.' என்கிறாள் ஒரு பள்ளிச் சிறுமி. அடுத்த வருஷம் கனடா போய் நயாகரா ஃபால்ஸ் பார்ப்போம் , அதுக்கடுத்த வருஷம் ஜாக்கி ஷான் பார்க்க ஷாங்காய் போறோம். அப்புறம் யூ.எஸ் போறோம். சிங்கப்பூர், மலேசியா எல்லாம் ஏற்கனவே பார்த்தாச்சு என்ற ரீதியில் விரிகிறது சிறுவர், சிறுமியரின்  பள்ளிக்கூடக் கலந்துரையாடல்கள். 
 
இதனடிப்படையில் சுற்றுலாவை மையமாக வைத்து உலகின் 57 நாடுகளில் நிகழ்த்தப்பட்ட ஆய்வின் அடிப்படையில் சுற்றுலாப்பயணிகளை அதிகம் கவரும் நகரங்கள் எவை என்று ஒரு லிஸ்ட் தயாரிக்கப்பட்டது. அந்த லிஸ்டில் முதலில் இருக்கும் நகரம் எது? அடுத்தடுத்த இடங்களில் இருக்கும் நகரங்கள் எவை? என்று இந்தக்  கட்டுரையை வாசித்து தெரிந்து கொள்ளுங்கள்.


ஷாங்காய்: ஷாங்காய் என்றால் சீன மொழியில் 'கடலுக்கு மேலே' என்று பொருள். ஹுவாங்ப்பூ நதியின் கரையில் அமைந்த துறைமுக நகரமான ஷாங்காய் எப்போதுமே உலக மக்கள் சென்று வர விரும்பும் முக்கியமான சுற்றுலா தளங்களில் முதலிடம் வகிக்கிறது. புகைப்படத்தைப் பார்த்தாலே நகரத்தின் அழகில் உள்ளம் கொள்ளை போகிறது. 


பட்டாயா: தாய்லாந்தில் இருக்கும் இந்த பட்டாயா நகரம் 1960 களில் சாதாரண மீன்பிடி கிராமமாகவே இருந்து வந்தது. ஆனால் இங்கிருக்கும் அழகான கடலும் நதியும் சார்ந்த சுற்றுப்புறம் இன்று இதை ஒரு சுற்றுலாத் தலமாக மாற்றியுள்ளது. இப்போது இங்கே எல்லாத் திசைகளிலும் சுற்றுலாப்  பயணிகள் வந்து தங்கிச் செல்லும்  ரிசார்ட்டுகள்  பல்கிப்பெருகியுள்ளன. 


மியாமி: அமெரிக்காவின் தெற்கு மாகாணத்தில் முக்கிய நகரம் மியாமி. இங்கே கியூபாவின் செல்வாக்கு அதிகமிருந்தாலும் உலக சுற்றுலாப் பயணிகளை ஈர்க்கும்  அமெரிக்க நகரங்களில் எப்போதும் இதற்கு மிகப் பெரும் இடமுண்டு. புகழ் பெற்ற மியாமி கடற்கரை இந்தியாவில் பல மொழி  திரைப்படங்களில் இடம்பெற்றுள்ளது.


புக்கெட் தீவு: 576 சதுர கிலோ மீட்டர் பரப்பளவு கொண்ட இந்த புக்கெட் தீவு தாய்லாந்தின் பெரிய தீவுகளில் ஒன்றாக கருதப்படுகிறது. இதைத் தவிர  மேலும் 32 குட்டி குட்டித் தீவுகள் தாய்லாந்தில் உள்ளன. இங்கே பெருமளவு டின் மற்றும் ரப்பர் உற்பத்தி செய்யப்படுவதால் பொருளாதார வளம் மிக்க தீவுகளில் இதுவும் ஒன்று.


குவாங்ஷூ: சீனாவின் மூன்றாவது மிகப்பெரிய நகரமான இந்த குவாங்ஷூ தென் மத்திய மாகாணமாகிய குவாங்டங் பகுதியில் அமைந்துள்ளது. 
 
 
தைபே: தைவான் தலைநகரமான தைபே அங்கிருக்கும் சுவையான தெருவோர உணவகங்கள் மற்றும் இரவுக்  கடைகள் மூலமாக சுற்றுலாப் பயணிகளை   ஈர்க்கும் திறனைப் பெற்றுள்ளது. இந்தத் தெருவோர உணவகங்களில் அசைவ உணவுகள் அனைத்தும் அவ்வப்போது பயணிகள் விருப்பத்துக்கு ஏற்ப உடனடியாக தயாராகின்றன. தொட்டியில் மிதந்து கொண்டிருக்கும் மீன் வாடிக்கையாளர் விருப்பத்திற்கு இணங்க அடுத்த  நொடியில் எண்ணெய்யில் பொறிக்கப் பட்டு  தட்டில் வைக்கப் படும் என்றால் பார்த்துக் கொள்ளுங்கள் அந்த உணவின் சுவையை!
 


 
ரோம்: பழைய ரோம் நகரம் கி.பி.பத்தாம் நூற்றாண்டில் ரோமுலஸ் மற்றும் ரீமஸ் சகோதரர்களின் கூட்டு முயற்சியில் உருவாக்கப் பட்டது என்கிறது வரலாறு. ரோம் 'உலக நாகரீகத்தின்  தொட்டில்' என்று பாராட்டத்  தக்க வகையில் அங்கே எங்கெங்கு காணினும் நவீன மயம்.

  


சியோல்: தென் கொரியாவின் தலைநகரான சியோலின் மக்கள் தொகை 10 மில்லியனுக்கும் அதிகம்.மக்கள் நெருக்கடி மிகுந்த நகரம் என்றாலும் எப்போதும் சுற்றுலாப் பயணிகளை ஈர்க்கும் நகரங்களில் சியோலும் முன்னணியில் இருக்கிறது. 


 
  
அனடோலியா: மத்திய தரைக்கடலின் கரையோரப் பகுதியில் அமைந்திருக்கும் இந்த துருக்கிய நகரம் அதன் ஸ்படிக  நீல நிற கடற்கரைக்காக சுற்றுலாப் பயணிகளால் பெரிதும் விரும்பப் படுகிறது. 

 
  
கோலாலம்பூர்: தெற்கு மலேசிய தீபகற்பத்தில் அமைந்துள்ள கோலாலம்பூர் மலேஷியாவின்  தலைநகர், சுற்றுலாப் பிரியர்கள் கோலாலம்பூரை  'நுகர்வோரின்  சொர்க்கம்' என்று அழைத்து கொண்டாடுகிறார்கள்.  
 
  


 

இஸ்தான்புல்: உலக  நகரங்களில் பாதி ஆசியாக் கண்டத்திலும் பாதி ஐரோப்பாக் கண்டத்திலுமாக அமைந்திருக்கும் ஒரே நகரம் என்ற பெருமை இஸ்தான்புலுக்கு  உண்டு.
 
  

துபாய்: உலகிலேயே மிக உயரமான கட்டிடமாக 163 மாடிகள் கொண்ட புர்ஜ் கலீபா எனும் கட்டிடம் துபாயில் தான் அமைந்துள்ளது. இதற்காக மட்டுமல்ல இந்தக் கட்டிடம் கட்டப் படுவதற்கு முன்பும் கூட துபாய்க்கு  உலக சுற்றுலாப் பயணிகளின் பயண லிஸ்டில் எப்போதும் முதலிடம் உண்டு. 
புகைப்படத்தில் உள்ள நகரங்கள் மட்டுமல்ல இதே போன்ற  சிறந்த சுற்றுலாத் தளங்கள் உலகெங்கும் இன்னும் விரிந்து கிடக்கின்றன. ஒவ்வொரு விடுமுறை காலத்தின் போதும் பயணிகள்இந்த லிஸ்டை சோதித்துக் கொள்ளலாம். இன்னமும் பார்க்காத இடங்களில் காத்திருக்கலாம் நமக்கான சுவாரஸ்யங்கள்! 

]]>
http://images.dinamani.com/uploads/user/imagelibrary/2016/8/16/w600X390/miyami.jpg http://www.dinamani.com/lifestyle/travellogue/2016/aug/16/வேர்ல்டு-டூர்-போகலாமா-2557046.html