சாத்தனூர் அணையில் 7.5 மெகா வாட் மின்சாரம் உற்பத்தி

திருவண்ணாமலை மாவட்டம், சாத்தனூர் அணையில் உள்ள நீர்மின் உற்பத்தி நிலையத்தில் 24 மணி நேரத்தில் 7.5 மெகா வாட் மின்சாரம் தயாரிக்கப்பட்டது.
சாத்தனூர் அணையின் உபரி நீர் செவ்வாய்க்கிழமை மாலை திறக்கப்பட்டது. விநாடிக்கு 1,500 கன அடி நீர் திறந்துவிடப்பட்டுள்ளது. இதில், 1,000 கன அடி நீர் அணையில் உள்ள நீர்மின் உற்பத்தி நிலையம் வழியாகவும், 500 கன அடி நீர் தென்பெண்ணை ஆறு வழியாகவும் திறந்துவிடப்பட்டுள்ளது.
7.5 மெகா வாட் மின்சாரம் உற்பத்தி: இந்நிலையில், அணையில் உள்ள நீர்மின் உற்பத்தி நிலையம் வழியாக திறந்துவிடப்படும் தண்ணீரைக் கொண்டு 24 மணி நேரத்தில் 7.5 மெகா வாட் மின்சாரம் தயாரிக்கப்பட்டது. இதேபோல, தொடர்ந்து நாள் ஒன்றுக்கு 7.2 மெகா வாட் முதல் 7.5 மெகா வாட் மின்சாரம் நீர்மின் உற்பத்தி நிலையத்தில் தயாரிக்கப்படும் என்றும், இந்த மின்சாரம் திருவண்ணாமலை மாவட்ட பயன்பாட்டுக்கு வழங்கப்படும் என்றும் நீர்மின் நிலைய அதிகாரிகள் தெரிவித்தனர்.