நாளை சுந்தரர் தேவார தமிழிசை விழா

ராணிப்பேட்டையில் ஞாயிற்றுக்கிழமை நடைபெறவுள்ள சுந்தரர் தேவாரம் தமிழிசை விழாவில், திருக்கயிலாய பரம்பரைத் திருவாவடுதுறை ஆதீனம் 24-ஆவது குருமகா சந்நிதானம் ஸ்ரீலஸ்ரீ அம்பலவாண தேசிக பரமாச்சாரிய சுவாமிகள் பங்கேற்று அருளுரை வழங்கவுள்ளார்.
இதுகுறித்து ராணிப்பேட்டை சைவத்திருமுறை நேர்முகப் பயிற்சி மைய அமைப்பாளர் இரா.ரகுபதி கூறியதாவது:
தமிழகத்திலேயே முதன் முறையாக ராணிப்பேட்டையில் சுந்தரர் தேவாரம் 7-ஆம் திருமுறை முற்றோதல் பயிற்சி நடைபெறுகிறது.
ராணிப்பேட்டை காரை கூட்டுச் சாலையில் உள்ள சிறுவர்களுக்கான அரசு குழந்தைகள் இல்லத்தில் ஞாயிற்றுக்கிழமை காலை 6 மணி முதல் மாலை 6 மணி வரை இப்பயிற்சி நடைபெறுகிறது.
இதில் வேலூர் மாவட்டத்துக்கு முதன் முறையாக திருக்கயிலாய பரம்பரைத் திருவாவடுதுறை ஆதீனம் 24-ஆவது குருமகா சந்நிதானம் ஸ்ரீலஸ்ரீ அம்பலவாண தேசிக பரமாச்சாரிய சுவாமிகள் பங்கேற்று அருளுரை வழங்க உள்ளார். மேலும், சிதம்பரத்தில் இருந்து 15-க்கும் மேற்பட்ட ஓதுவா மூர்த்திகள் கலந்துகொண்டு சுந்தரர் தேவாரம்
பாட உள்ளனர்.    இதில், தமிழகம் முழுவதிலும் இருந்து சுமார் ஆயிரக்கணக்கான சிவனடியார்கள் பங்கேற்று 7-ஆம் திருமுறை முற்றோதல் பயிற்சி பெற உள்ளனர். திருமுறை பயிற்சி மைய இயக்குநர் சபா.சண்முகசுந்தரம் பயிற்சியளிக்கிறார் என்றார் அவர்.