மாவட்டத்தில் கொடி நாள் வசூல் ஊர்வலம்: வேலூரில் ஆட்சியர் தொடங்கி வைப்பு

வேலூர் மாநகரில் கொடி நாள் வசூல் ஊர்வலத்தை மாவட்ட ஆட்சியர் எஸ்.ஏ.ராமன் வெள்ளிக்கிழமை தொடங்கி வைத்தார்.
வேலூர் மக்கான் சந்திப்பில் சிப்பாய் நினைவு தூண் அருகில் கொடி நாள் வசூலை தொடங்கி வைத்த ஆட்சியர், ஊர்வலத்தை கொடி அசைத்து தொடங்கி வைத்தார். அத்துடன், முன்னாள் படை வீரர்களின் குடும்ப நலனுக்காக பொதுமக்கள் அதிக அளவில் நிதி வழங்கவும் அவர் கேட்டுக் கொண்டார். 
மாவட்ட வருவாய் அலுவலர் ஜெ.பார்த்தீபன், மாவட்ட முன்னாள் படை வீரர் நல துணை இயக்குநர் மேஜர் போனி வின்சென்ட், முன்னாள் படைவீரர் நலவாரிய உப தலைவர் கேப்டன் துரைராஜ், வேலூர் வட்டாட்சியர் ரமேஷ் உள்ளிட்டோர் பங்கேற்றனர்.
மாலையில் காவலர் திருமண மண்டபத்தில் நடைபெற்ற நிகழ்ச்சியில், முன்னாள் படைவீரர்கள், அவர்தம் குடும்பத்தினர், போர் வீரர்கள் குடும்பத்தைச் சேர்ந்த விதவையர், போரில் ஊனமுற்ற வீரர்கள் ஆகியோருடன் தேநீர் விருந்து நடைபெற்றது.
வாணியம்பாடியில்...
வாணியம்பாடி வட்டாட்சியர் அலுவலகம் சார்பில் முன்னாள் ராணுவத்தினருக்கான கொடிநாள் வசூல் ஊர்வலம் வெள்ளிக்கிழமை நடைபெற்றது. இந்த ஊர்வலத்துக்கு வட்டாட்சியர் கிருஷ்ணவேணி தலைமை வகித்தார். 
வேலூர் மாவட்ட நீதிபதி ஆனந்தி கொடிநாள் வசூலை தொடங்கி வைத்தார். அதைத் தொடர்ந்து, கொடி நாள் வசூல் ஊர்வலத்தை கொடியசைத்து தொடங்கி வைத்தார்.
 நிகழ்ச்சியில், வாணியம்பாடி சார்பு நீதிபதி ராமசந்திரன், மாவட்ட உரிமையியல் நீதிபதி ஜெனீபர், குற்றவியல் நீதிபதி காளிமுத்துவேல், தலைமையிடத்து துணை வட்டாட்சியர் ரேவதி, வருவாய்த் துறை ஆய்வாளர் ராஜ்குமார் உள்ளிட்டோர் பங்கேற்றனர். பள்ளி மாணவர்கள் திரளானோர் பங்கேற்ற ஊர்வலம் முக்கிய வீதிகள் வழியாகச் சென்றது.
இந்த ஊர்வலத்தில் பொதுமக்களிடம் கொடி நாள் நிதி வசூலிக்கப்பட்டது.
பேர்ணாம்பட்டில்...
பேர்ணாம்பட்டில் கொடி நாள் வசூல் ஊர்வலம் வட்டாட்சியர் அலுவலகத்தில் இருந்து தொடங்கியது. ஊர்வலத்தை வட்டாட்சியர் கோட்டீஸ்வரன் கொடியசைத்து தொடங்கி வைத்தார். 
ஊர்வலம் நகரின் முக்கிய  சாலைகள் வழியாகச் சென்றது. தலைமையிடத்து துணை வட்டாட்சியர் பழனி, வருவாய் ஆய்வாளர் இளையராஜா, பல்வேறு பள்ளிகளின் மாணவர்கள் ஊர்வலத்தில் கலந்து கொண்டனர்.