வரும் ஜூலை 1 முதல் 31-ஆம் தேதி வரை வாக்காளர் பட்டியல் திருத்தப்பணி நடைபெறவுள்ளதாக மாவட்ட ஆட்சியர் தெரிவித்துள்ளார்.
காரைக்கால் மாவட்ட ஆட்சியர் ப.பார்த்திபன் இதுகுறித்து திங்கள்கிழமை வெளியிட்ட செய்திக் குறிப்பு: தகுதி வாய்ந்த இளம் வாக்காளர்களை வாக்காளர் பட்டியலில் அதிக அளவில் சேர்த்தல் மற்றும் இறந்தவர்களின் பெயரை பட்டியலில் இருந்து நீக்குதல் ஆகியவற்றுக்கான சிறப்புப்பணி வரும் 1.7.2017 முதல் 31.7.2017 வரை நடத்த தேர்தல் ஆணையம் உத்தரவிட்டுள்ளது. ஜூலை 31-ஆம் தேதி நிறைவடையும் இந்த சிறப்புப் பணியின்போது அதிகாரிகளின் அலுவலகங்களில் விண்ணப்பப் படிவங்களைச் சமர்ப்பிக்கலாம். மேலும் தபால் மூலமாகவும் அனுப்பலாம். 9.7.2017 மற்றும் 23.7.2017 ஆகிய இரு தினங்களில் அனைத்து வாக்குச் சாவடியில் நடைபெறும் சிறப்பு முகாமிலும் விண்ணப்பங்களை சமர்ப்பிக்கலாம் என்றார்.