கோமாரி நோய்த் தடுப்பூசி போடும் பணி நாளை தொடக்கம்

காரைக்கால் பகுதிகளிலுள்ள கால்நடைகளுக்கு மார்ச் 15-ஆம் தேதி முதல் கோமாரி நோய்த் தடுப்பூசி போடும் பணி தொடங்குகிறது என கால்நடை பராமரிப்பு மற்றும் கால்நடை நலத்துறை இணை இயக்குநர் லதா மங்கேஷ்கர் தெரிவித்துள்ளார். 
இதுகுறித்து அவர் வெளியிட்ட செய்திக் குறிப்பு: தேசிய கோமாரி நோய்த் தடுப்புத் திட்டம் புதுச்சேரி மாநிலம், காரைக்காலில் நடைமுறைப்படுத்தப்படுகிறது. இத்திட்டத்தின் 14-ஆவது சுற்றாக கால்நடை மருத்துவர்கள் மார்ச் 15-ஆம் தேதி முதல் வீடு வீடாகச் சென்று கால்நடைகளுக்கு கோமாரி நோய்த் தடுப்பூசி போடவுள்ளனர். மார்ச் 15 முதல் 17 வரை காரைக்கால், நெடுங்காடு கொம்யூன்களிலும்,  மார்ச் 19 முதல் 21 வரை நிரவி, தென்னங்குடி பகுதிகளிலும், மார்ச் 22 முதல் 24 வரை திருப்பட்டினம் மற்றும் கோட்டுச்சேரி கொம்யூன்களில் காலை 6 முதல் 10 மணி வரை மருத்துவக் குழுவினர் நேரில் வந்து தடுப்பூசி போடுவர். எனவே, கால்நடை வளர்ப்பவர்கள் இவ்வாய்ப்பை பயன்படுத்திக்கொண்டு தங்களது கால்நடைகளை கோமாரி நோயிலிருந்து பாதுகாத்துக்கொள்ள கேட்டுக்கொள்ளப்படுகிறது.