அண்ணாவின் பிறந்தநாளையொட்டி காரைக்கால் பகுதியில் உள்ள அண்ணா சிலைகளுக்கு திமுக, அதிமுகவினர் மாலை அணிவித்து மரியாதை செலுத்தினர்.
காரைக்கால் மாவட்ட அதிமுக சார்பில் அண்ணா பிறந்தநாள் விழா சனிக்கிழமை கொண்டாடப்பட்டது. கோட்டுச்சேரியில் உள்ள கட்சி அலுவலகத்திலிருந்து கட்சியினர் அப்பகுதியில் உள்ள அண்ணா சிலைக்கு மாலை அணிவிக்க ஊர்வலமாகச் சென்றனர்.
மாவட்ட செயலரும், சட்டப்பேரவை முன்னாள் உறுப்பினருமான எம்.வி.ஓமலிங்கம் தலைமையில் அண்ணா சிலைக்கு மாலை அணிவிக்கப்பட்டது.
இதில் காரைக்கால் தெற்குத் தொகுதி சட்டப்பேரவை உறுப்பினர் கே.ஏ.யு.அசனா மற்றும் பொருளாளர் எச்.எம்.ஏ.காதர், இணைச் செயலர் கே.ஜீவானந்தம் உள்ளிட்ட கட்சி நிர்வாகிகள் பலர் கலந்துகொண்டனர்.
திமுக சார்பில் முன்னாள் அமைச்சரும், காரைக்கால் திமுக அமைப்பாளருமான ஏ.எம்.எச்.நாஜிம் தலைமையில், காரைக்காலில் உள்ள திமுக அலுவலக வாயிலில் அண்ணா படம் வைத்து மலர்தூவி மரியாதை செலுத்தப்பட்டது. இந்த நிகழ்ச்சியில் சட்டப்பேரவை உறுப்பினரும், புதுச்சேரி மின் திறல் குழுமத் தலைவருமான கீதாஆனந்தன் உள்ளிட்ட திமுகவினர் கலந்துகொண்டனர். இந்தக் குழுவினர் கோட்டுச்சேரிக்கு சென்று அங்குள்ள அண்ணா சிலைக்கு மரியாதை செலுத்தினர்.
மாவட்டத்தில் பல்வேறு இடங்களில் அதிமுக, திமுகவினர் அண்ணா உருவப் படத்தை அலங்கரித்து வைத்து மரியாதை செலுத்தினர்.