திருவாரூர் ஆழித்தேரோட்டத்தின்போது 1,500 போலீஸார் பாதுகாப்பு பணியில் ஈடுபடுவார்கள் என மாவட்ட காவல் கண்காணிப்பாளர் என்.எம். மயில்வாகனன் வெள்ளிக்கிழமை தெரிவித்தார்.
தேரோடும் வீதிகளில் பாதுகாப்பு மற்றும் போக்குவரத்து மாற்றம் குறித்து ஆய்வு மேற்கொண்ட அவர் செய்தியாளர்களிடம் கூறியது:
ஆழித்தேரோட்டத்தைக் காண பல்லாயிரக்கணக்கான பக்தர்கள் கூடுவார்கள் என்பதால், தேர்ப் பாதுகாப்புப் பணியில் 1,000 காவலர்களும், கோயில் வளாகம் மற்றும் கமலாலயக் குளக்கரையில் 500 காவலர்களும் பாதுகாப்புப் பணியில் ஈடுபடுவார்கள். இதற்காக திருச்சி, தஞ்சாவூர், நாகப்பட்டினம், கரூர், திருவாரூர் உள்ளிட்ட 8 மாவட்டங்களிலிருந்து காவலர்கள் வரவழைக்கப்படுவர்.
குற்றச்செயல்களை தடுக்க துணைக் காவல் கண்காணிப்பாளர் தலைமையில் சிறப்புக் குழுக்கள் அமைக்கப்பட்டுள்ளது. தவிர தேரோடும் 4 வீதிகளிலும் கண்காணிப்பு கேமராக்கள் பொருத்தப்பட்டு கண்காணிக்கப்படும். மேலும், மாடி வீடுகளில் நின்றபடி போலீஸார் கண்காணிப்புப் பணியில் ஈடுபடுவார்கள். போக்குவரத்தில் மாற்றம் செய்யப்படும். தேரோட்டத்தின்போது திருவாரூர் நகருக்குள் கனரக வாகனங்களுக்கு தடை விதிக்கப்படும் என்றார்.