ஐசிசி சாம்பியன்ஸ் டிராபி கிரிக்கெட் போட்டியில் இந்தியா, பாகிஸ்தான் இடையே ஞாயிற்றுக்கிழமை நடைபெற்ற இறுதி ஆட்டத்தை மையமாக வைத்து இணையவழி சூதாட்டத்தில் ஈடுபட்டதாக தில்லியில் 3 பேர் கைது செய்யப்பட்டனர்.
இதுதொடர்பாக குற்ற தடுப்புப் பிரிவு உயரதிகாரி ஒருவர் கூறியதாவது:
மத்திய தில்லியின் சிவில் லைன்ஸ் பகுதியிலுள்ள கட்டடம் ஒன்றில், கிரிக்கெட் சூதாட்டத்தில் சிலர் ஈடுபட்டிருப்பதாக ரகசிய தகவல் கிடைத்தது. இதையடுத்து, அந்த கட்டடத்தில் அதிரடி சோதனை மேற்கொண்ட குற்ற தடுப்பு பிரிவினர், ராஜேஷ் குமார், நிதின் அரோரா, நிதின் குரோவர் ஆகிய 3 பேரை கைது செய்தனர்.
அவர்களிடம் இருந்து 12 செல்லிடப்பேசிகள், 3 லேப்டாப்கள், 2 எல்சிடி டிவிக்கள், விடியோ பதிவு இயந்திரம் உள்ளிட்டவை பறிமுதல் செய்யப்பட்டன. இதுதொடர்பாக வழக்குப் பதிவு செய்யப்பட்டு, விசாரணை நடைபெற்று வருகிறது என்றார் அந்த அதிகாரி.