தில்லி மாநகராட்சிகள் மேற்கொண்டு வரும் சீலிங் நடவடிக்கைக்கு எதிர்ப்புத் தெரிவித்து அகில இந்திய வர்த்தகர் சங்கங்களின் கூட்டமைப்பு (சிஏஐடி) சார்பில் ரோஜா மலர்களை ஏந்தி நூதன போராட்டம் செவ்வாய்க்கிழமை நடைபெற்றது.
சீலிங் நடவடிக்கைக்கு எதிர்ப்புத் தெரிவித்து கடந்த பிப்ரவரி 2-ஆம் தேதி தொடங்கி 48 மணி நேரம் கடையடைப்பும், 3-ஆம் தேதி கண்டாகர் சாந்தினி செளக் வரை வணிகர்கள் பங்கேற்ற பேரணியும் நடைபெற்றன.
மேலும், தில்லி மாநகராட்சிகள் மேற்கொண்டு வரும் சீலிங் நடவடிக்கையை நிறுத்துவதற்கு மத்திய அரசு அவசர சட்டத்தைக் கொண்டு வர வேண்டும் என கடந்த 9-ஆம் தேதி கோரிக்கை விடுத்தனர். இந்த விவகாரம் தொடர்பாக தில்லி முதல்வர் அரவிந்த் கேஜரிவாலுக்கு கூட்டமைப்பின் சார்பில் அதன் பொதுச் செயலாளர் பிரவீண் கண்டெல்வால் செவ்வாய்க்கிழமை கடிதம் எழுதியிருந்தார்.
நூதன போராட்டம்: இந்நிலையில், பிரவீண் கண்டெல்வால் தலைமையிலான கூட்டமைப்பினர் வடக்கு, தெற்கு தில்லி மாநகராட்சிகளின் தலைமையகம் அமைந்துள்ள சிவிக் சென்டர் அருகே கையில் ரோஜா மலர்களை ஏந்தி புதன்கிழமை நூதன ஆர்ப்பாட்டத்தில் ஈடுபட்டனர்.
இது குறித்து பிரவீண் கண்டெல்வால் செய்தியாளர்களிடம் கூறியதாவது:
தில்லியில் மாநகராட்சிகள் மேற்கொண்டு வரும் சீலிங் நடவடிக்கைகளால் வணிகர்கள் கடுமையாகப் பாதிக்கப்பட்டு வருகின்றனர். இப்பாதிப்புகளிலிருந்து வணிகத்தையும், வணிகர்களையும் மீட்க வேண்டும். எனவே, சீலிங் நடவடிக்கையை நிறுத்தி வைக்க வேண்டும். சீலிங் நடவடிக்கைக்கு எதிராக "மை வேலன்டைன் - மை ஷாப்' என்பதை வலியுறுத்தி ரோஜா மலர்கள் ஏந்தி நூதான போராட்டம் நடத்தினோம். கண்டாகர் பகுதியில் வியாழக்கிழமை (பிப்ரவரி 15) வணிகர்களின் மாபெரும் பேரணி நடைபெறும் என்றார் அவர்.