களியக்காவிளை அருகே வேளாண் கூட்டுறவு சங்கத்தில் செயல்பட்டு வரும் இ-சேவை மையத்தை சங்கத் தலைவர் செவ்வாய்க்கிழமை பூட்டிச் சென்றதை கண்டித்து, பெண் பணியாளர் காத்திருப்புப் போராட்டத்தில் ஈடுபட்டார்.
களியக்காவிளை அருகேயுள்ள குழிவிளை பகுதியில் அதங்கோடு சாரப்பழஞ்சி தொடக்க வேளாண்மை கூட்டுறவு சங்கம் செயல்பட்டு வருகிறது. இங்குள்ள இ-சேவை மையத்தில் அதங்கோடு பகுதியைச் சேர்ந்த திவ்யா கடந்த 6 ஆண்டுகளாக பணியாற்றி வருகிறார். இந்த நிலையில், அவர் செவ்வாய்க்கிழமை காலை பணிக்கு வந்தபோது இ-சேவை மைய அறை பூட்டப்பட்டிருந்தது. இதையடுத்து, இ-சேவை மையம் முன் மாலை வரை அவர் காத்திருப்புப் போராட்டத்தில் ஈடுபட்டார்.
இதுகுறித்து அவர் கூறும்போது, இ-சேவை மையம் பூட்டப்பட்டதால், பல்வேறு சான்றுகளுக்காக விண்ணப்பித்தோர் மற்றும் புதிதாக விண்ணப்பிக்க வந்தோர் பெரிதும் பாதிக்கப்பட்டுள்ளனர். எனவே, இங்கு காத்திருப்பு போராட்டத்தில் ஈடுபட்டுள்ளேன். கூட்டுறவுத் துறை அதிகாரிகள் உரிய நடவடிக்கை எடுக்க வேண்டும் என்றார்.