பத்து ஆண்டுகளுக்கும் மேலாக குண்டும் குழியுமாக காணப்படும் போலையர்புரம் - நடுவக்குறிச்சி இணைப்புச் சாலையை உடனடியாக சீரமைக்க வேண்டும் என பொதுமக்கள் கோரிக்கை விடுத்துள்ளனர்.
சாத்தான்குளம் ஒன்றியத்தில் சாஸ்தாவிநல்லூர், நடுவக்குறிச்சி ஆகிய ஊராட்சி பகுதிகளை உள்ளடக்கியவாறு, போலையர்புரத்திலிருந்து நடுவக்குறிச்சி செல்லும் இணைப்பு சாலை அமைந்துள்ளது. இந்தச் சாலை வழியாக சாத்தான்குளம், போலையர்புரம் பகுதியிலிருந்து வாகனங்களில் எளிதில் இடைச்சிவிளை, திசையன்விளை உள்ளிட்ட பகுதிகளுக்கு சென்று வரலாம்.
ஆனால், இந்தச் சாலை கடந்த 10 ஆண்டுகளுக்கும் மேலாக சீரமைக்கப்படாமல் மிகவும் குண்டும், குழியுமாக காணப்படுவதால், வாகன ஒட்டிகள் மாற்றுப் பாதையில் கூடுதல் தொலைவு செல்ல வேண்டிய நிலை உள்ளது. எனவே, இந்த இணைப்புச் சாலையை உடனடியாக சீரமைக்க அதிகாரிகள் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.