புரட்டாசி மாத சனிக்கிழமையை முன்னிட்டு, கோம்புபாளையம் சீனிவாச பெருமாள் கோயிலில் நடைபெற்ற சிறப்பு வழிபாட்டில் பக்தர்கள் திரளாகப் பங்கேற்றனர்.
கரூர் மாவட்டம், கோம்புபாளையத்தில் சீனிவாசபெருமாள் கோயில் உள்ளது. இக்கோயிலில் புரட்டாசி சனிக்கிழமையை முன்னிட்டு பூதேவி, நீலாதேவியுடன் சீனிவாச பெருமாளுக்கு சிறப்பு அபிஷேகம், ஆராதனை சனிக்கிழமை நடைபெற்றது. முன்னதாக, பக்தர்கள் காவிரியில் நீராடி புனிதநீர் எடுத்து வந்து சுவாமிக்கு சிறப்பு அபிஷேகம் செய்தனர். பிறகு பூதேவி, நீலாதேவி சமேத சீனிவாசப் பெருமாளுக்கு பால், தயிர், திருமஞ்சனம் உள்ளிட்ட 18 வகையான திரவியங்களால் சிறப்பு அபிஷேகம் நடைபெற்றது.
தொடர்ந்து, பூக்களால் அலங்காரம் செய்யப்பட்டு சுவாமிகள் பக்தர்களுக்கு காட்சியளித்தனர். நிகழ்ச்சியையொட்டி, அன்னதானம் வழங்கப்பட்டது.