"வைட்டமின்-ஏ சத்து முதுமையைத் தடுக்கும்'

வைட்டமின்-ஏ சத்து மனிதர்களின் முதுமையைத் தடுக்கவல்லது என்றார் அரசு மருத்துவர் வீ.சி. சுபாஷ்காந்தி.
புதுகை அரசு ராணியார் மருத்துவமனையில் முதன்மை மகப்பேறு மருத்துவர் எஸ்.கற்பகம் தலைமையில் புதன்கிழமை நடைபெற்ற  விழிப்புணர்வு முகாமில் பங்கேற்று மேலும் அவர் பேசியது:
கேரட், தக்காளி,கீரை வகைகள், ஆப்பிள், பப்பாளி, தர்பூசணி, ஆரஞ்சு பழங்கள்,பால்,முட்டை மற்றும் மீன் ஆகியவற்றில் வைட்டமின் ஏ சத்து அதிகளவில் உள்ளது. இவற்றை உணவில் சேர்த்துக் கொள்வதன் மூலம் கண் சம்பந்தப்பட்ட நோய்களை வராமல் தடுப்பதோடு நோய் எதிர்ப்பு சக்தியையும் அதிகரிக்கிறது.  தோல் சம்பந்தப்பட்ட காயங்களை விரைவில் குணமாக்குகிறது. வைட்டமின் ஏ முதுமையைத் தடுப்பதோடு சிறந்த ஆன்டி, ஆக்ஸிடன்ட் ஆக செயல்பட்டு புற்றுநோயைத் தடுக்கிறது.  வைட்டமின் ஏ-யில் உள்ள ரெட்டினாயிக் அமிலம் நுரையீரல், மார்பகம், கருமுட்டை, கர்ப்பவாய், சிறுநீர்ப்பை போன்ற இடங்களில் ஏற்படும் புற்றுநோயைத் தடுக்கிறது. தமிழக அரசால் ஆறு மாதத்துக்கு ஒரு முறை வழங்கப்படும் வைட்டமின் ஏ திரவம் 6 மாதம் முதல் 60 மாதம் வரை உள்ள குழந்தைகளுக்கு வரும் 25 ஆம் தேதி வரை வழங்கப்படுகிறது என்றார்.  
நிலைய மருத்துவ அலுவலர் எஸ்.இந்திராணி, மருத்துவர் புவனேஸ்வரி,பேராசிரியை ராதா ஆகியோர் முன்னிலையில் கற்பக விநாயகா செவிலியர் கல்லூரி மாணவிகள் வைட்டமின் - ஏ நிறைந்த உணவுப் பொருட்களை காட்சிப்படுத்தி பொதுமக்களுக்கு விளக்கமளித்தனர். தொடர்ந்து,தண்ணீரை சிக்கனமாகப் பயன்படுத்துவோம் என்ற உலக தண்ணீர் தின உறுதி எடுத்துக்கொண்டனர்.
முன்னதாக செவிலியர் கண்காணிப்பாளர் ஜெஸிராஜம் வரவேற்றார். செவிலியர் புவனேஸ்வரி நன்றி கூறினார்.