தாராசுரம் ஐராவதீஸ்வரர் கோயில் அம்மன் சன்னதியில் செவ்வாய்க்கிழமை அனுமதியின்றி நடத்தப்பட்ட யாகத்திற்கு பொதுமக்கள் எதிர்ப்பு தெரிவித்தனர். இதனால் யாகம் அவசர அவசரமாக நடத்தி முடிக்கப்பட்டது.
கும்பகோணத்தை அடுத்த தாராசுரத்தில் ராஜேந்திரசோழனால் கட்டப்பட்ட பழைமை வாய்ந்த கோயிலான ஐராவதீஸ்வரர் கோயில் உள்ளது. இக்கோயில் நிர்வாகத்தை தஞ்சாவூர் அரண்மனை தேவஸ்தானம் மற்றும் இந்து சமய அறநிலையத் துறையும், கட்டுமானங்களை தொல்லியல் துறையும் நிர்வகித்து வருகிறது.
இந்நிலையில், செவ்வாய்க்கிழமை காலை பெரியநாயகி அம்மன் சன்னதி முன்பு வெளிநாடு வாழ் இந்தியர்களுக்காக அர்ச்சகர் பிரசன்னா திடீரென யாகம் வளர்த்துக் கொண்டிருந்தார். இதில் 10-க்கும் மேற்பட்டோர் பங்கேற்றனர். இதை பார்த்த அப்பகுதியினர் அர்ச்சகர் பிரசன்னாவிடம் விவரம் கேட்டனர். அதற்கு அவர் முறையாக பதில் ஏதும் கூறாததால், பொதுமக்கள் யாகத்திற்கு எதிர்ப்பு தெரிவித்தனர்.
இதையடுத்து, பக்தர்கள் தஞ்சாவூரில் உள்ள அரண்மனை தேவஸ்தான பரம்பரை அறங்காவலர் பாபாஜி ராஜாபோன்ஸ்லேவுக்கும், தஞ்சாவூர் இந்து சமய அறநிலையத்துறை உதவி ஆணையர் பரணிதரனுக்கும் தகவல் அளித்தனர். இதையறிந்த பிரசன்னா யாகத்தை அவசர அவசரமாக முடித்துக் கொண்டார்.
இதுதொடர்பாக அறநிலையத் துறை உதவி ஆணையர் பரணிதரன் கூறியது:
தாராசுரம் கோயில் அம்மன் சன்னதியில் யாகம் நடத்த அர்ச்சகர் அனுமதி வாங்கவில்லை. பொதுமக்கள் புகார் அளித்துள்ளனர். இதையடுத்து கோயில் கண்காணிப்பாளரை விசாரணை நடத்த உத்தரவிடப்பட்டுள்ளது. விசாரணையில் ஆகம விதிகளை மீறி, பணம் சம்பாதிக்கும் நோக்குடன் அர்ச்சகர் பிரசன்னா யாகம் செய்ததாக தெரிந்தால், அவர் மீது ஒழுங்கு நடவடிக்கை எடுக்கப்படும் என்றார்.
இதுகுறித்து அர்ச்சகர் பிரசன்னா கூறியது: கோயிலில் அம்மனுக்காகதான் யாகம் நடத்தப்பட்டது. இது மாதந்தோறும் நடைபெறும் யாகமாகும். இங்கு பக்தர்கள் யாரும் பிரச்னை செய்யவில்லை என்றார்.