சாயல்குடி பகுதியில் கட்டட ஒப்பந்ததாரரின் காரில் இருந்த ரூ. 56 ஆயிரம் பணத்தை, தேர்தல் பறக்கும் படையினர் செவ்வாய்க்கிழமை பறிமுதல் செய்தனர்.
ராமநாதபுரம் மக்களவைத் தொகுதிக்கு உள்பட்ட பகுதிகளில் தேர்தல் கண்காணிப்பு பறக்கும் படையினர் தொடர்ந்து சோதனையில் ஈடுபட்டு வருகின்றனர். இந்நிலையில், தொண்டி கிழக்கு கடற்கரைச் சாலை புதுப்பட்டி பகுதியில் பறக்கும் படையினர் வாகனச் சோதனையில் ஈடுபட்டிருந்தனர். அப்போது, நம்புதாளையிலிருந்து ராமநாதபுரம் நோக்கி வந்த காரை சோதனையிட்டனர். அதில், ரூ. 56 ஆயிரம் பணம் இருந்தது தெரியவந்தது. விசாரணையில், காரில் வந்தவர் கட்டட ஒப்பந்ததாரர் பிரபு என்பதும், அவரிடம் பணத்துக்குரிய ஆவணம் இல்லை என்பதும் தெரியவந்தது. அதையடுத்து, பறக்கும் படையினர் பணத்தை பறிமுதல் செய்தனர். இதேபோல், பரமக்குடி பகுதியிலும் செவ்வாய்க்கிழமை நடந்த வாகனச் சோதனையில், நான்கு பேரிடமிருந்து ரூ. 4 லட்சம் பிடிபட்டதாக, தேர்தல் பறக்கும் படை அதிகாரிகள் தெரிவித்தனர்.