18 நவம்பர் 2018

டெங்கு பாதிப்பு ஏற்படாத வகையில் தூய்மைப் பணி: ஆட்சியர் அறிவுறுத்தல்

DIN | Published: 12th September 2018 09:40 AM

டெங்கு பாதிப்பு ஏற்படாத வகையில் களப் பணியாளர்கள் தூய்மைப் பணிகளை விரைந்து மேற்கொள்ள வேண்டும் என ஆட்சியர் ஷில்பா பிரபாகர் சதீஷ் தெரிவித்தார்.
திருநெல்வேலி மாநகராட்சியில் செவ்வாய்க்கிழமை நடைபெற்ற டெங்கு தடுப்பு பணிகளை ஆய்வு செய்த மாவட்ட ஆட்சியர் ஷில்பா பிரபாகர் சதீஷ், டெங்கு தடுப்புப் பணியில் ஈடுபடும் டெங்கு தடுப்பு களப் பணியாளர்களை நேரில் அழைத்து பல்வேறு ஆலோசனைகளை வழங்கினார்.
பின்னர், ஆட்சியர் கூறியதாவது: குடிநீர்த் தொட்டிகள், குழாயடிகள் போன்றவற்றை ஆய்வு செய்து குளோரின் மருந்திட்டு பாதுகாக்கப்பட்ட குடிநீர் வழங்க வேண்டும். பருவமழை தொடங்க இருப்பதால் முன்னெச்செரிக்கை பணிகளை தொய்வின்றி செய்திட வேண்டும்.
டெங்குவால் சிறு பாதிப்புகூட ஏற்படாத வகையில் தூய்மைப் பணிகளை விரைந்து மேற்கொள்ள வேண்டும். பொதுமக்களுக்கு டெங்கு கொசுவால் ஏற்படும் பாதிப்புகள், கொசு வளரும் சூழல்களை எடுத்துக் கூறி விழிப்புணர்வு ஏற்படுத்த வேண்டும் பொதுமக்கள் மற்றும் குழந்தைகள் தங்கள் இல்லங்களையும், சுற்றுப்புற வளாகத்தையும் தூய்மையாக வைத்திட ஆலோசனை வழங்க வேண்டும் என்றார். 
பின்னர், கலைநிகழ்ச்சிகள் மூலம் வீதி வீதியாக டெங்கு தடுப்பு பிரசாரம்  நடத்தவுள்ள வாகனத்தை ஆட்சியர் கொடியசைத்து தொடங்கிவைத்தார். புனித தோமையர் உயர் நிலைப் பள்ளியில் படிக்கும் மாணவிகள் சுமித்ரா, மகேஸ்வரி, சுஜா ஆகியோருக்கு பள்ளி வளாகம் மற்றும் சுற்றுப்புறத்தை தூய்மையாக வைத்தமைக்காக பரிசு மற்றும் நற்சான்றிதழ்களை வழங்கி ஆட்சியர் பாராட்டினார்.
இந்நிகழ்ச்சியில் மாநகராட்சி ஆணையர் (பொ) நாராயண நாயர், மாநகர அலுவலர் சதீஷ்குமார், மாநகராட்சி சுகாதார அலுவலர்கள் அரசகுமார், சாகுல் ஹமீது,  முருகேசன், சுப்பிரமணியன் உள்ளிட்ட பலர் கலந்துகொண்டனர். 
 

More from the section

மின்சாரம் பாய்ந்து விவசாயி சாவு
பாளை.யில் விழிப்புணர்வு மனிதச் சங்கிலி
நெல்லை அருகே குழந்தையை கொன்று பெண் தற்கொலை
நான்குனேரியன் கால்வாயில் பாலம் சேதமடையும் அபாயம்
சாலைகளில் சுற்றித் திரியும் கால்நடைகள்: உரிமையாளர்கள் மீது நடவடிக்கை: மாநகராட்சி ஆணையர் அதிரடி