கரூர் மாவட்டம் குளித்தலை அடுத்த நெய்தலூர் காலனியில் டாஸ்மாக் கடை செயல்பட்டு வருகிறது. இந்தக் கடையில் விற்பனையாளராக சூரியனூர் ஊராட்சிக்குட்பட்ட மேலப்பட்டியைச் சேர்ந்த பெரியசாமி(40) என்பவர் விற்பனையாளராகப் பணியாற்றி வருகிறார்.
வழக்கம்போல ஞாயிற்றுக்கிழமை இரவு கடையைப் பூட்டிவிட்டு, மது விற்ற பணம் ரூ.4.79 லட்சம் எடுத்துக்கொண்டு பைக்கில் வீட்டுக்குச் சென்றார். பெரியபனையூர் மாகாளியம்மன் கோயில் அருகே சென்றபோது திடீரென மூன்று பைக்குகளில் முகமூடி அணிந்து வந்த 6 பேர் அவர் மீது மிளகாய்ப் பொடி தூவியுள்ளனர். பின்னர் தோள்பட்டையில் அரிவாளால் வெட்டிவிட்டு அவரிடமிருந்த ரூ.4.79 லட்சத்தை கொள்ளையடித்து விட்டு ஓடி விட்டனர். காயமடைந்த பெரியசாமி குளித்தலையில் உள்ள தனியார் மருத்துவமனையில் அனுமதிக்கப்பட்டார். மேலும் இதுகுறித்து குளித்தலை போலீஸில் புகார் செய்தார். புகாரின்பேரில் போலீஸார் வழக்குப்பதிந்து மர்ம நபர்களைத் தேடி வருகின்றனர்.