மைசூரு அருகே திங்கள்கிழமை அதிகாலை நிகழ்ந்த சாலை விபத்தில் கன்னட நடிகர் தர்ஷனின் வலது கை எலும்பு முறிந்தது. மேலும், அவருடன் சென்ற நடிகர்கள் தேவராஜ், பிரஜ்வல், அந்தோணி ஆகியோர் காயமடைந்தனர்.
கன்னட நடிகரான தர்ஷன், மூத்த நடிகர் தேவராஜ், அவரது மகனும் நடிகருமான பிரஜ்வல் ஆகியோருடன் மைசூரு வனவிலங்கு சரணாலயத்துக்கு ஞாயிற்றுக்கிமை சென்றனர். பிறகு, மைசூரு பட்டத்து இளவரசர் யதுவீர் கிருஷ்ணதத்த சாமராஜ உடையாரைச் சந்தித்துவிட்டு திங்கள்கிழமை அதிகாலை காரில் பெங்களூருக்குச் சென்றனர்.
மைசூரு வி.வி.புரம் வெளிவட்டச் சாலையில் பலத்த மழையால் ஓட்டுநரின் கட்டுப்பாட்டை இழந்த கார், சாலைத் தடுப்புச் சுவரில் மோதியது. இதில் நடிகர் தர்ஷனின் வலது கை எலும்பு முறிந்தது. நடிகர்கள் தேவராஜ், பிரஜ்வல், தர்ஷனின் நண்பர் அந்தோணி ஆகியோர் காயமடைந்தனர். இதையடுத்து, தர்ஷன் தனியார் மருத்துவமனையில் அனுமதிக்கப்பட்டார்.