எப்போது மக்களவைத் தேர்தல்? மார்ச் முதல் வாரத்தில் அறிவிக்கிறதா தேர்தல் ஆணையம்? 

மக்களவைத் தேர்தல் அட்டவணையை தேர்தல் ஆணையம் மார்ச் முதல் வாரத்தில் அறிவிக்க வாய்ப்புள்ளதாக தகவல் வெளியாகியுள்ளது. 

மக்களவைத் தேர்தல் தொடர்பாக, தேர்தல் ஆணையத்தின் செய்தித்தொடர்பாளர் கூறுகையில், "தேர்தலை எத்தனை கட்டங்களாக நடத்த வேண்டும், எந்த மாதத்தில் நடத்த வேண்டும் என்பது குறித்தான முடிவுகளை தேர்தல் ஆணையம் எடுத்து வருகிறது. தேர்தல் அறிவிப்பை எந்த தேதியில் வெளியிடவேண்டும் என்பது குறித்தான முடிவு இதுவரை எடுக்கவில்லை" என்று தெரிவித்தார்.    

இதுதொடர்பாக, வெளியாகியுள்ள தகவல்கள்களின் படி, பாதுகாப்பு படை மற்றும் இதர தேவைகளின் அடிப்படையில் தேர்தலை எத்தனை கட்டங்களாக நடத்த வேண்டும் என்பது குறித்து முடிவு எடுக்கப்படும் என்று தெரிகிறது. மேலும், மக்களவைத் தேர்தல் குறித்தான அறிவிப்புகள் மார்ச் மாதம் முதல் வாரத்தில் வெளியாகும் என்று எதிர்பார்க்கப்படுகிறது. 

ஆந்திரா, ஒடிஷா, சிக்கிம் மற்றும் அருணாச்சல பிரதேசம் ஆகிய மாநிலங்களின் சட்டப்பேரவைத் தேர்தலை மக்களவைத் தேர்தலுடன் இணைத்து நடத்த தேர்தல் ஆணையம் முடிவு செய்ய வாய்ப்புள்ளது. 

ஜம்மூ-காஷ்மீரில் ஆட்சி கலைக்கப்பட்டதை அடுத்து அங்கு அடுத்த 6 மாதத்தில் புதிய சட்டப்பேரவைத் தேர்தலை நடத்தவேண்டும். நவம்பர் 2018-இல் கலைக்கப்பட்டதால், அங்கு அதிகபட்சமாக மே மாத இறுதிக்குள் தேர்தல் நடத்தப்படவேண்டும். அதனால், காஷ்மீர் சட்டப்பேரவைத் தேர்தலும் மக்களவைத் தேர்தலுடன் சேர்ந்து நடைபெற வாய்ப்புள்ளது. 

2004-இல், மக்களவைத் தேர்தல் 4 கட்டங்களாக நடைபெறும் என தேர்தல் ஆணையம் பிப்ரவரி 29-ஆம் தேதி அறிவித்தது. அதன்படி, முதல் கட்ட தேர்தல் ஏப்ரல் 20-ஆம் தேதியும், கடைசி கட்ட தேர்தல் மே 10-ஆம் தேதியும் நடைபெற்றது. 

2009-இல், மக்களவைத் தேர்தல் 5 கட்டங்களாக நடைபெறும் என தேர்தல் ஆணையம் மார்ச் 2-ஆம் தேதி அறிவித்தது. அதன்படி, முதல் கட்ட தேர்தல் ஏப்ரல் 16-ஆம் தேதியும், கடைசி கட்ட தேர்தல் மே 13-ஆம் தேதியும் நடைபெற்றது. 

2014-இல், மக்களவைத் தேர்தல் 9 கட்டங்களாக நடைபெறும் என தேர்தல் ஆணையம் மார்ச் 5-ஆம் தேதி அறிவித்தது. அதன்படி, முதல் கட்ட தேர்தல் ஏப்ரல் 7-ஆம் தேதியும், கடைசி கட்ட தேர்தல் மே 12-ஆம் தேதியும் நடைபெற்றது.