தஞ்சாவூர் மாவட்டம், திருவையாறில் சத்குரு ஸ்ரீ தியாகராஜ சுவாமிகளின் 172-வது ஆராதனை விழா நேற்று மாலை தொடங்கியது. தொடர்ந்து 5 நாட்கள் நடைபெறும் இந்த விழாவில் ஜன.25-ம் தேதி பஞ்சரத்ன கீர்த்தனை இசைத்து தியாகராஜருக்கு அஞ்சலி செலுத்தப்படவுள்ளது.
திங்கள்கிழமை மாலை 5 மணியளவில் மங்கள இசையுடன் தொடங்கும் இந்த விழாவில் மாலை 6 மணியளவில் தொடக்க விழா நடைபெறுகிறது. ஸ்ரீ தியாகபிரம்ம மஹோத்சவ சபா தலைவர் ஜி.ஆர். மூப்பனார் தலைமையில் நடைபெறும் இந்த விழாவை டி.வி. கோபாலகிருஷ்ணன் தொடங்கி வைக்கிறார். இதில், ஆட்சியர் ஆ. அண்ணாதுரை, சபா அறங்காவலர் குழுத் தலைவரும், தமாகா தலைவருமான ஜி.கே. வாசன் உள்ளிட்டோர் பங்கேற்றனர்.
தொடர்ந்து, குன்னக்குடி பாலமுரளிகிருஷ்ணா பாட்டு, சிக்கில் சி. குருசரண் பாட்டு, சந்தீப் நாராயணன் பாட்டு, பாபநாசம் அசோக் ரமணி பாட்டு, ராஜேஷ் வைத்யா வீணை உள்பட 13 இசை நிகழ்ச்சிகள் நடைபெறவுள்ளன.
இதேபோல, இரண்டாம் நாளான இன்று (ஜன.22-ம்) தேதி 62 இன்னிசை நிகழ்ச்சிகளும், மூன்றாம் நாளான 23-ம் தேதி 60 இன்னிசை நிகழ்ச்சிகளும், நான்காம் நாளான 24-ம் தேதி 62 இன்னிசை நிகழ்ச்சிகளும் நடைபெறவுள்ளன. நிறைவு நாளான ஜன.25-ம் தேதி காலை 9 மணி முதல் 10 மணி வரை ஆராதனை நடைபெறவுள்ளது.
இதில், ஆயிரத்துக்கும் அதிகமான இசைக் கலைஞர்கள் பங்கேற்று ஒன்றிணைந்து பஞ்சரத்ன கீர்த்தனைகளை பாடி ஸ்ரீ தியாகராஜருக்கு அஞ்சலி செலுத்தவுள்ளனர். பின்னர், தொடர்ந்து இரவு வரை இன்னிசை நிகழ்ச்சிகள் நடைபெறவுள்ளன.