தீபாவளி மலர் 2018: ஆனந்தவிகடன் - பக்.400; ரூ.150.

அமரர் சில்பி வரைந்த மயிலாப்பூர் கற்பகாம்பாள் ஓவியத்தை அட்டைப்படமாகக் கொண்டு வெளிவந்துள்ளது, இவ்வாண்டு ஆனந்த விகடன் தீபாவளி மலர். 
திரைப்படத்துறையைச் சார்ந்த நடிகர், நடிகை, ஒளிப்பதிவாளர், இயக்குநர், தயாரிப்பாளர் எனப் பலருடைய நேர்காணல்கள், தமிழச்சி தங்கபாண்டியன், நாஞ்சில்நாடன், சு.வெங்கடேசன் போன்ற இலக்கியவாதிகளின் நேர்காணல்கள், மகுடேசுவரன், கண்மணி குணசேகரன், யுகபாரதி, சக்திஜோதி ஆகியோரின் கவிதைகள், சோ.தர்மன், அ.வெண்ணிலா, சுபா, எம்.கோபாலகிருஷ்ணன் போன்றோரின் சிறுகதைகள் மற்றும் ஆன்மிகம், வரலாறு, பயணம் என எல்லாம் கலந்த தஞ்சாவூர்க் கதம்பமாக மணக்கிறது மலர். 
நேர்காணல்களில் ஐம்பொன் சிலை வடிக்கும் சிற்பி மோகன்ராஜ் ஸ்தபதி, கின்னஸ் சாதனையாளர் ஓவியர் ராஜசேகரன், "இஸ்ரோ' தலைவர் சிவன், "கடம்' விநாயகராம் ஆகியோருடையவை குறிப்பிடத்தக்கன. அகத்திய முனிவர் குறித்து அ.கா.பெருமாள் எழுதியிருக்கும் கட்டுரை மிகவும் முக்கியம்.
மகாத்மா காந்தியின் 150 ஆவது பிறந்த ஆண்டையொட்டி ஒரு கட்டுரை இடம் பெற்றுள்ளது. அக்கட்டுரையை இன்னும் சற்று விரிவாக்கியிருக்கலாம். 
இம்மலரில் குறிப்பிடப்படவேண்டிய ஒரு கட்டுரை, இருநாட்டுத் தலைவர்கள் சந்திப்பின்போது உடனிருந்து உதவும் மொழிபெயர்ப்பாளர்கள் குறித்த கட்டுரையே. மிகவும் சிறப்பு.
எல்லா வயதினரையும் கவரும்படி அமைந்திருக்கிறது இவ்வாண்டின் "ஆனந்தவிகடன்' தீபாவளி மலர்.