பச்சைப் பட்டுடுத்தி வைகை ஆற்றில் இறங்கினார் கள்ளழகர்

சித்திரைத் திருவிழாவின் முக்கிய நிகழ்ச்சியான கள்ளழகர் வைகையாற்றில்  எழுந்தருளும் நிகழ்வு இன்று ஏப்ரல் 19ம் தேதி காலை 6 மணிக்கு பச்சைப் பட்டு உடுத்தி தங்க குதிரை வாகனத்தில் வைகை ஆற்றில் இறங்கினார் கள்ளழகர்.

உலகப் புகழ்பெற்ற மதுரை சித்திரைத் திருவிழா  ஏப்ரல் 4-ம் தேதி மீனாட்சி சுந்தரேசுவரர் கோயிலில்  வாஸ்து சாந்தி, நிலத்தேவர் வழிபாடு நடைபெற்றது. தொடர்ந்து ஏப்ரல் 8-ம் காலை கொடியேற்றத்துடன் முதல் நாள் திருவிழா தொடங்கியது.

இதைத்தொடர்ந்து ஏப்ரல் 9-ம் தேதி தங்க சப்பர வாகனம்,  பூத,  அன்ன வாகனம், ஏப்ரல் 10-ம் தேதி தங்க சப்பர வாகனம், கைலாச பர்வதம், காமதேனு வாகனம், ஏப்ரல் 11-ம் தேதி தங்கப்பல்லக்கு வாகனம், ஏப்ரல் 12-ம் தேதி தங்க சப்பர வாகனம், தங்கக் குதிரை வாகனம், 13-ம் தேதி தங்கம், வெள்ளி ரிஷப வாகனம், 14-ம் தேதி சிம்மாசனங்களில் நந்திகேஸ்வரர், யாழி வாகனம், 15-ம் தேதி பட்டாபிஷேகமும், 16-ம் தேதி திக் விஜயமும் நடைபெற்றது.

மீனாட்சி சுந்தரேசுவரர் திருக்கல்யாணம்:
விழாவின் முக்கிய நிகழ்ச்சியான மீனாட்சி சுந்தரேசுவரர் திருக்கல்யாணம் ஏப்ரல் 17-ம் தேதி  காலை நடைபெறுகிறது.  பின் இரவு 8 மணிக்கு கல்யாணக் கோலத்தில் சுவாமி, அம்மன் பூப்பல்லக்கில் வீதி உலா வந்து பக்தர்களுக்கு அருள்பாலித்தனர். தொடர்ந்து  ஏப்ரல் 18-ம் தேதி காலை 5.45 மணிக்கு சுவாமி, அம்மன் தேரோட்டம் நடைபெற்றது. 

கள்ளழகரை வரவேற்று எதிர்சேவை: 
 சித்திரைத் திருவிழாவின் முக்கிய நிகழ்ச்சியான அழகர் வைகையாற்றில்  இறங்கும் வைபவத்தையொட்டி சுந்தர்ராஜ பெருமாள் கள்ளழகர் கோலத்தில் தங்கக் குதிரை வாகனத்தில் ஏப்ரல் 17 புதன்கிழமை மாலை மதுரைக்கு புறப்பட்ட அழகர் சுந்தர்ராஜபட்டியில் உள்ள மறவர் மண்டகப்படிக்கு வியாழக்கிழமை அதிகாலை 1.30-மணிக்கு வந்து சேர்ந்தார். பின் வியாழக்கிழமை காலை 6 மணிக்கு மதுரை மூன்றுமாவடி பகுதியில் பக்தர்கள் கள்ளழகரை எதிர்கொண்டழைக்கும் எதிர்சேவை நடைபெற்றது. 
வெள்ளிக்கிழமை அதிகாலை 3 மணிக்கு தல்லாகுளம் கோயிலில் இருந்து புறப்படும் கள்ளழகர் தல்லாகுளம் கருப்பணசாமி கோயிலில் ஆயிரம் பொன்சப்பரத்தில் எழுந்தருள்கிறார். 

வெள்ளிக்கிழமை அதிகாலை தங்கக்குதிரை வாகனத்தில் வைகை ஆற்றுக்குச் செல்லும் கள்ளழகர் அங்கு அதிகாலை 6 மணிக்கு ஆற்றில் எழுந்தருளினார்.
வைகை ஆற்றில் இறங்கும் கள்ளழகர் காலை 7.25 மணி வரை  பக்தர்களுக்கு காட்சி தருகிறார்.

கள்ளழகர் வைகை ஆற்றில் இறங்கும் நிகழ்வை தரிசனம் செய்ய தமிழகத்தின் பல்வேறு பகுதிகளில் இருந்து லட்சக்கணக்கான பக்தர்கள் மதுரையில் குவிந்துள்ளனர்.