சிறுசேமிப்பு திட்டங்களின் வட்டி விகிதங்களில் மாற்றமில்லை

பி.பி.எஃப்., கிஸான் விகாஸ் பத்திரம் உள்ளிட்ட சிறுசேமிப்பு திட்டங்களின் வட்டி விகிதங்களில் மாற்றம் எதுவுமில்லை என்று மத்திய அரசு தெரிவித்துள்ளது.
இதுகுறித்து நிதி அமைச்சகம் வெளியிட்டுள்ள அறிவிக்கையில் தெரிவிக்கப்பட்டுள்ளதாவது:
நடப்பு 2017-ஆம் ஆண்டின் ஜனவரி முதல் மார்ச் வரையிலான காலாண்டில் சிறுசேமிப்பு திட்டங்களுக்கான வட்டி விகிதங்களில் மாற்றம் எதுவும் செய்யப்படவில்லை. அந்த திட்டங்களுக்கு அக்டோபர்-டிசம்பர் காலாண்டில் நிர்ணயிக்கப்பட்ட வட்டி விகிதங்களே தொடரும்.
அதன்படி, பிபிஎஃப் மற்றும் 5 ஆண்டு தேசிய சேமிப்பு பத்திரங்களுக்கான வட்டி 8 சதவீதமாகவும், கிஸான் விகாஸ் பத்திரங்களுக்கான வட்டி 7.7 சதவீதமாகவும், பெண் குழந்தைகளுக்கான சுகன்யா ஸம்ருத்தி மற்றும் முதியோர் 5-ஆண்டு சேமிப்பு திட்டங்களுக்கான வட்டி தலா 8.5 சதவீதமாகவும் தொடரும் என்று அந்த அறிவிக்கையில் தெரிவிக்கப்பட்டுள்ளது.