நடப்பு நிதி ஆண்டில் ஏப்ரல் முதல் ஜனவரி வரையிலான கால அளவில் கச்சா வைரம் இறக்குமதி 11.11 சதவீதம் அதிகரித்துள்ளது.
இதுகுறித்து நவரத்தினங்கள் மற்றும் ஆபரணங்கள் ஏற்றுமதி மேம்பாட்டு கவுன்சில் தெரிவித்துள்ளதாவது: நடப்பு 2017-18 நிதி ஆண்டில் ஏப்ரல்-ஜனவரி வரையிலான முதல் பத்து மாதங்களில் 1,553 கோடி டாலர் (சுமார் ரூ.1 லட்சம் கோடி) மதிப்பிற்கு பட்டை தீட்டப்படாத மற்றும் பட்டைத் தீட்டிய கச்சா வைரங்கள் இறக்குமதி செய்யப்பட்டுள்ளன. கடந்த 2016-17 நிதி ஆண்டில் இதே கால அளவில் கச்சா வைரம் இறக்குமதியான 1,397 கோடி டாலருடன் ஒப்பிடுகையில் இது 11.11 சதவீதம் அதிகமாகும்.
கச்சா வைரம் இறக்குமதி அதிகரித்துள்ள அதே வேளையில், பட்டை தீட்டப்பட்ட மற்றும் பட்டைத் தீட்டிய வைரங்கள் இறக்குமதி 216 கோடி டாலரிலிருந்து 12.91 சதவீதம் சரிவடைந்து 188 கோடி டாலராக காணப்பட்டது.
அதேசமயம், தங்க கட்டிகள் இறக்குமதியும் 18.2 சதவீதம் அதிகரித்து 437 கோடி டாலரை எட்டியது. அமெரிக்கா உள்ளிட்ட பல முக்கிய வெளிநாடுகளின் சந்தைகளில் தேவை குறைந்ததையடுத்து, நாட்டின் நவரத்தினங்கள் மற்றும் ஆபரணங்கள் ஏற்றுமதி 4.71 சதவீதம் குறைந்து 2,750 கோடி டாலராகியுள்ளது என்று அந்தக் கவுன்சில் தெரிவித்துள்ளது.
உள்நாட்டில் அதிக அளவில் வேலைவாய்ப்புகளை வழங்கி வரும் நவரத்தினங்கள் மற்றும் ஆபரணங்கள் தயாரிப்பு துறை நாட்டின் ஒட்டுமொத்த ஏற்றுமதியில் 14 சதவீத பங்களிப்பை கொண்டுள்ளது என்பது குறிப்பிடத்தக்கது.