பங்குச் சந்தைகளில் தனியார் வங்கிகளின் செயல்பாடு மோசமாக இருந்ததால் தொடர்ந்து மூன்றாவது நாளாக சென்செக்ஸ் 71 புள்ளிகள் இழப்பை சந்தித்தது.
சமீபத்திய சரிவுகளால் பங்குகளின் விலை குறைந்திருந்ததை சாதகமாக பயன்படுத்தி முதலீட்டாளர்கள் அவற்றை வாங்கியதால் பங்குச் சந்தைகளில் தொடக்கத்தில் வர்த்தகம் விறுவிறுப்புடன் காணப்பட்டது. வர்த்தகத்தின் ஒரு கட்டத்தில் சென்செக்ஸ் 100 புள்ளிகளுக்கும் மேல் அதிகரித்திருந்தது.
இந்த சூழ்நிலையில், வர்த்தகத்தின் இறுதிப் பகுதியில் தனியார் வங்கிகளின் பங்குகளை முதலீட்டாளர்கள் லாப நோக்கம் கருதி விற்பனை செய்தனர். இதனால், பங்குச் சந்தைகள் சரிவுப் பாதைக்கு சென்றன.
டாலருக்கு எதிரான ரூபாய் மதிப்பு 68 காசுகள் குறைந்து வர்த்தகத்தின் இடையே மூன்று மாதங்களில் இல்லாத குறைந்தபட்ச அளவாக ரூ.64.88-க்கு சென்றது. இதுவும், பங்குச் சந்தைகளில் தாக்கத்தை ஏற்படுத்தியது.
ரியல் எஸ்டேட், வங்கி, பொறியியல் சாதனங்கள், மோட்டார் வாகனம், உள்கட்டமைப்பு, மருந்து ஆகிய துறைகளைச் சேர்ந்த குறியீட்டெண்கள் வீழ்ச்சி கண்டன. அதேசமயம், நுகர்வோர் சாதனங்கள், உலோகம், தொழில்நுட்பம், பொதுத் துறை, மின்சாரம், தகவல் தொழில்நுட்ப துறைகளைச் சேர்ந்த குறியீட்டெண்கள் ஏற்றம் கண்டன.
தனியார் துறை வங்கிகளான ஆக்ஸிஸ் வங்கி, கோட்டக் வங்கி, யெஸ் வங்கி, ஐசிஐசிஐ வங்கி, ஹெச்டிஎஃப்சி வங்கி பங்குகளின் விலை 1.44 சதவீதம் வரை சரிவடைந்தன.
அதேசமயம், ஓஎன்ஜிசி, ஹீரோ மோட்டோகார்ப், டிசிஎஸ், இன்ஃபோசிஸ், பார்தி ஏர்டெல், டாடா ஸ்டீல், விப்ரோ, பவர் கிரிட், டாடா மோட்டார்ஸ் உள்ளிட்ட நிறுவனப் பங்குகளின் விலை 1.70 சதவீதம் வரை உயர்ந்தன.
மும்பை பங்குச் சந்தையில் செவ்வாய்க்கிழமை நடைபெற்ற வர்த்தகத்தில் சென்செக்ஸ் 71 புள்ளிகள் குறைந்து 33,703 புள்ளிகளாக நிலைத்தது.
தேசிய பங்குச் சந்தையில் செவ்வாய்க்கிழமை நடைபெற்ற வர்த்தகத்தில் நிஃப்டி 18 புள்ளிகள் சரிந்து 10,360 புள்ளிகளாக நிலைத்தது.