அடுத்த நிதி ஆண்டில் இந்தியாவின் பொருளாதார வளர்ச்சி 7.3 சதவீதத்தை எட்டும் என தரக்குறியீட்டு நிறுவனமான 'ஃபிட்ச்' மதிப்பிட்டுள்ளது.
அமெரிக்காவைச் சேர்ந்த அந்த நிறுவனம் இதுகுறித்து சர்வதேச பொருளாôதர ஆய்வறிக்கையில் மேலும் தெரிவித்திருப்பதாவது:
உள்கட்டமைப்பு திட்டங்களில் மேற்கொள்ளப்படும் முதலீடு விறுவிறுப்படைந்துள்ளது. அதேசமயத்தில், சரக்கு மற்றும் சேவை வரி விதிப்பால் (ஜிஎஸ்டி) ஏற்பட்ட பாதிப்புகளும் படிப்படியாக மாறி வருகின்றன.
இவற்றைக் கருத்தில் கொண்டால், அடுத்த நிதி ஆண்டில் இந்தியாவின் பொருளாதார வளர்ச்சி 7.3 சதவீதத்தைத் தொடும். மேலும், இது, 2019-20-ஆம் நிதி ஆண்டில் 7.5 சதவீதமாக அதிகரிக்கும்.
அதேசமயம், நடப்பு நிதி ஆண்டில் இந்திய பொருளாதார வளர்ச்சி 6.5 சதவீதமாகவே இருக்கும். பணவீக்கம் 2018 மற்றும் 2019-இல் 5 சதவீதத்துக்கும் குறைவாகவே காணப்படும். இருப்பினும், இது ரிசர்வ் வங்கி இலக்கை காட்டிலும் அதிகம் என்பது நினைவுகூரத்தக்கது.
சர்வதேச பொருளாதார வளர்ச்சியைப் பொருத்தமட்டில் தொடர்ந்து மூன்றாண்டுகளாக வரும் 2019-ஆம் ஆண்டு வரையில் 3 சதவீதத்துக்கும் கூடுதலாகவே இருக்கும் என 'ஃபிட்ச்' அந்த ஆய்வறிக்கையில் தெரிவித்துள்ளது.
மத்திய புள்ளியியல் அலுவலகம் (சிஎஸ்ஓ), இந்தியாவின் பொருளாதார வளர்ச்சி 2016-17 நிதி ஆண்டில் 7.1 சதவீதமாக இருந்த நிலையில் பல்வேறு காரணங்களால் நடப்பு நிதி ஆண்டில் அது 6.6 சதவீதமாக மட்டுமே இருக்கும் என தெரிவித்திருந்தது.
இந்த நிலையில், 'ஃபிட்ச்' நிறுவனம் அதை விடக் குறைவாக கணித்துள்ளது குறிப்பிடத்தக்கது.