கபாலி, மாயா, மெட்ராஸ் படங்களில் நடித்தவர் மைம் கோபி. ஜி மைம் ஸ்டூடியோ என்கிற பெயரில் நடிப்புப் பயிற்சிப் பள்ளியும் நடத்தி வருகிறார். ஆதரவற்ற குழந்தைகளுக்காகப் பல கலை நிகழ்ச்சிகளையும் தொடர்ந்து நடத்தி வருகிறார்.
சமீபத்தில் ஆதரவற்ற குழந்தைகளை மகிழ்விக்கும் நோக்கத்தில் 20 குழந்தைகளை சென்னையிலிருந்து விமானம் மூலமாக கோவைக்கு அழைத்துச் சென்று ஐந்து நட்சத்திர ஹோட்டலில் தங்கவைத்து பல சுற்றுலாப் பகுதிகளுக்கும் அழைத்துச் சென்றுள்ளார்.
இதுபற்றி மைம்கோபி கூறும்போது: ஆதரவற்ற குழந்தைகளுக்கு விமானப்பயணம் என்பது ஒரு கனவுபோல. அதை நனவாக்கும் ஆசையில் இந்த முயற்சியை ஆரம்பித்துள்ளோம். இதில் குழந்தைகளை விமானத்தில் பயணம் செய்யவைத்து, நட்சத்திர ஹோட்டலில் தங்கவைத்து சுற்றுலாத்தலங்களுக்கு அவர்களை அழைத்து சென்று மகிழ்வித்தோம் என்றார்.