இந்திய அணி கேப்டன் தோனியின் கிரிக்கெட் வாழ்க்கையை மையமாக முன்வைத்து உருவாக்கப்பட்டுள்ள படம், எம்எஸ் தோனி - தி அன்டோல்ட் ஸ்டோரி. தோனி வேடத்தில் சுஷாந்த் சிங் ராஜ்புத் நடித்துள்ளார். இயக்கம் - நீரஜ் பாண்டே. இந்தப் படம், செப்டம்பர் 30-ம் தேதி வெளியாகிறது.
சென்னை சூப்பர் கிங்ஸ் அணி தொடங்கப்பட்டபோது தோனியும் நடிகை லஷ்மி ராயும் காதலித்ததாகச் செய்திகள் வெளிவந்தன. இதுபற்றி தோனி வெளிப்படையாகப் பேசியதில்லை. இந்நிலையில் தோனி - தி அன்டோல்ட் ஸ்டோரி படத்தில் லஷ்மி ராய் தொடர்புடைய காட்சிகள் உள்ளதாகக் கூறப்படுகிறது.
இந்தப் படம் தொடர்பாக லஷ்மி ராய் பேட்டியளித்ததாவது:
தோனியின் படத்தில் நான் இருப்பேனா என ஏன் என்னிடம் கேட்கிறார்கள்? தோனியுடன் நான் இப்போது தொடர்பில் இல்லை. அவரும் அவர் வாழ்க்கையைப் பார்த்துச் சென்றுவிட்டார். திருமணமாகி ஒரு குழந்தையும் அவருக்கு உண்டு. அவருடைய படம் வருகிறபோது ஏன் எல்லோரும் என்னைக் கேள்வி கேட்கிறார்கள்? தோனியின் படத்தில் என்னைப் பற்றி எதுவும் இருக்காது என எண்ணுகிறேன். வாழ்க்கை வரலாறு என்பதால் அவரைப் பற்றிதான் அந்தப் படத்தில் இருக்கவேண்டும். அவருடைய உறவுகளைப் பற்றி அல்ல. எப்போதுமே இன்னொருவருடன் இணைத்துப் பேசுவதற்கு யாருமே விரும்பமாட்டார்கள் என்று கூறியுள்ளார்.