வேலையில்லா பட்டதாரி 2 பட விளம்பர நிகழ்ச்சிகளுக்காக ஹைதராபாத் சென்ற தனுஷ், தனியார் தொலைக்காட்சிக்குப் பேட்டியளித்தபோது சர்ச்சைக்குரிய கேள்விகள் கேட்கப்பட்டதால் பாதியில் வெளியேறினார்.
படம் தொடர்புடைய பேட்டியில் பங்கேற்ற தனுஷிடம் சர்ச்சைக்குரிய கேள்விகள் கேட்கப்பட்டன. சுசித்ரா ட்விட்டர் சர்ச்சை தொடர்பாகக் கேட்கப்பட்ட கேள்விகளால் கடுப்பானார் தனுஷ். தனுஷின் வீடியோ வெளியிடப்படுவதாகச் சொன்னதால் மன உளைச்சல் உண்டானதா என்கிற கேள்விக்கு மறுத்துப் பதில் அளித்தார் தனுஷ். தன் மீது எவ்வித குற்றச்சாட்டும் கிடையாது என்றார்.
அவருடைய மண வாழ்க்கையில் சிக்கல் ஏற்பட்டுள்ளதா என்கிற கேள்வியைக் கேட்டபோது மேலும் கோபமடைந்தார் தனுஷ். இது ஒரு கேவலமான பேட்டி என்று பேட்டியின் பாதியிலேயே வெளியேறினார்.
பிறகு தனுஷைச் சமாதானம் செய்து பேட்டி முழுமையாகப் படமாக்கப்பட்டது. அப்போது படம் தொடர்பான கேள்விகளே தனுஷிடம் கேட்கப்பட்டன.
சில மாதங்களுக்கு முன்பு, பாடகி சுசித்ராவின் ட்விட்டர் கணக்கில் இருந்து தனுஷ் மற்றும் இதர பிரபலங்களைப் பற்றி பல்வேறு விதமான ட்வீட்கள் வெளியாகின. இதனால் ட்விட்டர் வலைத்தளத்தில் பரபரப்பு ஏற்பட்டது. சுசித்ராவின் ட்விட்டர் கணக்கு ஹேச் செய்யப்பட்டதாகத் தகவல் வெளியானது. பிரபல நடிகர், நடிகைகளின் புகைப்படங்கள், வீடியோக்கள், மின்னஞ்சல்கள் என தனிப்பட்ட தகவல்கள் தொடர்ந்து வெளியிடப்பட்டதால் தமிழ்த் திரையினர் மிகுந்த கவலையடைந்தனர். பிறகு, அத்தகைய புகைப்படங்களும் வீடியோக்களும் அவருடைய ட்விட்டர் கணக்கிலிருந்து அகற்றப்பட்டன. சுசித்ராவின் ட்விட்டர் கணக்கும் நீக்கப்பட்டது. இதனால் சுசித்ராவின் ட்விட்டர் சர்ச்சைகளுக்கு முடிவுகட்டப்பட்டது.