பாலிவுட்டில் இளம் வயது ஹீரோக்கள் தன்னைவிட அதிக வயதான ஹீரோயின்களுடன் ஜோடியாக நடிப்பது புதிதல்ல. கரீனா கபூர் கான் இரண்டு இளம் ஹீரோக்களுடன் நடித்துள்ளார். ஏக் மேன் ஆர் ஈக் துக் மற்றும் கோரி தேரே பியார் மெயின் ஆகிய படங்களில் இம்ரான் கானுடனும் கி & கா படத்தில் அர்ஜுன் கபூருடன் நடித்துள்ளார். ஐஷ்வர்யா ராய் பச்சன் தன்னைவிட இளையவரான ரன்பிர் கபூருடன் ஏ தில் ஹய் முஷ்கிலில் ஜோடியாக நடித்துள்ளார். விஐபி 2 -வி ல் கஜோல் தனுஷுடன் நடித்திருந்தாலும், அவர்கள் அதில் ஜோடியாக நடிக்கவில்லை.
இளைய கதாநாயகருடன் வேலை செய்வது விளையாட்டுத்தனமாக இருக்குமா என்பது பற்றி கஜோலிடம் கேட்ட போது, அவர் சிரித்தபடி பதிலளித்தார், "இது திரைக்கதை சார்ந்த விஷயம். ஒரு படத்தின் கதை அதைக் கோரினால் என்னை விட வயது குறைந்த நடிகருடன் ஜோடியாக நடிப்பதை தவிர்க்க மாட்டேன். இன்றைய திரைப்படங்கள் பல்வேறுவிதமான கதைகளைக் கொண்டிருக்கின்றன, திரைப்பட இயக்குனர்கள் அவற்றை பொறுப்புணர்வுடனும் முதிர்ச்சியுடனும் கையாளுகின்றனர், இது மிக நல்ல விஷயம்’ என்றார் கஜோல்.
இந்தத் தலைமுறை நடிகர்களுள் யாருடன் ஜோடியாக நடிக்க விரும்புகிறீர்கள் என்ற கேள்விக்கு கஜோல் யாரையும் பெயரிடவில்லை என்றாலும் ஒரே ஒரு நிபந்தனையை மட்டும் சொன்னார். 'என்னுடன் ஜோடியாக நடிக்கக் கூடிய நடிகர் சற்று முதிர்ச்சியுடன் மேன்லியாக இருக்க வேண்டும், பாயிஷ்ஷாக அதாவது மிகவும் இளைய தோற்றத்தில் இருக்கக் கூடாது. நான் யாரையும் குறிப்பிட்டுச் சொல்ல மாட்டேன்’ என்றார் கஜோல்.
ஐஸ்வர்யா ராயுடன் ஜோடி போட்டது போல் காஜோலுடன் ரன்வீர் விரைவில் நடிக்கக் கூடும் என்கிறது பாலிவுட் வட்டாரம்.