இயக்குநர் ரஞ்சித்துடன் நடிகர் ரஜினிகாந்த் 2-ஆவது முறையாக இணைந்துள்ள காலா ரிலீஸ் தேதி 7 மணிக்கு அறிவிக்கப்படும் என்று நடிகர் தனுஷ் தெரிவித்துள்ளார்.
'கபாலி' படத்தின் வெற்றியைத் தொடர்ந்து ரஜினி மற்றும் இயக்குநர் பா.ரஞ்சித் கூட்டணியில் உருவாகியுள்ள படம் 'கரிகாலன்' என்கிற 'காலா'. தமிழ், ஹிந்தி, தெலுங்கு என 3 மொழிகளில் இப்படம் வெளியாகிறது.
நடிகர் தனுஷின் வுண்டர்பார் ஃபிலிம்ஸ் நிறுவனம் இத்திரைப்படத்தை தயாரிக்கிறது. சந்தோஷ் நாராயணன் இசையமைத்துள்ளார்.
இத்திரைப்படத்தில் சமுத்திரக்கனி, நானா படேகர், சம்பத், சாயாஜி ஷின்டே, அருள் தாஸ், ஹூமா குரேஷி, திலீபன், அரவிந்த் ஆகாஷ், சுதான்ஷூ பாண்டே, ஈஸ்வரி ராவ், சாக்ஷி அகர்வால் உள்ளிட்டோர் நடித்துள்ளனர்.
அதேபோன்று ரஜினி - ஷங்கர் கூட்டணியில் உருவாகி வரும் 2.O படத்தை லைகா நிறுவனம் தயாரித்து வருகிறது. பட்ஜெட் - ரூ. 400 கோடி. ரஜினிக்கு இணையான கதாபாத்திரத்தில் பாலிவுட் நடிகர் அக்ஷய் குமார் நடித்துள்ளார். கதாநாயகி - ஏமி ஜாக்சன். ஏ.ஆர். ரஹ்மான் இசை அமைத்துள்ளார். 3டி தொழில்நுட்பத்தில் 2.0 படம் உருவாகிவருவதால் இதன் கிராபிக்ஸ் பணிகள் அமெரிக்காவில் தற்போது நடைபெற்று வருகின்றன.
கடந்த தீபாவளியன்று வெளியாகும் என அறிவிக்கப்பட்ட 2.0 படம், அடுத்ததாக ஜனவரி 25 அன்று வெளியாகும் என்று அறிவிக்கப்பட்டது. இதன்பிறகு ஏப்ரல் 14 அன்று வெளியாகும் என ரஜினி அறிவித்தார். எனினும் கிராபிக்ஸ் பணிகள் இன்னமும் முடிவடையாததால் ஏப்ரலில் படம் வெளியாவது சந்தேகம் எனத் தெரிகிறது.
காலா அல்லது 2.0 இரண்டில் எது முதலில் வெளியாகும் என்பது இரு நாள்களில் தெரியவரும் என்று செய்தியாளர்களை சந்தித்த ரஜினி கடந்த 8-ந் தேதி கூறினார்.
இந்நிலையில், காலா திரைப்படத்தின் ரிலீஸ் தேதி குறித்து இரவு 7 மணிக்கு அறிவிக்கப்படும் என்று இத்திரைப்படத்தின் தயாரிப்பாளரும், நடிகருமான தனுஷ் தற்போது ட்வீட் செய்துள்ளார். இச்செய்தி ரஜினி ரசிகர்கள் இடையே பெரும் பரபரப்பை ஏற்படுத்தியுள்ளது.