நம் மண் மீது எனக்கும் பெரிய பொறுப்பு உள்ளது என்று கூறி பிக் பாஸ் ஜூலி விடியோ ஒன்றை வெளியிட்டுள்ளார்.
ஜல்லிக்கட்டுப் போராட்டத்தில் பங்கேற்று, கோஷங்கள் மூலம் அரசியல்வாதிகளை விமரிசனம் செய்து புகழ்பெற்றவரான ஜூலி, விஜய் தொலைக்காட்சியில் ஒளிபரப்பான பிக் பாஸ் நிகழ்ச்சியில், போட்டியாளராகக் களமிறங்கினார். அந்த நிகழ்ச்சியில் திடீரென நடிகை ஓவியாவுக்கும் ஜூலிக்கும் இடையே கருத்து மோதல் உண்டானதால் ரசிகர்களின் ஆதரவை இழந்த ஜூலி, பிறகு போட்டியிலிருந்து வெளியேற்றப்பட்டார். இதன்பிறகு கடந்த செப்டம்பர் மாதம், செவிலியர் போராட்டத்தில் கலந்துகொள்ள வந்த ஜூலிக்கு காவல்துறையினர் அனுமதி மறுத்தார்கள். நானும் ஒரு செவிலியர்தான். என்னையும் இந்தப் போராட்டத்தில் பங்கேற்க அனுமதியுங்கள் என்கிற ஜூலியின் கோரிக்கையை காவல்துறையினர் நிராகரித்ததால் ஜூலி ஏமாற்றத்துடன் திரும்பிச் சென்றார்.
மருத்துவப் படிப்பில் சேர முடியாமல் போனதற்காக கடந்த வருடம் தற்கொலை செய்துகொண்ட மாணவி அனிதாவின் வாழ்க்கை திரைப்படமாகிறது. அனிதா வேடத்தில் ஜூலி நடிக்கவுள்ளார். Dr.S. அனிதா MBBS என இப்படத்துக்குப் பெயரிடப்பட்டுள்ளது. உத்தமி என்கிற படத்தில் நடித்து வரும் ஜூலி கதாநாயகியாக நடிக்கும் 2-வது படமிது.
இந்நிலையில் தன்னுடைய ட்விட்டர் தளத்தில் புதிய விடியோ ஒன்றை வெளியிட்டுள்ளார் ஜூலி. அதில் அவர் கூறியதாவது:
(டம்ளரிலிருந்த ஏதோவொன்றை அருந்தியபடி) எக்கச்சக்கமான அரசியல் மாற்றங்கள் தமிழ்நாட்டில் நடந்துகொண்டுதான் உள்ளது. நம் விவசாயிகளுக்கான வாழ்வாதாரம், நீட் தேர்வுக்கான எதிர்ப்புகள், காவிரிக்கான தேவைகள் என்று நிறைய உள்ளன.
இந்த நிலைமையில் நம் மண் மீது எனக்கும் பெரிய பொறுப்பு உள்ளது. என்னுடைய மக்களுக்காக நான் என்ன செய்யப் போகிறேன்?
(டம்ளரிலிருந்த ஏதோவொன்றை மீண்டும் அருந்துகிறார். தலையைக் கோதியபடி...) தொடரப்போகிறேன்....
என்று, தான் அடுத்துச் சொன்ன வார்த்தையின் ஒலியை நீக்கி விடியோவை வெளியிட்டுள்ளார்.
ஜூலி உண்மையிலேயே போராட்டம் ஒன்றில் களமிறங்கப்போகிறாரா அல்லது படம், தொலைக்காட்சி நிகழ்ச்சிகளுக்கான விளம்பரத்துக்காக இப்படிச் செய்கிறாரா என்கிற கேள்விகள் இந்த விடியோவைக் காணும்போது எழுகின்றன. எனினும் ஜூலியின் இந்த அறிவிப்புக்கு எதிர்வினையாற்றிய பலரும் ஜூலியை விமரிசனம் செய்து கருத்துகளைப் பதிவு செய்துள்ளார்கள்.