லிங்குசாமி இயக்கத்தில் கார்த்தி, தமன்னா நடித்து வரும் "பையா' படத்தையடுத்து பாலாஜி சக்திவேல் இயக்கும் "வழக்கு எண் 18/7' படத்தை தயாரிக்கிறது லிங்குசாமியின் திருப்பதி பிரதர்ஸ் நிறுவனம்.
இதையடுத்து அந்த நிறுவனம் தயாரிக்கும் படத்தை பூபதி பாண்டியன் இயக்குகிறார். இதில் சிம்பு நாயகனாக நடிக்கிறார். சிம்புவின் ஜோடியாக நடிக்க அனுஷ்காவிடம் பேச்சுவார்த்தை நடக்கிறது.
விஜய்யின் "வேட்டைக்கார'னை முடித்துவிட்ட அனுஷ்கா சிம்புவுடன் ஜோடி சேர வாய்ப்பிருக்கிறது. இதற்கிடையே "விண்ணைத் தாண்டி வருவாயா' படத்தை முடித்து விட்டு "வாலிபன்' படத்தை இயக்கி நடிக்க ஆயத்தமாகி வருகிறார் சிம்பு.
"வாலிபன்' படத்தில் தமிழ் திரையுலகின் முன்னணி நாயகர்களின் வாரிசுகளில் ஒருவர் சிம்புவின் ஜோடியாக நடிக்க வாய்ப்பிருக்கிறது. இதற்கான இறுதிக் கட்ட பேச்சுவார்த்தை நடந்து வருகிறது. வாலிபனுக்கு யுவன் ஷங்கர்ராஜா இசையமைக்கிறார்.