ஆயுர்வேத மருத்துவத்தை உலக அளவில் ஊக்குவிப்பதற்காக, இந்தியாவுடன் இணைந்து பணியாற்ற சர்வதேச மருத்துவ ஆராய்ச்சியாளர்கள் உறுதிபூண்டுள்ளனர்.
ஆயுர்வேத மருத்துவம் தொடர்பான 2 நாள் சர்வதேச மாநாடு, லண்டனில் கடந்த 1, 2-ஆம் தேதிகளில் நடைபெற்றது. 55 நாடுகளைச் சேர்ந்த அறிவியல் ஆராய்ச்சியாளர்கள், மருத்துவர்கள் பங்கேற்ற இக்கூட்டத்தில் நிறைவேற்றப்பட்ட 9 அம்ச தீர்மானம் குறித்து, மாநாட்டு ஏற்பாட்டாளர்கள் செவ்வாய்க்கிழமை கூறியதாவது:
பல்வேறு நோய்களையும் தீர்க்கக் கூடிய புனிதமான ஆயுர்வேத மருத்துவத்தை, உலக அளவில் ஊக்குவிப்பதற்காக இந்தியாவுடன் இணைந்து பணியாற்றுவது என்று முடிவு செய்யப்பட்டுள்ளது. இந்திய அரசின் ஆயுஷ் துறை மற்றும் பல்வேறு நாடுகளில் உள்ள இந்திய தூதரகங்களுடன் இணைந்து, ஒவ்வொரு நாட்டுக்கும் தனிப்பட்ட ஆயுர்வேத மருத்துவத் திட்டத்தை உருவாக்க தீர்மானித்துள்ளோம். மேலும், ஆயுர்வேத மருத்துவத்தின் தரத்தை பராமரிப்பதற்காக சர்வதேச தர வாரியத்தையும், சர்வதேச ஆயுர்வேத கூட்டமைப்பையும் அமைக்க வேண்டும்.
ஒவ்வொரு நாட்டிலும் உள்ள கல்லூரிகள் மற்றும் பல்கலைக்கழகங்களில் ஆயுர்வேதம் குறித்த பாடங்களை அறிமுகப்படுத்துவதற்காக அந்த நாடுகளுடன் இணைந்து நடவடிக்கை மேற்கொள்ள வேண்டும் என்பன உள்ளிட்ட கோரிக்கைகளும் அந்த தீர்மானத்தில் உள்ளன.
மாநாட்டின்போது, நீரிழிவு நோய், இதயம், மூளை சம்பந்தப்பட்ட நோய்களுக்கு ஆயுர்வேத சிகிச்சை மூலம் தீர்வு கிடைப்பது குறித்து ஆதாரங்களுடன் விளக்கப்பட்டது என்று அவர்கள் தெரிவித்தனர். அலோபதி மருத்துவம் போலின்றி, எந்த பக்கவிளைவையும் ஏற்படுத்தாத ஆயுர்வேத மருத்துவம், உலக அளவில் பிரபலமாகத் தொடங்கியுள்ளது. பிரிட்டன் நாட்டு தேசிய சுகாதார சேவைத் திட்டத்தில் ஆயுர்வேதத்தையும் சேர்ப்பது தொடர்பாக அந்நாட்டு நாடாளுமன்றத்தில் கடந்த ஆண்டு தீர்மானம் தாக்கல் செய்யப்பட்டது. அந்தத் தீர்மானத்துக்கு தற்போது 30 உறுப்பினர்களின் ஆதரவு உள்ளது.
இதேபோல, பிரேஸில் நாட்டு பொது சுகாதார மையங்களில் ஆயுர்வேத சிகிச்சை கிடைக்க வகை செய்யும் சட்டம் கடந்த வாரம் நிறைவேற்றப்பட்டது.