ஓமந்தூரார் மருத்துவமனையில் முதன்முறையாக இதய மாற்று அறுவைச் சிகிச்சை

ஓமந்தூரார் பல்நோக்கு சிறப்பு மருத்துவமனையில் முதன்முறையாக இதய மாற்று அறுவைச்சிகிச்சை செய்யப்பட்டுள்ளது.
ஈரோடு மாவட்டம் கோபிச்செட்டிப்பாளையத்தைச் சேர்ந்த ஜெயாம்மாள் (46)
இதயத்தில் பாதிப்பு ஏற்பட்டு கடந்த டிசம்பர் மாதம் சென்னை ஓமந்தூரார் பல்நோக்கு மருத்துவமனையில் அனுமதிக்கப்பட்டார். அவருக்கு சென்னையில் உள்ள தனியார் மருத்துவமனை நோயாளியிடம் இருந்து தானமாகப் பெற்ற இருதயம் பொருத்தப்பட்டுள்ளது. கடந்த ஏப்ரல் 4-ஆம் தேதி இந்த அறுவைச் சிகிச்சை வெற்றிகரமாக செய்யப்பட்டது.
இது தொடர்பாக இதய அறுவைச் சிகிச்சைத் துறையின் பேராசிரியர் பி.அமிர்தராஜ் சென்னையில் செய்தியாளர்களிடம் திங்கள்கிழமை கூறியதாவது:
சாதாரணமாக இதயம் ரத்தத்தை உந்தித் தள்ளுவது 60 சதவீதமாகும். ஆனால் ஜெயாம்மாளுக்கு 20 சதவீதத்துக்கும் குறைவாகவே காணப்பட்டது. அதனால் அவருக்கு மூச்சு விடுதிலும் பிரச்னை ஏற்பட்டது. இதனால் பொருத்தமான இதயம் கிடைக்கும் வரை மருந்துகளே வழங்கப்பட்டு வந்தது. இரண்டு முறை தானம் பெற்ற இருதயத்தை அறுவடை செய்ய முற்பட்டு தோல்வி ஏற்பட்டது. அதன் பின்பு சென்னை தனியார் மருத்துவமனை தானமாகப் பெற்ற இதயத்தை 6 மருத்துவ நிபுணர்கள் 6 மணி நேரம் அறுவைச் சிகிச்சை செய்து பொருத்தினோம் என்றார்.
மருத்துவக் கல்வி இயக்குநர் (பொறுப்பு) டாக்டர் நாராயண பாபு கூறுகையில், ஓமந்தூரார் பல்நோக்கு சிறப்பு மருத்துவமனைக்கு இருதயம் மற்றும் நுரையீரல் மாற்று அறுவைச் சிகிச்சை செய்வதற்கு அங்கீகாரம் உள்ளது. விரைவில் நுரையீரல் மாற்று அறுவைச் சிகிச்சையும் நடைபெறும். தனியார் மருத்துவமனையில் ரூ.30 லட்சம் செலவில் செய்யப்படும் அறுவைச் சிகிச்சை முதல்வரின் விரிவான காப்பீட்டுத் திட்டத்தின் கீழ் இலவசமாக செய்யப்பட்டுள்ளது.
அறுவைச் சிகிச்சைக்குப் பின்பு மாதம் ரூ.20 ஆயிரம் மதிப்புள்ள நோய் எதிர்ப்பு சக்திக்கான மருந்துகளும் இலவசமாக வழங்கப்படும் என்றார்.
ஓமந்தூரார் மருத்துவமனை இதய அறுவைச் சிகிச்சை மேற்கொள்ளும் இரண்டாவது அரசு மருத்துவமனையாகும். சென்னை ராஜீவ்காந்தி பொது மருத்துவமனையில் இதுவரை 5 இதய மாற்று அறுவைச் சிகிச்சைகள் மேற்கொள்ளப்பட்டுள்ளன. ஓமந்தூரார் மருத்துவமனையில் தற்போது 4 நோயாளிகள் இதய மாற்று அறுவைச் சிகிச்சைக்கான பட்டியலில் காத்திருக்கின்றனர்.