இந்தியாவின் மிகவும் அதிக எடை கொண்ட ஜிசாட்-19 தகவல் தொடர்பு செயற்கைக்கோளைச் சுமந்தபடி ஜிஎஸ்எல்வி மார்க்-3 ராக்கெட் விரைவில் விண்ணில் செலுத்தப்பட உள்ளது.
இந்திய விண்வெளி தொழில்நுட்பத்தில் மிகப்பெரிய மாற்றத்தை ஏற்படுத்தக் கூடியதாக ஜிஎஸ்எல்வி மார்க்-3 ராக்கெட் கருதப்படுகிறது. இதன் மூலம், எந்த வெளிநாட்டையும் சார்ந்திருக்காமல், மிகப்பெரிய செயற்கைக்கோள்களை நம்மால் ஏவ முடியும்.
இந்த ராக்கெட் மூலம் 4 டன் (4,000 கிலோ) எடை வரை உள்ள செயற்கைக்கோள்களை விண்ணில் செலுத்த முடியும். இது தற்போதைய ஜிஎஸ்எல்வி மார்க்-2 ராக்கெட் சுமக்கக் கூடிய எடையை விட இரண்டு மடங்கு அதிகமாகும்.
தற்போது 2 டன்னுக்கும் கூடுதலான எடை கொண்ட செயற்கைக்கோள்களை அனுப்பக் கூடிய ராக்கெட்டுகள் இந்தியாவிடம் இல்லை. எனவே, அத்தகைய செயற்கைக்கோள்களை ஐரோப்பிய ராக்கெட்டுகள் மூலம்தான் நம் நாடு விண்ணில் செலுத்தி வருகிறது.
இந்நிலையில், ஜிஎஸ்எல்வி மார்க்-3 ராக்கெட் மூலம் அதிக எடை கொண்ட செயற்கைக்கோள்களை இந்தியாவின் மிகவும் அதிக எடை கொண்ட (3.2 டன்) ஜிசாட்-19 தகவல் தொடர்பு செயற்கைக்கோளைச் சுமந்தபடி ஜிஎஸ்எல்வி மார்க்-3 ராக்கெட் விரைவில் விண்ணில் செலுத்தப்பட உள்ளது. அதற்கான பணிகள் முழுவீச்சில் நடைபெற்று வருவதாகவும், அந்த ராக்கெட்டுடன் கிரையோஜெனிக் என்ஜின் ஒருங்கிணைக்கப்பட்டு வருவதாகவும் விக்ரம் சாராபாய் விண்வெளி ஆய்வு மைத்தின் இயக்குநர் கே.சிவன், திருவனந்தபுரத்தில் செய்தியாளர்களிடம் வெள்ளிக்கிழமை தெரிவித்தார். அவர் மேலும் கூறியதாவது:
இன்னும் ஒரு வார காலத்துக்குள் ஜிஎஸ்எல்வி மார்க்-3 ராக்கெட்டுடன் ஜிசாட்-19 செயற்கைக்கோளை நாங்கள் இணைத்து விடுவோம். இந்தச் செயற்கைக்கோளை ஜூன் மாதத்தின் முதல் வாரத்தில் விண்ணில் செலுத்த தீர்மானித்துள்ளோம்.
எனினும், அதற்கான தேதி முடிவு செய்யப்படவில்லை. இந்தச் செயற்கைக்கோள், அதைச் செலுத்த உள்ள ராக்கெட் ஆகிய இரண்டுமே அதிநவீனமானவை என்றார் அவர்.