ஆந்திரத்துக்கு சிறப்பு அந்தஸ்து அளிக்கக்கோரும் விவகாரத்தை, நாடாளுமன்றத்தில் தெலுங்கு தேசம் கட்சி (டிடிபி) எம்.பி.க்கள் தீவிரமாக எழுப்பி வருகின்றனர். சிறப்பு அந்தஸ்து அளிக்கக்கோரும் கோரிக்கை குறித்தும், வருவாய் பற்றாக்குறை ஆந்திரத்துக்கு கொடுத்த வாக்குறுதிகளை மத்திய அரசு நிறைவேற்றுவது தொடர்பாகவும் அக்கட்சி எம்.பி-க்கள் தொடர் அமளியில் ஈடுபட்டு வருகின்றனர்.மேலும், அக்கட்சியைச் சேர்ந்த அசோக் கஜபதி ராஜு, ஒய்.எஸ். செளதரி ஆகியோர் மத்திய அமைச்சரவையில் இருந்து ராஜிநாமா செய்தனர்.
அதுமட்டுமல்லாமல் கூட்டணி கட்சியான தங்கள் கட்சியின் உறுப்பினர்களை சந்திக்க மறுத்த மத்திய அமைச்சர் பியூஷ் கோயல், ஒய்எஸ்ஆர் கட்சி உறுப்பினர்களைச் சந்தித்தார். இவ்விவகாரம் ஆந்திர முதல்வர் சந்திரபாபு நாயுடுவுக்கு மேலும் அதிர்ச்சியை ஏற்படுத்தியது. எனவே பாஜகவுடன் யார் கூட்டணியில் உள்ளனர் என்பதை அக்கட்சி தெளிவுபடுத்த வேண்டும் என்றும் காட்டமாக விமர்சித்து, தனக்கு ஆந்திர மக்களின் நலன்தான் முக்கியம் என்று கூறினார்.
இந்நிலையில், ஆந்திராவுக்கு சிறப்பு அந்தஸ்து வழங்க மறுக்கும் மத்திய அரசைக் கண்டித்து நாடாளுமன்றத்தில் வெள்ளிக்கிழமை நம்பிக்கையில்லா தீர்மானம் கொண்டு வர ஒய்எஸ்ஆர் காங்கிரஸ் தலைவர் ஜெகன்மோகன் ரெட்டி முடிவு செய்துள்ளார்.
மேலும் இந்த தீர்மானத்துக்கு ஆதரவு அளிக்க வேண்டி காங்கிரஸ் கட்சியின் மல்லிகார்ஜுன கார்கே, மார்க்சிஸ்ட் கம்யூனிஸ்ட் கட்சியின் சீதாராம் யெச்சூரி போன்ற முக்கியத் தலைவர்களைச் சந்தித்து ஒய்எஸ்ஆர் உறுப்பினர் யூ.வி.சுப்பா ரெட்டி ஆதரவு திரட்டினார். இதையடுத்தும் மத்திய அரசு ஆந்திர மாநிலத்தை புறக்கணித்தால் ஒய்எஸ்ஆர் காங்கிரஸ் கட்சி எம்.பி-க்கள் வருகிற ஏப்ரல் 6-ந் தேதி ராஜிநாமா செய்வார்கள் என்றும் ஜெகன்மோகன் ரெட்டி தெரிவித்துள்ளார்.