செல்லுலாய்ட் சிறகுகள்

ஏதாவது ஒரு விதத்தில் பரபரப்பாக கவனிக்கப்பட்ட படங்களைப் பற்றி பேசலாம். தடை செய்ய முயன்ற படங்கள், மிரட்டல்களைச் சந்தித்த படங்கள், விருதுகள் வாங்கிய படங்கள் என்று வகைதொகை இல்லாமல் பேசலாம். ஹாலிவுட், டோலிவுட், மாலிவுட் என்ற எந்த வரையறையும் இல்லை. கமர்ஷியல் படம், உலகப் படம், கலைப் படம் என்கிற பாகுபாடுகளும் இல்லை. கேமராவை அந்தக் கோணத்தில் வைத்திருக்க வேண்டும், அந்த மூன்றாவது காட்சியில் பியானோவின் ஒலி குறைவாக இருந்திருக்க வேண்டும் என்கிற டெக்னிக்கல் சமாசாரங்களும் இல்லை. நாயகன் அணிந்திருந்த சட்டை ஒரு குறியீடு, தேநீர்க் குடுவையின் நிறம் ஒரு குறியீடு என்கிற பயமூட்டும் விவகாரங்கள் இல்லை. ‘இந்தப் படத்தை பார்த்தேன்... இதில் இருந்து என்ன புரிந்துகொண்டேன்...’ என்று திண்ணையில் உட்கார்ந்து பக்கத்து வீட்டு நண்பனிடம் உரையாடுவது போன்ற தொனியில் இந்தக் கட்டுரைகள் இருக்கும். அதுதான் நோக்கம். முக்கியமான படங்கள் என விவாதிக்கப்படுகிற படங்களைப் பற்றி தமிழில் ஒரு குறுக்குவெட்டுப் பார்வை. அதுதான் திட்டம்.

வா.மணிகண்டன்

வா.மணிகண்டன்

ஈரோடு மாவட்டம் கோபிசெட்டிப்பாளையத்துக்கு அருகில் இருக்கும் கரட்டடிபாளையம் என்ற சிற்றூரில் பிறந்தவர் வா.மணிகண்டன். தனது பள்ளிப்படிப்பை கோபிசெட்டிப்பாளையம் வைரவிழா மேல்நிலைப்பள்ளியில் முடித்துவிட்டு, இளநிலைப் பொறியியல் படிப்பை (பி.ஈ) சேலம் சோனா தொழில்நுட்பக் கல்லூரியிலும், முதுநிலைப் படிப்பை (எம்.டெக்) வேலூர் பல்கலைக் கழகத்திலும் முடித்தவர். கட்டுரைகள், சிறுகதைகள், கவிதை என எழுதிக்கொண்டிருக்கும் இவர் இதுவரை, இரண்டு கவிதை நூல்கள், ஒரு சிறுகதைத் தொகுப்பு, இரண்டு கட்டுரைத் தொகுப்புகள் என ஐந்து புத்தகங்களை எழுதியுள்ளார். பெங்களூரில் இருக்கும் பன்னாட்டு நிறுவனத்தில் மென்பொருள் ஆலோசகராகத் தற்போது பணியாற்றி வரும் மணிகண்டன், www.nisaptham.com என்கிற அவரது வலைத்தளத்துக்காக 2013-ம் ஆண்டின் சுஜாதா இணைய விருதைப் பெற்றவர். எழுத்து தவிர தனது நிசப்தம் அறக்கட்டளை மூலம் மருத்துவம் மற்றும் கல்வி உதவிகளைச் செய்து வருவதோடு, கல்வி ஆலோசகராகவும் செயல்பட்டு வருகிறார்.

  • அதிகம்
    படிக்கப்பட்டவை
  • அதிகம் இ-மெயில் செய்யப்பட்டவை