அரசு கல்லூரியாக அறிவிக்கப்பட உள்ள ராஜா முத்தையா மருத்துவக் கல்லூரி மாணவர்களுக்கு கட்டணக் குறைப்பு இருக்குமா? 

சிதம்பரம் அண்ணாமலைப் பல்கலைக்கழகத்தின் ஓர் அங்கமாக செயல்பட்டு வரும் இராஜா முத்தையா மருத்துவக் கல்லூரி, பல் மருத்துவக்
அரசு கல்லூரியாக அறிவிக்கப்பட உள்ள ராஜா முத்தையா மருத்துவக் கல்லூரி மாணவர்களுக்கு கட்டணக் குறைப்பு இருக்குமா? 

சென்னை: சிதம்பரம் அண்ணாமலைப் பல்கலைக்கழகத்தின் ஓர் அங்கமாக செயல்பட்டு வரும் இராஜா முத்தையா மருத்துவக் கல்லூரி, பல் மருத்துவக் கல்லூரி ஆகியவற்றை அரசு கல்லூரிகளாக அறிவிக்க தமிழக அரசு திட்டமிட்டிருக்கிறது. தமிழக அரசின் இந்த திட்டம் சரியானது என்பதில் ஐயமில்லை. ஆனால், நிர்வாக மாற்றம் மட்டுமின்றி கட்டண மாற்றமும் செய்தால் தான் இந்நடவடிக்கை பயனுள்ளதாக அமையும் என ராமதாஸ் தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில், சிதம்பரம் அண்ணாமலைப் பல்கலைக்கழகம் கடந்த 2013-ஆம் ஆண்டு அரசுடைமையாக்கப்பட்ட போதிலும், அதன் முழுமையான பயன்கள் இன்னும் மாணவர்களுக்குக் கிடைக்கவில்லை. பல்கலைக்கழகத்தின் அங்கமாக திகழும் இராஜா முத்தையா மருத்துவக் கல்லூரி, இராஜா முத்தையா பல் மருத்துவக் கல்லூரி ஆகியவை பெயரளவில் அரசுடமையாக்கப் பட்டாலும் அண்ணாமலைப் பல்கலைக்கழகம் தனியாரின் கைகளில் இருந்த போது வசூலிக்கப்பட்ட கட்டணம் தான் தொடர்ந்து வசூலிக்கப்பட்டு வருகிறது. மாணவர்களின் நலனுக்கு எதிரான இக்கட்டண முறையை நீக்கிவிட்டு, அரசு கல்லூரிகளில் வசூலிக்கப்படும் அதே கட்டணத்தை வசூலிக்க நடவடிக்கை எடுக்க வேண்டும் என பாமக சார்பில் வலியுறுத்தப்பட்ட நிலையில், இப்படி ஒரு முடிவு எடுக்கப்பட்டுள்ளது.

இராஜா முத்தையா மருத்துவக் கல்லூரியும், பல் மருத்துவக் கல்லூரியும் அண்ணாமலைப் பல்கலைக் கழகத்தின் நிர்வாக கட்டுப்பாட்டிலிருந்து தமிழ்நாடு எம்.ஜி.ஆர் மருத்துவப் பல்கலைக்கழக நிர்வாகத்திற்கு மாறுவது மாணவர்களுக்கு பல வழிகளில் வசதியாக இருக்கும். அதேநேரத்தில் இந்த நடவடிக்கையால் இக்கல்லூரி மாணவர்களுக்கு கட்டணக் குறைப்பு இருக்குமா? என்பது தான் மில்லியன் டாலர் கேள்வி.

இராஜா முத்தையா மருத்துவக் கல்லூரி, பல் மருத்துவக் கல்லூரி ஆகியவற்றை நேரடியாக தமிழக அரசின் கட்டுப்பாட்டிற்குள் கொண்டு வந்து, தமிழ்நாடு எம்.ஜி.ஆர். மருத்துவப் பல்கலைக்கழகத்துடன் இணைக்க வேண்டும். அரசு மருத்துவக் கல்லூரிகளுக்கு இணையாக இந்த இரு கல்லூரிகளின் கல்விக் கட்டணமும் குறைக்கப்பட வேண்டும்.

ஆனால், இந்த இரு கல்லூரிகளை அண்ணாமலைப் பல்கலைக்கழகத்தின் நிர்வாக கட்டுப்பாட்டிலிருந்து பிரிக்க வேண்டும் என்று தமிழக அரசு திட்டமிடுவதன் நோக்கம் வேறு ஆகும். அண்ணாமலைப் பல்கலைக்கழகத்தின் நிர்வாக செலவுகள் அதிகரித்து விட்ட நிலையில் ஆண்டுக்கு ரூ.250 கோடி பற்றாக்குறை ஏற்படும் நிலையில், மருத்துவக் கல்லூரிகளை தனியாக பிரித்து விட்டால் பல்கலைக்கழக செலவுகளில் ஆண்டுக்கு ரூ.80 கோடி குறையும் என்பதற்காகவே அரசு இவ்வாறு செய்ய நினைக்கிறது.

இராஜா முத்தையா மருத்துவக் கல்லூரியையும், பல் மருத்துவக் கல்லூரியையும் நிர்வாக மாற்றம் செய்வதுடன் தமிழக அரசு நிறுத்திக் கொண்டால் மாணவர்களுக்கு எந்த பயனும் ஏற்படாது. கல்விக் கட்டணங்களைக் குறைக்க வேண்டும் என்பது தான் மாணவர்களின் முக்கியக் கோரிக்கை ஆகும். 

தமிழக அரசின் நேரடிக் கட்டுப்பாட்டில் உள்ள அரசு மருத்துவக் கல்லூரிகளிலும், சிதம்பரம் ராஜா முத்தையா மருத்துவக் கல்லூரியிலும் நீட் தேர்வு மதிப்பெண்களின் அடிப்படையில் ஒற்றைச் சாளர கலந்தாய்வு மூலம் தான் மாணவர் சேர்க்கை நடத்தப்படுகிறது. ஆனால், இளநிலை மருத்துவப் படிப்புக்கு ஆண்டுக் கட்டணமாக அரசு கல்லூரிகளில் 13,600 ரூபாய் மட்டுமே வசூலிக்கப்படும் நிலையில், ராஜா முத்தையா மருத்துவக் கல்லூரியில் ரூ 5 லட்சத்து 54 ஆயிரம் வசூலிக்கப்படுகிறது. 

அதேபோல், இளநிலை பல் மருத்துவம், முதுநிலை மருத்துவப் பட்டப் படிப்பு, முதுநிலை மருத்துவப் பட்டயப் படிப்பு ஆகியவற்றுக்கு அரசு மருத்துவக் கல்லூரிகளில் முறையே ரூ.11,600, ரூ. 42,025, ரூ.31,325 மட்டுமே வசூலிக்கப்படும் நிலையில், ராஜா முத்தையா மருத்துவக் கல்லூரியில் இப்படிப்புகளுக்கு முறையே ரூ.3.40 லட்சம், ரூ.9.80 லட்சம், ரூ.8.00 லட்சம் கட்டணமாக வசூலிக்கப் படுகிறது. ஒரே அடிப்படையில் மாணவர் சேர்க்கை நடைபெறும் மருத்துவக் கல்லூரிகளில் வெவ்வேறு கட்டணங்கள் வசூலிக்கப்படுவது முறையல்ல. இதை எந்த வகையிலும் அரசு நியாயப்படுத்த முடியாது.

இராஜா முத்தையா மருத்துவக் கல்லூரி மற்றும் பல் மருத்துவக் கல்லூரி கட்டணத்தைக் குறைப்பது ஒன்றும் சாத்தியமில்லாத விஷயமல்ல. இந்த இரு கல்லூரிகளையும் அண்ணாமலைப் பல்கலைக்கழகத்தில் இருந்து பிரிக்கப்பட்டவையாக பார்க்காமல் கடலூர் மாவட்டத்திற்காக புதிதாக அமைக்கப்பட்டவையாக நினைத்து அவற்றுக்கான தொடர் செலவினங்களுக்கு நிதி ஒதுக்கினால் போதுமானது. இதற்கு முன் தமிழ்நாட்டில் செயல்பட்டு வரும் தொழிலாளர் ஈட்டுறுதிக் கழகத்திற்கு (இ.எஸ்.ஐ) சொந்தமான இரு மருத்துவக் கல்லூரிகளை தமிழக அரசே ஏற்று நடத்துவது தொடர்பாக பிரதமர் நரேந்திர மோடிக்கு 12.03.2015 அன்று அப்போதைய முதல்வர் பன்னீர்செல்வம் எழுதியக் கடிதத்தில் அக்கல்லூரிகளின் தொடர் செலவினங்களை தமிழக அரசே ஏற்றுக் கொள்ளும் என்று கூறியிருந்தார். அதே விதி சிதம்பரம் இராஜா முத்தையா மருத்துவக் கல்லூரி மற்றும் பல் மருத்துவக் கல்லூரிக்கும் பொருந்தும்.

எனவே, சிதம்பரம் இராஜா முத்தையா மருத்துவக் கல்லூரி மற்றும் பல் மருத்துவக் கல்லூரியை தமிழ்நாடு எம்.ஜி.ஆர் மருத்துவப் பல்கலைக்கழகத்தின் நிர்வாக வரம்புக்குள் கொண்டு வரும் போது, அவற்றின் கட்டணங்களையும் அரசு மருத்துவக் கல்லூரிகளின் கட்டணம் அளவுக்கு குறைக்க வேண்டும் என வலியுபறுத்தி உள்ளார்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com