புதுதில்லியை தலைமையிடமாகக் கொண்டு கடந்த 2005 முதல் செயல்பட்டு வருகிறது BLS International நிறுவனம். இதை தொடங்கியவர் திவாகர் அகர்வால்.
பாஸ்போர்ட், விசா, தூதரகம் சார்ந்த சேவைகளை வழங்கி வரும் இந்த நிறுவனம், இந்தியாவில் உள்ள அரசு வாடிக்கையாளர்கள் (Client Governments) மூலம் அதிக அளவிலான ஒப்படைப்புப் பணிகளையும், போர்ச்சுக்கல், கிரேக்கம், ஹங்கேரி ஆகிய நாடுகளில் இருந்து சிறிய அளவிலான வெளிப் பணிகளையும் பெற்று வந்தது.
இந்த நிலையில், கடந்த 2014-இல் இந்த நிறுவனத்தின் இணை மேலாண்மை இயக்குநராகப் பொறுப்பேற்றார் திவாகர் அகர்வாலின் 23 வயது மகன் சிகார் அகர்வால். இவர் தில்லி பல்கலைக்கழகத்தில் வணிகவியல் பட்டம் பெற்று, Indian internship at Grant Thornton-இல் நிர்வாகப் பயிற்சி பெற்றவர். படிக்கும் போதே, தன் குடும்பத் தொழிலை சர்வதேச அளவில் உயர்த்த வேண்டும் என்ற உந்துதல் ஏற்பட, அவ்வாறே அதில் சேர்ந்தவுடன், நிறுவனத்தில் செயல்பாடுகளில் தொடர்ச்சியாகப் பல மாற்றங்களை கொண்டுவந்தார்.
குறிப்பாக, ஆவணங்களைப் பரிசீலிப்பதற்கான நேரத்தை குறைக்கும் வகையில், அவற்றில் பயோமெட்ரிக்ஸ் முறைகளை அறிமுகப்படுத்தியதோடு, இணையதளத்தையும் சீரமைத்தார். பல்வேறு நாடுகளில் இருந்தும் ஊழியர்களைத் தேர்ந்தெடுத்து பணியில் அமர்த்தினார்.
சிகார் அகர்வாலின் தேடல் காரணமாக, BLS நிறுவனத்தின் வருவாய் 4 ஆண்டுகளில் ரூ. 854 கோடியாக உயர்ந்தது. மேலும், இந்த நிறுவனம் 62 நாடுகளில் கால் பதித்துள்ளதோடு, இந்தியாவில் 36 அரசு நிறுவன வாடிக்கையாளர்களையும் பெற்றுள்ளது. மேலும், 2014-2018-க்குள் நிறுவனத்தின் லாபம் ரூ. 105 கோடி என 4 மடங்காக உயர்ந்தது.
தற்போது, 27 வயதாகும் சிகார், முக்கியமான விசா சேவைகளைக் கடந்து, அரசு சேவைகளான குடிமக்களுக்கு பிறப்பு, இறப்பு, திருமண சான்றிதழ், அடையாள அட்டை, வாக்காளர் அட்டை வழங்கும் பணிகளைப் பெற்று செயல்படுத்துவதிலும் கவனம் செலுத்தி வருகிறார்.
இதன் ஒரு பகுதியாக, வசதி படைத்தவர்கள், முதியோர், மாற்றுத் திறனாளிகளின் வசதியை கருத்தில் கொண்டு, நடமாடும் பயோமெட்ரிக்ஸ் சேவையையும் அளித்து வருகிறார். இதன்மூலம், விண்ணப்பதாரர்கள் விசா மையத்திற்கு நேரில் வந்து நாள் கணக்கில் காத்திருக்கும் பிரச்னை தவிர்க்கப்பட்டிருக்கிறது.
விசா பெற விரும்புபவர்கள் அவர்கள் வீட்டிலோ, அலுவலத்திலோ, எங்கே அவர்களுக்கு வசதியோ அங்கே சென்று, விசா விண்ணப்பப் படிவம், தேவையான சான்றுகள், பயோ மெட்ரிக் தகவல்கள் ஆகியவற்றை இந்த நிறுவனத்தினர் சேகரித்துக் கொண்டு வருவார்கள். பிறகு அந்த விசா விண்ணப்பத்தின் நிலையை ஒவ்வொரு ஸ்டேஜிலும் எஸ்எம்எஸ் மூலமாகவோ, இ மெயில் மூலமாகவோ தெரிவிப்பார்கள். எல்லாப் பணிகளும் முடிந்த பிறகு, விண்ணப்பதாரரிடம் இருந்து பெற்றுவந்த பாஸ்போர்ட் கூரியர் மூலமாக அனுப்பி வைக்கப்படும்.
இதன் மூலம் ஒருவர் எங்கேயும் அலையாமல் வீட்டிலிருந்தே விசா பெற முடியும். ஏனென்றால் காத்துக் கிடக்க நேரமின்றி இயந்திரம் போல் ஓடிக் கொண்டிருக்கும் பலருக்கு இந்த நடமாடும் பயொமெட்ரிக்ஸ் சேவை மிகவும் பயனுள்ளதாக இருக்கிறது. பெரிய நிறுவனங்களில் பணியாற்றும் அதிக அளவிலான தொழிலாளர்கள், மாணவர்கள், விளையாட்டு வீரர்கள் மற்றும் கலைக் குழுக்களை இலக்காக வைத்து இந்தச் சேவையைத் தொடங்கியிருக்கிறார் சிகார்.
இந்தியாவிற்கு மட்டுமல்ல, பிற நாடுகளுக்கும் தனது விசா சேவையை விரிவுபடுத்தியிருக்கிறார் சிகார். கடந்த மே மாதத்தில் விசா புதுப்பித்தல் பணிகளுக்காக பிரிட்டன் அரசிடமிருந்து ரூ. 980 கோடிக்கான ஒப்பந்தத்தைப் பெற்றுள்ளது BLS. அதோடு, கடந்த 2016, டிசம்பர் மாதம் ஸ்பெயின் அரசுக்காக உலகம் முழுவதும் விசா சேவை மையங்களை அமைத்து கொடுப்பதற்காக ரூ. 1400 கோடியில் 5 ஆண்டுகளுக்கான ஒப்பந்தத்தைப் பெற்றுள்ளது இந்த நிறுவனம். ஐரோப்பா, ஆசியா மற்றும் மத்திய கிழக்கு நாடுகளிலும் புதிய பணிகளைப் பெறும் பொருட்டு, அங்கும் ஊழியர்களை நியமித்துள்ளார் சிகார் அகர்வால்.
வெளிநாட்டுத் தூதர்களை சந்தித்துப் பேசுவதற்காகவும், தூதரக சேவைப் பணிகளுக்காகவும் இவர் கடந்த 3 ஆண்டுகளில் 25 நாடுகளுக்குப் பயணித்துள்ளார். இவரது கடுமையான உழைப்பால், சர்வதேச ஏலங்களில் பங்கேற்கவும், ஒப்பந்தங்களைப் பெறவும் BLS நிறுவனம் முன்தகுதி பெற்றுள்ளது.
BLS நிறுவனம் தற்போது உலக அளவில் முதல் 3 நிறுவனங்களில் ஒன்றாக உள்ளது. 62 நாடுகளில் 2,325 அலுவலகங்கள், 9 ஆயிரம் ஊழியர்களைக் கொண்டுள்ள இந்த நிறுவனம், இதுவரை 3.1 கோடி விண்ணப்பங்களைக் கையாண்டுள்ளது.
கடினமான மற்றும் அதிநவீன உலக போட்டியை வரவேற்கும் சிகார் அகர்வால், அதை எதிர்கொள்ள விசா சேவை மற்றும் மின் ஆளுகையில் புதிய தொழில்நுட்பங்களைப் பெறுவதற்காக தனது நிறுவனத்தில் முடுக்கும் பிரிவையும் (accelerator division) ஏற்படுத்தியுள்ளார்.