திருச்செந்தூர் கோயிலில் மார்கழி மாத நடைதிறப்பு நேரங்கள் மாற்றம்

திருச்செந்தூர் சுப்பிரமணிய சுவாமி கோயிலில் மார்கழி மாதத்தில் நடைதிறப்பு நேரங்களில் மாற்றம் செய்யப்பட்டுள்ளது.
இதுகுறித்து கோயில் இணை ஆணையர் தா.வரதராஜன் வெளியிட்டுள்ள செய்திக் குறிப்பு:
தமிழ் மாதமான மார்கழி (டிச.16) வெள்ளிக்கிழமை தொடங்கி அடுத்த மாதம் ஜனவரி 13-இல் நிறைவு பெறுகிறது. இந்த மாதத்தில் திருச்செந்தூர் சுப்பிரமணிய சுவாமி கோயில் நடை அதிகாலை 3 மணிக்கு திறக்கப்பட்டு, 3.30 மணிக்கு விஸ்வரூபம், 4 மணிக்கு உதயமார்த்தாண்ட அபிஷேகம், 4.45 மணிக்கு உதயமார்த்தாண்ட தீபாராதனை, 5 மணிக்கு திருப்பள்ளி எழுச்சி, 6-7 மணிக்குள் கால சந்தி தீபாராதனை, 7.30 மணிக்கு உச்சிக்கால அபிஷேகம், 8.45 மணி முதல் 9 மணிக்குள் உச்சிகால தீபாராதனை, மாலை 3.30 மணிக்கு சாயரட்சை தீபாராதனை, மாலை 6 மணிக்கு இராக்கால அபிஷேகம், இரவு 6.45 மணி முதல் 7.00 மணிக்குள் இராக்கால தீபாராதனை, இரவு 7.30 மணிக்கு ஏகாந்த தீபாராதனை, இரவு 8.00-8.30 மணிக்குள் பள்ளியறை தீபாராதனை நடைபெற்று கோயில் நடை திருக்காப்பிடப்படும்.
முக்கிய விழா நாள்களான ஜனவரி 1-ஆம் தேதி ஞாயிற்றுக்கிழமை ஆங்கில வருடப் பிறப்பை முன்னிட்டு, கோயில் அதிகாலை 1 மணிக்கும், ஜனவரி 11ஆம் தேதி ஆருத்ரா தரிசனத்தை முன்னிட்டு கோயில் அதிகாலை 2 மணிக்கும், ஜனவரி 14ஆம் தேதி சனிக்கிழமை பொங்கல் திருநாளை முன்னிட்டு கோயில் நடை அதிகாலை 1 மணிக்கும் திறக்கப்பட்டு தொடர்ந்து பூஜைகள் நடைபெறும் என கூறப்பட்டுள்ளது.