வீரராகவ பெருமாள் கோயிலில் மே 1 முதல் சித்திரை மாத பிரம்மோற்சவம்

திருவள்ளூர் வைத்திய வீரராகவ பெருமாள் கோயிலில் சித்திரை மாத பிரம்மோற்சவம் வரும் மே 1-ஆம் தேதி தொடங்கி, 10-ஆம் தேதி வரை நடைபெறவுள்ளது.
வீரராகவ பெருமாள் கோயிலில் ஆண்டுதோறும் தை, சித்திரை மாதங்களில் பிரம்மோற்சவம் நடைபெறுவது வழக்கம். இந்த ஆண்டு சித்திரை மாத பிரம்மோற்சவம் வரும் 1-ஆம் தேதி கொடியேற்றத்துடன் தொடங்குகிறது.
விழாவையொட்டி, முதலாம் நாள் காலையில், துவஜரோஹனம், தங்க சப்பரம், இரவு சிம்ம வாகன வீதியுலா நடைபெறுகிறது.
இரண்டாம் நாள் காலையில் அம்ச வாகனம், இரவு சூரிய பிரபை வாகன வீதியுலாவும், 3-ஆம் நாள் காலையில் கருட சேவை, இரவு ஹனுமந்த வாகன வீதியுலாவும் நடைபெறுகிறது. 4-ஆம் நாள் காலை
சேஷவாகனம், இரவு சந்திரபிரபை, 5-ஆம் நாள் நாச்சியார் திருக்கோலம், இரவு யாளி வாகன வீதியுலா நடைபெறுகிறது. 6-ஆம் நாள் காலை வெள்ளிச்சப்பரம், வேணுகோபால் திருக்கோலம், 7-ஆம் நாள் காலை முதல் மாலை வரை தேர் திருவிழா நடைபெறுகிறது.
8-ஆம் நாள் காலை திருப்பாதம் சாடி திருமஞ்சனம், இரவு குதிரை வாகனம், 9-ஆம் நாள் காலை தீர்த்தவாரி, ஆல்மேல் பல்லக்கு, இரவு விஜயகோடி விமானம் நிகழ்ச்சி நடைபெறுகிறது.
கடைசி நாளான 10-ஆம் தேதி காலையில் திருமஞ்சனம், இரவில் கண்ணாடி பல்லக்கு ஆகியவற்றுடன் சித்திரை மாத பிரம்மோற்சவம் நிறைவடைகிறது.
விழாவின் இடையே மே 4-ஆம் தேதி முதல் 7-ஆம் தேதி வரை ஸ்ரீராமானுஜர் ஜயந்தி விழாவும், இசை நிகழ்ச்சிகள், ஆன்மிக கண்காட்சி, கலை நிகழ்ச்சிகள் நடைபெறவுள்ளதாக கோயில் நிர்வாகத்தினர் தெரிவித்துள்ளனர்.