ஆற்காடு வட்டம், விளாப்பாக்கம் பேரூராட்சிப் பகுதியில் அமைந்துள்ள பச்சையம்மன் திருக்கோயில் மகா கும்பாபிஷேகம் வரும் திங்கள்கிழமை (மே 29) காலை 9 மணிக்கு மேல் 10.30க்குள் நடைபெறுகிறது. வி.என்.சபாரத்தின சிவாச்சாரியார் கும்பாபிஷேகத்தை நடத்தி வைக்கிறார்.
இதையொட்டி 26ஆம் தேதி வெள்ளிக்கிழமை காலை 6 மணிக்கு அம்மன் கரிக்கோலம் வருதல், 27ஆம் தேதி காலை கணபதி ஹோமம், நவக்கிரக ஹோமம், கோ பூஜையுடன் மகா பூர்ணாஹுதியும், மாலை 5 மணிக்கு வாஸ்து சாந்தி, அங்குரார்ப்பணம், யாகசாலை பூஜைகள் தொடங்குகின்றன.
28-ஆம் தேதி காலை 8 மணிக்கு 2-ஆம் கால யாகசாலை பூஜையும், அன்று மாலை 3 மணிக்கு அம்மன் பிரதிஷ்டையும், மாலை 5 மணிக்கு 3-ஆம் கால யாகபூஜையுடன் அஷ்டபந்தனம் சாத்துதலும் நடைபெறும்.
29-ஆம் தேதி காலை 7 மணிக்கு 4-ஆம் கால யாகபூஜை, நாடி சந்தானம், மகா பூர்ணாஹுதியுடன் தீபாராதனையும், 9 மணிக்கு மேல் பச்சையம்மன் மற்றும் பரிவார மூர்த்திகளுக்கு மகா கும்பாபிஷேகமும் நடைபெறுகிறது. இரவு அலங்கரிக்கப்பட்ட வாகனத்தில் உற்சவர் பச்சையம்மன் திருவீதியுலா நடைபெறுகிறது.
இதற்கான ஏற்பாடுகளை விளாப்பாக்கம் செங்குந்தர் சமுதாயத்தினர் மற்றும் ஊர் பொதுமக்கள் செய்து வருகின்றனர்.