தொட்டில் கட்டிப் போட்டு
குழந்தைக்கு வேடிக்கைக் காட்டி
பாலூட்டி சோறூட்டி
பழம்பெருமைக் கதை பேசி
தாலாட்டுப்பாடியதெல்லாம்
பழங்கதையானதே இன்று.
தொலைக்காட்சிப் பார்த்துக் கொண்டே
தானேஆடும் தூளிகட்டி
இசைத்தட்டில் பாடல்கேட்டுக் கொண்டு
குழந்தையை ஆட்டுவது இன்று.
அம்மா அத்தை பாட்டி
சின்னம்மா பெரியம்மா
அக்காள் என
மாறி மாறி பாட்டுப் பாடி
தாலாட்டியதெல்லாம்
பழங்கதையாய்ப் போனதே இன்று
உறவுகள் மறந்து
வேலைக்காரியின்
பாசமற்றப் பாட்டெல்லாம்
ஒற்றைக் குழந்தைக்குத்
தாலாட்டாய் மாறியது இன்று.
அன்பு கலந்து
பாசம் குழைத்து
நேசம் இணைத்து
கண்டிப்புடன் பாடிய பாடல்கள்
பழங்கதையாய் போனதே இன்று.
புரியாத இசைகள் கூட்டி
தெரியாத பாடல்கள் பாடி
பிடிக்காமலும்
பிடித்தும்
குழந்தைகள் காப்பகம் வழியாக
வளரும் குழந்தைகளுக்கு
இன்றேது தாலாட்டு