இன்று
பாலூட்டத் தயங்கும் பெண்கள்
தாலாட்டுப் பாடி குழந்தை
தொட்டிலை ஆட்டுவார்களா ?!
தாலாட்டும்
செயல் ஒருவிதம்
பாடல்களோ பலவிதம் !
குடிசையில்...
‘குடி குடி கெடுக்கும்’
குடிகார உன் அப்பன்
அறிவுக்கும் எட்டாது
அரசுக்கும் புரியாது !
குடித்துவிட்டு
அம்மா அடிபட்டு
அலறுவதைக் கேட்கும்
முன்னே கண்மணியே
அசந்து கண் உறங்கு !
மாளிகையில்....
பரிசுப் பொருள்
ஸ்மார்ட் போனோடு
தாய் மாமா வருவாரு
சுட்டிப் பையா கைபேசியை
கட்டிப்பிடித்து கண் உறங்கு!
வாட்ஸப்பில்
அழகிய உன் முகம்
உலகமெல்லாம் தெரியும்
அம்மா செல்லமே
அசந்து கண் உறங்கு !
நாட்டில் ...
சுயநலப் பேய்களோ
பணம் பதவி சுகம் காண
நீதி நேர்மை மனிதநேயம்
விரும்பும் மக்களை
தாலாட்டுப் பாடி
தூங்க வைக்கிறார்கள் !