லீவு விட்டவுடன்
அம்மாவோடு சேர்ந்து
நதிக்கரையில் குளிக்கச்சென்றது;
அக்காவோடு சேர்ந்து
துணிகளை சுமந்து
நீரில் மீன்பிடித்து விளையாடியது;
தோழிகளுடன் சேர்ந்து
ஆற்று மணற்பரப்பில்
வீடு கட்டி மகிழ்ந்தது;
திருமணம் ஆனதும்
ஆடியில் தாலிபெருக்க
நீரேயில்லாத,
மணலேயில்லாத,
காவிரி நதிக்கரைக்கு அழைத்துச்சென்றதும் ;
நதிக்கரையின் நினைவலைகள்
என்னுள் ஏதோ நினைவூட்டியது!
பார்! மகளே!
நீ விளையாடிய என்னுள்
இன்று
லாரியின் சக்கரங்கள் விளையாட;
நீரை விட
மண்ணுக்கே விலை உயர்வென
என்னை தோண்டி விற்றனர்!
உன் சந்ததி விளையாட
நான் இருப்பேனா ?
உன் நினைவுகளில் இருந்தால்
நீயே சொல்லிக்கொடு;
காவிரி
நதிக்கரையின் வளம் குறித்து!