ஒவ்வொரு ஆண்டின் ஒவ்வொரு நாளும்
கடந்து சென்றும் பாடம் சொல்லும்
கவனித்து பயணித்தால் வெற்றி நிச்சயம்
கவனம் தவறினால் அனுபவம் நிச்சயம்
வெற்றியை எளிதில் கடந்துவிடு
தோல்வியை மனதில் பதியமிடு.
உங்களால் தான் முடியுமென்பார்
எங்கள் ஆதரவு உங்களுக்கென்பார்
அடிக்கும் காற்று மாறி வீசினால்
நீங்கள் எல்லாம் சுமையென்பார்
பச்சோந்தியின் குணம் நிறைந்த
அரசியல்வாதிகளை மறக்க முடியுமா?
கடவுளை மற மனிதனை நினையென
பெரியார் சொன்னார் மனிதம் போற்றி
மகனைக் கொன்றான் மனுநீதியும்
மாட்டின் துன்பம் போக்கவே
மாட்டுக்காக மனிதனைக் கொன்ற
மத வெறியை மறக்க முடியுமா?
காமராஜரும் கக்கனும் வென்ற
அரசியல் நேர்மை விளைந்த மண்ணில்
ஓட்டுக்குத் துட்டு கொடுத்தால் தான்
வெல்ல முடியும் என்று சொன்ன
2017 ஐ மறக்கத்தான் முடியுமோ?
மறக்க வைப்பாயா 2018ஆம் ஆண்டே?