ஐபிஎல் கிரிக்கெட் போட்டியின் 28-ஆவது ஆட்டத்தில் சன்ரைசர்ஸ் ஹைதராபாத் 11 ரன்கள் வித்தியாசத்தில் ராஜஸ்தான் ராயல்ஸை வீழ்த்தியது. ராஜஸ்தான் மாநிலம் ஜெய்ப்பூரில் ஞாயிற்றுக்கிழமை மாலை நடைபெற்ற ஆட்டத்தில் முதலில் பேட் செய்த ஹைதராபாத் 20 ஓவர்களில் 7 விக்கெட் இழப்புக்கு 151 ரன்கள் எடுத்தது. அடுத்து ஆடிய ராஜஸ்தான், 20 ஓவர்களில் 6 விக்கெட் இழப்புக்கு 140 ரன்களே எடுத்து வீழ்ந்தது. ஹைதராபாத் கேப்டன் கேன் வில்லியம்சன் ஆட்டநாயகன் ஆனார்.
இந்த ஐபிஎல் போட்டியில் ஹைதராபாத் அணியின் பந்துவீச்சாளர்கள் தொடர்ந்து அசத்தி வருகிறார்கள். சன்ரைசர்ஸ் ஹைதராபாத் அணியின் சித்தார்த் கெளல் 8 ஆட்டங்களில் 11 விக்கெட்டுகள் எடுத்து அதிக விக்கெட்டுகள் எடுத்த பந்துவீச்சாளர்களின் பட்டியலில் முதலிடத்தைப் பிடித்துள்ளார்.
கடந்த மூன்று ஆட்டங்களில் சன்ரைசர்ஸின் ஸ்கோர்கள்
118
132/6
151/7
வேறு அணிகளாக இருந்திருந்தால் மூன்று ஆட்டங்களிலும் தோற்றிருக்க வாய்ப்புண்டு. ஆனால் பந்துவீச்சாளர்களின் அசத்தலான பங்களிப்பால் குறைவான ஸ்கோர்களாக இருந்தாலும் வெற்றிபெற்றுள்ளது ஹைதராபாத். இதனால் 8 ஆட்டங்களில் ஆறில் வெற்றி பெற்று 12 புள்ளிகளுடன் முதலிடத்தில் உள்ளது. அடுத்த இடங்களில் சென்னை, பஞ்சாப், கொல்கத்தா ஆகிய அணிகள் உள்ளன.
